សាលាមធ្យមសិក្សាវិចិត្រសិល្បៈខ្វះសិស្សចូលរៀនទោះមិនមានការបង់ថ្លៃសាលា
2018.08.23
ក្រុមសម្ដែងសិល្បៈនាកម្មវិធីតាំងពិព័រណ៍នៅសាលាមធ្យមវិចិត្រសិល្បៈ ថ្ងៃទី១៥ ខែមករា ឆ្នាំ២០១៧។
RFA
ក្រសួងវប្បធម៌ និងវិចិត្រសិល្បៈ ចាប់ផ្ដើមផ្សព្វផ្សាយអំពីការទទួលពាក្យសុំចូលសិក្សាជំនាញសិល្បៈ វប្បធម៌ នៅសាលាមធ្យមសិក្សាវិចិត្រសិល្បៈ តាមបណ្ដាញសង្គមហ្វេសប៊ុក (Facebook)។
រដ្ឋមន្ត្រីក្រសួង វប្បធម៌ និងវិចិត្រសិល្បៈ អ្នកស្រី ភឿង សកុណា មានប្រសាសន៍ថា ដោយមានការផ្សព្វផ្សាយពីការទទួលពាក្យសុំចូលរៀនជំនាញនេះពីចម្ងាយ ដូច្នេះ ក្រសួងសង្ឃឹមថា ឆ្នាំសិក្សា២០១៨ -២០១៩ នៅសាលាមធ្យមសិក្សាវិចិត្រសិល្បៈ នឹងមានសិស្សចូលរៀនច្រើនជាងពេលមុនៗ៖ «កាលពីបួនប្រាំឆ្នាំមុន កូនសិស្សមានការថយចុះបន្តិច ប៉ុន្តែកាលពីឆ្នាំទៅ បន្ទាប់ពីមានការផ្សព្វផ្សាយទូលំទូលាយ និងការកែសម្រួលហេដ្ឋារចនាសម្ព័ន្ធដូចជា ផ្លូវ អាគារសិក្សា និងឧបករណ៍សិក្សាជាដើម សិស្សចាប់ផ្ដើមមានការកើនឡើង ហើយនៅឆ្នាំសិក្សា ២០១៨-២០១៩ នេះ សង្ឃឹមថា សិស្ស នឹងមានការកើនឡើងគួរឲ្យយើងពេញចិត្ត ហើយការដាក់សុំចូលរៀននេះមិនមានការបង់ថ្លៃអ្វីនោះទេ»។
ចំណែកសាស្ត្រាចារ្យសាលាវិចិត្រសិល្បៈមួយចំនួន នៅតែមានក្តីបារម្ភពីការខ្វះអ្នកបន្តវេនជំនាញ សិល្បៈ វប្បធម៌ ពីពួកគាត់ ពីព្រោះក្មេងជំនាន់ក្រោយ ហាក់មិនសូវចាប់អារម្មណ៍ ចូលចិត្តសិក្សាចាប់យកជំនាញនេះជាអាជីពនោះឡើយ ក្នុងរយៈពេលប៉ុន្មានឆ្នាំចុងក្រោយនេះ។
ការលើកឡើងពីកង្វល់លើបញ្ហានេះ ខណៈសាលាមធ្យមសិក្សាវិចិត្រសិល្បៈ ប្រកាសជ្រើសរើស សិស្សានុសិស្ស អោយចូលរៀនជំនាញចំនួន៥ ក្នុងឆ្នាំសិក្សាថ្មី ២០១៨-២០១៩ ក្នុងនោះរួមមាន ផ្នែក ដូរ្យតន្ត្រី របាំ ល្ខោន សៀក និងសិល្បៈសូនរូប។
សាលាចាប់ទទួលពាក្យស្នើសុំចាប់ពីខែសីហានេះ តទៅ ហើយរហូតដល់ ថ្ងៃទី២៨ កញ្ញា ឆ្នាំ២០១៨ សាលានឹងរៀបចំការប្រឡងពិនិត្យ ឧបនិស្ស័យ របស់សិស្សានុសិស្ស ឲ្យចូលរៀនតាមជំនាញនីមួយៗ។
ក្រសួងបញ្ជាក់បញ្ចាក់ថា ការប្រឡងជ្រើសរើសសិស្សចូលរៀននេះ ឥតបង់ថ្លៃអ្វីទាំងអស់។
សេចក្ដីជូនដំណឹង របស់សាលាមធ្យមវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ កាលពីថ្ងៃទី ២៣ កក្កដា ឲ្យដឹងថា ពាក្យដាក់សុំប្រឡង អាចរកបាននៅលើទំព័រហ្វេសប៊ុករបស់ក្រសួង ឬនៅសាលាមធ្យមវិចិត្រសិល្បៈផ្ទាល់ ដែលមានទីតាំង នៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ការប្រកាសជ្រើសរើសនេះ ធ្វើឡើងជារៀងរាល់ឆ្នាំ ប៉ុន្តែ មិនសូវមានក្រុមយុវជនរំភើប រីករាយសម្រុកចូលទៅដាក់ពាក្យប្រឡង ដូចការប្រឡង ចម្រៀងសម័យ នៅតាមស្ថានីយទូរទស្សន៍នានា ឬនៅតាមសាលាជំនាញ និងមហាវិទ្យាល័យផ្សេងៗនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
