ពលរដ្ឋ​និង​ព្រះសង្ឃ​ប្ដេជ្ញា​បន្ត​ការ​ចូល​រួម​តវ៉ា​ស្វែង​រក​ភាព​យុត្តិធម៌​ក្នុង​សង្គម

ការ​ប៉ះ​ទង្គិច​គ្នា​ដោយ​ហិង្សា​រវាង​កម្លាំង​សមត្ថកិច្ច និង​ក្រុម​បាតុករ​មក​ពី​រោងចក្រ អែស.អិល (SL) ព្រម​ទាំង​ប្រជាពលរដ្ឋ​មួយ​ចំនួន​ផ្សេង​ទៀត​នៅ​មុខ​វត្ត​ស្ទឹងមានជ័យ កាល​ពី​ថ្ងៃ​ទី​១២ ខែ​វិច្ឆិកា ឆ្នាំ​២០១៣ មិន​បាន​ធ្វើ​អោយ​ប្រជាពលរដ្ឋ​មាន​ភាព​រួញរា​ក្នុង​ការ​ប្រើប្រាស់​សិទ្ធិ​សេរីភាព​របស់​ពួក​គាត់ ដើម្បី​ទាមទារ​យុត្តិធម៌​ឡើយ។
ដោយ យាង សុជាមេត្តា
2013-11-14
អ៊ីម៉ែល
មតិ
Share
បោះពុម្ព
ព្រះតេជព្រះគុណ រឿន រិទ្ធិ (ស្តាំ) ត្រូវ​អាជ្ញាធរ​ចាប់​កាល​ពី​ថ្ងៃ​ទី​១២ វិច្ឆិកា ឆ្នាំ​២០១៣ ហើយ​ត្រូវ​បាន​ដោះ​លែង​វិញ​នៅ​យប់​ថ្ងៃ​ដដែល ផ្ដល់​បទ​សម្ភាសន៍​ដល់​អ្នក​សារព័ត៌មាន នា​មុខ​ស្នងការដ្ឋាន​នគរបាល​រាជធានី​ភ្នំពេញ។
ព្រះតេជព្រះគុណ រឿន រិទ្ធិ (ស្តាំ) ត្រូវ​អាជ្ញាធរ​ចាប់​កាល​ពី​ថ្ងៃ​ទី​១២ វិច្ឆិកា ឆ្នាំ​២០១៣ ហើយ​ត្រូវ​បាន​ដោះ​លែង​វិញ​នៅ​យប់​ថ្ងៃ​ដដែល ផ្ដល់​បទ​សម្ភាសន៍​ដល់​អ្នក​សារព័ត៌មាន នា​មុខ​ស្នងការដ្ឋាន​នគរបាល​រាជធានី​ភ្នំពេញ។
RFA/Yeang Socheametta

ទាំង​ប្រជាពលរដ្ឋ ទាំង​ព្រះសង្ឃ សុទ្ធតែ​បាន​បង្ហាញ​ការ​ប្ដេជ្ញា​ថា ដរាប​ណា​នៅ​មាន​អយុត្តិធម៌​ក្នុង​សង្គម ដរាប​នោះ​ពួក​គេ​នឹង​បន្ត​ការ​ចូល​រួម​ទាមទារ បើ​ទោះ​ជា​ត្រូវ​ប្រឈម​នឹង​អំពើ​ហិង្សា​របស់​កម្លាំង​សមត្ថកិច្ច​យ៉ាង​ណា​ក៏ដោយ។

«សំឡេង​ស្រែក​ទាមទារ​របស់​ប្រជាពលរដ្ឋ»

