ស្ថានភាព​ចូល​ឆ្នាំ​ចិន-វៀតណាម​​ថ្ងៃ​ទី​១​នៅ​រាជធានី​ភ្នំពេញ

ពិធី​បុណ្យ​ចូល​ឆ្នាំ​ចិន-វៀតណាម ថ្ងៃ​ទី​១ នៅ​រាជធានី​ភ្នំពេញ យើង​សង្កេត​ឃើញ​ថា មាន​សភាព​ស្ងប់ស្ងាត់​ជាង​ឆ្នាំ​មុនៗ ខណៈ​ដែល​អ្នក​មាន​សែស្រឡាយ​ចិន និង​វៀតណាម ដែល​ធ្វើ​ពិធី​សែនព្រេន​ខ្លះ​មាន​មតិ​ថា ការ​សែន​ឆ្នាំ​នេះ​ហាក់​មិន​សូវ​ពេញលេញ ហើយ​អ្នក​ខ្លះ​ទៀត​ថា​ជា​ករណី​ធម្មតា។
ដោយ ឡេង ម៉ាលី
2014.01.30
Share on WhatsApp
Share on WhatsApp
សែន ចិន ៣០៥ ពលរដ្ឋ​ខ្មែរ​នៅ​រាជធានី​ភ្នំពេញ រៀបចំ​សែន​ដូន​តា​ពេល​បុណ្យ​ចូល​ឆ្នាំ​ចិន កាល​ពី​ថ្ងៃ​ទី​២២ ខែ​មករា ឆ្នាំ​២០១២។
RFA/Vohar Cheath

គ្រួសារ​កូន​ចៅ​ចិន ខ្លះ​បាន​ត្អូញ​ថា ការ​សែន​ព្រេន​កុងម៉ា​ក្នុង​ឱកាស​បុណ្យ​ចូល​ឆ្នាំ​ចិន ឆ្នាំ​នេះ ហាក់​មិន​បាន​ពេញលេញ ព្រោះ​អាជ្ញាធរ​ហាម​មិន​ឱ្យ​អុជ​ផាវ។

សមាជិក​គ្រួសារ​កូន​ចៅ​ចិន មួយ​រូប នៅ​សង្កាត់​ចាក់អង្រែ ខណ្ឌ​មានជ័យ រាជធានី​ភ្នំពេញ លោក រស់ ហៃ មាន​ប្រសាសន៍​ថា ការ​អុជ​ផាវ​ក្នុង​ពិធី​បុណ្យ​ចូល​ឆ្នាំ​ចិន ក៏​មាន​សារសំខាន់​ដែរ ព្រោះ​ជា​ប្រពៃណី។ លោក​ជឿ​ថា សំឡេង​ផាវ​ដេញ​ឧបទ្រព​ចង្រៃ​ឆ្នាំ​ចាស់​ចេញ​ពី​ផ្ទះ​ឱ្យ​អស់ ហើយ​នាំ​ជោគ​លាភ សិរី​សួស្ដី​ចូល​មក​វិញ។ លោក​បន្ត​ថា ការ​សែន​ព្រេន​របស់​លោក​ឆ្នាំ​នេះ មិន​សូវ​ពេញ​ចិត្ត៖ «ការ​ដុត​ផាវ​សំខាន់​ណាស់​ដែរ។ ពេល​គេ​ហាម​អ៊ីចឹង យើង​មិន​អាច​ដុត​បាន។ វា​មិន​ពេញ​ចិត្ត​ពេញ​ថ្លើម ដែល​ពេល​សែន​ម្ដងៗ គេ​ហាម​មិន​ឱ្យ​ដុត វា​មិន​សូវ​ល្អ​ឱ្យ​ពេញលេញ។ បើ​បាន​ដុត​ទៅ វា​បាន​សប្បាយ​ដែរ ដូច​ដេញ​បិសាច​ចេញ​ពី​ភូមិ​ពី​ផ្ទះ​សម្បែង​យើង​អ៊ីចឹង​សំឡេង​ផាវ»

ទាក់ទង​នឹង​ការ​អុជ​ផាវ និង​កាំជ្រួច ឬ​ការ​បង្ក​សំឡេង​ផ្ទុះ​ផ្សេងៗ​ក្នុង​ពេល​បុណ្យ​ចូល​ឆ្នាំ​ចិន ត្រូវ​បាន​សាលា​រាជធានី​ភ្នំពេញ ចេញ​បម្រាម​មួយ​កាល​ពី​ថ្ងៃ​ទី​១៧ មករា ក្នុង​គោលដៅ​រក្សា​សន្តិសុខ សុវត្ថិភាព សណ្ដាប់ធ្នាប់ និង​របៀប​រៀប​រយ​សាធារណៈ។ រាល់​ការ​ហែ​ក្បួន​ផ្សេងៗ ទាំង​តាម​បែប​សាសនា ឬ​ប្រពៃណី ដែល​គ្មាន​ការ​អនុញ្ញាត​ត្រូវ​ហាម​ឃាត់។

