ពលករ​ខ្មែរ​ម្នាក់​លះបង់​សេចក្ដី​សុខ​ផ្ទាល់ខ្លួន​​ជួយ​ការងារ​ពលករ​ខ្មែរ​ដែល​ជួប​ទុក្ខ​លំបាក​នៅ​ថៃ

ដោយ ថា ថៃ
2022.10.19
Share on WhatsApp
Share on WhatsApp
ពលករ​ខ្មែរ​ម្នាក់​លះបង់​សេចក្ដី​សុខ​ផ្ទាល់ខ្លួន​​ជួយ​ការងារ​ពលករ​ខ្មែរ​ដែល​ជួប​ទុក្ខ​លំបាក​នៅ​ថៃ ពលករខ្មែរ​ប្រកបការងារសំណង់នៅប្រទេស​ថៃ កាលពីថ្ងៃទី១៨ ខែ​កក្កដា ឆ្នាំ​២០២២។
រូប៖ ពលរដ្ឋផ្ដល់ឱ្យ

ពលករ​ខ្មែរ​ម្នាក់​លះបង់​សេចក្ដីសុខ​ផ្ទាល់ខ្លួន​ដោយ​មិន​គិត​ពី​ការ​ហត់នឿយ ដើម្បី​បំពេញ​ការងារ​ស្ម័គ្រចិត្ត​ជួយ​ដល់​ពលករ​ខ្មែរ ដែល​ជួប​ទុក្ខ​លំបាក​នៅ​ប្រទេស​ថៃ​។ មន្ត្រី​សង្គម​ស៊ីវិល​យល់ថា ពលករ​ខ្មែរ​ដែល​ចេះ​ជួយ​សម្រាលទុក្ខ​គ្នា​ទៅវិញទៅមក​នេះ ជា​រឿង​ល្អ​ដែល​ធ្វើ​ឱ្យ​ពលករ​ចេះ​សាមគ្គី​គ្នា​ធ្វើ​ការ​ដើម្បី​សង្គម។

ពលករ​ខ្មែរ​ម្នាក់ សុខចិត្ត​ចំណាយពេល​ផ្ទាល់ខ្លួន ធ្វើ​ការងារ​ស្ម័គ្រចិត្ត​ចុះ​ជួយ​ពលករ​ខ្មែរ​តាម​តំបន់​ផ្សេងៗ ជាពិសេស​កំឡុង​ពេល​ដែល​ពលករ​ខ្មែរ​ជួប​ទុក្ខ​លំបាក​ខ្លាំង ដោយសារ​ការ​រាតត្បាត​ជំងឺ​កូវីដ​-១៩ ខ្វះ​ស្បៀងអាហារ ថ្នាំសង្កូវ កន្លែង​សម្រាក​ព្យាបាល គឺ​លោក​តែងតែ​ជួយ​សម្រួល​ដល់​ពលករ​ខ្មែរ​ទាំង​នោះ។

ពលករ​ខ្មែរ ដែល​ធ្វើ​ការ​សំណង់​ក្នុង​ប្រទេស​ថៃ​អស់​រយៈពេល​៥​ឆ្នាំ មកពី​ស្រុក​បវេល ខេត្ត​បាត់ដំបង លោក ឆន សុខឿន ប្រាប់​វិទ្យុ​អាស៊ីសេរី​ថា ការដែល​លោក​ទៅ​ជួយ​ទុក្ខ​ធុរៈ​ដល់​ពលករ​ខ្មែរ គឺ​ធ្វើឡើង​ដោយ​ចិត្ត​ស្មោះ​ក្នុងនាម​ខ្មែរ​ដូចគ្នា​រស់នៅ​ក្រៅប្រទេស​។ លោក​បន្ត​ថា លោក​ជួយ​យកអាសា​ដល់​ពលករ​ខ្មែរ ដូចជា​ពេល​ពលករ​ត្រូវ​ថៅកែ​កេងប្រវ័ញ្ច​កម្លាំង​ពលកម្ម រក​ជំនួយ​សប្បុរស​ជួយ​ពលករ​ខ្វះខាត ជួយ​នាំ​ពលករ​ទៅ​មន្ទីរពេទ្យ និង​តែង​ឃោសនា​ឲ្យ​ពលករ​ខ្មែរ​ជួបជុំគ្នា នៅពេល​បុណ្យទាន​ជាដើម៖ «​ចំពោះ​ខ្ញុំ​បាន​ប្ដេជ្ញាចិត្ត​រួចហើយ​ថា ធ្វើ​កិច្ច​ការងារ​នេះ​គឺ​ដើម្បី​ផលប្រយោជន៍​បងប្អូន​ខ្មែរ​យើង​ដែល​រងទុក្ខ​វេទនា ទោះ​តែ​ខ្លួនឯង​ហ្នឹង​បាន​រស់​ដោយ​ទាំង​ត្រដរ​ក្ដី​។ ប៉ុន្តែ​ឲ្យ​តែ​យើង​នៅ​រស់​នៅ​មាន​ដង្ហើម​ខ្ញុំ​នៅតែ​ជួយ​បងប្អូន​ខ្មែរ ទោះ​តែ​មិនបាន​ទៅ​ប្រទេស​កម្ពុជា មកពី​ការ​ធ្វើទុក្ខបុកម្នេញ​រប​ស់​រដ្ឋាភិបាល ប៉ុន្តែ​ខ្លួន​ខ្ញុំ​ផ្ទាល់​មកដល់​ប្រទេស​ថៃ​នេះ ក៏​នៅតែ​ចំណាយពេល​វេលា​នេះ​ជួយ​ដល់​បងប្អូន​ពលករ​ខ្មែរ​ដែរ​រងគ្រោះ​ដោយ​ប្រការ​ផ្សេងៗ»