អំពើ​ហិង្សា​រវាង​កម្លាំង​សមត្ថកិច្ច និង​ប្រជាពលរដ្ឋ បាន​បណ្ដាល​អោយ​ស្ត្រី​លក់​បាយ​វ័យ ៤៩​ឆ្នាំ​ម្នាក់​ស្លាប់ និង​ប្រជាពលរដ្ឋ​ជាច្រើន​ទៀត​រង​របួស។ ក្រៅ​ពី​នោះ ព្រះសង្ឃ ៧​អង្គ ព្រម​ទាំង​ប្រជាពលរដ្ឋ​ប្រមាណ ៣០​នាក់​ផ្សេង​ទៀត ដែល​ភាគ​ច្រើន​មិន​មែន​ជា​បាតុករ ត្រូវ​បាន​កម្លាំង​សមត្ថកិច្ច​ឃាត់​ខ្លួន​រក្សា​ទុក​នៅ​ស្នងការដ្ឋាន​នគរបាល​រាជធានី​ភ្នំពេញ។

បើ​ទោះ​បី​ជា​អំពើ​ហិង្សា​ឈាន​ដល់​ការ​បាត់​បង់​ជីវិត​មនុស្ស រង​របួស​ធ្ងន់ធ្ងរ ឬ​ចាប់​ខ្លួន​យ៉ាង​ណា​ក៏ដោយ​ចុះ តែ​សកម្មភាព​ទាំងអស់​នេះ​មិន​បាន​ធ្វើ​អោយ​ព្រះសង្ឃ និង​ពលរដ្ឋ​ដែល​មើល​ឃើញ​ភាព​អយុត្តិធម៌​ទាំងអស់​នេះ រួញរា​ក្នុង​ការ​ប្រើប្រាស់​សិទ្ធិ​សេរីភាព​របស់​ពួក​គេ ដើម្បី​ទាមទារ​យុត្តិធម៌​ឡើយ។ តែ​ផ្ទុយ​ទៅ​វិញ វា​ហាក់​បាន​ធ្វើ​អោយ​ពួក​គេ​មាន​ភាព​ពុះ​កញ្ជ្រោល និង​មាន​ការ​សហការ​គ្នា​ជាង​មុន​ទៅ​វិញ។

ព្រះសង្ឃ​មួយ​អង្គ​ព្រះនាម រឿន រិទ្ធិ ដែល​ស្ថិត​ក្នុង​ចំណោម​ព្រះសង្ឃ​ទាំង ៧​អង្គ ត្រូវ​បាន​អាជ្ញាធរ​ចាប់​កាល​ពី​ថ្ងៃ​ទី​១២ វិច្ឆិកា ហើយ​ត្រូវ​បាន​ដោះ​លែង​វិញ​នៅ​យប់​ថ្ងៃ​ដដែល​នោះ បាន​អោយ​ដឹង​ថា ព្រះអង្គ​ត្រូវ​បាន​កម្លាំង​សមត្ថកិច្ច​វាយ និង​ជេរ​ប្រមាថ​ធ្ងន់ៗ មុន​ពេល​ព្រះអង្គ​ត្រូវ​បាន​សមត្ថកិច្ច​ចាប់៖ «ហៅ​យើង​ទៅ​កត់​កំណត់​ហេតុ សួរ​យើង​ថា យើង​បាន​ចូល​រួម​អត់? ហើយ​អាត្មា​ប្រាប់​គេ​ហើយ​ប្រាប់​ទៀត​ថា អាត្មា​មិន​បាន​ចូល​រួម​ទេ ប៉ុន្តែ​គ្រាន់​តែ​ទទួល​ស្គាល់​ថា អាត្មា​បាន​ឈរ​មើល​ខាង​លើ​វិហារ​មែន ដល់​ពេល​ដល់​ម៉ោង​ឆាន់ មក​ឆាន់ ឃើញ​ពួក​គេ​វាយ​កូន​សិស្ស ចាប់​កូន​សិស្ស អាត្មា​ចូល​មក​ឃាត់ វា​ចាប់​មក​ជាមួយ​ហ្មង​ទៅ ពេល​ដែល​ព្រះចៅ​អធិការ​ទៅ​ធានា គ្រាន់​តែ​គេ​ដាក់​លក្ខខណ្ឌ​ថា អោយ​ព្រះចៅ​អធិការ​យក​ទៅ​ណែនាំ លើក​ក្រោយ​កុំ​អោយ​ប្រព្រឹត្ត​អំពើ​អ៊ីចឹង​ទៀត បើ​ធ្វើ​អំពើ​អ៊ីចឹង​ទៀត លើក​ក្រោយ​គេ​ចាប់​ប្រហែល​ជា​មិន​អាច​លែង​ទៀត​ទេ»

