មន្ត្រីអង្គការសង្គមស៊ីវិលនៅខេត្តកោះកុងរិះគន់ក្រសួងទេសចរណ៍ដែលបានចុះហត្ថលេខាលើកិច្ចសហប្រតិបត្តិការជាមួយក្រុមហ៊ុន យូញៀន ឌីវែលឡុបមែន គ្រូប (Union Development Group) វិទ្យាស្ថានទេសចរណ៍ និងវិជ្ជាជីវៈខេត្តយូណាន (Yunnan) របស់ចិន នៅព្រឹកថ្ងៃទី៩ មិថុនាថា មិនមានប្រយោជន៍សំខាន់ដល់ប្រជាពលរដ្ឋនោះទេ។ ការរិះគន់នេះ ដោយសារតែក្រសួងទេសចរណ៍បានសហប្រតិបត្តិការជាមួយក្រុមហ៊ុនទេសចរណ៍ចិននៅខេត្តកោះកុងចំនួន ២លើកហើយ ប៉ុន្តែមិនទាន់មានការអភិវឌ្ឍលើវិស័យទេសចរណ៍ ហើយពលរដ្ឋនៅតែក្រីក្រដដែល។
អតីតអ្នកសម្របសម្រួលអង្គការ លីកាដូ (Licadho) ខេត្តកោះកុង ហើយបច្ចុប្បន្នជាមន្ត្រីសម្របសម្រួលផ្នែកសិទ្ធិមនុស្សអង្គការ លីកាដូ (Licadho) ប្រចាំខេត្តបន្ទាយមានជ័យ លោក អ៊ិន គង់ជិត ឲ្យដឹងថ្ងៃទី៩ មិថុនាថា ក្រសួងទេសចរណ៍មិនគួរសហប្រតិបត្តិការជាមួយក្រុមហ៊ុនចិនញឹកញាប់ពេកនោះទេ ព្រោះក្រុមហ៊ុនរបស់ចិនជាច្រើន បានសម្រុកទៅវិនិយោគខេត្តកោះកុង ហើយជាញឹកញាប់តែងតែបង្កការប៉ះពាល់ដល់ការរស់នៅរបស់ប្រជាពលរដ្ឋទៀតផង។ លោក អ៊ិន គង់ជិត អះអាងទៀតថា ក្រុមហ៊ុនចិននឹងទទួលបានអត្ថប្រយោជន៍ច្រើនលើសលប់ពីកម្ពុជា ប៉ុន្តែផ្ទុយទៅវិញ កម្ពុជាមិនទទួលបានផលប្រយោជន៍នោះឡើយ៖ «»
គេហទំព័រក្រសួងទេសចរណ៍ឲ្យដឹងថា រដ្ឋលេខាធិការក្រសួងទេសចរណ៍លោក ជា បូរ៉ា ជាអធិបតីនៅក្នុងនៅក្នុងពិធីបើកសម្ពោធមូលដ្ឋានបណ្ដុះបណ្ដាលជំនាញទេសចរណ៍នៅក្រៅប្រទេសក្នុងខេត្តកោះកុង។ ពិធីនេះក្រសួងបានចុះហត្ថលេខាលើកិច្ចសហប្រតិបត្តិការជាងមួយក្រុមហ៊ុនយូញៀនគ្រូប វិទ្យាស្ថានទេសចរណ៍ និងវិជ្ជាជីវៈខេត្តយូណាន(Yunnan)។
ក្រសួងឲ្យដឹងទៀតថា ពិធីនេះដើម្បីជំរុញ និងពង្រឹងកិច្ចសហប្រតិបត្តិការនៃភាពជាដៃគូក្នុងការជំរុញបណ្ដុះបណ្ដាលជំនាញវិជ្ជាជីវៈទេសចរណ៍ ការអភិវឌ្ឍធនធានមនុស្ស និងការសិក្សាស្រាវជ្រាវក្នុងវិស័យទេសចរណ៍ឲ្យមានកម្មវិធីហ្វឹកហាត់ការងារសម្រាប់សិស្ស និស្សិត បុគ្គលិក និងការបង្កើតវិទ្យាស្ថានជាតិទេសចរណ៍កម្ពុជា។
កាលពីខែមករា ឆ្នាំ២០១៨ ក្រសួងមួយនេះក៏បានចុះអនុស្សរណៈយោគយល់គ្នាម្ដងរួចមកហើយ។លោក អ៊ិន គង់ជិត កត់សំគាល់ថា បើទោះជាក្រសួងធ្វើកិច្ចសហប្រតិបត្តិការជាក្រុមហ៊ុន ២លើកហើយក្ដី ក៏ប៉ុន្តែវិស័យទេសចរណ៍នេះមិនបានជួយដល់ពលរដ្ឋរស់នៅកោះកុងមានជីវភាពធូរធារនោះទេ ផ្ទុយទៅវិញធ្វើឲ្យប្រជាពលរដ្ឋកាន់តែក្រីក្រ៖ «»