បុរស​មាឌ​ស្ដើង សម្បុរ​ខ្មៅ​ស្រអែម លោក ឆន សុខឿន អាយុ​ជាង​៤០​ឆ្នាំ រាល់ថ្ងៃ​លោក​តស៊ូ​ធ្វើការ​ជា​កម្មករ​សំណង់ ដើម្បី​រក​ប្រាក់​មក​ផ្គត់ផ្គង់​គ្រួសារ ដោយមាន​ប្រពន្ធ និង​កូន​បី​នាក់​ក្នុង​បន្ទុក​គ្រួសារ​។ ជីវិត​របស់​លោក​ត្រូវ​រសាត់អណ្ដែត​នៅក្នុង​ប្រទេស​ថៃ ជាច្រើន​ខេត្ត​ក្រុង ហើយ​លោក​តាំងចិត្ត​ថា នឹង​រក​កន្លែង​ណាមួយ​រស់នៅ​ប្រចាំ ដើម្បី​ឲ្យ​កូន​ទាំង​បី​នាក់​របស់​លោក​បាន​ចូល​សាលា​ទៀងទាត់។

ពលករ​ខ្មែរ​រូប​នេះ ប្ដេជ្ញាចិត្ត​ថា ដរាបណា​លោក​នៅ​មាន​ដង្ហើម លោក​នឹង​ខិតខំ​តាម​ជួយ​ពលករ​ខ្មែរ​ដែល​រងគ្រោះ ដោយ​ប្រការ​ផ្សេងៗ តាម​លទ្ធភាព​ដែល​លោក​អាច​ធ្វើ​បាន​។ លោក​បន្ត​ថា ពេលខ្លះ​លោក​ត្រូវ​ថៅកែ​បណ្ដេញ​ចេញពី​ការងារ ដោយសារ​លោក​មិនបាន​បំពេញការងារ​ឲ្យ​បាន​ទៀងទាត់ ព្រោះ​រវល់​តែ​ចំណាយពេល​ឈឺឆ្អាល​ជួយ​ដល់​ពលករ​ខ្មែរ​។ លោក​បញ្ជាក់​ថា ដំបូង​ឡើង​ប្រពន្ធ​របស់​លោក​មិនសូវ​ពេញ​ចិត្តនឹង​សកម្មភាព​ការងារ​របស់​លោក​ទេ ព្រោះ​គិតតែ​ពី​ជួយ​អ្នកដទៃ​មិន​ខ្វល់​ពី​ខ្លួនឯង និង​គ្រួសារ តែ​ក្រោយមក​លោក​បាន​ពន្យល់​ប្រពន្ធ​របស់​លោក ឲ្យ​យល់​ពី​សកម្មភាព​ដែល​លោក​បាន​ធ្វើ ទើប​គាត់​ពេញចិត្ត​ឱ្យ​លោក​ធ្វើ​ការងារ​នេះ​បន្ត​ទៀត​៖ «ខ្ញុំ​តែងតែ​ប្រាប់​គាត់​ថា យើង​បាន​រស់​បាន​ហូប​ប៉ុណ្ណឹង​ហើយ​ទោះ​តែ​ខ្វះខាត​ក្ដី​ប៉ុន្តែ​នៅ​មាន​បងប្អូន​មួយ​ចំនួន​ច្រើន​ធំ​ណាស់ ដែល​គាត់​រងគ្រោះ​ជាង​យើង អីចឹង អានេះ​គឺ​យើង​ធ្វើ​ដូចម្ដេច​ចិត្ត​ខ្ញុំ​នៅ​មិនបាន​ដោយសារ​យើង​មើលឃើញ​បងប្អូន​ខ្មែរ ដែល​គាត់​រងគ្រោះ​ទោះ​តែ​នៅ​ប្រទេស​ថៃ ដែល​គេ​គោរព​ច្បាប់​ក៏ដោយ ប៉ុន្តែ​នៅតែ​មាន​ថៅកែ​មួយចំនួន​ដែល​គេ​តែងតែ​បោកប្រាស់ តែងតែ​កិបកេង​កម្លាំង​ពួកគាត់​ហ្នឹង អីចឹង​គឺ​ខ្ញុំ​មិនអាច​សំងំ​ស្ងៀម​បានទេ ខ្ញុំ​នឹង ធ្វើ​ជួយ​អ្វី​តាម​ដែល​ខ្ញុំ​ធ្វើ​ទៅ​បាន»