តែ​ទោះ​បី​ជា​សមត្ថកិច្ច​ដាក់​លក្ខខណ្ឌ​អោយ​ព្រះអង្គ​យ៉ាង​ណា​ក៏ដោយ ព្រះតេជព្រះគុណ រឿន រិទ្ធិ មាន​ថេរ​ដីកា​ថា ដរាប​ណា​នៅ​តែ​មាន​អំពើ​អយុត្តិធម៌ ព្រះអង្គ​នឹង​មិន​ខ្លាច​ប្រើប្រាស់​សិទ្ធិ​សេរីភាព ដើម្បី​ទាមទារ​យុត្តិធម៌​នោះ​ឡើយ៖ «បើ​សិន​មាន​អំពើ​អយុត្តិធម៌​អ៊ីចឹង​ទៀត អាត្មា​នឹង​ចូល​រួម​ទៀត ព្រោះ​យើង​ទាមទារ​យុត្តិធម៌​ដើម្បី​សង្គម​យើង​បច្ចុប្បន្ន ដើម្បី​កូន​ចៅ​យើង​ទៅ​ថ្ងៃ​ខាង​មុខ ទោះ​បី​ដាច់​ក្បាល​ពី​លើ​ស្មា​ក៏​អាត្មា​សុខ​ចិត្ត​ដែរ។ ពេល​នេះ​អាត្មា​ស្រែក​ឃ្លាន​ចង់​បាន​សច្ចធម៌ ជាង​ចង់​បាន​ជីវិត​អាត្មា​ទៅ​ទៀត។ ទី​ណា​មាន​សច្ចធម៌ ទី​នោះ​មាន​សន្តិភាព មាន​សេរីភាព និង​មាន​ទឹក​ដី​រីក​ចម្រើន លូត​លាស់​ធំ​ធាត់»

បន្ទាប់​ពី​មាន​ការ​ឃាត់​ខ្លួន​ព្រះសង្ឃ និង​ប្រជាពលរដ្ឋ​យក​ទៅ​ដាក់​នៅ​ស្នងការដ្ឋាន​នគរបាល​ជាតិ​រាជធានី​ភ្នំពេញ ព្រះសង្ឃ​ដទៃ​ទៀត ជាពិសេស​ព្រះសង្ឃ​ដែល​ជា​សមាជិក​នៃ​បណ្ដាញ​ព្រះសង្ឃ​ដើម្បី​យុត្តិធម៌​សង្គម បាន​នាំ​គ្នា​ទៅ​តវ៉ា​ទាមទារ​អោយ​មាន​ការ​ដោះ​លែង​ព្រះសង្ឃ និង​ពលរដ្ឋ​ទាំង​នោះ​វិញ។

