អតីត​អ្នក​បើកបរ​ឡាន​ក្រុង​កាពីតូល​ជាង​៥០​នាក់​ទាមទារ​ឲ្យ​ក្រុមហ៊ុន​យក​ពួក​គេ​ចូល​ធ្វើ​ការ

ដោយ ឡេង ម៉ាលី
2015-12-30
អ៊ីម៉ែល
មតិ
Share
បោះពុម្ព
អតីត​អ្នក​បើកបរ​រថយន្ត​ក្រុង​កាពីតូល​តវ៉ា​ជា​ថ្មី​ទៀត នៅ​មុខ​ស្នាក់ការ​ក្រុមហ៊ុន​ផ្សារ​អូរឫស្សី នៅ​ថ្ងៃ​ទី​៣០ ខែ​ធ្នូ ឆ្នាំ​២០១៥។ RFA/Rann Samnang
អតីត​អ្នក​បើកបរ​រថយន្ត​ក្រុង​កាពីតូល​តវ៉ា​ជា​ថ្មី​ទៀត នៅ​មុខ​ស្នាក់ការ​ក្រុមហ៊ុន​ផ្សារ​អូរឫស្សី នៅ​ថ្ងៃ​ទី​៣០ ខែ​ធ្នូ ឆ្នាំ​២០១៥។ RFA/Rann Samnang
RFA/Rann Samnang

អតីត​អ្នក​បើកបរ​រថយន្ត​ឲ្យ​ក្រុមហ៊ុន​រថយន្ត​ក្រុង​កាពីតូល (CAPITOL) មក​ពី​ទូទាំង​ប្រទេស​ប្រមាណ ៥០​នាក់ នាំ​គ្នា​តវ៉ា​នៅ​រាជធានី​ភ្នំពេញ​នៅ​ព្រឹក​ថ្ងៃ​ទី​៣០ ធ្នូ ដោយ​ទាមទារ​ឲ្យ​ក្រុមហ៊ុន​គោរព​ច្បាប់​ស្ដីពី​ការងារ និង​ទទួល​យក​ពួក​គេ​ចូល​ធ្វើ​ការ​វិញ។

អតីត​អ្នក​បើកបរ​រថយន្ត​ក្រុង​កាពីតូល ដែល​ត្រូវ​បាន​ក្រុមហ៊ុន​រថយន្ត​ក្រុង​កាពីតូល បញ្ឈប់​ពី​ការងារ​ប្រមាណ ៥០​នាក់ ស្រែក​តវ៉ា​នៅ​មុខ​ក្រុមហ៊ុន​ជា​ថ្មី​ទៀត នៅ​ថ្ងៃ​ទី​៣០ ធ្នូ៖ «អយុត្តិធម៌​ណាស់! អយុត្តិធម៌​ណាស់...»

ក្រុម​អតីត​អ្នក​បើកបរ​ទាំង​នេះ ធ្លាប់​តវ៉ា​នឹង​ប្រធាន​ក្រុមហ៊ុន​រថយន្ត​ក្រុង​កាពីតូល ដូច​គ្នា​នេះ​ម្ដង​ហើយ​កាល​ពី​ខែ​កក្កដា។ ជម្លោះ​នេះ បាន​កើត​មាន​បន្ទាប់​ពី​ប្រធាន​ក្រុមហ៊ុន​រថយន្ត​ក្រុង​កាពីតូល បញ្ឈប់​អ្នក​បើកបរ ៧​នាក់ ដែល​ពួក​គាត់​អះអាង​ថា ជា​សកម្មជន​សហជីព។ ក្រុម​អ្នក​តវ៉ា​បញ្ជាក់​ថា មូលហេតុ​ដែល​នាំ​ឲ្យ​មាន​ការ​តវ៉ា​ជា​ថ្មី​នេះ គឺ​ដោយសារ​តែ​ពួក​គាត់​ខក​ចិត្ត​នឹង​ក្រុមហ៊ុន ដែល​មិន​គោរព​ច្បាប់​ស្ដីពី​ការងារ ផ្ដល់​អត្ថប្រយោជន៍​ទាប និង​មិន​គោរព​សេចក្ដី​សម្រេច ដែល​ថា​ខាង​ពួក​គាត់​ឈ្នះ។