ពាក់ព័ន្ធ​នឹង​រឿងរ៉ាវ​ជីវិត​តស៊ូ​ជួយ​ដល់​ពលករ​ខ្មែរ​នៅ​ប្រទេស​ថៃ​ពី​សំណាក់​លោក ឆន សុខឿន នេះ​ពលករ​ខ្មែរ​ម្នាក់ ដែល​ប្រកប​របរ​ដើរ​រើស​អេតចាយ​ក្នុង​ខេត្ត​នន្ទ​បុរី (Nun Buri) ជាប់​ទីក្រុង​បាងកក មកពី​ស្រុក​បវេល ខេត្ត​បាត់ដំបង លោក ហង់ ចន្ថា ឲ្យ​ដឹង​ថា លោក ឆន សុខឿន ជា​មនុស្ស​ដែល​ខ្នះខ្នែង​ធ្វើការ​ងារ​សង្គម​ខ្លាំង រួមមាន​ការ​ជួយ​ចុះ​ចែក​ស្បៀងអាហារ​ពេល​ពលករ​អត់​ការងារ ឬ​ថៅកែ​មិន​បើកប្រាក់​ឲ្យ និង​ជួយ​សម្រួល​ផ្នែក​ភាសា ហើយ​ជួយ​អ្នកដទៃ​អស់ពី​ចិត្ត ដោយ​មិន​គិត​ពី​ផល​តបស្នង​ឡើយ​។ លោក​បន្ត​ថា ពលករ​ខ្មែរ​រូប​នេះ នៅ​ពេល​ដែល​គាត់​ទទួល​ដំណឹង​ថា​ពលករ​ខ្មែរ​នៅ​ទីណា​មានទុក្ខ​លំបាក លោក​តែង​ខ្វាយខ្វល់​ប្រកាស​រក​ជំនួយ​ទៅ​ជួយ​ភ្លាម​។ លោក​បន្ថែម​ថា លោក និង​ពលករ​ខ្មែរ​ដទៃទៀត តែង​ស្រឡាញ់​រាប់អាន​លោក ឆន សុខឿន ព្រោះ​បុរស​វ័យ​កណ្ដាល​រូប​នេះ​មានចិត្ត​ទូលាយ ចេះ​ជួយ​ដល់​អ្នកដទៃ​មិន​រំពឹង​ផលប្រយោជន៍​ឡើយ៖ «​ហេ​! មួយរយៈ​នេះ​គាត់​ជួយ​ច្រើនណាស់ ពី​មុន​មក តាំង​ពីមុន​មក​ជួយ​ច្រើន​បង ជួយ​ច្រើន​តាំងពី​យើង​ជាប់​កូវីដ​មួយ​សា​ដំបូង​មក គឺ​គាត់​ចុះ​ជួយ​រហូត​គាត់​ជួយ​ច្រើន ជួយ​ដូច​ថា​គាត់ ដូច​ថា​ពី​មុន​មក​អ៊ីចឹង​គាត់​ធ្លាប់​ទទួល​បាន​ជំនួយ​ពី​នេះ​ពី​នោះ​មក​យក​ទៅ​ជួយ​ពលករ ឬក៏​អាច​រៃអង្គាស​ក្រុមការងារ​ខ្លះ​អី​ខ្លះ​ចូលគ្នា​តិចតួចៗ ជួយ​ក៏​មានអី​ក៏​មាន​អីចឹង​ណា គឺថា​គាត់​ចុះ​ជួយ​ច្រើន​ដូច​ថា​ជួនកាល​ពលករ​មាន​ជំងឺ​ឈឺ​ខ្វះខាត​អីចឹង​គាត់​ជួយ​ខ្នះខ្នែង​ប្រមូល​គ្រប់គ្នា​ក្រុមការងារ​គាត់​ហ្នឹង ឬក៏​ពលករ​ដែល​គាត់​ស្គាល់​ជា​ក្រុមការងារ»

