ពលរដ្ឋនៅព្រំដែនបន្ទាយមានជ័យថាមេខ្យល់សម្រុកនាំពលករទៅកាប់ឈើនៅថៃខុសច្បាប់
2018.02.09
ពលករខ្មែរនាំគ្នាទៅរកការងារធ្វើនៅប្រទេសថៃ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ថ្ងៃទី៤ ខែតុលា ឆ្នាំ២០១៦។ Photo Provided
Photo Provided
ប្រជាពលរដ្ឋរស់នៅជាប់ព្រំដែនស្រុកអូរជ្រៅ ខេត្តបន្ទាយមានជ័យលើកឡើងថា ក្រុមមេខ្យល់សម្រុកនាំពលករខ្មែរជាច្រើននាក់ ឆ្លងដែនទៅលួចកាប់ឈើក្នុងទឹកដីថៃខុសច្បាប់។ អ្នកភូមិសម្ដែងការព្រួយបារម្ភថា ការនាំពលករចូលទៅកាប់នេះ គឺប្រឈមនឹងគ្រោះថ្នាក់ដល់អាយុជីវិត។ ពលរដ្ឋបន្ថែមថា អាជ្ញាធរមិនបានទប់ស្កាត់សកម្មភាពនេះនៅឡើយទេ។
ពលរដ្ឋនៅជាប់ព្រំដែនស្រុកអូរជ្រៅទទូចឲ្យអាជ្ញាធរពាក់ព័ន្ធចាត់វិធានការទៅលើក្រុមមេខ្យល់ ដែលនាំពលករឆ្លងដែនខុសច្បាប់ផ្ដន្ទាទោសតាមផ្លូវច្បាប់ ដើម្បីកុំឲ្យពួកគេនាំពលករឆ្លងដែនទៅប្រទេសថៃទៀត។
ប្រជាពលរដ្ឋនៅស្រុកអូរជ្រៅម្នាក់ថ្លែងមិនឲ្យបញ្ចេញឈ្មោះនៅថ្ងៃទី៩ កុម្ភៈថា ក្រុមមេខ្យល់បាននាំដឹកពលករមកពីតាមបណ្ដាខេត្តផ្សេងៗឆ្លងកាត់តាមពីផ្សារគត់តាសត ឆ្ពោះទៅព្រំដែនច្រករបៀងក្នុងឃុំអូរបីជាន់ ដើម្បីនាំឆ្លងដែនទៅលួចកាប់ឈើនៅប្រទេសថៃខុសច្បាប់។ ពលរដ្ឋរូបនេះអះអាងទៀតថា មួយរយៈចុងក្រោយនេះក្រុមមេខ្យល់សម្រុកនាំពលករឆ្លងដែនកាន់តែច្រើន ដោយពុំមានអាជ្ញាធរណាទប់ស្កាត់នោះឡើយ៖ «ឥឡូវគេមិនសូវដឹកចូលទេគេច្រើនឈប់ត្រឹមផ្សារគត់តាសត ហើយគេហៅឡាន ពីព្រំដែនទៅដឹកយកមក។ ខ្ញុំឃើញមានខោអាវមានវ៉ាលីស៍សំពីងសំពោងក្នុងឡាន ហើយខ្ញុំសួរថាអូនមកពីណា ខ្លះថាមកខេត្តកំពង់ធំ តែយូរៗទៅក៏ក្លាយជាមិត្តភ័ក្ដិនឹងគ្នា ក៏ជិះឡានជុំគ្នា ដោយរថយន្តមួយមានគ្នាប្រមាណ១០នាក់»។
ពលរដ្ឋរូបនេះបន្ថែមទៀតថា ក្រុមមេខ្យល់នាំពលករឆ្លងដែនភាគច្រើននៅពេលយប់ ដោយចេញតាមច្រករបៀងព្រំដែនណងចាន់ និងច្រកជោគជ័យ ក្នុងស្រុកអូរជ្រៅ ខេត្តបន្ទាយមានជ័យ។
អាស៊ីសេរីពុំទាន់អាចទាក់ទងមន្ត្រីច្រករបៀងព្រំដែនទាំងនេះ បាននៅឡើយទេនៅថ្ងៃទី៩ កុម្ភៈ ដោយទូរស័ព្ទនៅក្រៅប្រព័ន្ធសេវា។
