តំណាងកម្មកររោងចក្រនៅកំពង់ចាមអះអាងថាកម្មករព្រមចូលធ្វើការដោយមានគំនាប
2014.07.30
កម្មកររោងចក្រស្បែកជើង កាលីង តុន (CALING TON) ធ្វើកូដកម្មនៅមុខច្រកចូលរោងចក្រនាឃុំខ្នុរដំបង ស្រុកជើងព្រៃ ខេត្តកំពង់ចាម នៅថ្ងៃទី២៥ ខែកក្កដា ឆ្នាំ២០១៤។
កម្មកររោងចក្រស្បែកជើង កាលីង តុន (Caling Ton) ដែលមានទីតាំងនៅឃុំខ្នុរដំបង ស្រុកជើងព្រៃ ខេត្តកំពង់ចាម ព្រមចូលធ្វើការវិញហើយនៅថ្ងៃទី៣០ កក្កដា។ ការព្រមចូលធ្វើការវិញនេះ តំណាងកម្មករអះអាងថា ដោយសារមានគំនាបផ្សេងៗ ពីព្រោះការទាមទារលក្ខខណ្ឌការងាររបស់ពួកគាត់ទាំង ៨ចំណុចពីមុននោះ គឺខាងរោងចក្រមិនទាន់ផ្តល់បានឡើយ។
ប្រធានមន្ទីរការងារ បញ្ជាក់ថា មានការដោះស្រាយបញ្ហាទាំងនោះជាកញ្ចប់ ហើយកម្មករព្រមចូលធ្វើការដោយសារព្រមទទួលយកដំណោះស្រាយគ្មានការបង្ខិតបង្ខំទេ។
តំណាងកម្មករ និងជាប្រធានសហជីពសំឡេងយុវជនខ្មែរក្នុងរោងចក្រស្បែកជើង កាលីង តុន លោក សួស សំនៀង ឱ្យដឹងថា នៅព្រឹកថ្ងៃទី៣០ កក្កដា នេះ កម្មករទាំងអស់បានត្រឡប់ចូលធ្វើការធម្មតាវិញ ប៉ុន្តែពួកគាត់ទាំងនោះមិនស្ងប់ចិត្តឡើយ។ លោកបញ្ជាក់ថា ការមិនស្ងប់ចិត្តនោះ គឺដោយសារការទាមទារលក្ខខណ្ឌការងាររបស់ពួកគាត់ទាំង ៨ចំណុច រួមមានការសុំប្រាក់ថ្លៃបាយមួយថ្ងៃ ៤ពាន់រៀល ឬបាយមួយពេល សុំដំឡើងប្រាក់លើកទឹកចិត្ត ១៥ដុល្លារ ប្រាក់សោហ៊ុយធ្វើដំណើរ ១៥ដុល្លារ រួមនិងចំណុចផ្សេងៗមួយចំនួនទៀត គឺខាងភាគីរោងចក្រមិនទាន់ផ្តល់ជូនទាំងស្រុងនោះឡើយ។
លោកបន្ថែមថា កាលពីថ្ងៃទី២៩ កក្កដា ភាគីតំណាងកម្មករ តំណាងរោងចក្រ តំណាងសមាគមនិយោជក និងខាងអាជ្ញាធរ បានប្រជុំពិភាក្សាគ្នាដើម្បីរកចំណុចរួមទៅលើការទាមទាររបស់កម្មករ។ ខាងរោងចក្រ បានផ្តល់ប្រាក់បាយម្នាក់ ២ម៉ឺនរៀលក្នុងមួយខែ ចំណែកប្រធាន ឬកម្មករដែលស្នាក់នៅក្នុងរោងចក្រ និងមានអាហារខ្លះ ដែលកាលពីមុនរោងចក្រកាត់ប្រាក់ខែពួកគាត់ជិត ២០ដុល្លារ គឺប្ដូរមកកាត់ត្រឹម ១០ដុល្លារវិញ។ ក្រៅពីនោះ ខាងរោងចក្របិទការចរចាតែម្តង។ តំណាងកម្មករដដែលឱ្យដឹងទៀតថា កម្មករព្រមចូលធ្វើការវិញនោះ គឺដោយសារតែមានគំនាបផ្សេងៗពីខាងតុលាការ និងអាជ្ញាធរទៀតផង។
