អាជ្ញាធរ​បិទ​គេហទំព័រ​ចំនួន​១១២ ដែល​កំពុង​ប្រព្រឹត្ត​ល្បែងស៊ីសង​ខុសច្បាប់​នៅ​កម្ពុជា

ដោយ ហ៊ុំ ចំរើន
2024.03.30
អាជ្ញាធរ​បិទ​គេហទំព័រ​ចំនួន​១១២ ដែល​កំពុង​ប្រព្រឹត្ត​ល្បែងស៊ីសង​ខុសច្បាប់​នៅ​កម្ពុជា រដ្ឋមន្ត្រី​ក្រសួង​ប្រៃសណីយ៍ និង​ទូរគមនាគមន៍ លោក ជា វ៉ាន់ដេត។
រូប៖ ហ្វេសប៊ុកក្រសួង​ប្រៃសណីយ៍

អាជ្ញាធរ​នៃ​អគ្គលេខាធិការដ្ឋាន​នៃ​គណៈកម្មការ​គ្រប់គ្រង​ល្បែង​ពាណិជ្ជកម្ម​កម្ពុជា បាន​ចាត់វិធានការ​បិទ​ខ្ទប់​គេហទំព័រ​ល្បែង​អនឡាញ​ចំនួន ១១២ ដែល​កំពុង​ធ្វើ​អាជីវកម្ម​ខុសច្បាប់​នៅ​កម្ពុជា​។ អ្នកជំនាញ​ព័ត៌មានវិទ្យា ថា ចំនួន​គេហទំព័រ​ដែល​ត្រូវ​បាន​បិទ​ខ្ទប់​នេះ មាន​ចំនួន​តិចតួច​នៅឡើយ ខណៈ​គេហទំព័រ​ល្បែង​ខុសច្បាប់​របស់​ប្រតិបត្តិ​ករ​នៅ​ក្រៅ​ប្រទេស​ជាច្រើន​ទៀត កំពុង​មាន​សកម្មភាព​នៅ​លើ​បណ្ដាញ​សង្គម​កម្ពុជា​នៅឡើយ។

អគ្គលេខាធិការដ្ឋាន នៃ​គណៈកម្មការ​គ្រប់គ្រង​ល្បែង​ពាណិជ្ជកម្ម​កម្ពុជា បាន​ផ្សាយ​របាយការណ៍ កាលពី​ថ្ងៃទី​២៩ ខែមីនា ស្ដីពី​ការ​សហការ​ជាមួយ​ក្រសួង ប្រៃសណីយ៍ និង​ទូរគមនាគមន៍ បាន​រាំង​ខ្ទប់​គេហទំព័រ​ល្បែង​អនឡាញ​ចំនួន​១១២ ដែល​កំពុង​ធ្វើ​សកម្មភាព​ប្រព្រឹត្ត​ល្បែងស៊ីសង​ខុសច្បាប់​គ្រប់​ប្រភេទ​នៅ​កម្ពុជា ក្នុង​រយៈពេល​បី​ខែ​នៃ​ដើម​ឆ្នាំ​២០២៤ នេះ។

ការ​រាំង​ខ្ទប់​គេហទំព័រ​ល្បែង​ខុសច្បាប់​នេះ ធ្វើឡើង​តាម​សំណើ​របស់​គណៈកម្មការ​គ្រប់គ្រង​ល្បែង​ពាណិជ្ជកម្ម​កម្ពុជា ជាច្រើន​លើក ឱ្យ​ស្ថាប័ន​ជំនាញ​ពាក់ព័ន្ធ ចាត់វិធានការ​រាំង​ខ្ទប់​គេហទំព័រ​ល្បែង​ខុសច្បាប់ ក្រោយ​រក​ឃើញ​ថា គេហទំព័រ​ទាំងនេះ​កំពុង​រីក​ដុះដាល​កាន់តែ​ច្រើន និង​សកម្ម​ក្នុង​ការ​ផ្សព្វផ្សាយ​ពាណិជ្ជកម្ម​អំពី​ល្បែង​កាស៊ីណូ​អនឡាញ នៅ​លើ​បណ្ដាញ​សង្គម​ហ្វេសប៊ុក (Facebook) យូធូប (Youtube) និង​តេឡេក្រាម (Telegram)