ប្រធាន​បណ្ដាញ​ព្រះសង្ឃ​ដើម្បី​យុត្តិធម៌​សង្គម ព្រះតេជព្រះគុណ ប៊ុត ប៊ុនតិញ បាន​មាន​ថេរ​ដីកា​ថា ទង្វើ​ដែល​សមត្ថកិច្ច​រដ្ឋាភិបាល​បាន​ប្រព្រឹត្ត​មក​លើ​ព្រះសង្ឃ វា​ហួស​ហេតុ​ពេក មិន​សម​ជា​ប្រទេស​ដែល​កាន់​ព្រះពុទ្ធ​សាសនា​ឡើយ។ ព្រះតេជព្រះគុណ​ថា ក្រៅ​ពី​បាន​វាយ​ដំ​ធ្វើ​បាប​ព្រះសង្ឃ សមត្ថកិច្ច​ទាំង​នោះ​បាន​ទាញ​សម្រាត​ស្បង់​ចីពរ​របស់​ព្រះសង្ឃ​ទៀត​ផង។ ព្រះតេជព្រះគុណ​ថា សមត្ថកិច្ច​គ្មាន​សិទ្ធិ​មក​ធ្វើ​ទង្វើ​បែប​នេះ​លើ​ព្រះសង្ឃ​ឡើយ។

ព្រះតេជព្រះគុណ ប៊ុត ប៊ុនតិញ៖ «វា​ខុស​ឆ្គង​ត្រង់​ថា លោក​ខ្លះ​លោក​និមន្ត​មក​ពី​រៀន ហើយ​នាំ​គ្នា​ដេញ​វាយ​ដេញ​ចាប់​លោក​ដេញ​បាញ់​ដូច​សត្វ​ធាតុ។ លោក​ខ្លះ​នៅ​ក្នុង​កុដិ​នោះ​ទៅ គេ​ឃើញ​ពួក​បាតុករ​រត់​ចូល​ទៅ វា​ទៅ​វាយ​ដោយ​ទាំងអស់​ទៅ​ណា ដូច​អ្នក​លក់​លៀស​លក់​អី​ទៅ​ណា គ្នា​មាន​ដឹង​អី​ណា ហើយ​ទៅ​ដេញ​វាយ​ដូច​របៀប​ឃ្លាន​ស៊ី​ចំណី​អ៊ីចឹង វា​អាក្រក់​មើល វា​មិន​មែន​ចំ​មនុស្ស​ដែល​ទៅ​បង្ក​ហេតុ។ អ្នក​នៅ​ក្នុង​វត្ត​ខ្លះ​គ្នា​អត់​ដឹង​អី​ផង ស្រាប់​តែ​គេ​ទៅ​ដេញ​វាយ​ដេញ​បាញ់​គ្នា​ឆោឡោ​ដែរ មិន​ដឹង​ជា​ទៅ​លាក់​នៅ​ណា ព្រោះ​អត់​ដឹង​ខ្លួន បើ​គេ​ដឹង​ខ្លួន​គេ​រត់​ហើយ ទៅ​ចាប់​ហ្នឹង​ទៅ​ចាប់​អ្នក​ដែល​អត់​ដឹង​ខ្លួន តើ​អ្នក​ដឹង​ខ្លួន​មាន​ចាប់​គេ​បាន​ណា អា​ហ្នឹង​ហើយ​រឿង​អយុត្តិធម៌​នោះ»

ដោយសារ​រឿង​អយុត្តិធម៌​នេះ​ហើយ ទើប​ព្រះតេជព្រះគុណ ប៊ុត ប៊ុនតិញ និង​ព្រះសង្ឃ​ឯ​ទៀត ដែល​ជា​សមាជិក​នៃ​បណ្ដាញ​ព្រះសង្ឃ​ដើម្បី​យុត្តិធម៌​សង្គម តែង​បាន​ចេញ​ព្រះ​ភ័ក្ត្រ​ការពារ និង​ស្វែង​រក​យុត្តិធម៌​អោយ​ព្រះសង្ឃ និង​ពលរដ្ឋ​ផ្សេង​ទៀត​ដែល​ជា​ជន​រងគ្រោះ។ ព្រះតេជព្រះគុណ ប៊ុនតិញ មាន​ថេរ​ដីកា​បន្ត​ថា ដរាប​ណា​រដ្ឋាភិបាល​នៅ​តែ​មិន​ផ្លាស់​ប្ដូរ​ឥរិយាបថ​របស់​ខ្លួន ព្រះសង្ឃ និង​ពលរដ្ឋ​នៅ​តែ​បន្ត​ក្រោក​ឡើង​ទាមទារ​យុត្តិធម៌​របស់​ពួក​គេ។