ទោះជាយ៉ាងណាអភិបាលស្រុកអូរជ្រៅ លោក លី សុវណ្ណរិទ្ធ មានប្រសាសន៍ថា ខាងសាលាស្រុកពុំទាន់ទទួលព័ត៌មានជុំវិញពីការនាំពលករឆ្លងដែន ទៅកាប់ឈើនៅប្រទេសថៃនេះនៅឡើយទេ។ ប៉ុន្តែ លោកអះអាងថា អាជ្ញាធរខេត្តកំពុងរឹតបន្តឹងចំពោះពលករឆ្លងដែនខុសច្បាប់ ហើយថែមទាំងបើកការិយាល័យធ្វើប័ណ្ណឆ្លងដែន រយៈពេលខ្លីជូនពលរដ្ឋនៅសាលាខេត្តទៀតផង៖ «បាទរាល់ថ្ងៃនេះពួកគាត់កំពុងតែធ្វើប័ណ្ណឆ្លងដែនទៅធ្វើការនៅប្រទេសថៃ ប៉ុន្តែមិនទៅឆ្ងាយទេ។ យើងអត់ទាន់ដឹងថា ពីណាជាមេខ្យល់ដើម្បីដឹកជញ្ជូនពលករនៅឡើយទេ ព្រោះប្រជាពលរដ្ឋរាល់ថ្ងៃនេះគាត់ឆ្លងដែនមានប័ណ្ណឆ្លងដែនទៅធ្វើការនៅថៃនឹង»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យលោក ស៊ុំ ច័ន្ទគា កត់សំគាល់ថា ពលករឆ្លងដែនទៅកាប់ឈើនៅក្នុងទឹកដីថៃខុសច្បាប់នេះ ប្រឈមនឹងគ្រោះថ្នាក់ដល់អាយុជីវិត ព្រោះពួកគេទៅលួចកាប់ឈើក្នុងព្រៃនៅតំបន់ហាមរបស់ថៃ។ មន្ត្រីសង្គមស៊ីវិលរូបនេះអះអាងទៀតថា ការឆ្លងដែនប្រថុយប្រថាននេះ គឺដោយសារការឃុបឃិតគ្នារវាងក្រុមមេខ្យល់សមត្ថកិច្ចច្រកព្រំដែនខ្មែរ និងសមត្ថកិច្ចថៃ៖ «ខ្លះគេថាអោយទៅកាប់ដើមអាកាស្យ៉ា តែភាពពិតទៅកាប់ឈើក្រញូង ហើយថៃដេញបាញ់រត់បាសសក់សំពោង នេះក៏ដោយសារតែភាពក្រីក្រគ្មានការងារធ្វើ ដោយសារកសិករមានកសិផលហើយលក់ទៅបានថោក នេះគឺជាបញ្ហាជំងឺសង្គមរបស់កម្ពុជា ដែលរដ្ឋាភិបាលត្រូវធ្វើកំណែទម្រង់ត្រូវយ៉ាងណា ដើម្បីបញ្ចប់ការទៅក្រៅប្រទេសខុសច្បាប់បែបនេះទៀត»។
ប្រជាពលរដ្ឋនៅព្រំដែនស្រុកអូរជ្រៅ ឲ្យដឹងថា តំបន់ដែលពលករខ្មែរទៅកាប់ឈើក្នុងទឹកដីថៃ គឺនៅខេត្តចាន់បុរី និងខេត្តឈុនបុរី ដោយអ្នកខ្លះចូលទៅកាប់ឈើប្រមាណពី ២សប្ដាហ៍ ទៅ១ខែទើបត្រឡប់មកវិញ ហើយពលករដែលប្រកបរបរនេះភាគច្រើនមកពីតាមបណ្ដាខេត្តឆ្ងាយៗ ដូចជាខេត្តកំពង់ធំ កំពង់ចាម និងខេត្តតាកែវជាដើម។ ជារឿយៗសមត្ថកិច្ចថៃតែងបាញ់សម្លាប់ពលករខ្មែរ ដែលឆ្លងដែនទៅកាប់ឈើខុសច្បាប់ក្នុងទឹកដីថៃ ព្រមទាំងបានបញ្ជូនត្រឡប់មកកម្ពុជាវិញតាមព្រំដែនជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
