កម្មករដែលថៅកែមិនព្រមបើកប្រាក់ខែឲ្យតាំងពីខែមករាអត់លុយទៅស្រុកកំណើត
2018.04.08
ក្រុមកម្មករ កម្មការិនី ដែលមានជម្លោះជាមួយថៅកែរោងចក្រ រឿងមិនព្រមបើកប្រាក់ខែឲ្យតាំងខែមករា ដើមឆ្នាំ២០១៨នេះ អះអាងថា នៅពេលបុណ្យចូលឆ្នាំនេះ ពួកគេគ្មានគម្រោងទៅលេងស្រុកកំណើត ដូចកម្មករដទៃទេ ដោយសារពុំមានប្រាក់ចាយវាយដូចគេឯងដទៃទៀត។
ក្រុមសហជីពទាមទារឲ្យថៅកែគោរពច្បាប់ការងារ បើកលុយឲ្យកម្មករមុនចូលឆ្នាំ ដើម្បីឲ្យពួកគាត់ មានឱកាសទៅជួបជុំគ្រួសារ នៅស្រុកកំណើត។
កម្មការិនី នៃរោងចក្រហ្វើសហ្គាវ័ន្ដ អាប់ភើរ៉ែល (First GAWON Apparel) នៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ប្រាប់ថា ពិធីបុណ្យចូលឆ្នាំ នៅឆ្នាំនេះ ពួកគាត់មិនអាចទៅលេងស្រុកកំណើត ដូចកម្មករធ្វើការនៅរោងចក្រដទៃទេ ដោយសារ ថៅកែជាជនជាតិកូរ៉េ នៅតែមិនព្រមបើកប្រាក់ឈ្នួលឲ្យពួកគាត់។
កម្មការិនី ប្រាប់ថា ពួកគាត់ភាគច្រើន បាននាំគ្នាវេចចាន ឆ្នាំង មុងកន្ទេល មកចងតង់ដេកមុខរោងចក្រតម្រៀបគ្នាអស់ហើយ ព្រោះ៣ខែហើយ ដែលពួកគាត់មិនទាន់ទទួលបានប្រាក់ឈ្នួល ដូច្នេះពួកគាត់ គ្មានប្រាក់បង់ថ្លៃផ្ទះ និងមានអ្នកខ្លះជំពាក់ធនាគារថែមទៀត។
កម្មការិនីម្នាក់ អ្នកស្រី សុខ សំណាង ប្រាប់ថា គាត់សោកស្ដាយចំពោះការខកខានទៅលេងស្រុកកំណើតនៅឆ្នាំនេះ។ បើទោះជាពួកគាត់បានស្វះស្វែងរកកិច្ចអន្តរាគមន៍ នៅក្រសួងការងារជាច្រើនដងហើយ ប៉ុន្តែនៅតែមិនទាន់មានលទ្ធផល។ អ្នកស្រី សុខ សំណាង ទាមទារឲ្យរដ្ឋាភិបាលអន្តរាគមន៍ ក្នុងរឿងនេះ ដើម្បីណែនាំ ឬបង្ខំឲ្យថៅកែរោងចក្រគោរពច្បាប់ការងារ និងគួរចេញមុខផ្ដល់ប្រាក់ឈ្នួលឲ្យកម្មករក្នុងរោងចក្រ រួចចាំកាត់យកពីថៅកែវិញ ដើម្បីអាចឲ្យពួកគាត់មានលទ្ធភាពទៅលេងស្រុកកំណើត នៅរដូវចូលឆ្នាំ។ «»
កាលពីថ្ងៃទី១៨ ខែមករា កម្មកររោងចក្រ ហ្វើស ហ្គាវ័ន អាប់ភែរឹល បានលើដាក់ញត្តិនៅខុទ្ទកាល័យលោកនាយករដ្ឋមន្ត្រី ហ៊ុន សែន ម្ដងហើយ ដើម្បីស្នើសុំដោយផ្ទាល់ឲ្យលោក ហ៊ុន សែន ជួយរកដំណោះស្រាយដល់ពួកគាត់។ កម្មកររោងចក្រហ្វើសហ្គាវ័ន្ដ ឲ្យដឹងទៀតថា ថៅកែរោងចក្រ ជនជាតិកូរ៉េខាងត្បូង ធ្លាប់មានប្រវត្តិថ្មីៗនេះ រត់ចោលកម្មករ មិនព្រមបើកប្រាក់ឈ្នួលឲ្យកម្មករម្ដងហើយ នៅរោងចក្រហ្គាវ័ន្ដ ក្នុងក្រុងតាខ្មៅ។ ប៉ុន្តែរោងចក្រហ្គាវ័ន្ដ នៅក្រុងតាខ្មៅ ត្រូវតុលាការចេញដីកាបង្គាប់ឲ្យកម្មករនាំគ្នាលក់ឡាយឡុង សម្ភារៈរោងចក្រ ក្រោយពេលកម្មករដេកយាមរាប់ខែ ទាំងថ្ងៃទាំងយប់ នៅមុខរោងចក្រ។