លោក សួស សំនៀង៖ «គាត់បង្ខំចិត្តទទួលយក ដោយសារតែមានគំនាបផ្សេងៗដែលធ្វើឱ្យគាត់យល់ថា សម្រេចចិត្តយកសិន។ បាទ! ក៏ដូចជាខាងតុលាការ គាត់បានចេញដីកាឱ្យបងប្អូនកម្មករចូលធ្វើការវិញនៅថ្ងៃស្អែកហ្នឹង គឺគាត់ទទួលបានអាហ្នឹង។ ក៏ដូចជាខាងប៉ូលិសខាងអីផ្សេងៗ គំនាបមកខាងសហជីព ក៏ដូចជាបងប្អូនដែលគាត់បានដឹង»។
លោកយល់ថា ប្រសិនបើតំណាងរោងចក្រនៅតែប្រកាន់ជំហររបស់ខ្លួនដូចពេលនេះបន្តទៀត វានឹងធ្វើឱ្យកម្មករទាំងអស់មិនពេញចិត្ត ហើយវានឹងអាចបង្កើតឱ្យមានកូដកម្មសាជាថ្មីក្នុងពេលឆាប់ៗមិនខានឡើយ។
អ្នកបកប្រែភាសាចិន នៅរោងចក្រ កាលីង តុន លោក ឃីម វីរៈ បញ្ជាក់ថា លោកមិនបានដឹងពីកិច្ចប្រជុំ និងគោលជំហររបស់ថៅកែរោងចក្រឡើយ ប៉ុន្តែលោកគ្រាន់តែដឹងថា កម្មករបានចូលធ្វើការវិញហើយនៅថ្ងៃទី៣០ កក្កដា នេះ។
ប្រធានមន្ទីរការងារ និងបណ្តុះបណ្តាលវិជ្ជាជីវៈ ខេត្តកំពង់ចាម លោក ឆេង ហ៊ាង មានប្រសាសន៍នៅថ្ងៃទី៣០ កក្កដា ថា កម្មករដែលយល់ព្រមចូលធ្វើការវិញនោះ គឺមិនមែនដោយសារតែមានគំនាបពីតុលាការ ឬអាជ្ញាធរនោះទេ ប៉ុន្តែពួកគាត់ព្រមចូលធ្វើការ ដោយសារតែមានការដោះស្រាយមួយសមស្របដែលធ្វើឱ្យកម្មករអាចទទួលយកបាន៖ «ខ្ញុំគិតថា មិនមែនដោយសារគាត់មិនពេញចិត្តទេ អ្វីដែលគាត់ដែលយើងបានលទ្ធផលហ្នឹង គឺមានការពេញចិត្តមានការសប្បាយរីករាយជាមួយនឹងគ្នាហើយ។ ក្រោមការដោះស្រាយសះជាហ្នឹង គឺថាមិនមានអីដូចថានៅមន្ទិលអីទៀតទេ គឺថាដោយរីករាយហើយ»។
លោកបន្តថា ក្នុងករណីដែលកម្មករមិនពេញចិត្ត ឬចង់ទាមទារអ្វីមួយពីភាគីរោងចក្រនោះ គឺពួកគាត់អាចធ្វើបាន ពីព្រោះជាសិទ្ធិសេរីភាពរបស់ពួកគាត់ដែលមានចែងក្នុងច្បាប់ការងារ ក៏ប៉ុន្តែការធ្វើបាតុកម្ម ឬកូដកម្មណាមួយនោះ គឺត្រូវធ្វើឡើងដោយស្របច្បាប់ និងមានការជូនដំណឹងមកអាជ្ញាធរឱ្យបានត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
សង្គម
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- សារជូនពរឆ្នាំថ្មី ២០២៤
- ពលរដ្ឋចាញ់បោកអ្នកស្រី ឡេង ចាន់ណា ព្រមានឡើងមកតវ៉ានៅមុខផ្ទះលោក ហ៊ុន សែន បើតុលាការខេត្តសៀមរាបពន្យារពេលដោះស្រាយ
- ទិដ្ឋភាពទូទៅ នៃពិធីបុណ្យចូលឆ្នាំខ្មែរ ក្នុងតំបន់អង្គរខេត្តសៀមរាប