អាជ្ញាធរ​ខណ្ឌ​ជ្រោយ​​ចង្វារ​​ចាប់​ខ្លួន​​មន្ត្រី​យោធា​​ម្នាក់ ដោយ​សារ​​មិន​គោរព​​បម្រាម​​រដ្ឋាភិបាល

ដោយ អាស៊ីសេរី
2021-04-20
Share
អាជ្ញាធរ​ខណ្ឌ​ជ្រោយ​​ចង្វារ​​ចាប់​ខ្លួន​​មន្ត្រី​យោធា​​ម្នាក់ ដោយ​សារ​​មិន​គោរព​​បម្រាម​​រដ្ឋាភិបាល (ឆ្វេង) មន្ត្រីនគរបាលយាមប្រចាំការនៅរង្វល់មូលជ្រោយចង្វារត្រើយខាងកើតបានរងរបួសក្រោយពេលរងអំពើហិង្សាពីមន្ត្រីយោធាឈ្មោះ ខៀវ ចាន់​សុភក្ត្រា កាលពីថ្ងៃទី២០ ខែមេសា។
រូប៖ ហ្វេសប៊ុក អគ្គស្នងការនគរបាលជាតិ។

សមត្ថកិច្ច​ចាប់​ខ្លួន​មន្ត្រី​យោធា​ម្នាក់​បម្រើ​ការ​នៅ​ក្រសួង​ការពារ​ជាតិ ឈ្មោះ​ ខៀវ ចាន់​សុភក្ត្រា វ័យ​៣១​ឆ្នាំ បញ្ជូន​ទៅ​សាក​សួរ​នៅ​អធិការ​ខណ្ឌ​ជ្រោយ​ចង្វារ ដើម្បី​កសាង​សំណុំរឿង​បញ្ជូន​ទៅ​តុលាការ​ក្រុង​ភ្នំពេញ​។ ការ​ចាប់​ខ្លួននេះ​ ធ្វើ​ឡើង​នៅ​ថ្ងៃ​ទី​២០ មេសា ក្រោយ​ពី​បុរស​រូប​នោះ​ ជិះ​ម៉ូតូ​ទៅ​បុក​រនាំង​ដែក​ដែល​អាជ្ញាធរ​ដាក់​បិទ​ផ្លូវ​ហាម​ពលរដ្ឋ​មិន​ឲ្យ​ធ្វើដំណើរ និង​ថែម​ទាំង​ប្រើ​ហិង្សា​ដាក់​មន្ត្រី​នគរបាល​យាម​ប្រចាំ​ការ​នៅ​គោលដៅ​នោះ​ទៀត​ផង។

ទោះ​ជា​យ៉ាង​ណា រូប​ភាព​វីដេអូ​ដែល​បង្ហោះ​នៅ​លើ​បណ្ដាញ​សង្គម ហ្វេសប៊ុក (Facebook) បង្ហាញ​ថា សមត្ថកិច្ច​៣​ទៅ​៤​នាក់ ​ក៏​បាន​ព្រួយ​គ្នា​វាយ​ដំ​ទាត់​ធាក់​ទៅ​លើ​មន្ត្រី​យោធា​រូប​នោះ​វិញ​ដែរ ទោះ​បី​ជា​ដៃ​របស់​គាត់​ជាប់​ខ្នោះ​ហើយ​ក្តី។

អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញលោក សាន សុខសីហា ប្រាប់​អាស៊ី​សេរី​ថា ករណី​នេះ គឺ​មិន​អាច​លើក​លែង​ឲ្យ​បាន​ទេ ព្រោះ​ក្នុង​អំឡុង​ពេល​នេះ រដ្ឋាភិបាល​បាន​ដាក់​ចេញ​បម្រាប​តឹងតែង​ដើម្បី​ទប់ស្កាត់​ជំងឺ​​កូវីដ-១៩​ ដែល​កំពុង​រីក​រាលដាល​កាន់​តែ​ខ្លាំង។ ​ក្នុង​កាលៈទេសៈ​ដ៏​លំបាក​នេះ លោក​ស្នើ​ឲ្យ​ពលរដ្ឋ ​បន្ត​នៅ​ផ្ទះ និង​គោរព​តាម​ចំណាត់​ការ​របស់​អាជ្ញាធរ ​នៅ​តាម​ខណ្ឌ​នីមួយ​ ដើម្បី​បញ្ចៀស​ការ​ការ​ឆ្លង​ជំងឺ​-១៩៖ «បើ​យើង​គិត​ថា​ គ្រាន់​តែ​ជា​លក្ខណៈ​ហិង្សា មិន​មែន​ស្ថិត​ក្នុង​ដំណាក់​កាល​បិទ​ខ្ទប់ អា​ហ្នឹង​ យើង​គិត​ថា វា​បញ្ហា​មួយ​ផ្សេង​។ តែ​ដំណាក់​កាល​អ្វី​ដែល​កំហុស​ធ្ងន់ធ្ងរ​គឺ​ ទី​១​ គាត់​បើក​ម៉ូតូ​ចេញ​ក្រៅ​ខុស​ពី​បម្រាម។ ទី​២​ គឺ​គាត់​បើក​ឆ្លងកាត់​បុក​បារ៉ាស់​ ដែល​ជាទី​តាំង​គេ​ហាម​បិទ​ខ្ទប់​។ នេះ​ជា​ចំណុច​សំខាន់​ដែល​ត្រូវ​ចោទ​ប្រកាន់។ យើង​កំពុង​ធ្វើការ​សាកសួរ និង​រៀប​ចំ​សំណុំ​ឯកសារ​ បើ​សិន​ជា​យើង​ទាន់ យើង​អាច​បញ្ជូន​ថ្ងៃ​ហ្នឹង។ បើ​មិន​ទាន់​ទេ​ ស្អែក​ព្រឹក»។

កាល​ពី​ថ្ងៃ​ទី​១៤ ខែ​មេសា លោក​ ហ៊ុន​ សែន សម្រេច​ដាក់​ចេញ​បម្រាប​បិទ​ខ្ទប់​រាជធានី​ភ្នំពេញ និង​ក្រុង​តាខ្មៅ នៅ​ខេត្ត​កណ្ដាល រយៈពេល​ ១៤ ​ថ្ងៃ ដោយ​​អនុវត្ត​ភ្លាម​នៅ​យប់​រំលង​អាធ្រាត្រ​ថ្ងៃ​ឈាន​ចូល​ថ្ងៃទី១៥ ខែ​មេសា។

បី​ថ្ងៃ​ក្រោយ នៅ​ថ្ងៃ​ទី​១៨ ខែមេសា អភិបាល​រាជធានី​ភ្នំពេញលោក ឃួង ស្រេង ​បាន​ចេញ​សេចក្ដី​សម្រេច​ស្ដីពី​ការ​ផាក​ពិន័យ​ចំពោះ​បុគ្គល ដែល​មិន​គោរព​បម្រាប​គោចរ​ក្នុង​អំឡុង​ពេល​បិទ​ខ្ទប់​ទីក្រុង ជា​ប្រាក់​ចាប់​ពី​ ២ លាន​រៀល (២,០០០,០០០រៀល) ដល់​៥​លាន​រៀល (៥,០០០,០០០រៀល)។

គិត​មក​ដល់​ពេល​នេះ នៅ​ទូទាំង​ប្រទេស មាន​មនុស្ស​១១នាក់​ ត្រូវ​បាន​សមត្ថកិច្ច​បញ្ជូន​ខ្លួន​ទៅ​តុលាការ និង​មនុស្ស​ប្រមាណ​ ៨០​ នាក់ តម្រូវ​ឱ្យ​ធ្វើ​កិច្ចសន្យា​អប់រំ និង​ផាក​ពិន័យ​ ដោយសារ​ពួកគេ​បាន​ប្រព្រឹត្ត​ល្មើស​នឹង​បម្រាម​រដ្ឋាភិបាល​ក្នុង​ពេល​​ទប់ស្កាត់​ការ​រីក​រាល​ដាល​ជំងឺ​កូវីដ​-១៩។

អ្នក​ដែល​ល្មើស​នឹង​បម្រាម​ទាំង​នោះ មាន​នៅ​រាជធានី​ភ្នំពេញ ខេត្ត​កណ្ដាល ខេត្ត​កំពង់ធំ ខេត្ត​កំពង់ចាម ខេត្ត​ស្វាយរៀង ខេត្ត​ព្រះសីហនុ និង​ខេត្ត​រតនគិរី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល