អាជ្ញាធរ​បន្ត​បង្ក្រាប​កូដករ​ណាហ្គាវើលដ៍​មិន​ឱ្យ​តវ៉ា​ទាមទារ​ដំណោះស្រាយ​ការងារ

2022.05.12
Share on WhatsApp
Share on WhatsApp
អាជ្ញាធរ​បន្ត​បង្ក្រាប​កូដករ​ណាហ្គាវើលដ៍​មិន​ឱ្យ​តវ៉ា​ទាមទារ​ដំណោះស្រាយ​ការងារ ក្រុម​កូដករ​បុគ្គលិក​ក្រុមហ៊ុន​កាស៊ីណូ​ណាហ្គាវើលដ៍ (NagaWorld) បន្ត​ធ្វើ​កូដកម្ម​រក​ដំណោះស្រាយ​ក្នុង​វិវាទការងារ នៅ​ខាងមុខក្រុមហ៊ុន នៅ​ថ្ងៃ​ទី១២ ខែឧសភា ឆ្នាំ២០២២។
រូបភាពពីពលរដ្ឋ

អាជ្ញាធរ​ក្រុង​ភ្នំពេញ​ជា​ច្រើន​នាក់​ បន្ត​រារាំង​ក្រុម​កូដករ​បុគ្គលិក​ក្រុមហ៊ុន​កាស៊ីណូ​ណាហ្គាវើលដ៍ (NagaWorld) មិន​ឱ្យ​ពួក​គាត់​ឈរ​ទាមទារ​ដំណោះស្រាយ​នៅ​ក្បែរ​អគារ​ក្រុមហ៊ុន​ឡើយ​នៅ​ថ្ងៃ​ទី១២ ឧសភា។ ដូច​សព្វ​ដង​ដែរ អាជ្ញាធរ​បាន​ឡោមព័ទ្ធ​កូដករ​ដោយ​បង្ខំ​ឱ្យ​ឡើង​ឡាន​ក្រុង រួច​បន្ត​ដឹក​ទម្លាក់​ពួកគាត់​នៅ​ខណ្ឌ​ព្រែកព្នៅ រហូត​ដល់​ម៉ោង​ប្រមាណ ៤ល្ងាច ទើប​អាជ្ញាធរ​ដឹក​កូដករ​ទម្លាក់​នៅ​ទីលាន​ប្រជាធិបតេយ្យ​វិញ។

កូដករ​ម្នាក់ កញ្ញា ផុន ករុណា​ ប្រាប់​វិទ្យុ​អាស៊ី​សេរី​ថា អាជ្ញាធរ​បាន​ព្យាយាម​ការពារ​ភាគី​ក្រុមហ៊ុន ទើប​វិវាទ​ការងារ​ដ៏​រ៉ាំរ៉ៃ​នេះ​អូស​បន្លាយ​ពេល​គ្មាន​ច្រក​ចេញ។ កញ្ញា​បន្ត​ថា ការ​បង្ក្រាប​របស់​អាជ្ញាធរ​ជា​បន្ត​បន្ទាប់​នេះ​ កាន់​តែ​ធ្វើ​ឱ្យ​កូដករ​ទទួល​រង​ភាព​អយុត្តិធម៌​បន្ថែម​ទៀត។ កញ្ញា​ថ្កោលទោស​ទង្វើ​របស់​អាជ្ញាធរ​ ថា​កំពុង​តែ​អនុវត្ត​តួនាទី​ផ្ទុយ​ពី​ច្បាប់​ និង​បាន​បំពាន​សិទ្ធិ​ពលរដ្ឋ​ដែល​គ្រាន់​តែ​ប្រើ​សិទ្ធិ​ស្រប​ច្បាប់​ទាមទារ​សិទ្ធិ​សេរី​ភាព​ការងារ៖ «កូដកម្ម​ហ្នឹង​គឺ​នៅ​តែ កម្លាំង​អាជ្ញាធរ​នៅ​តែ​បង្ក្រាប នៅ​តែ​រុញច្រាន​យើង។ និយាយ​ទៅ​ពួក​ខ្ញុំ ឈឺចាប់ និង​ខក​បំណង​ជា​មួយ​បងៗ អាជ្ញាធរ ដែល​គាត់​នៅ​តែ​មក​យក​ទ្រូង​បាំង​ក្រុមហ៊ុន​ណាហ្គាវើលដ៍​ ទាំង​ដែល​ពួក​ខ្ញុំ​ទាមទារ​រក​យុត្តិធម៌​ពី​ថៅកែ។ តែ​គាត់​នៅ​តែ​រារាំង នៅ​តែ​បង្ក្រាប​ប្រើ​អំពើ​ហិង្សា​ ពួក​ខ្ញុំ​ពិត​ជា​ខក​បំណង​ជា​មួយ​កង​កម្លាំង​អាជ្ញាធរ​ ដែល​គាត់​អត់​មាន​វិធានការ​អី​ដើម្បី​ជួយ​រក​ដំណោះស្រាយ​ឱ្យ​ពួក​ខ្ញុំ»

រយៈពេល​ប៉ុន្មាន​ថ្ងៃ​ជាប់​គ្នា​នេះ អាជ្ញាធរ​បង្កើន​ការ​បង្ក្រាប​កាន់​តែ​ខ្លាំង​លើ​ក្រុម​កូដករ​ ដោយ​អាជ្ញាធរ​បាន​វាយ ទាត់​ធាក់ កូដករ​ដល់​ក្នុង​រថយន្ត​ ដែល​បណ្ដាល​ឱ្យ​កូដករ​ជា​ស្ត្រី​មួយ​ចំនួន​រង​របួស​ផង​ដែរ។

កាលពីថ្ងៃទី១១ ឧសភា ក្រុម​សហជីព​ ចេញ​សេចក្ដីថ្លែងការណ៍ ​ថ្កោលទោស​ចំពោះ​ទង្វើ​អាជ្ញាធរ​ និង​ទាមទារ​ឱ្យ​បញ្ឈប់​ការ​បៀតបៀន គំរាម​កំហែង និង​ប្រើ​អំពើ​ហិង្សា​លើ​កូដករ​ត​ទៅ​ទៀត។ ទន្ទឹង​គ្នា​នេះ ក្រុម​សហជីព ​ស្នើ​ដល់​អាជ្ញាធរ​ត្រូវ​ឈរ​លើ​ភាព​អព្យាក្រឹត្យ​ និង​ត្រូវ​ជំរុញ​ឱ្យ​ភាគី​ក្រុមហ៊ុន​ដោះស្រាយ​វិវាទ​ការងារ​នេះ ស្រប​តាម​ច្បាប់​ស្ដីពី​ការងារ និង​អនុលោម​តាម​អនុសញ្ញា​ស្នូល​របស់​អង្គការ​ពលកម្ម​អន្តរជាតិ (ILO)

ទោះ​យ៉ាង​ណា​ក្ដី ក្រុម​កូដករ​ថា ពួកគាត់​នឹង​នៅ​តែ​បន្ត​ចេញ​ធ្វើ​កូដកម្ម​ដោយ​សន្តិវិធី ដើម្បី​ទាមទារ​ឱ្យ​ថៅកែ​ក្រុមហ៊ុន​បញ្ឈប់​ការ​រើសអើង​សហជីព​ និង​ត្រូវ​ទទួល​យក​បុគ្គលិក​ចំនួន២០០នាក់​ឱ្យ​ចូល​បម្រើ​ការងារ​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល