នគរបាលខេត្តព្រះសីហនុចាប់ជនជាតិចិន៤នាក់ ពាក់ព័ន្ធបទល្មើសបង្ខាំងមនុស្សខុសច្បាប់

អាស៊ីសេរី
2018-09-13
អ៊ីម៉ែល
មតិ
Share
បោះពុម្ព
ជនជាតិ​ចិន ដែល​សមត្ថកិច្ច​នគរបាល​ខេត្ត​ព្រះសីហនុ ឃាត់​ខ្លួន​សង្ស័យ​ពី​បទ​ជំរិត​ទារ​ប្រាក់​តាម​ប្រព័ន្ធ​បច្ចេកវិទ្យា​ទំនើប នា​កន្លែង​ស្នាក់នៅ ស្ថិត​ក្នុង​សង្កាត់៣ ក្រុង​ព្រះសីហនុ កាល​ពី​ព្រឹក​ថ្ងៃ​ទី​៣១ ខែ​តុលា ឆ្នាំ​២០១៥។
ជនជាតិ​ចិន ដែល​សមត្ថកិច្ច​នគរបាល​ខេត្ត​ព្រះសីហនុ ឃាត់​ខ្លួន​សង្ស័យ​ពី​បទ​ជំរិត​ទារ​ប្រាក់​តាម​ប្រព័ន្ធ​បច្ចេកវិទ្យា​ទំនើប នា​កន្លែង​ស្នាក់នៅ ស្ថិត​ក្នុង​សង្កាត់៣ ក្រុង​ព្រះសីហនុ កាល​ពី​ព្រឹក​ថ្ងៃ​ទី​៣១ ខែ​តុលា ឆ្នាំ​២០១៥។
Photo: RFA

មន្ត្រី​ឃ្លាំមើល​ការអភិវឌ្ឍ​សង្គម និង​អាណាព្យាបាល រស់នៅ​ខេត្ត​ព្រះសីហនុ ព្រួយបារម្ភ​អំពី​បញ្ហា​អសន្តិសុខ បន្ទាប់ពី​ទីតាំង​ល្បែងស៊ីសង​ទាំង​ស្របច្បាប់ និង​គ្មាន​ច្បាប់ បានកើត​មាន​រីក​ដូច​ផ្សិត ហើយ​សមត្ថកិច្ច​គ្រប់គ្រង​មិនទាន់​បានល្អ ដែល​តែង​បង្ក​ឲ្យ​កើតមាន​បទល្មើស​ចាប់ជំរិត​មនុស្ស​ជា​បន្តបន្ទាប់​មកនេះ​។​

​សមត្ថកិច្ច​នគរបាល​នៃ​ស្នងការដ្ឋាន​ខេត្ត​ព្រះសីហនុ បាន​ឲ្យ​ដឹងថា បាន​ឃាត់ខ្លួន​ជនសង្ស័យ​ជនជាតិ​ចិន​៤​នាក់ ពាក់ព័ន្ធ​ករណី​បទល្មើស​ចាប់​បង្ខាំង​មនុស្ស​ខុសច្បាប់ និង​ធ្វើ​ទារុណកម្ម​។

​មន្ត្រី​សង្គម​ស៊ីវិល និង​ប្រជាពលរដ្ឋ​មួយចំនួន​រស់នៅ​ខេត្ត​ព្រះសីហនុ បង្ហាញ​ការព្រួយបារម្ភ​ជាថ្មីទៀត នៅ​គ្រា​បទល្មើស​ចាប់​បង្ខាំង​មនុស្ស​ខុសច្បាប់​ ជំរិត​ទារប្រាក់ ដែលមាន​ជនសង្ស័យ​ជា​ជន​ជាតិចិន បាន​បន្តធ្វើ​សកម្មភាព នាទី​ប្រជុំជន​ក្នុង​ក្រុងព្រះសីហនុ​។​

​ពួកគេ​សំណូមពរ​ដល់​សមត្ថកិច្ច​ស្ថាប័ន​ពាក់ព័ន្ធ ពិសេស​កម្លាំង​នគរបាល និង​កងរាជអាវុធហត្ថ​ខេត្ត​ព្រះសីហនុ ឲ្យ​ជួយ​បង្កើន​សកម្មភាព​ការងារ របស់ខ្លួន ឲ្យ​បាន​ច្រើន​ថែមទៀត ដើម្បី​រក្សា​សន្តិសុខ​សុវត្ថិភាព​ជូន​ប្រជាពលរដ្ឋ ភ្ញៀវទេសចរ និង​អ្នកវិនិយោគទុន​។​

អ្នកស្រី ជាប សុធា​រី អ្នកសម្របសម្រួល​សមា​គម​អាដហុក (Adhoc) ប្រចាំខេត្ត​ព្រះសីហនុ ស្ថិត​ក្នុងចំណោម​​អាណាព្យាបាល និង​មន្ត្រី​សង្គម​ស៊ីវិល​ច្រើន​ទៀត មានប្រសាសន៍ថា រាល់ថ្ងៃនេះ​ឃើញ​មាន​ជនជាតិ​ចិន​បានបង្ហាញ​វត្តមាន​ច្រើន នៅក្នុង​ក្រុងព្រះសីហនុ និង​ប្រកប​អាជីវកម្ម​ផ្សេងៗ ក្នុងនោះ​ភាគច្រើន​គឺ​ប្រកប​អាជីវកម្ម​​ល្បែងស៊ីសង សណ្ឋាគារ កាស៊ីណូ ហាង​ម៉ាស្សា និង​ហាង​លក់ដូរ​ចំណីអាហារ​ជាដើម ។​

