អ្នកនាំពាក្យសាលាខេត្តព្រះសីហនុលោក ឃាង ភារម្យ ប្រាប់អាស៊ីសេរី នៅថ្ងៃទី៣ កក្កដាថា ឃ្លាំងធ្វើពីដែក និងដំបូលប្រក់ស័ង្កសី មួយទៀតនៅក្នុងខេត្តព្រះសីហនុបានបាក់ដួលរលំរាបដល់ដីប៉ុន្តែមិនបណ្ដាលអោយមានមនុស្សស្លាប់ ឬរងរបួសទេ។
លោកបញ្ជាក់ថា ហេតុការណ៍នេះបានកើតមានឡើងនៅភូមិថ្មី សង្កាត់លេខបី ខេត្តព្រះសីហនុ តែលោក មិនបានបញ្ជាក់ពីមូលហេតុដែលបណ្ដាលអោយឃ្លាំងដែកនោះបាក់នៅឡើយទេ។លោកគ្រាន់តែបានបញ្ជាក់ថា មុនពេលបាក់តំបន់នោះមានភ្លៀងធ្លាក់ខ្លាំង៖ «យើងទុកអោយជំនាញចុះទៅសិក្សាសិនទៅថាវាបញ្ហាអ្វីគាត់ចុះទៅពិនិត្យមើលសិនទៅ។បើខ្ញុំបានព័ត៌មានអ្វីបន្តបន្ទាប់អីចាំខ្ញុំជម្រាបជូនតាមក្រោយទៀត »។
ការបាក់ឃ្លាំងធ្វើពីដែកដោយជនជាតិចិននេះបានកើតមានឡើងជាលើកទីពីរបន្ទាប់ពីអគារកម្ពស់៧ជាន់សាងសង់ឡើងដោយជនជាតិចិនបានបាក់ដួលរលំរាបដល់ដីកាលពីថ្ងៃទី២២ ខែមិថុនា នៅក្នុងខេត្តព្រះសីហនុដែលបានបណ្ដាលអោយមានមនុស្សចំនួន២៨នាក់ស្លាប់ និង ២៦ នាក់ផ្សេងទៀតរងរបួស។
របបក្រុងភ្នំពេញបានសម្រេចបង្កើតគណៈកម្មការចម្រុះដើម្បីត្រួតពិនិត្យសំណង់នៅក្នុងខេត្តព្រះសីហនុដោយមានការចូលរួមពី ១៧ ស្ថាប័នផ្សេងៗ គ្នា ដែលរួមមានការចូលរួមពីក្រសួងដែនដី ទីស្ដីការគណៈរដ្ឋមន្ត្រី ក្រសួងបរិស្ថាន និងខេត្តព្រះសីហនុផងដែរ។
អាជ្ញាធររបបក្រុងភ្នំពេញសម្រេចផ្អាកសំណង់អគារចំនួនបីជាបណ្ដោះអាសន្ន ក្រោយពីបានរកឃើញថា អគារសំណង់ទាំងនោះគ្មានច្បាប់អនុញ្ញាត និងសាងសង់ខុសបច្ចេកទេស។ក៏ប៉ុន្តែ លោក សុខ គីន ប្រធានសហព័ន្ធ សហជីពកម្មករសំណង់នៅតែដាក់មន្ទិលសង្ស័យថា របបក្រុងភ្នំពេញនឹងមិនអាចធ្វើកិច្ចការឯករាជ្យបានទេ និង បានចាត់ទុកថា រាល់វិធានការកន្លងមកគឺ អាជ្ញាធរនៅតែអនុវត្តន៍តាមស្តង់ដារពីរ ដោយមិនយកច្បាប់ទៅអនុវត្តជាគោលនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។