ព្រះតេជព្រះគុណ ប៊ុត ប៊ុនតិញ៖ «អាត្មា​គិត​ថា ប្រសិន​ជា​រដ្ឋាភិបាល​នៅ​តែ​ប្រព្រឹត្ត​អំពើ​អ៊ីចឹង វា​ជា​ការ​ញុះញង់​អោយ​ប្រជាជន​ទូទាំង​ប្រទេស​ក្រោក​ឈរ វា​ជា​ការ​ញុះញង់​អោយ​ព្រះសង្ឃ​ទូទាំង​ប្រទេស​ក្រោក​ឈរ។ មែន​ទែន​ទៅ គេ​អត់​ចង់​ធ្វើ​ទេ ប៉ុន្តែ​រដ្ឋាភិបាល​ខ្លួន​ឯង​ញុះញង់​អោយ​គេ​ធ្វើ យើង​នាំ​ព្រះសង្ឃ​ទូទាំង​ប្រទេស​នាំ​គ្នា​រួម​កម្លាំង​តែ​មួយ បើ​សិន​ជា​គេ​សម្លាប់​មួយ​ប្រទេស​វា​ល្អ​មើល បើ​គេ​ហ៊ាន​ដេញ​បាញ់​មួយ​ប្រទេស​វា​ល្អ​មើល​ហើយ។ ឥឡូវ​គេ​ដេញ​បាញ់​មួយ​វត្ត ប៉ុន្តែ​បើ​យើង​រួម​មួយ​ប្រទេស វា​ល្អ អាត្មា​កំពុង​តែ​ប្រមូល​កម្លាំង។ ឥឡូវ​បាន​បាត់ដំបង បាន​កំពង់ធំ បាន​កំពង់ចាម គេ​ត្រៀម​ចូល​រួម។ ដូច្នេះ យើង​មាន​តែ​យុទ្ធសាស្ត្រ​ហ្នឹង​ទេ អត់​មាន​យុទ្ធសាស្ត្រ​ផ្សេង​ទៀត​ទេ»

មិន​មែន​មាន​តែ​ព្រះសង្ឃ និង​ក្រុម​គ្រួសារ​អាណាព្យាបាល​ជន​រងគ្រោះ​នោះ​ទេ ដែល​បាន​ទៅ​កាន់​ស្នងការដ្ឋាន​នគរបាល​ជាតិ ដើម្បី​ទាមទារ​អោយ​មាន​ការ​ដោះ​លែង​ព្រះសង្ឃ និង​ពលរដ្ឋ សហគមន៍​អ្នក​ភូមិ​បឹងកក់ និង​បុរីកីឡា ដែល​បញ្ហា​របស់​ខ្លួន​នៅ​មិន​ទាន់​ទាំង​បាន​ដោះស្រាយ​រួច​ផង​នោះ ក៏​បាន​នាំ​គ្នា​ទៅ​ឈឺ​ឆ្អាល​ចំពោះ​ការ​ចាប់​ខ្លួន​នោះ​ដែរ។