ស្រដៀង​គ្នា​នេះ​ដែរ ពលករ​ខ្មែរ​ម្នាក់ទៀត ដែល​ធ្វើការ​ផ្នែក​សន្តិសុខ​នៅ​ការដ្ឋាន​សំណង់​មួយ​នៅ​ទីក្រុង​បាងកក មកពី​ឃុំ​ពន្លៃ ស្រុក​បរិបូរ ខេត្តកំពង់ឆ្នាំង លោក ថន ស្ដើង ប្រាប់​ថា លោក​ក៏​ស្រឡាញ់​រាប់អាន​លោក ឆន សុខឿន ដែរ ព្រោះ​លោក​ធ្លាប់​បាន​ចុះ​ជួយ​ការងារ​ស្ម័គ្រចិត្ត​ជាមួយ​លោក ឆន សុខឿន បាន​ច្រើន​លើក​មក​ហើយ​នៅ​ប្រទេស​ថៃ។ លោក​កោតសរសើរ​ដល់​លោក ឆន សុខឿន ដែល​ខំប្រឹង​បំពេញការងារ​ជួយ​ដល់​ពលករ​ខ្មែរ​ជួប​ការ​លំបាក​ផ្សេងៗ​។​៖ «ឈឺ​អ៊ីចឹង​ខ្ញុំ​ទៅ​ដេកពេទ្យ​អ៊ីចឹង​ថៅកែ​ខ្ញុំ​គាត់​ជួយ​ចេញ​លុយ​ឲ្យ​ដែរ​អ៊ីចឹង​ទៅ ថ្វីត្បិតតែ​គាត់​មិន​ឲ្យ​យើង​ធ្វើការ​ប៉ុន្តែ​គាត់​បាន​ជួយ​លុយ​ជួយ​កាក់​អី​ថ្លៃ​ពេទ្យ​អីចឹង​ណា​បង ហើយ​ម្ហូបអាហារ​អីហ្នឹង​គឺ​បាន​ថៅកែ​គាត់​ជួយ​ដែរ​។ ខាង​ក្រុមការងារ​ខ្ញុំ​គឺ​ខ្ញុំ​អត់​ចង់​ឲ្យ​គាត់​ហ្នឹង​ទទួលបន្ទុក​ខ្លាំង​មក​លើ​ក្រុមការងារ ឬថា​ពួក​ខ្ញុំ​មាន​បញ្ហា​អីចឹង​មិន​ចង់​ឲ្យ​មាន​បន្ទុក​ទេ ដើម្បី​ឲ្យ​ពួកគាត់​ហ្នឹង​សល់​ពេលវេលា​ច្រើន​សម្រាប់​ជួយ​ដល់​បងប្អូន​ពលករ ចុះ​សួរសុខទុក្ខ​បងប្អូន​ពលករ»

លោក ថន ស្ដើង លើកទឹកចិត្ត​ដល់​លោក ឆន សុខឿន ឲ្យ​ខំធ្វើការ​ងារ​ជួយ​សង្គម និង​ប្រឹងប្រែង​ប្រមែប្រមូល​ឲ្យ​ពលករ​ខ្មែរ នៅ​ប្រទេស​ថៃ ឱ្យ​ចេះ​រួបរួមសាមគ្គី​គ្នា ក្នុង​ពេល​រស់នៅ​ក្រៅប្រទេស។

