មន្ត្រីនគរបាលខេត្តស្ទឹងត្រែង មួយរូបសុំមិនបញ្ចេញឈ្មោះឲ្យដឹងនៅថ្ងៃទី៣០ មិថុនា ថា ប្រធាននាយកដ្ឋានកណ្ដាលយុត្តិធម៌ នៃអគ្គស្នងការដ្ឋាននគរបាលជាតិនៃក្រសួងមហាផ្ទៃ លោក ម៉ក់ ជីតូ និងព្រះរាជអាជ្ញាខេត្តស្ទឹងត្រែង រួមទាំងកងកម្លាំងនគរបាលខេត្ត បានចុះឆែកឆេរទីតាំង ៤កន្លែង រួមទាំងហាងខារ៉ាអូខេយីហោពិភពថ្មី ក្នុងក្រុងស្ទឹងត្រែង និងលំនៅឋានជនសង្ស័យឈ្មោះ ដាំ ញ៉ាំ ថាជាប់ពាក់ព័ន្ធគ្រឿងញៀនជាង ៥០គីឡូក្រាម ដែលសមត្ថកិច្ចបង្ក្រាបបានកាលពីថ្ងៃទី១៦ ខែមិថុនា។
ស្នងការនគរបាលខេត្តស្ទឹងត្រែង លោក ម៉ៅ តារា មិនធ្វើអត្ថាធិប្បាយជុំវិញនឹងការឆែកឆេរនេះទេនៅថ្ងៃទី៣០ មិថុនា ដោយលោកបង្វែរឲ្យសួរ លោក ម៉ក់ ជីតូ ផ្ទាល់។
វិទ្យុអាស៊ីសេរី មិនអាចទាក់ទង លោក លោក ម៉ក់ ជីតូ ជាប្រធាននាយកដ្ឋានកណ្ដាលយុត្តិធម៌ នៃអគ្គស្នងការនគរបាលជាតិ ដើម្បីសុំបញ្ជាក់បន្ថែមពីករណីនេះបាននៅឡើយ។
មន្ត្រីនគរបាលម្នាក់សុំមិនឲ្យបញ្ចេញឈ្មោះ និងសុំមិនឲ្យថតសំឡេង ឲ្យដឹងថា កម្លាំងនគរបាលចុះឆែកឆេរតាមដីកាសាលាដំបូងរាជធានីភ្នំពេញ ព្រមទាំងរឹបអូសបានទូដែក១ មានទំហំប្រហែល ៦០សង់ទីម៉ែត្របួនជ្រុងព័ណ៌ខ្មៅ។ ចំណែកជនសង្ស័យម្នាក់ គឺលោក ដាំ ញ៉ាំ បានរត់គេចខ្លួនបាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។