អ្នកស្រី ទេព វន្នី បាន​និយាយ​ថា បើ​ទោះ​ជា​ក្រុម​របស់​អ្នកស្រី​ធ្លាប់​ត្រូវ​បាន​សមត្ថកិច្ច​បិទ​ភ្លើង​បាញ់​ចម្ពាម​កៅស៊ូ​អោយ​រង​របួស​ជាច្រើន​នាក់ កាល​ពី​ពេល​ជួប​ជុំ​នៅ​វត្ត​ភ្នំ ក៏ដោយ ក៏​ក្រុម​អ្នកស្រី​មិន​ខ្លាច​នឹង​ចេញ​មក​ជា​ថ្មី​ម្តង​ទៀត ដើម្បី​ទាមទារ​រក​យុត្តិធម៌​អោយ​ព្រះសង្ឃ និង​ជន​រងគ្រោះ​ផ្សេង​ទៀត​ដែរ។ អ្នកស្រី​ថា បញ្ហា​របស់​ប្រជាពលរដ្ឋ​ដទៃ វា​ក៏​ជា​បញ្ហា​សម្រាប់​ក្រុម​អ្នកស្រី​ដែរ៖ «បើ​អត់​ប្រយោជន៍​សម្លាប់​ខ្មែរ​គ្នា​ឯង​អ៊ីចឹង សម្បើម​តែ​ម្តង ឃើញ​ស៊ី​សាច់​ហុត​ឈាម។ ថ្នាក់​ដឹក​នាំ​ស្នងការ​ក្រុង ការពារ​ជាតិ និង​ការពារ​រាស្ត្រ​មួយ​ទាំង​មូល ស្រាប់​តែ​ចាត់​ទុក​រាស្ត្រ​ជា​សត្រូវ សួរ​ថា អោយ​រាស្ត្រ​នៅ​បាន​ម៉េច​សុខ? ថ្ងៃ​នេះ​ខ្ញុំ​មិន​សុខ ថ្ងៃ​ក្រោយ​អស់​លោក​ក៏​មិន​សុខ​ដែរ អា​ហ្នឹង​វា​ជា​ជំងឺ​មហា​រីក វា​ឆ្លង​ត​គ្នា ភាព​អយុត្តិធម៌​រាល​ដាល​លឿន​ណាស់​ពី​មួយ​កន្លែង​ទៅ​មួយ​កន្លែង»

រហូត​មក​ដល់​ល្ងាច​ថ្ងៃ​ពុធ ទី​១៣ វិច្ឆិកា សមត្ថកិច្ច​បាន​ដោះ​លែង​ពលរដ្ឋ ២៩​នាក់ ក្នុង​ចំណោម ៣១​នាក់ ដែល​បាន​ចាប់​ឃុំ​ខ្លួន​កាល​ពី​ថ្ងៃ​ទី​១២ វិច្ឆិកា។ នៅ​សល់ ២​នាក់​ទៀត សមត្ថកិច្ច​ពុំ​ទាន់​ដោះ​លែង​នៅ​ឡើយ ដោយ​កំពុង​កសាង​សំណុំ​រឿង​បញ្ជូន​ទៅ​តុលាការ។

ការ​ប៉ះ​ទង្គិច​គ្នា​រវាង​កម្លាំង​សមត្ថកិច្ច និង​ប្រជាពលរដ្ឋ កាល​ពី​ថ្ងៃ​ទី​១២ វិច្ឆិកា ជា​ព្រឹត្តិការណ៍​ទី​២​ហើយ ក្រោយ​ការ​បោះ​ឆ្នោត​ជ្រើស​រើស​តំណាង​រាស្ត្រ​អាណត្តិ​ទី​៥ កាល​ពី​ថ្ងៃ​ទី​២៨ ខែ​កក្កដា។ ការ​ប៉ះ​ទង្គិច​គ្នា​លើក​ទី​១ បាន​កើត​ឡើង​នៅ​យប់​ថ្ងៃ​ទី​១៥ ខែ​កញ្ញា នៅ​ក្បែរ​ស្ពាន​អាកាស​ក្បាល​ថ្នល់ ដែល​នៅ​ពេល​នោះ បាន​បណ្ដាល​អោយ​បុរស​ម្នាក់​ស្លាប់​នៅ​នឹង​កន្លែង ដោយសារ​គ្រាប់​កាំភ្លើង​ហោះ​ចំ​ក្បាល។ រហូត​មក​ដល់​ពេល​នេះ ជន​ដៃ​ដល់​មិន​ទាន់​ត្រូវ​បាន​ចាប់​បញ្ជូន​ខ្លួន​ទៅ​កាន់​តុលាការ​នៅ​ឡើយ។ ចំពោះ​ការ​ស្លាប់​របស់​ស្ត្រី​អ្នក​លក់​បាយ​នៅ​ពេល​នេះ គេ​ក៏​នៅ​មាន​ទាន់​ដឹង​ថា តើ​រដ្ឋាភិបាល​នឹង​មាន​ចំណាត់​ការ​យ៉ាង​ដូច​ម្ដេច​នោះ​ដែរ? អ្វី​ដែល​យើង​អាច​ដឹង​នៅ​ពេល​នេះ គឺ​មនុស្ស​គ្រប់​គ្នា​កំពុង​រង់ចាំ​មើល​ចំណាត់​ការ​របស់​រដ្ឋាភិបាល៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (9)
Share