ជុំវិញ​រឿង​នេះ វិទ្យុ​អាស៊ីសេរី មិន​អាច​ទាក់ទង​សុំ​ការ​អត្ថាធិប្បាយ​ពី​ស្ថានទូត​កម្ពុជា​ប្រចាំ​ប្រទេស​ថៃ បានទេ នៅ​ល្ងាច​ថ្ងៃទី​១៧ ខែតុលា ដោយ​ទូរស័ព្ទ​ហៅ​ចូល​ជាច្រើន​ដង​តែ​ពុំ​មាន​អ្នកទទួល។

ពាក់ព័ន្ធ​រឿង​នេះ​ដែរ មន្ត្រី​គម្រោង​នៃ​មជ្ឈមណ្ឌល​សម្ពន្ធភាព​ការងារ និង​សិទ្ធិមនុស្ស អង្គការ​សង់ត្រាល់ លោក លឹង សុផុន គាំទ្រ​ចំពោះ​ទង្វើ​ល្អ​របស់​ពលករ​ខ្មែរ ដែល​រស់នៅ​ឆ្ងាយ​មាតុភូមិ ហើយ​ចេះ​អប់រំ ស្រឡាញ់ យកអាសា​គ្នា ដោយ​បាន​លះបង់​សេចក្ដីសុខ​ផ្ទាល់ខ្លួន ដើម្បី​ទៅ​ជួយ​ពលករ​ដូចគ្នា ដូចជា​លោក ឆន សុខឿន ជាដើម​។ លោក​លើកឡើង​ថា ពលករ​ខ្មែរ​ចេះ​ផ្ដល់​សេចក្ដីសុខ​ឲ្យ​គ្នា ដោយ​យកចិត្តទុកដាក់​ពី​សុខទុក្ខ​គ្នា​ទៅវិញទៅមក ធ្វើ​ឲ្យ​ជាតិ​សាសន៍​ដទៃ​ស្ងើចសរសើរ៖ «ខ្ញុំ​មើលឃើញ​តែមួយ​ជ្រុង​ថា​គាត់​ចូលរួម​ក្នុង​ការ​ជួយជ្រោមជ្រែង​បងប្អូន​ខ្មែរ​នៅ​ថៃ ដែល​គាត់​មាន​បញ្ហា​ប្រឈម​នឹង​ផ្សេងៗ​ដូចជា​ខ្វះខាត​ខ្វះ​ស្បៀង​ខ្វះ​អាហារ​អីចឹង ឃើញ​គាត់​អំពាវនាវ​ស្វែងរក​ជន​សប្បុរស ស្វែងរក​ដូចជា​ជំនួយ​ដើម្បី​ជួយ​ដល់​បងប្អូន​ពលករ​អីចឹង​ណា​។ ខ្ញុំ​គិតថា​វា​ជា​រឿង​ត្រឹមត្រូវ វា​ជា​រឿង​គួរ​ឲ្យ​កោតសរសើរ​ស្ញប់ស្ញែង បើ​បុគ្គល​ដែល​ចូលរួម​ធ្វើការ​សង្គម​ដែល​ចេះ​ជួយ​សាមគ្គី​គ្នា ចេះ​ជួយ​គ្នា​ទៅវិញទៅមក​ចេះ​ចែករំលែក​នូវ​អ្វី​ដែល​យើង​មាន​អ៊ីចឹង​ទៅ​ណា»

ទង្វើ​ល្អ​ចេះ​ឈឺឆ្អាល​ដល់​ពលករ​ខ្មែរ​នៅ​ប្រទេស​ថៃ របស់​លោក ឆន សុខឿន តែងតែ​បាន​កោត​សរសើរ​ពី​សំណាក់​ពលករ​ខ្មែរ ដោយសារតែ​ទឹកចិត្ត​ជួយ​ឈឺឆ្អាល​ជួយ​ដល់​ពលករ​ខ្មែរ​ដែល​រងគ្រោះ​និង​ជួប​ការ​លំបាក​។ លោក ឆន សុខឿន និយាយ​ថា ប្រសិនបើ​លោក​នៅតែ​បន្ត​ធ្វើ​ការងារ​នៅ​ប្រទេស​ថៃ គឺ​លោក​នឹង​មិន​បោះបង់​ការងារ​ស្ម័គ្រចិត្ត​ចុះ​ជួយ​ដល់​ពលករ​ខ្មែរ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។