សាលា​រាជធានី​ភ្នំពេញ ក៏​បាន​ណែនាំ​ឱ្យ​គ្រប់​ក្រសួង​មន្ទីរ​ទាំងអស់ ចាត់​វិធាន​ការ​ម៉ឺងម៉ាត់​ចំពោះ​បម្រាម​នេះ ហើយ​ចាត់​វិធាន​ការ​ច្បាប់​ចំពោះ​ជន​ណា​បំពាន​បម្រាម​នេះ។ បម្រាម​របស់​សាលា​រាជធានី​ភ្នំពេញ បាន​ចេញ​បន្ទាប់​ពី​ការ​បង្ក្រាប​បាតុកម្ម​ដោយ​បង្ហូរ​ឈាម​កាល​ពី​ដើម​ខែ។ ទោះ​ជា​មាន​ការ​មិន​ចិត្ត​ខ្លះ​មិន​ពេញ​ចិត្ត​នឹង​បម្រាម​ដុត​ផាវ​ក្ដី ក៏​មាន​មតិ​ខ្លះ​ទៀត និយាយ​ថា ជា​ការ​ធម្មតា។

លោកស្រី ជុំ ឆេងលាង ថ្លែង​ថា សម្រាប់​អ្នក​ដែល​ជនជាតិ​ចិន មែន​ទែន និង​ធូរធារ គួរ​តែ​មាន​ដុត​ផាវ។ ប៉ុន្តែ ចំពោះ​លោកស្រី​ដែល​ជា​ខ្មែរ​កាត់​ចិន សាមញ្ញ មិន​ជា​បញ្ហា​អ្វី​ទេ រឿង​ហាម​អុជ​ផាវ​នេះ ក៏ប៉ុន្តែ រឿង​សំខាន់​សម្រាប់​លោកស្រី គឺ​បញ្ហា​ទំនិញ​ឡើង​ថ្លៃ៖ «គ្រាន់​តែ​របស់​របរ​ហ្នឹង​វា​ឡើង ឡើង​ច្រើន។ ទាំងអស់ ទាំង​បន្លែ​សាច់​មាន់​អី​ហ្នឹង ឡើង​តែ​ម្ដង។ វា​មិន​ដូច​មុន​ទេ កាល​មុន​វា​ធូរ​ថ្លៃ។ ធ្លាប់​ធ្វើ​អស់​តែ​ពីរ​រយ វា​ឡើង​ដល់​បី​រយ​អី​អ៊ីចឹង​ទៅ។ ឆ្នាំ​ហ្នឹង​វា​ឡើង​អ៊ីចឹង។ ទាំង​ពី​ក្រដាស​សែន​អី​ឡើង​ទាំងអស់​ហ្នឹង។ ហ្នឹង​ធ្វើ​សង្ខេប​ហើយ ពីរ​បី​រយ​អី​មិន​បាន​ធំ​ដុំ​អី​ទេ គិត​ទៅ... បើ​ធំ​ដុំ​ទៀត​ទៅ​វា​ច្រើន​ទៀត​ទៅ។ គេ​អ្នក​មាន គេ​ច្រើន​ជាង​យើង​ទៀត​ទៅ អា​ហ្នឹង​អ៊ីចឹង»

ស្រដៀង​គ្នា​នេះ​ដែរ សមាជិក​គ្រួសារ​កាត់​ចិន មួយ​រូប​ទៀត គឺ​លោក តាំង ហួយ អាយុ ៧១​ឆ្នាំ នៅ​ខណ្ឌ​មានជ័យ រាជធានី​ភ្នំពេញ ថ្លែង​ថា ការ​សែន​ព្រេន​ចូល​ឆ្នាំ​ចិន របស់​គ្រួសារ​លោក​នៅ​ឆ្នាំ​នេះ ប្រព្រឹត្ត​ទៅ​ជា​ធម្មតា​ដូច​រាល់​ឆ្នាំ៖ «ឱ្យ​តែ​ចូល​ឆ្នាំ​សែន​ទាំងអស់​គ្នា កុងម៉ា​ជីដូន​ជីតា។ រាល់​ឆ្នាំ អត់​មាន​ឱ្យ​ខាន​ទេ។ អត់​សែន​ឮ​ចាស់ៗ​ថា រក​ស៊ី​មិន​កាក់​កប។ ចាស់ៗ​និយាយ​ចេះ​តែ​ធ្វើ​ទៅ។ ឥឡូវ​អស់​ពី​ចាស់​ហើយ កូន​ហ្នឹង​ចេះ​តែ​តៗ​ទៅ។ ចេះ​តែ​ឱ្យ​បាន​ត​ទៅ។ ឆ្នាំ​នេះ​បាន​ស្ងប់ស្ងាត់ ហើយ​បាន​បន្លែ​វា​ថោក។ ប៉ុន្តែ​ថ្លៃ ថ្លៃ​ផ្លែ​ឈើ​វិញ»

យ៉ាង​ណា​ក្ដី ពិធី​បុណ្យ​ចូល​ឆ្នាំ​ចិន-វៀតណាម ថ្ងៃ​ទី​១ នៅ​រាជធានី​ភ្នំពេញ ថ្ងៃ​ទី​៣០ មករា នេះ យើង​សង្កេត​ឃើញ​ថា បាន​ប្រព្រឹត្ត​ទៅ​ជា​ធម្មតា បើ​ទោះ​ជា​មាន​សភាព​ស្ងប់ស្ងាត់ ព្រោះ​តែ​មិន​មាន​អុជ​ផាវ ឬ​កាំជ្រួច​ដូច​ឆ្នាំ​មុនៗ​ក៏ដោយ។ ក្នុង​ថ្ងៃ​នេះ ក៏​ឃើញ​មាន​ក្រុម​រាំ​មុងសាយ​ជាច្រើន​ក្រុម នៃ​សមាគម​ចិន បាន​ទៅ​សម្ដែង​នៅ​ខាង​មុខ​ព្រះបរមរាជវាំង និង​ស្ថានទូត​ចិន ប្រចាំ​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។