អតីត​អ្នក​បើកបរ​រថយន្ត​ពី​ភ្នំពេញ​ទៅ​ក្រុង​ហូជីមិញ ប្រទេស​វៀតណាម គឺ​លោក គង់ ប៊ុនធឿន ថ្លែង​ក្នុង​ពេល​តវ៉ា​ថា លក្ខខណ្ឌ​ពួក​លោក​ទាមទារ​មាន ៣​ចំណុច៖ «ចង់​បាន​មក​វិញ​ហ្នឹង គឺ​ឲ្យ​ពួក​ខ្ញុំ ៥៥​នាក់​ហ្នឹង​ចូល​ធ្វើ​ការ​នៅ​កន្លែង​ដើម​វិញ ដោយ​អត់​មាន​លក្ខខណ្ឌ ហើយ​សុំ​ឲ្យ​ក្រុមហ៊ុន​គោរព និង​អនុវត្ត​ច្បាប់​ស្ដីពី​ការងារ ព្រោះ​កន្លង​មក​យូរ​ឆ្នាំ​ហើយ ពួក​ខ្ញុំ​នេះ​ជា​តៃកុង​ឡាន​អាជីព ហៅ​ថា​តៃកុង​យូរ​ឆ្នាំ ហើយ​តៃកុង​ចាស់​ហៅ​តៃកុង​យូរ​ហ្នឹង គាត់​មាន​បទពិសោធន៍​ច្រើន​ណាស់។ ពេល​នោះ​សុំ​កុំ​ឲ្យ​រើសអើង ឲ្យ​ចូល​ធ្វើ​ការ​កន្លែង​ដើម​វិញ កុំ​ឲ្យ​មាន​ការ​ចោទ​ប្រកាន់​រក​លេស​នេះ​លេស​នោះ យក​ប្ដឹង​ទៅ​តុលាការ​ពី​បទ​អីៗ ដោយសារ​ពួក​ខ្ញុំ​គ្មាន​កំហុស»

ទាក់ទង​នឹង​ការ​រើសអើង​នេះ ត្រូវ​បាន​អតីត​អ្នក​បើកបរ​រថយន្ត​មួយ​រូប​ទៀត គឺ​លោក រិន សំបូ មាន​ប្រសាសន៍​ថា ក្រុមហ៊ុន​កាពីតូល បញ្ឈប់​ពួក​លោក​ពី​ការងារ ដោយសារ​តែ​ពួក​លោក​ចូលរួម​ចលនា​របស់​សហជីព គឺ​សហភាព​ការងារ​កម្ពុជា។

ក្រុម​អ្នក​តវ៉ា​ដែល​ផ្ទេរ​សិទ្ធិ​ជូន​សហភាព​ការងារ​កម្ពុជា ដើម្បី​ដោះស្រាយ​ទាំង​ក្រៅ​ប្រព័ន្ធ និង​ក្នុង​ប្រព័ន្ធ​តុលាការ អះអាង​ថា ក្រុមប្រឹក្សា​អាជ្ញា​កណ្ដាល​កាត់​ក្ដី​ឲ្យ​ភាគី​ខ្លួន​ឈ្នះ។

ឆ្លើយ​តប​ការ​ចោទ​ប្រកាន់​របស់​ក្រុម​អ្នក​តវ៉ា នាយក​ចាត់​ការ​ទូទៅ​នៃ​ក្រុមហ៊ុន​កាពីតូល លោក ផាន់ សុភាព ថ្លែង​ថា អ្វី​ដែល​អ្នក​តវ៉ា​លើក​ឡើង​នេះ មិន​មែន​ជា​ការ​ពិត​ទេ ហើយ​ខាង​ក្រុមហ៊ុន​ទេ​ជា​អ្នក​ទទួល​ការ​សម្រេច​ឲ្យ​ឈ្នះ។ លោក​បន្ត​ថា ខាង​ក្រុមហ៊ុន​មិន​ចរចា ហើយ​ជំរុញ​ឲ្យ​ក្រុម​អតីត​អ្នក​បើកបរ​តវ៉ា​តាម​ច្បាប់​ទៅ​តុលាការ៖ «ក្រុមហ៊ុន​បាន​ឈ្នះ​សឹង​តែ ៩០% ទៅ​ហើយ។ អ៊ីចឹង​ក្រុមហ៊ុន​គ្មាន​អី​ត្រូវ​ចរចា​ទេ ហើយ​ក្រុមហ៊ុន​ក៏​បាន​ជូន​ដំណឹង​ឲ្យ​គាត់​មក​យក​កម្រៃ​ថវិកា ដែល​ក្រុមហ៊ុន​បាន​បញ្ឈប់​ពួក​គាត់។ ប៉ុន្តែ​គាត់​យល់​ព្រម​ទេ ដោយសារ​គាត់​ថា គាត់​បាន​តិច ហើយ​ម្នាក់ៗ​គុណ​ទៅ​សុទ្ធតែ​ឃើញ​រាប់​ម៉ឺន​ដុល្លារ មិន​ដឹង​ថា​គាត់​ហ្នឹង​គិត​តាម​ក្បាច់​ស្អី​ទេ។ អ៊ីចឹង​ក្រុមហ៊ុន​មាន​ផ្លូវ​ច្បាប់​សម្រាប់​ធ្វើ​ការ​ហ្នឹង បាន​ទូទាត់​តាម​ច្បាប់​ការងារ​ទាំងអស់ អត់​មាន​ចន្លោះ​កន្លែង​ណា​មួយ​ទេ»

