អគ្គនាយកដ្ឋានអន្តោប្រវេសន៍គ្រោងនឹងបញ្ជូនជនជាតិចិន ២១នាក់ បន្ទាប់ពីឆ្លងដែនដោយខុសច្បាប់ចូលមកប្រទេសកម្ពុជា
2021.03.22
មន្ត្រីជាន់ខ្ពស់កម្ពុជា និយាយថា សមត្ថកិច្ចគ្រោងនឹងចាប់បញ្ជូនជនជាតិចិន ចំនួន ២១នាក់ទៅកាន់ប្រទេសចិនវិញ បន្ទាប់ពីបានបញ្ចប់ការធ្វើចត្តាឡីស័ករយៈពេល ១៥ថ្ងៃ ដើម្បីពិនិត្យមើលជំងឺកូវីដ១៩។
អគ្គនាយករងអន្តោប្រវេសន៍ និងជាអ្នកនាំពាក្យនៃអគ្គនាយកដ្ឋានអន្តោប្រវេសន៍ លោក កែវ វណ្ណថន ប្រាប់អាស៊ីសេរីថា ជនជាតិចិនទាំង ២១នាក់នេះ ត្រូវបានស្នងការនគរបាលខេត្តតាកែវបញ្ជូនមកដល់អគ្គនាយកដ្ឋានអន្តោប្រវេសន៍ កាលពីរសៀលថ្ងៃទី២២ មីនា ហើយគ្រោងនឹងបញ្ជូនចេញពីប្រទេសកម្ពុជាក្នុងពេលឆាប់ៗ ខាងមុខនេះ។
លោកបញ្ជាក់ថា ការចាប់បញ្ជូនចេញជនជាតិចិនទាំង ២១នាក់ចេញពីកម្ពុជានេះ គឺកម្ពុជាបានអនុម័តច្បាប់ស្ដីពីការទប់ស្កាត់ជំងឺកូវីដ១៩ និងច្បាប់ស្ដីពីអន្តោប្រវេសន៍។ លោកថា សមត្ថកិច្ចកំពុងរង់ចាំសេចក្ដីសម្រេចរបស់ក្រសួងមហាផ្ទៃទើបអាចបណ្ដេញចេញពីកម្ពុជាបាន។
មន្ត្រីក្រសួងសុខាភិបាលបានដាក់ឱ្យពួកគេធ្វើចត្តាឡីស័កចំនួន ១៤ថ្ងៃ ដើម្បីពិនិត្យសុខភាពរកមើលជំងឺកូវីដ១៩។
អនុប្រធានអង្គការលីកាដូទទួលបន្ទុកសិទ្ធិមនុស្សលោក អំ សំអាត បញ្ជាក់ថា ជនជាតិចិនទាំង ២១នាក់នេះ គួរតែត្រូវតុលាការជំនុំជម្រះពីបទឆ្លងដែនខុសច្បាប់ជាមុនសិន មុននឹងសម្រេចបញ្ជូនចេញ។
លោកបន្តថា កម្ពុជាមានច្បាប់ស្តីពីការគ្រប់គ្រងជនអន្តោប្រវេសន៍ ដូច្នេះរាល់ជនបរទេសណាក៏ដោយ ដែលបានឆ្លងដែនដោយខុសច្បាប់ត្រូវតែអនុវត្តក្រោមច្បាប់នេះ៖ «តាមគោលការច្បាប់យើងកាលណាឆ្លងដែនដោយខុសច្បាប់ គឺអាចអនុវត្តតាមច្បាប់អន្តោប្រវេសន៍ អាចនឹងធ្វើការនឹងធ្វើការឃុំខ្លួនរយៈពេលប៉ុន្មានខែអ៊ីចឹងទៅ ហើយចប់ទៅ អាចនឹងធ្វើការបណ្ដេញចេញ។ នេះជាគោលការណ៍ច្បាប់ ដើម្បីឱ្យមានការរាងចាល ហើយនឹងអនុវត្តជាគំរូ ដើម្បីកុំឱ្យមានការឆ្លងដែនដោយខុសច្បាប់អ៊ីចឹងទៀត»។
លោក បន្តថា ការឆ្លងដែនដោយខុសច្បាប់ សមត្ថកិច្ចត្រូវរកមូលហេតុថា តើការឆ្លងដែនរបស់ជនជាតិចិនទាំងនោះ មានការឆ្លងកាត់មន្ត្រីនៅកន្លែងឆែកឆេរតាមច្រកព្រំដែនដែរ ឬទេ? ប្រសិនបើមានការឆ្លងកាត់ ត្រូវតែស្រាវជ្រាវរកមើលថា តើហេតុអ្វីបានជាជនជាតិចិនទាំងនោះចូលមកកម្ពុជាបាន។ លោកថា ប្រសិនមានមន្ត្រីណាជាប់ពាក់ព័ន្ធអំពើពុករលួយអនុញ្ញាតឱ្យជនជាតិចិនចូលមកកម្ពុជាបាន ត្រូវតែទទួលខុសត្រូវតាមផ្លូវច្បាប់ ជាពិសេស ដើម្បីទប់ស្កាត់ការរាលដាលនៃជំងឺកូវីដ១៩។
គិតក្នុងរយៈពេល ៣ខែ ដើមឆ្នាំ២០២១ នេះ អគ្គនាយកដ្ឋានអន្តោប្រវេសន៍ក្រសួងមហាផ្ទៃបានបណ្ដេញចេញជនជាតិចិនសរុបចំនួន ៧៥នាក់ ក្នុងនោះមានស្ត្រីចំនួន ៨នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។