អ្នក​អាន​អនាមិក

I don't see this controversy must be responsible by current government, dues to violent demonstration created by those workers. Monks must stand out from any activities which lead to destroy our country's religion and believe. Nowadays, Cambodian people start slowing down their believes to our monks in Buddhism religion in Cambodia. So, for those monks which been arrested must deserved serious punishment.

Nov 15, 2013 12:51 AM

អ្នក​អាន​អនាមិក

ពី Phnom Penh

I 10000% supported your ideas to use your own right to fight against the current government, having Hun Sen as a cruel leader. If you look at the Maslow theory, as one of human being, we all are equally treated to have "safety" to live in society we are in and "love/belonging" to have our own right to live as others. Fight against Hun Sen! Hun Sen is not Khmer now!

Nov 14, 2013 10:31 PM

ក្មេងវត្ត

ពី វត្តភ្នំ

ឯណាទៅដែលហ៊ុន សែន-ចិនហៅថាស្ដេចសង្ឃទាំងពីរនោះម្ដេច
មិនឃើញចេញមកជួយរកយុត្តិធម៌ដល់ព្រះសង្ឃដែលត្រូវពួកទមិឡ
វាយដំ ឬមួយហ៊ុន សែន-ចិនហាមមិនឱ្យចូលរួម?។បើដូច្នេះមែន
គួរហៅថាស្ដេចបម្រើហ៊ុនសែនវិញត្រូវជាងហៅថា"ស្ដេចសង្ឃ"។

Nov 14, 2013 08:27 PM

អ្នក​អាន​អនាមិក

សូមពិនិត្យមើលព្រះភ័ក្តព្រះអង្គ។ មិនមែនមុខអ្នកបួសទេ គឺជាមុខអ្នកប្រដាល់ ចងអាឃត ទឹកមុខនេះអាចឈានទៅសំលាប់មនុស្សបាន។

Nov 14, 2013 08:15 PM

(

សូមលើកទឹកចិត្តអ្នកដែលត្រូវហ៊ុន សែនរំលោភ បន្តតវ៉ា។ ទីណាមានការជិះជាន់ ទីនោះមានការតស៊ូ។ បើអ្នកមិនរើបម្រះ នោះគេជាន់អ្នកទាល់តែងាប់។ ដូច្នេះ បើជនពាលជាន់អ្នកទាំងបំពាន អ្នកត្រូវវាយខ្មងវាបំបាក់ ដើម្បីអោយវាដឹង។ ក្រុមហ៊ុន សែនជិតដល់ថ្ងៃរបស់វាហើយ។ A *** has its day.


[មតិ​នេះ​ត្រូវ​បាន​កែសម្រួល​ដោយ​អ្នក​និពន្ធ​របស់​វិទ្យុ​អាស៊ីសេរី ដើម្បី​ឲ្យ​ស្រប​តាម​លក្ខខណ្ឌ​ប្រើប្រាស់​របស់​យើង​ខ្ញុំ។]

Nov 14, 2013 02:08 PM

មើល​មតិ​ទាំង​អស់.

គេហទំព័រ​ទាំងមូល