អ្នក​សិក្សា​ផ្នែក​ព័ត៌មានវិទ្យា លោក នង ធារ៉ា ប្រាប់​វិទ្យុ​អាស៊ីសេរី នៅ​ថ្ងៃទី​៣០ ខែ​មីនា ថា វិធានការ​ទប់ស្កាត់​គេហទំព័រ​ល្បែង​អនឡាញ​ខុសច្បាប់​របស់​អាជ្ញាធរ និង​ក្រសួង​ពាក់ព័ន្ធ ហាក់​គ្មាន​ប្រសិទ្ធភាព​នោះ​ទេ ព្រោះ​ចំនួន​វេបសាយ ឬ​គេហទំព័រ ដែល​អាជ្ញាធរ​បាន​បិទ​ខ្ទប់​នេះ ហាក់​មាន​ចំនួន​តិចតួច​នៅឡើយ បើ​ធៀប​នឹង​វេបសាយ​ល្បែង​ខុសច្បាប់ ដែល​កំពុង​វាយលុក​លើ​បណ្ដាញ​សង្គម​។ លោក​សង្កេត​ឃើញ​ថា ការ​រាំង​ខ្ទប់​វេប​សាយ​ល្បែង​អនឡាញ ក៏​មិន​ខុសពី​ការ​ចាប់​ក្ដាម​ដាក់​លើ​ចង្អេរ​នោះ​ទេ ដោយ​អ្នកបង្កើត​វេបសាយ​ល្បែង​ទាំងនោះ​នៅ​មាន​ប្រើប្រាស់​វិធីសាស្ត្រ​ច្រើនណាស់ ដើម្បី​ដំណើរការ។

លោក នង ធារ៉ា៖ «ដើម្បី​ឱ្យ​មាន​ប្រសិទ្ធភាព លុះត្រាតែ​ចាត់វិធានការ​តាមផ្លូវ​ច្បាប់​។ ប្រសិនបើ​គេ​បើក​យើង​បិទ ដូច​ចាប់​ក្ដាម​ដាក់​លើ​ចង្អេរ​ដូច្នេះ​ដែរ វា​អត់​មាន​ប្រសិទ្ធភាព​អ្វី​នោះ​ទេ ហើយ​វា​ត្រូវការ​ចំណាយពេល​យូរ​ទៀត ខាត​ទាំង​ធនធាន​ជាតិ ខាត​ទាំង​សេដ្ឋកិច្ចជាតិ​។ បិទ​មួយ​បង្កើតបាន​មួយ​តើ មាន​អ្វី​ពិបាក​! ថ្ងៃ​ហ្នឹង​បិទ​មួយរយ ស្អែក​ខានស្អែក​បើក​មួយរយ​ទៀត​ក៏បាន អាហ្នឹង​វា​មាន​ស្អី​ពិបាក​។ វា​មាន​វេបសាយ វា​មាន ហូស្តីង (Hosting) វា​មាន ដូមេន​(Domain) មក អ៊ីចឹង​បង្កើត​តែមួយ​ភ្លែត​ហ្នឹង មាន​អ្វី​ពិបាក»

ទោះជា​យ៉ាងណា ក្រៅពី​ពង្រីក​ការ​ផ្សព្វផ្សាយ​នៅ​លើ​បណ្ដាញ​សង្គម និង​គេហទំព័រ​ហើយ​នោះ ល្បែង​ខុសច្បាប់​ទាំងនេះ បាន​ពង្រីក​ការផ្សាយពាណិជ្ជកម្ម ដែល​ភ្ជាប់​ជាមួយ​វីដេអូ​របស់​សារព័ត៌មាន​អនឡាញ​មួយចំនួន និង​វីដេអូ​របស់​អ្នករក​លុយ​តាម​អនឡាញ (MMO) មួយចំនួន​ផង​ដែរ។

លេខាធិការ​នៃ​គណៈកម្មការ​គ្រប់គ្រង​ល្បែង​ពាណិជ្ជកម្ម លោក រស់ ភីរុណ ប្រាប់​វិទ្យុ​អាស៊ីសេរី ថា គេហទំព័រ​ល្បែង​អនឡាញ​ខុសច្បាប់​ទាំង ១១២ ដែល​ក្រសួង​ប្រៃសណីយ៍ រាំង​ខ្ទប់​បាន​នេះ គឺ​មាន​ប្រព័ន្ធ​ប្រតិបត្តិការ​(Server) នៅក្នុង​ស្រុក ដោយឡែក​ចំពោះ​គេហទំព័រ​ដែល​មាន​ប្រព័ន្ធ​ប្រតិបត្តិការ​នៅ​ក្រៅ​ប្រទេស អាជ្ញាធរ​មិន​ទាន់​អាច​រាំង​ខ្ទប់​បាន​នោះ​ទេ​។ លោក រស់ ភីរុណ បញ្ជាក់​ថា ការទប់ស្កាត់​ល្បែង​អនឡាញ​នៅ​លើ​ប្រព័ន្ធ​ឌីជីថល នេះ មាន​ភាព​ពិបាក ជាង​ការ​បង្ក្រាប​ល្បែង​ស៊ីសង​នៅ​តាម​សហគមន៍។

