អាជ្ញាធរខេត្តកំពង់ចាមហៅយុវជនម្នាក់សួររឿងផ្ញើសារទៅលោក ស ខេង ឱ្យដោះស្រាយរឿងគ្រឿងញៀន
2021.08.06
លោក ឃីម សុខុម សមាជិកក្រុមយុវជន ១០០រាត្រី និងជាសមាជិកសមាគមសម្ព័ន្ធនិស្សិតបញ្ញវន្តខ្មែរ ដែលត្រូវបានអាជ្ញាធរមូលដ្ឋានខេត្តកំពង់ចាម ហៅទៅសួរនាំ រឿងផ្ញើសារទៅលោក ស ខេង ឱ្យដោះស្រាយបញ្ហាគ្រឿងញៀន។
រូប៖ យុវជនផ្ដល់ឱ្យ
អាជ្ញាធរមូលដ្ឋាននៅខេត្តកំពង់ចាម បានកោះហៅយុវជនម្នាក់ ដែលជាសមាជិកក្រុមការងារ ១០០រាត្រី មកសួរនាំនៅសាលាឃុំខ្នុរដំបង ករណីយុវជនរូបនេះផ្ញើសារទៅរដ្ឋមន្ត្រីក្រសួងមហាផ្ទៃ លោក ស ខេង ឱ្យជួយដោះស្រាយ បញ្ហាគ្រឿងញៀននៅមូលដ្ឋាន។ មន្ត្រីសង្គមស៊ីវិលមើលឃើញថា ការសួរនាំរបស់អាជ្ញាធរនេះ អាចធ្វើឱ្យពលរដ្ឋដទៃទៀត ខ្លាចរអាក្នុងការផ្តល់ដំណឹង ពីភាពអសន្តិសុខភូមិ/ឃុំ។
អាជ្ញាធរមូលដ្ឋាន និងនគរបាលស្រុកជើងព្រៃ ខេត្តកំពង់ចាម បានអនុញ្ញាតឱ្យសមាជិកក្រុមការងារ ១០០រាត្រី លោក ឃីម សុខុម វិលត្រឡប់មកលំនៅឋានវិញហើយ នៅរសៀលថ្ងៃទី៦ សីហានេះ បន្ទាប់ពីសាកសួរជិត ២ម៉ោង។ ប៉ុន្តែការហៅមកសួរនាំបែបនេះ អាចប៉ះពាល់ដល់សុវត្ថិភាពរបស់យុវជនរូបនេះ។
សមាជិកក្រុមការងារ ១០០រាត្រី និងជាសមាជិកសមាគមសម្ព័ន្ធនិស្សិតបញ្ញវន្តខ្មែរ លោក ឃីម សុខុម ប្រាប់វិទ្យុអាស៊ីសេរីថា អាជ្ញាធរ និងនគរបាល បានបង្គាប់ឱ្យលោកបង្ហាញភស្តុតាង និងទីតាំងជាក់ស្តែងអំពីការប្រើប្រាស់ និងចែកចាយគ្រឿងញៀន នៅក្នុងឃុំខ្នុរដំបង ស្រុកជើងព្រៃ។ លោកយល់ថា ទោះជាអាជ្ញាធរមិនបានគំរាមកំហែងលោកក៏ដោយ ក៏ការហៅមកសួរនាំបែបនេះអាចធ្វើឱ្យពលរដ្ឋផ្សេងទៀតភ័យខ្លាចមិនហ៊ានរាយការណ៍ ពីបញ្ហាគ្រឿងញៀន ដែលកំពុងកើតឡើងច្រើននៅមូលដ្ឋាន។ លោកសង្កត់ធ្ងន់ថា ការសួរនាំរបស់អាជ្ញាធរ ហាក់មិនបានគិតគូរឱ្យល្អិតល្អន់ ពីសុខសុវត្ថិភាពផ្ទាល់ខ្លួនរបស់លោកនោះទេ ព្រោះការសាកសួរលោក នៅសាលាឃុំ ពុំមែនជាដំណោះស្រាយសមរម្យ ដើម្បីធានាពីសន្តិសុខរបស់លោកនោះទេ៖ «ប្រសិនបើពលរដ្ឋធម្មតា នៅពេលគាត់ដឹងរឿងហ្នឹង គឺគាត់មិននិយាយសោះ នៅពេលគាត់ឃើញ ខ្ញុំផ្ទាល់ ហើយគាត់ក៏មិននិយាយទៅថ្នាក់លើដែរថា ស្រុកភូមិគាត់មាន។ អត់ខ្វះទេ អ្នកដែលដឹងថា នៅនេះមានអ្នកប្រើប្រាស់គ្រឿងញៀនច្រើន តែគេមិនហ៊ាននិយាយ ហើយបើសិនគេឃើញ ដូចខ្ញុំ ពួកគាត់ម្នាក់ៗ សភ្នែក»។
កាលពីពាក់កណ្ដាលខែកក្កដាកន្លងទៅ លោក ឃីម សុខុម បានផ្ញើសារទៅកាន់ប្រអប់សារនៃទំព័រហ្វេសបុក (Facebook) របស់រដ្ឋមន្ត្រីក្រសួងមហាផ្ទៃ លោក ស ខេង ដើម្បីឱ្យរដ្ឋមន្ត្រីរូបនេះ ជួយទប់ស្កាត់ការរីករាលដាលគ្រឿងញៀន ដែលកំពុងកើតឡើងច្រើន នៅក្នុងឃុំខ្នុរដំបង ស្រុកជើងព្រៃ។ យុវជនរូបនេះសម្ដែងក្ដីបារម្ភ ហើយប្រាប់លោក ស ខេង អំពីឥទ្ធិពលអាក្រក់នៃគ្រឿងញៀន ដែលប៉ះពាល់យុវជន និងសង្គមជាតិ។ ប៉ុន្តែសាររបស់លោក មិនទទួលបានការឆ្លើយតបវិញនោះទេ។
ជុំវិញរឿងនេះ មេឃុំខ្នុរដំបង លោក ឌី ឌិន បកស្រាយថា នគរបាល និងអាជ្ញាធរបានហៅ ពលរដ្ឋរូបនេះមកសាកសួរមែន ប៉ុន្តែដើម្បីសហការគ្នា ស្វែងរកតម្រុយបង្ក្រាបគ្រឿងញៀន ក្នុងសហគមន៍ ពុំមែនជាការគំរាមកំហែងនោះទេ។ លោកបញ្ជាក់ថា សមត្ថកិច្ចចង់បានព័ត៌មានច្បាស់លាស់ ដើម្បីបង្ក្រាបបទល្មើសគ្រឿងញៀន៖ «មានពីណាទៅគំរាមកំហែងគាត់ គាត់ផ្តល់យោបល់ឱ្យយើងតើក្នុងសង្គម។ ការពារសុវត្ថិភាពទាំងអស់គ្នា គាត់ផ្តល់មតិយោបល់ល្អៗ យើងគួរទទួលស្គាល់ថា គាត់ជាពលរដ្ឋមួយចូលរួមចំណែក ក្នុងសង្គម»។
ផ្ទុយពីការបកស្រាយនេះ មន្ត្រីសង្គមស៊ីវិលមើលឃើញថា រូបភាពសួរនាំរបស់អាជ្ញាធរ បង្កើតឱ្យមានអសន្តិសុខចំពោះយុវជនរូបនេះ ព្រោះអ្នកចរាចរគ្រឿងញៀន ចែកចាយ និងអ្នកដែលប្រើប្រាស់គ្រឿងញៀន អាចនឹងខឹងសម្បារ និងស្អប់គាត់។
នាយករងទទួលបន្ទុកផ្នែកឃ្លាំមើលសិទ្ធិមនុស្ស នៃអង្គការសិទ្ធិមនុស្សលីកាដូ លោក អំ សំអាត ថ្លែងថា អាជ្ញាធរគួរតែមាននីតិវិធីច្បាស់លាស់ ក្នុងការសួរនាំ និងគិតគូរពីសុវត្ថិភាពយុវជនរូបនេះ។ ជាមួយគ្នានេះ លោកថា អាជ្ញាធរគួរតែលើកទឹកចិត្ត និងផ្តល់តម្លៃ ចំពោះយុវជន និងពលរដ្ឋ ដែលហ៊ានរាយការណ៍ពីបញ្ហាប្រឈមនៅមូលដ្ឋាន ប្រាប់ទៅថ្នាក់ដឹកនាំ៖ «ខ្ញុំមើលទៅរូបភាពមិនល្អទេ វាអាចជះឥទ្ធិពលមិនល្អសម្រាប់ពលរដ្ឋដទៃទៀត បើគាត់ចង់រាយការណ៍ តែរាយការណ៍ហើយ ត្រូវបានមកសួរនាំផ្សេងៗ ហើយអាច ប៉ះពាល់ដល់ការភ័យខ្លាចសុវត្ថិភាពទៀត វាពិបាកក្នុងការចូលរួម អ៊ីចឹងហើយធ្វើអី ឱ្យស្របតាមគោលនយោបាយរបស់រដ្ឋាភិបាល ការចូលរួមរបស់ពលរដ្ឋជារឿងសំខាន់។
មន្ត្រីសង្គមស៊ីវិលរូបនេះបន្ថែមថា ប្រសិនបើការរាយការណ៍របស់យុវជនរូបនេះ ជាការពិត សមត្ថកិច្ចខេត្តកំពង់ចាម ត្រូវតែស្រាវជ្រាវចាត់វិធានការជាបន្ទាន់ ដើម្បីរក្សាសន្តិសុខសុវត្ថិភាពជូនពលរដ្ឋ ស្របតាមគោលនយោបាយ ភូមិ/ឃុំ/សង្កាត់មានសុវត្ថិភាព របស់រដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
