សាខាគយខេត្តព្រះសីហនុចាប់បានរថយន្តសេរីទំនើបចង្កូតស្ដាំបន្លំពន្ធ៩គ្រឿង
2019.01.10
មន្ត្រីឃ្លាំមើលសង្គមគាំទ្រការរឹបអូសរថយន្តគេចពន្ធជាច្រើនគ្រឿងធ្វើជាសម្បត្តិរដ្ឋ និងលើកទឹកចិត្តឲ្យមន្ត្រីស្ថាប័នជំនាញពាន់ព័ន្ធ បន្តពង្រឹងការងារប្រយុទ្ធនឹងការរត់ពន្ធបន្ថែមទៀត។
ប្រធានសាខាគយ និងរដ្ឋាករខេត្តព្រះសីហនុ លោក ទុំ ណូ បានឲ្យដឹងកាលពីថ្ងៃទី១០ ខែមករា ថា ស្ថាប័ននេះ បានសហការចុះចាប់ និងបង្ក្រាប ចាប់រថយន្តសេរីទំនើបចង្កូតស្ដាំបន្លំពន្ធចំនួន ៩គ្រឿងក្នុងរយៈពេលប៉ុន្មានថ្ងៃចុងក្រោយនេះ ដើម្បីយកមករក្សាទុកនៅសាខាគយ និងរដ្ឋាករខេត្តព្រះសីហនុ។ លោក ទុំ ណូ បញ្ជាក់ថា រថយន្តទំនើបចង្កូតស្តាំបន្លំពន្ធទាំងនេះ នឹងត្រូវដកហូតទុកជាទ្រព្យសម្បត្តិរដ្ឋ ដោយមិនមានការដោះស្រាយបង់ជាប្រាក់ពិន័យឲ្យម្ចាស់នាំយកទៅវិញនោះទេ។ ទាក់ទិនបញ្ហានេះ អ្នកស្រី ជាប សុធារី មន្ត្រីសម្របសម្រួលសមាគមអាដហុក ប្រចាំខេត្តព្រះសីហនុ បានគាំទ្រចំពោះការចុះអនុវត្តការងារ ដ៏មានប្រសិទ្ធភាពរបស់មន្ត្រីជំនាញសាខាគយ និងរដ្ឋាករខេត្តនេះ ព្រមទាំងមន្ត្រីជំនាញស្ថាប័នពាក់ព័ន្ធ ដែលបានបង្ហាញពីសកម្មភាពមានភាពវិជ្ជមានច្រើន៖ «តាមពិតកន្លងមកយើងចង់ឲ្យមន្ត្រីជំនាញទាំងអស់ មានការទទួលខុសត្រូវក្នុងការបំពេញភារកិច្ច របស់ខ្លួនឲ្យបានត្រឹមត្រូវ។ ជាពិសេសទាក់ទងការងារពិនិត្យពន្ធយានយន្តគ្រប់ប្រភេទឲ្យមានប្រសិទ្ធភាព។ ប៉ុន្តែឥឡូវយើងឃើញថា ជាលទ្ធផលការងារ របស់មន្ត្រីគយ និងរដ្ឋាករ ព្រមទាំងស្ថាប័នពាក់ព័ន្ធក្នុងប៉ុន្មានថ្ងៃមកនេះ គឺមានការផ្លាស់ប្ដូរមានផលវិជ្ជមានច្រើនគួរឲ្យកត់សម្គាល់។ អ៊ីចឹងករណីនេះ វាជាគំរូមួយដ៏ល្អប្រសើរ ហើយយើងគាំទ្រ និងលើកទឹកចិត្ត ដោយសង្ឃឹមថា មន្ត្រីសាខាគយ និងរដ្ឋាករ ក៏ដូចជាមន្ត្រីស្ថាប័នពាក់ព័ន្ធនឹងពង្រឹងការងារ របស់ខ្លួនឲ្យបានល្អថែមទៀត»។
ចំណែក លោក សន ជ័យ ប្រធានសម្ព័ន្ធគណនេយ្យភាពសង្គមកម្ពុជា មានប្រសាសន៍ថា រថយន្តចង្កូតស្ដាំមិនគួរលើកទឹកចិត្ត ឲ្យមានការនាំចូលមកប្រើប្រាស់នៅកម្ពុជាទៀតទេ។ លោកស្វាគមន៍ចំពោះចំណាត់ការ របស់មន្ត្រីជំនាញគយ និងរដ្ឋាករ ដែលបានទប់ស្កាត់ការរត់ពន្ធរថយន្តចង្កូតស្តាំគេចពន្ធចូលមកកម្ពុជា។ លោកបន្តថា ចំពោះរថយន្តចង្កូតស្ដាំនេះ គួរតែមន្ត្រីជំនាញស្ថាប័នពាក់ព័ន្ធ រួមគ្នាទប់ស្កាត់កុំឲ្យនាំចូលមកកម្ពុជាជាបន្តទៀតនាថ្ងៃខាងមុខ ព្រោះវាបានបង្កហានិភ័យខ្ពស់ក្នុងការបើកបរតាមផ្លូវសាធារណៈ៖ «បើយើងមើលពីហានិភ័យវិញ គឺរថយន្តចង្កូតស្ដាំ បង្កហានិភ័យខ្ពស់ក្នុងការបើកបរ។ អញ្ចឹងយើងមិនលើកទឹកចិត្តឲ្យមានការនាំចូលរថយន្តចង្កូតស្ដាំនេះចូលមកកម្ពុជាទៀត។ ហើយចំពោះការទប់ស្កាត់គួរតែកើតមាន ដែលនេះជាវិធានការមួយ ដែលខ្ញុំយល់ថា វាមិនមែនជាវិធានការទប់ស្កាត់ការរំលោភច្បាប់តែប៉ុណ្ណោះនោះទេ ប៉ុន្តែវាក៏ជាការរួមចំណែកដល់ការគិតគួរពីហានិភ័យពីការប្រើប្រាស់យានយន្តចង្កូតស្ដាំ នៅក្នុងប្រទេសកម្ពុជាយើងផងដែរ»។
សាខាគយ និងរដ្ឋាករខេត្តព្រះសីហនុ បានបង្ក្រាបបទល្មើសគេចពន្ធបានជាង ១២០ករណីរួមមានការគេចពន្ធយានយន្ត និងទំនិញផ្សេងៗមួយចំនួនទៀត៕