ជម្លោះរវាងកម្មករ និងថៅកែរោងចក្រហ្វើសហ្គាវ័ន្ដនេះ អូសបន្លាយតាំងពីខែមករា ដើមឆ្នាំ២០១៨ មកម្ល៉េះ។ ក្រុមកម្មករ ប្រាប់ថា ថៅកែរោងចក្រតែងប្រើប្រាស់ផ្លូវតុលាការដើម្បីបង្ខំឲ្យកម្មករ ចូលធ្វើការវិញ ក្នុងរយៈពេលមិនបានបើកប្រាក់ឈ្នួល៣ខែមកនេះ។ ពួកគាត់ថា ដើម្បីរង់ចាំទទួលប្រាក់ឈ្នួល និងជៀសវាងថៅកែមានលេសចោទ កម្មករ និងសហជីព ថាមានចរិតញុះញង់ ឬបិទផ្លូវ ជាដើម ពួកគាត់បានបង្ខំចិត្តចូលធ្វើការវិញ តាមសេចក្ដីបង្គាប់របស់តុលាការ បើទោះជា៣ខែហើយ ពួកគាត់គ្មានបានប្រាក់ឈ្នួលសោះ។
អាស៊ីសេរី មិនអាចសុំការបំភ្លឺពីអ្នកនាំពាក្យក្រសួងការងារ លោក ហេង សួគិ៍ បានទេ ជុំវិញករណីកម្មករគ្មានលុយទៅលេងស្រុកនៅរដូវចូលឆ្នាំ ដោយសារថៅកែមិនព្រមបើកប្រាក់ឈ្នួលឲ្យ។
ប្រធានសហជីពស៊ីខៅឌូប្រចាំរោងចក្រ ហ្វើសហ្គាវ័ន្ដ លោក ខឹម មករា ឲ្យដឹងថា ក្រុមកម្មករទើបនាំគ្នាចេញមកធ្វើកូដកម្មចងតង់ដេកមុខរោងចក្រម្ដងទៀត កាលពីថ្ងៃទី៦ មេសា។ លោកថា កាលពីថ្ងៃទី៥ មេសា ភាគីទាំង៣ មានសហជីព ថៅកែរោងចក្រ និងមន្ត្រីក្រសួងការងារ បានប្រជុំគ្នារកដំណោះស្រាយ ប៉ុន្តែ ថៅកែប្រាប់ថា យល់ព្រមបើកប្រាក់ឈ្នួលឲ្យកម្មករ ក្នុងម្នាក់ទទួលបាន ១៧ដុល្លារ ស្មើនឹងប្រហែលខ្ទង់ ៦ម៉ឺន ៨ពាន់ (៦៨០០០)រៀល ក្នុងមួយខែ ព្រោះថៅកែគ្មានលទ្ធភាពបើកឲ្យកម្មករ។ សហជីពថា កម្មករមិនព្រមទទួលយកដំណោះស្រាយបែបនេះទេ ទើបពួកគាត់សម្រេចចិត្ត នាំគ្នាចេញធ្វើកូដកម្មម្ដងទៀត។ «»
សហជីពប្រាប់ថា បើទោះជាគ្មានប្រាក់បើកឲ្យកម្មករ ប៉ុន្តែថៅកែជាជនជាតិកូរ៉េ គឺ អ្នកស្រី ផាក់ ក្យុងហ៊ី មិនព្រមរត់ចោលកម្មករដូចកាលគាត់រត់ចោលកម្មកររោងចក្រហ្គាវ័ន្ដ នៅក្រុងតាខ្មៅឡើយ ដែលជាហេតុធ្វើឲ្យកម្មករមិនអាចទទួលបានប្រាក់ឧបត្ថម្ភរបស់លោកនាយករដ្ឋមន្ត្រី ហ៊ុន សែន។ កម្មករនិងសហជីព សំណូមពរឲ្យរបបក្រុងភ្នំពេញ ចេញមុខបើកប្រាក់ឈ្នួលឲ្យកម្មករ ទាំង៣ខែសិន ដើម្បីពួកគាត់អាចទៅលេងស្រុកកំណើត នៅពេលបុណ្យចូលឆ្នាំបាន រួចចាំទូទាត់ជាមួយថៅកែរោងចក្រវិញ៕