ក្រសួងអប់រំយុវជននិងកីឡា បានរិះរកវិធីថ្មីមួយទៀត គឺមិនអនុញ្ញាតឲ្យបើកសាកលវិទ្យាល័យបន្ថែមនោះទេ ប៉ុន្តែបានជំរុញឲ្យមានសកលវិទ្យាល័យដែលបង្រៀនផ្នែកជំនាញវិញ ដើម្បីដើរទាន់នឹងទីផ្សារការងារបច្ចុប្បន្នដែលអ្នកវិនិយោគកំពុងត្រូវការ។ យ៉ាងនេះក្ដី អ្នកសិក្សាផ្នែកសង្គមមិនគាំទ្រចំពោះការផ្ដួចផ្ដើមតាមវិធីនេះទេ ដោយទាមទារឲ្យពង្រឹងគុណភាពសាកលវិទ្យាល័យដែលមានស្រាប់។
មន្ត្រីជាន់ខ្ពស់ក្រសួងអប់រំ បានប្រកាសផ្អាកជាបណ្ដោះអាសន្នចំពោះការបើកបន្ថែមទៀតនូវសាកលវិទ្យាល័យនានា ក្នុងគ្រាដែលកម្ពុជា កំពុងកង្វះសាកលវិទ្យាល័យដែលបង្រៀនដល់និស្សិតផ្នែកជំនាញនោះ។
រដ្ឋមន្ត្រីក្រសួងអប់រំយុវជននិងកីឡា លោក ហង់ ជួនណារ៉ុន មានប្រសាសន៍ថា ការប្រកាសឲ្យផ្អាកជាបណ្ដោះអាសន្ននេះ គឺជាវិធានការកំណែទម្រង់មួយដើម្បីឆ្លើយតបទៅនឹងសេចក្ដីត្រូវការរបស់អ្នកវិនិយោគបច្ចុប្បន្ន។ លោកថា សព្វថ្ងៃនេះសាកលវិទ្យាល័យដល់ទៅជាង ៥០% បានបង្រៀនដល់និស្សិត គឺជាមុខវិជ្ជាផ្នែកវិទ្យាសាស្ត្រសង្គម សេដ្ឋកិច្ច ពាណិជ្ជកម្ម គ្រប់គ្រងជាដើម។
លោក ហង់ ជួនណារ៉ុន៖ «អ្នកវិនិយោគគឺត្រូវការជំនាញថ្មី ដូចជាវិស្វករ អ្នកជំនាញខាងផ្នែកកសិកម្ម ខាងផ្នែកវិទ្យាសាស្ត្រអីជាដើម។ អ៊ីចឹងក្រសួងផ្អាកជាបណ្ដោះអាសន្នក្នុងការបើកសាកលវិទ្យាល័យថ្មី ក៏ប៉ុន្តែអនុញ្ញាតឲ្យបង្កើតតែសាកលវិទ្យាល័យដែលបង្រៀនខាងផ្នែកកសិកម្ម ព្រោះយើងត្រូវការអ្នកជំនាញកសិកម្មច្រើន ខាងផ្នែកមេកានិច ព្រោះឥឡូវនេះមានការប្រើប្រាស់ត្រាក់ទ័រអីច្រើន អត់មានអ្នកជួសជុលទេត្រាក់ទ័រ ដោយសារអ្នកវិនិយោគត្រូវការវិស្វករច្រើនក៏ដូចជាត្រូវការអ្នកមានជំនាញវិជ្ជាជីវៈ។ យើងត្រូវការបង្កើតវិស័យសេដ្ឋកិច្ចថ្មី អ៊ីចឹងយើងអនុញ្ញាតបង្កើតតែវិស័យអាទិភាពហ្នឹងទេ»។
លោកថ្លែងបែបនេះនៅក្នុងពិធីខួបលើកទី១របស់សាកលវិទ្យាល័យអាមេរិកាំងភ្នំពេញ កាលពីថ្ងៃទី២៤ ឧសភា នៅឯមជ្ឈមណ្ឌលទួលគោក។
ឆ្លើយតបទៅនឹងការប្រកាសផ្អាកបណ្ដោះអាសន្នចំពោះការមិនឲ្យបន្តបើកសាកលវិទ្យាល័យបន្ថែមនេះ អ្នកសិក្សាស្រាវជ្រាវផ្នែកសង្គម លោក កែម ឡី មានមតិថា បញ្ហាសំខាន់គឺក្រសួងត្រូវតម្រង់ទិសសាកលវិទ្យាល័យដែលមានស្រាប់នោះឲ្យមានបង្រៀនកម្រិតបរិញ្ញាបត្រ អនុបណ្ឌិត ឬបណ្ឌិតខាងជំនាញឲ្យត្រូវនឹងទីផ្សារការងារទៅវិញទើបជាការប្រសើរ។ លោកថា តាមសេដ្ឋកិច្ចទីផ្សារសេរី ការហាមឃាត់មិនឲ្យបើកសាកលវិទ្យាល័យគឺមិនត្រឹមត្រូវនោះទេ ពោលគឺសាមីក្រសួងត្រូវតាមដាននឹងពង្រឹងសាកលវិទ្យាល័យនោះថាតើបានគោរពតាមស្តង់ដារការសិក្សា និងមានគុណភាពឬអត់។
លោក កែម ឡី៖ «សាកលវិទ្យាល័យជាច្រើនដែលមានការបណ្ដុះបណ្ដាល ឬមួយក៏ប្រព័ន្ធអប់រំមិនមែនតែត្រឹមសាកលវិទ្យាល័យទេ តាំងពីឌីប្លូម មករហូតមកដល់បាក់ឌុប រហូតដល់បរិញ្ញាបត្រ គឺយើងអត់មានស៊ីទៅនឹងទីផ្សារការងារទេ។ ខ្ញុំគិតថា គ្រាន់តែសារប្រាប់ទៅដល់សាកលវិទ្យាល័យផ្សេងៗ ឬក៏អ្នកចង់បើកថ្មីទេ យើងត្រូវធ្វើបដិវត្តន៍ប្រព័ន្ធអប់រំឲ្យប្រព័ន្ធអប់រំរបស់យើងតាំងពីថ្នាក់វិទ្យាល័យរហូតដល់សាកលវិទ្យាល័យ ឲ្យវាស្របទៅនឹងទីផ្សារការងារ។ រដ្ឋាភិបាលអាចនិយាយអ៊ីចឹងបានលុះត្រាតែរដ្ឋាភិបាលធ្វើការសិក្សាជាលក្ខណៈថ្នាក់ជាតិអំពីទីផ្សារការងារ យើងមិនអាចស្មានបានទេ»។
សាកលវិទ្យាល័យទាំងរដ្ឋនិងឯកជននៅទូទាំងប្រទេស សព្វថ្ងៃមានចំនួន ១០៥ សាកលវិទ្យាល័យ។ ចំណែកនិស្សិតមានជាង ២៥ម៉ឺននាក់។ ជារៀងរាល់ឆ្នាំមានការរិះគន់ថា និស្សិតដែលបានបញ្ចប់ការសិក្សាហើយពិបាកស្វែងរកការងារធ្វើ ប្រាក់បៀវត្សមិនសាកសមនឹងកម្រិតដែលបានសិក្សា ឬធ្វើការខុសជំនាញដែលខ្លួនបានរៀនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។