លោក ផាន់ សុភាព បញ្ជាក់​បន្ថែម​ថា ការ​មិន​ទទួល​យក​អតីត​អ្នក​បើកបរ​រថយន្ត​ទាំង​នេះ ក៏​ព្រោះ​តែ​ខាង​ក្រុមហ៊ុន​លែង​ទុក​ចិត្ត​ពួក​គេ។ លោក​ថា ក្រុម​អ្នក​បើកបរ​ទាំង​នោះ មិន​គោរព​ច្បាប់​ការងារ មិន​គោរព​បទបញ្ជា និង​កិច្ចសន្យា​ជាមួយ​ក្រុមហ៊ុន រាប់​ទាំង​ការ​កេង​ប្រវ័ញ្ច​លុយ​កាក់ ការ​លួច​ដាក់​ភ្ញៀវ​តាម​ផ្លូវ និង​បើក​លើស​ល្បឿន​កំណត់។

លោក​ឲ្យ​ដឹង​ថា ក្រុម​អ្នក​បើកបរ​ដែល​ត្រូវ​បញ្ឈប់​ពី​ការងារ​មាន​ចំនួន​ជាង ៤០​នាក់ ហើយ​ការ​ដឹក​ជញ្ជូន​អ្នក​ដំណើរ​របស់​ក្រុមហ៊ុន​លោក​មិន​រាំង​ស្ទះ​ទេ ព្រោះ​លោក​នៅ​មាន​បុគ្គលិក​ជិត ២០០​នាក់​ទៀត។

ទន្ទឹម​គ្នា​នេះ ក្រុម​អ្នក​តវ៉ា​អះអាង​ថា ពួក​គាត់​នឹង​បន្ត​ការ​តវ៉ា​រហូត​ដល់​មាន​ដំណោះស្រាយ​ទទួល​យក​បាន ហើយ​នឹង​កេណ្ឌ​អ្នក​តវ៉ា​ជាច្រើន​នាក់​បន្ថែម​ទៀត ថ្វី​បើ​ការ​តវ៉ា​នៅ​ព្រឹក​ថ្ងៃ​ទី​៣០ ធ្នូ ត្រូវ​បាន​កង​កម្លាំង​នគរបាល​ប្រមាណ ១០០​នាក់ រុញ​ច្រាន​ដក​យក​ឧបករណ៍​បំពង​សំឡេង និង​ស្គរ នៅ​ទល់​មុខ​ទីស្នាក់ការ​ក្រុមហ៊ុន​ជិត​ផ្សារ​អូរឫស្សី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

Dany

ពី Pai Lin

There are a lot of transport company. Why don't all of you seek for job with the other and why keep going to provoke this company..only this Capitol that can feed you or what???

Dec 31, 2015 01:51 AM

អ្នក​អាន​អនាមិក

Yes I support democracy to protest against something that you don't like it,but in Cambodia a real democracy don't have it.As you know land dispute,factory worker protest,anything we lost never win.So what are you going to do for your life,your country,your family and for all Khmer people? Keep this regime continue to lead a country or change leader,change regime,change to a real democracy,better life and so on..A choice is your wake up wake up don't sleep too much a time running out.

Dec 30, 2015 10:39 PM

គេហទំព័រ​ទាំងមូល