គ្រូបង្រៀនវិទ្យាល័យសុខអាននៅខេត្តតាកែវព្រមានធ្វើកូដកម្មមិនបង្រៀន
2015.03.18
លោកគ្រូអ្នកគ្រូវិទ្យាល័យ សុខ អាន ក្ដីទន្ទឹម ក្នុងស្រុកសំរោង ខេត្តតាកែវ គ្រោងធ្វើកូដកម្មមិនបង្រៀនសិស្ស ប្រសិនបើក្រសួងអប់រំ យុវជន និងកីឡា នៅតែពន្យារពេលមិនព្រមបញ្ចេញរបាយការណ៍ស៊ើបអង្កេត ដែលលោកគ្រូអ្នកគ្រូចោទប្រកាន់នាយកសាលានេះអំពីអំពើពុករលួយ។
ក្រុមលោកគ្រូអ្នកគ្រូដែលតវ៉ានោះ បានប្រកាសនៅថ្ងៃទី១៨ មីនា ថា ពួកគាត់ទុកពេលឲ្យមន្ទីរ និងក្រសួងអប់រំ យុវជន និងកីឡា រយៈពេល ៦០ថ្ងៃ ដើម្បីដោះស្រាយបណ្ដឹងរបស់ពួកគាត់ ដែលបានប្ដឹងនាយកសាលាអស់ជាច្រើនខែមកហើយពីអំពើពុករលួយ។ បើមិនដូច្នោះទេ ពួកគាត់នឹងធ្វើកូដកម្មមិនបង្រៀនសិស្ស។
ការប្រកាសនេះ ធ្វើឡើងបន្ទាប់ពីមន្ទីរអប់រំស្រុក និងអភិបាលស្រុកសំរោង បានកោះហៅលោកគ្រូសាលានោះទៅជួបនៅថ្ងៃទី១៨ មីនា ដើម្បីសំណូមពរមិនឲ្យលោកគ្រូអ្នកគ្រូធ្វើកូដកម្ម។
លោកគ្រូ ស្រី ថេង ដែលទើបជួបប្រជុំជាមួយលោកអភិបាលស្រុក និងលោកប្រធានមន្ទីរអប់រំ យុវជន និងកីឡា ស្រុកសំរោង នៅថ្ងៃទី១៨ មីនា បញ្ជាក់ថា លោកយល់ព្រមតាមសំណូមពរនោះ ប្រសិនបើក្រសួងអប់រំ យុវជន និងកីឡា អាចដោះស្រាយវិវាទនេះបានក្នុងរយៈពេល ២ខែខាងមុខទៀត៖ «អត់មានគំរាមអីទេ គេសំណូមពរខ្ញុំហ្នឹងថាឲ្យជួយជំរុញលោកគ្រូអ្នកគ្រូយើងហ្នឹងចូលធ្វើការឲ្យបានទៀងទាត់ ដើម្បីកូនចៅយើងទាំងអស់គ្នា ហើយខ្ញុំក៏បានទទួលស្គាល់ដែរថា សំណូមពរនេះជាសំណូមពរល្អមួយដែរ ដើម្បីកូនចៅយើងទាំងអស់គ្នា។ ប៉ុន្តែខ្ញុំគ្រាន់ថាខ្ញុំទទួលយកបានក្នុងអំឡុងរយៈពេល ៦០ថ្ងៃ បើលើសពី ៦០ថ្ងៃហ្នឹង ដំណោះស្រាយឲ្យលោកគ្រូអ្នកគ្រូយើងក្នុងអង្គភាពវិទ្យាល័យ សុខ អាន ក្ដីទន្ទឹម ទទួលយកមិនបាន ខ្ញុំនឹងសុំធ្វើកូដកម្ម ហើយបើដោះស្រាយហើយទទួលយកអត់បានទៀត ពួកលោកគ្រូអ្នកគ្រូយើងខ្ញុំទាំងអស់គ្នាហ្នឹង សុំតវ៉ាដល់នាយករដ្ឋមន្ត្រីហ្មង»។
កន្លងមក លោកគ្រូអ្នកគ្រូវិទ្យាល័យ សុខ អាន ក្ដីទន្ទឹម បានប្ដឹងតវ៉ាអំពីការដឹកនាំរបស់លោកនាយកសាលានេះ ថាមានបក្ខពួកនិយម និងមានអំពើពុករលួយក្នុងការចំណាយប្រាក់ទ្រទ្រង់សាលាចំនួន ៣០លានរៀល គ្មានតម្លាភាព ដែលការចោទប្រកាន់នេះត្រូវបាននាយកសាលា លោក ឡុង អិត បដិសេធ។