​អ្នកស្រី សុធា​រី បាន​កត់សម្គាល់ថា ជម្លោះ​ដែល​បង្កដោយ​​ជនជាតិ​ចិន បាន​កើតមាន​ច្រើន​ករណី​។ ក្នុងនោះ​បទល្មើស​វាយ​កាប់​ចាក់ និង​បទល្មើស​ចាប់​បង្ខាំង​មនុស្ស​ជំរិត​ទារប្រាក់ ក៏បាន​កើតមាន​ជា​បន្តបន្ទាប់​។​ «»

​ការព្រួយបារម្ភ របស់​ប្រជាពលរដ្ឋ រស់នៅ​ខេត្ត​ព្រះសីហនុ​ជាថ្មីទៀត​នេះ បាន​កើតមាន​​បន្ទាប់ពី កាល​ពី​ថ្ងៃទី​១០ ខែកញ្ញា កម្លាំង​សមត្ថកិច្ច នៃ​ស្នងការដ្ឋាន​នគរបាល​ខេត្ត​ព្រះសីហនុ  បាន​ចុះបង្ក្រាប​ករណី​បទល្មើស​​បង្ខាំង​មនុស្ស​ខុសច្បាប់​មួយ​ករណី ដោយបាន​ឃាត់ខ្លួន​បុរស​ដែលជា​ជនសង្ស័យ​ជនជាតិ​ចិន​ចំនួន ៤​នាក់ និង​រំដោះ​ជនរងគ្រោះ​បាន​ចំនួន​ ២​នាក់ ចេញពី​កណ្តាប់ដៃ​ជនល្មើស​។​

បទល្មើស​នេះ ជនសង្ស័យ​បានធ្វើ​សកម្មភាព​នៅសណ្ឋាគារ និង​កាស៊ីណូ​ខ្សាច់មាស ជាន់​ទី​៤ ក្នុង​បន្ទប់​លេខ​៤០៩ ស្ថិតនៅ​ក្រុមទី​១៥ ភូមិ​៤ សង្កាត់​៤ ក្រុង​-​ខេត្ត​ព្រះសីហនុ  ដោយ​ជនសង្ស័យ​ចំនួន ៤​នាក់ បាន​ចាប់​បង្ខាំង​បុរស​ម្នាក់ ​និង​ស្ត្រី​ម្នាក់​ធ្វើ​ទារុណកម្ម និង​ចាប់បាន​វត្ថុតាង​ដូចជា ពិល​ឆក់​ចំនួន​២​គ្រឿង និង​រថយន្ត ១​គ្រឿង​។​

​អ្នកស្រី ជាប សុធា​រី បាន​​កត់សម្គាល់​ថា បទល្មើស​បាន​កើតឡើង​ដោយសារតែ​ល្បែងស៊ីសង​បាន​កើតមាន​ព្រោងព្រាត នាទី​ប្រជុំជន​ក្នុង​ក្រុង​ទេសចរណ៍​មួយ​នេះ ទាំង​មានច្បាប់ និង​មិនទាន់​មានច្បាប់ ហើយ​អាជ្ញាធរ​គ្រប់គ្រង​មិនទាន់​បានល្អ​។​ «»

​កម្លាំង​សមត្ថកិច្ច​នគរបាល​​ខេត្ត​ព្រះសីហនុ  បាន​រំដោះ​​ជនរងគ្រោះ​ជា​ជនជាតិ​ចិន​ចំនួន​២​នាក់ និង​ឃាត់ខ្លួន​បាន​មនុស្ស​ប្រុស​ជា​ជនសង្ស័យ​ជា​ជនជាតិ​ចិន​ចំនួន​៤​នាក់  និង​ចាប់បាន​វត្ថុតាង​ដូចជា ពិល​ឆក់​ចំនួន​២​គ្រឿង​ និង រថយន្ត ១​គ្រឿង​។​

​សមត្ថកិច្ច​​នគរបាល​​ឲ្យ​ដឹងថា ករណី​ខាងលើនេះ បាន​កើតឡើង​ដោយសារ ជនរងគ្រោះ​បាន​ធានា លុយ​ចំនួន ១០០.០០០​យ័ន  ប្រមាណ​ជិត មួយ​ម៉ឺន ប្រាំ​​ពាន់​ដុល្លារ ពី​ក្រុម​ជនសង្ស័យ ដើម្បី​ឲ្យ​មិត្ត​ភ័ក្ត្រ​យក​ទៅ​​លេងល្បែង​​នៅ​កាស៊ី​ណូ ឆាង​យូ ពេល​លេង​ចាញ់​ មិត្ត​ភ័​ក្ត្រិ​របស់​ជនរងគ្រោះ​គ្មាន​​លុ​យ​សង​ក្រុម​ជនសង្ស័យ ក៏បាន​ចាប់​ជនរងគ្រោះ​ឃុំឃាំង​ក្នុង​បន្ទប់ ហើយ​ធ្វើ​ទារុណកម្ម វាយ​ធ្វើបាប ប្រើ​ពិល​ឆក់ បង្ខំ​ឲ្យ​ជនរងគ្រោះ​ស​សេរ​លិខិត​ជំពាក់​ប្រាក់​។​

​សមត្ថកិច្ច​នគរបាល​ឲ្យ​ដឹងថា បច្ចុប្បន្ន​ជនសង្ស័យ​ខាងលើនេះ ការិយាល័យ​នគរបាល​ព្រហ្មទណ្ឌ​កម្រិត​ស្រាល នៃ​ស្នងការដ្ឋាន​នគរបាល​ខេត្ត​ព្រះសីហនុ កំពុង​បន្ត​នីតិវិធី​តាមផ្លូវ​ច្បាប់​៕

ព័ត៌មាន (0)
Share
គេហទំព័រ​ទាំងមូល