ក្រុមហ៊ុន union development group បានចាប់ផ្ដើមគម្រោងសាងសង់តំបន់អភិវឌ្ឍន៍ រួមមាន ផែ បនល្បែងស៊ីសង និងព្រះលានយន្តហោះ កាលពីឆ្នាំ២០០៨ ក្រោយទទួលបានសិទ្ធិអភិវឌ្ឍន៍របស់ពេល ៩៩ឆ្នាំ លើផ្ទៃដី ៤ម៉ឺន ៥ពាន់ហិកតារ នៅក្នុងតំបន់អភិរក្សឧទ្យានជាតិ។ ប៉ុន្តែគម្រោងទាំងនោះមិនទាន់បានដំណើរការនៅឡើយនោះទេ ក្នុងរយៈពេល ១០កន្លងមកនេះ។ ទាំងបនល្បែងស៊ីសង និងផែ មិនទាន់មានសកម្មភាពណាមួយឡើយ។
របាយការណ៍ក្រសួងទេសចរណ៍បង្ហាញថាកាលពីឆ្នាំ២០១៧ កម្ពុជាមានកំណើនភ្ញៀវទេសចរណ៍ជិត ១២ភាគរយ (១១,៨% )ដោយទេសចរអន្តរជាតិជាង ៥លាន ៦សែននាក់ (៥.៦០០.០០០) ក្នុងនោះ ទេសចរចិនឈរក្នុងលំដាប់ទី១ គឺមានជាង ១លាននាក់ (១,២១០,៧៨២) កើនឡើងជិត៤៦ភាគរយ (៤៥,៩%)។ ក្រសួងថា ភ្ញៀវទេសចរណ៍អន្តរជាតិ បាននាំប្រាក់ចំណូលប្រមាណ ៣ពាន់ ៤០០លានដុល្លារអាមេរិក (៣.៤០០.០០០.០០០) ដែលរួមចំណែកប្រមាណ ១៣% នៃផលិតផលក្នុងស្រុកសរុប (GDP) និងបង្កើតការងារដោយផ្ទាល់ប្រមាណជាង ៦២ ម៉ឺននាក់ (៦២០,០០០)។ ប៉ុន្តែអ្នកនាំភ្ញៀវទេសចរណ៍នៅខេត្តសៀមរាប សុំមិនឲ្យបញ្ចេញឈ្មោះម្នាក់ ដែលអះអាងថា បានប្រកបរបរនាំភ្ញៀវទេសចរនៅតំបន់អង្គរប្រមាណ ២០ឆ្នាំហើយនោះ ថ្លែងថា មួយរយៈចុងក្រោយនេះ អ្នកនាំភ្ញៀវ និងពលរដ្ឋនៅតំបន់អង្គរខេត្តសៀមរាប មិនទទួលបានប្រាក់ចំណូលពីកំណើនភ្ញៀវទេសចរនោះទេ។ ពលរដ្ឋរូបនេះបន្ថែមទៀតថា អ្នកទេសចរពីសហគមន៍អឺរ៉ុប ប្រទេសជប៉ុន និងអាមេរិកជាដើម បានថយចុះជាងឆ្នាំមុនស្ទើរទ្វេដង ហើយការមកស្នាក់នៅរបស់អ្នកទេសចរតំបន់អង្គរ ក៏មានរយៈពេលខ្លីជាងឆ្នាំមុនៗ ដែរ ដែលធ្វើឲ្យពួកគាត់រស់នៅតំបន់នោះស្ទើរតែដាច់បាយទៅហើយ៖ «»
ក្រសួងទេសចរណ៍ឲ្យដឹងទៀតថា រយៈពេល ៤ខែ ដើមឆ្នាំ២០១៨ ទទួលបានភ្ញៀវអន្តរជាតិជាង ២ លាននាក់ (២.១០០.០០០) កើនឡើងប្រមាណ ១៣ភាគរយ បើធៀបនឹងរយៈពេលដូចគ្នានៅឆ្នាំ២០១៧។ ក្រសួងរំពឹងថា កម្ពុជានឹងទទួលបានទេសចរណ៍អន្តរជាតិប្រមាណ ៦,២លាននាក់ (៦,២០០,០០០) នៅឆ្នាំ២០១៨ និងប្រមាណ ៧លាននាក់ (៧.០០០.០០០) នៅឆ្នាំ២០២០ និង ភ្ញៀវទេសចរអន្តរជាតិ ប្រមាណ ១៥លាននាក់ នៅឆ្នាំ២០៣០។ អ្នកនាំភ្ញៀវទេសចរខេត្តសៀមរាប និងមន្ត្រីសង្គមស៊ីវិល លើកឡើងថា មានតែអ្នកមានលុយ និងមានអំណាច និងក្រុមហ៊ុនទេសចរណ៍បរទេសទេ ជាអ្នកដែលបានចំណូលខ្ពស់ពីកំណើនទេសចរណ៍មួយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។