បន្ទាប់មកនៅពាក់កណ្ដាលខែកុម្ភៈ ឆ្នាំ២០១៥ ក្រុមអធិការកិច្ចរបស់ក្រសួងអប់រំ យុវជន និងកីឡា បានចុះស៊ើបអង្កេតដល់សាលានេះរយៈពេលពីរថ្ងៃ ដែលក្នុងនោះក្រុមអធិការកិច្ចដែលមាន លោក ជ័យ សារិន លោក សុខ សុខា និងមន្ត្រីមួយរូបទៀត បានចុះជួបសាកសួរមន្ត្រីមន្ទីរអប់រំស្រុកសំរោង ដែរ។ ក៏ប៉ុន្តែ លោកគ្រូអ្នកគ្រូត្អូញត្អែរថា រហូតមកទល់ពេលនេះ ក្រុមអធិការកិច្ចមិនបានផ្ដល់ដំណឹងអំពីលទ្ធផលនៃការស៊ើបអង្កេតនោះសោះ។ លោកគ្រូអ្នកគ្រូបន្ថែមថា ពេលពួកគាត់ទាក់ទងសាកសួរអំពីដំណឹងនេះតាមទូរស័ព្ទម្ដងៗ មន្ត្រីដែលចុះអង្កេតនោះឆ្លើយថាជាប់រវល់ជាប់ប្រជុំរហូត។
ដោយឡែកនៅថ្ងៃទី១៨ មីនា វិទ្យុអាស៊ីសេរី បានព្យាយាមទាក់ទង លោក ជ័យ សារិន ជាមន្ត្រីមួយរូបក្នុងចំណោមមន្ត្រីស៊ើបអង្កេតដទៃទៀត ដើម្បីសុំព័ត៌មានបន្ថែមអំពីលទ្ធផលនៃការស៊ើបអង្កេតនេះ តែលោកបដិសេធ។
ចំណែកអ្នកនាំពាក្យក្រសួងអប់រំ យុវជន និងកីឡា លោក រស់ សាលីន បញ្ជាក់ថា ក្រសួងកំពុងធ្វើការលើរឿងនេះយ៉ាងប្រុងប្រយ័ត្ន៖ «ក្នុងករណីនេះ គឺថាសម្រេចនានារបស់ក្រសួងក្នុងអធិករកើតឡើងអ៊ីចឹង គឺយើងមិនអាចសម្រេចភ្លាមៗបានទេ ព្រោះរាល់ពាក្យបណ្ដឹងទាំងឡាយ គឺមានការចុះសង្កេតមើលការជាក់ស្ដែង តើរឿងហ្នឹងមានបញ្ហាអ្វី មកពីបញ្ហាអភិបាលកិច្ចនៅក្នុងហ្នឹងមិនល្អ មកពីការគោរពតាមសេចក្ដីណែនាំមិនត្រូវ ឬមួយក៏ការងារអនុវត្តការងាររដ្ឋបាល ការអនុវត្តការងារកម្មវិធី ការអនុវត្តការងារផ្សេងៗមានបញ្ហា ឬយ៉ាងណា ហើយបានយើងយកព័ត៌មានទាំងអស់នោះដោយមានការប្រជុំនៅកម្រិតមន្ទីរផង ហើយឡើងមកក្រសួងផង ហើយធ្វើការប្រជុំពិនិត្យផ្ទៀងផ្ទាត់រឿងជាក់ស្ដែង ហើយបានក្រសួងចាត់វិធានការដោយផ្អែកលើក្របខ័ណ្ឌការងារអធិការកិច្ច ផ្អែកលើច្បាប់អប់រំរបស់យើង បានជាយើងអាចចេញសេចក្ដីសម្រេចណាមួយបាន យើងមិនអាចធ្វើភ្លាមៗដែលអាចនាំប៉ះពាល់ដល់ការសម្រេចណាមួយបានទេ»។
វិទ្យាល័យ សុខ អាន ក្ដីទន្ទឹម មានគ្រូប្រមាណ ៥០នាក់ និងសិស្សានុសិស្សជាង ១.៥០០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
