ជនជាតិចិនចំនួនជាង ៥០០នាក់ ត្រូវសមត្ថកិច្ចចាប់ខ្លួនក្នុងឆ្នាំ ២០២០
2021.01.28
កាស៊ីណូណាហ្កាវើលកាលពីថ្ងៃទី ០១ មករា ឆ្នាំ ២០២០។
រូបថត៖ពលរដ្ឋម្នាក់
សមត្ថកិច្ចចាប់បានជនជាតិចិនចំនួនជាង ៥០០នាក់ កាលពីឆ្នាំ២០២០ កន្លងទៅនេះពាក់ព័ន្ធបទឧក្រិដ្ឋដែលបានប្រព្រឹត្តនៅកម្ពុជា។ តួលេខនេះ ត្រូវបានមន្ត្រីនគរបាលលើកឡើង បន្ទាប់ពីស្ថានទូតចិនប្រចាំប្រទេសកម្ពុជា បានព្រមានដល់ពលរដ្ឋចិន កាលពីថ្ងៃទី២៦ មករា មិនឱ្យលេងល្បែងស៊ីសង ព្រោះខ្លាចរងគ្រោះដោយអំពើហិង្សា និងកុំឲ្យចាញ់បោកដោយការលួងលោមផ្ដល់ប្រាក់ខែច្រើន ដើម្បីធ្វើការងារនៅកន្លែងល្បែងស៊ីសងតាមអ៊ីនធឺណិត (online gambling)។
ជនជាតិចិនដែលសមត្ថកិច្ចចាប់ខ្លួនភាគច្រើនជាប់ពាក់ព័ន្ធ នឹងអំពើឃាតកម្ម ចាប់ជំរិតទារប្រាក់ អំពើហិង្សា ឆបោក ចោរកម្ម រត់ពន្ធថ្នាំញៀន និងការប្រើប្រាស់អាវុធខុសច្បាប់ជាដើម។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមឃឿន បញ្ជាក់ថា ជនជាតិចិនដែលសមត្ថកិច្ចចាប់ខ្លួន កាលពីឆ្នាំ២០២០ កន្លងទៅនេះមានប្រមាណជាង ៥០០នាក់ (៥២៣នាក់) ហើយពួកគេកំពុងជាប់ឃុំឃាំងក្នុងពន្ធនាគារនៅក្នុងទីក្រុងភ្នំពេញ ខេត្តព្រះសីហនុ និងនៅខេត្តបន្ទាយមានជ័យ។
ស្ថានទូតចិនប្រចាំប្រទេសកម្ពុជាកាលពីថ្ងៃទី២៦ មករា បានព្រមានមិនឱ្យពលរដ្ឋចិន ចូលមកប្រទេសកម្ពុជាដើម្បីលេងល្បែងស៊ីសង និងកុំឲ្យចាញ់បោកដោយការលួងលោមផ្ដល់ប្រាក់ខែច្រើន ដើម្បីធ្វើការងារនៅកន្លែងល្បែងស៊ីសងតាមអ៊ីនធឺណិត (online gambling)។
លោក ឆាយ គឹមឃឿន ថា ការព្រមានរបស់ស្ថានទូតចិនជាការ អប់រំពលរដ្ឋចិន ចំពោះល្បែងស៊ីសងខុសច្បាប់ ហើយអ្វីដែលជាបទល្មើសកើតឡើងសមត្ថកិច្ចតែងតែបង្ក្រាប។
អ្នកនាំពាក្យរដ្ឋាភិបាល លោក ផៃ ស៊ីផាន កម្ពុជាកំពុងរឹតបន្តឹងច្បាប់ទៅលើល្បែងស៊ីសងគ្រប់ប្រភេទ មិនថា តាមប្រព័ន្ធអ៊ីនធឺណិតនោះទេ ដើម្បីការពារកុំឱ្យមានអំពើឧក្រិដ្ឋកម្មកើតចេញពីការលេងល្បែងស៊ីសង៖ «នេះជាការព្រមានមួយបង្ហាញពីកិច្ចសហប្រតិបត្តិការរវាងប្រជាជាតិទាំងពីរ ជាពិសេស រវាងរដ្ឋាភិបាលចិន និងរដ្ឋាភិបាលប្រទេសកម្ពុជា។ ចំពោះទិសដៅល្បែងកាស៊ីណូ នៅក្នុងប្រទេសកម្ពុជា គឺជាទិសដៅ ទេសចរណ៍កម្សាន្តតែប៉ុណ្ណោះ ដែលយើង?? ភាពអនាធិបតេយ្យដែលកាប់សម្លាប់គ្នាដោយសារល្បែងនោះទេ។ ដូច្នេះជាការលើកទឹកចិត្តមួយ ជាការសហការមួយ ដើម្បីទប់ស្កាត់ឧក្រិដ្ឋកម្ម»។
នាយករងអង្គការលីកាដូទទួលបន្ទុកផ្នែកឃ្លាំមើលសិទ្ធិមនុស្ស លោក អំ សំអាត ក៏មើលឃើញថា អំពើឧក្រិដ្ឋជាច្រើនពាក់ព័ន្ធនឹងជនជាតិចិន កើតឡើងបណ្ដាលមកពីល្បែងស៊ីសង។
លោកបន្តថា អាជ្ញាធរមានសមត្ថកិច្ចត្រូវតែចាត់វិធានការឱ្យបានតឹងរ៉ឹងបន្ថែមទៀត មិនថាជនជាតិចិន ឬជនជាតិអ្វីទេ ដើម្បីសណ្ដាប់ធ្នាប់ និងសន្តិសុខក្នុងសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