លោក រស់ ភីរុណ៖ «ព្រោះ​អី​ពាក់ព័ន្ធ​នឹង​សម័យ​ឌីជីថល នេះ សូម្បីតែ​ប្រទេស​គេ​ជឿនលឿន ក៏​ជួប​បញ្ហា​ហ្នឹង​ទាំងអស់​។ ខ្ញុំ​ទៅ​ធ្វើ​ការ​សិក្ខាសាលា​ជាមួយ​សមាគម​បញ្ញត្តករ​អន្តរជាតិ លោក​បារម្ភ​រឿង​ហ្នឹង ពិបាក​គ្រប់​តែ​គ្នា​ដែរ​ហ្នឹង រឿង​ហ្នឹង​។ គេ​កំពុងតែ​អនុវត្ត​កិច្ចការ​ហ្នឹង​ដែល​មាន​ការ​លំបាក​ដូចគ្នា​ទាំងអស់»

ទាក់ទិន​រឿង​នេះ ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាព លោក យង់ គិមអេង យល់ឃើញ​ថា រដ្ឋាភិបាល​គួរ​ចាត់វិធានការ​ច្បាប់ ដើម្បី​ធានា​លើ​ប្រសិទ្ធភាព​នៃ​វិធានការ​បិទ​ខ្ទប់​នេះ និង​មិន​ត្រូវ​បណ្ដោយ​ឱ្យ​គេហទំព័រ​ទាំង​នោះ​បើក​ដំណើរការ​ឡើងវិញ​ឡើយ​។ លោក​បន្ត​ថា អាជ្ញាធរ​គួរ​បង្កើន​ការ​ផ្សព្វផ្សាយ​ដល់​ប្រជាពលរដ្ឋ កុំឱ្យ​លេងល្បែង​ភ្នាល់​តាម​អនឡាញ ដើម្បី​ធ្វើ​ឱ្យ​សាជីវកម្ម​ឌីជីថល​ខុសច្បាប់​មួយ​នេះ បាត់បង់​ទៅ​ដោយ​ខ្លួនឯង។

លោក យង់ គិមអេង៖ «អ៊ីចឹង​ការដែល​ប្រកាស​ឱ្យ​គេ​លេងល្បែង​ហ្នឹង​វា​ប្រឆាំង​ជាមួយនឹង​ច្បាប់​របស់​រដ្ឋ​។ ចុះបើ​ប្រឆាំង​ជាមួយ​ច្បាប់​របស់​រដ្ឋ ហេតុអ្វី​ក៏​មិន​ព្រម​ចាត់វិធានការ​ប្រឆាំង​ជាមួយ​គាត់ កុំឱ្យ​គាត់​ប្រព្រឹត្ត​ការ​ល្បែងស៊ីសង ទាក់ទាញ​ឱ្យ​ពលរដ្ឋ​ទៅលេង​ល្បែងស៊ីសង អាហ្នឹង​វា​យ៉ាងម៉េច​? វា​ខុសគ្នា​យ៉ាងម៉េច​? រដ្ឋាភិបាល​គួរតែ​បញ្ជាក់​ពី​បញ្ហា​ហ្នឹង​ឱ្យ​បាន​ច្បាស់លាស់​ដែរ​បាទ»

អ្នកជំនាញ​ព័ត៌មានវិទ្យា និង​មន្ត្រី​សង្គម​ស៊ីវិល ជំរុញ​ឱ្យ​រដ្ឋាភិបាល សហការ​ជាមួយ​ក្រុមហ៊ុន​បណ្ដាញ​សង្គម ដើម្បី​រាំង​ខ្ទប់​គេហទំព័រ​ល្បែង​ខុសច្បាប់​នៅ​ក្រៅ​ប្រទេស និង​អនុវត្ត​ច្បាប់​ទៅលើ​ជនល្មើស និង​អ្នក​ចូលរួម​ផ្សព្វផ្សាយ ទើប​ការ​បង្ក្រាប​ល្បែង​ខុសច្បាប់​ទាំងនេះ​មាន​ប្រសិទ្ធភាព៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។