កម្មករសំណង់៥នាក់ស្លាប់ ដោយសារដាច់ខ្សែកន្ត្រកយោងនៅការដ្ឋានមួយកន្លែងនៅភ្នំពេញ
2024.09.29
សំណង់អគារ អូឡាំព្យ៉ា ស៊ីធី (Olympia City) នៅជាប់ពហុកីឡដ្ឋានអូឡាំពិក ជាបុត្រសម្ព័ន្ធរបស់ក្រុមហ៊ុន OCIC របស់ឧកញ៉ា ពុង ឃាវវសែ។
រូប៖ ហ្វេសប៊ុក Olympia City Leasing
កម្មករសំណង់ចំនួន៥នាក់ ស្លាប់ដោយសារដាច់ខ្សែកន្ត្រកយោង នៅការដ្ឋានសាងសង់មួយកន្លែងក្នុងរាជធានីភ្នំពេញ ។ សហជីពថា កម្មករវិស័យសំណង់នៅតែប្រឈមនឹងគ្រោះថ្នាក់ការងារកម្រិតខ្ពស់ និងស្នើដល់រដ្ឋាភិបាល ឲ្យកំណត់ប្រាក់ឈ្នួលអប្បបរមាសម្រាប់កម្មករលើវិស័យនេះ។
កម្មករសំណង់ចំនួន៥នាក់ បានបាត់បង់ជីវិតក្នុងហេតុការណ៍ ដាក់ខ្សែកន្ត្រកយោងនៅការដ្ឋានសាងសង់មួយកន្លែង នៃអគារអូឡាំព្យ៉ា (Olympia) ស្ថិតនៅសង្កាត់វាលវង់ ខណ្ឌ ៧ មករា រាជធានីភ្នំពេញ កាលពីរសៀលថ្ងៃទី ២៧ ខែកញ្ញា។
អគ្គលេខាធិការសហព័ន្ធសហជីពកម្មករសំណង់ និងព្រៃឈើកម្ពុជា លោក យ៉ាន់ ធី ប្រាប់អាស៊ីសេរី នៅថ្ងៃទី២៨ ខែកញ្ញាថា ហេតុការណ៍គ្រោះថ្នាក់ខាងលើនេះ ភាគីនិយោជក ឬថៅកែ គឺជាអ្នកទទួលខុសត្រូវទាំងស្រុកលើករណីនេះ ហើយក្រសួងការងារ និងក្រសួងដែនដី ក៏ត្រូវចូលរួមចំណែកទទួលខុសត្រូវផងដែរ។
លោក យ៉ាន់ ធី៖ «ខ្ញុំគិតថា សំណងដែលត្រូវផ្ដល់ឲ្យយ៉ាងហោចណាស់ឲ្យបានដូចអត្ថប្រយោជន៍របស់ប.ស.ស ទៅប្រសិនបើគាត់អត់ទាន់បានចុះបញ្ជីក៏ដោយ ប៉ុន្តែទី១គួរតែបានប្រាក់សោហ៊ុយបូជាសព ព្រោះតែគាត់គ្រោះថ្នាក់ការងារ ហើយបន្ទាប់មកក៏មានប្រាក់សម្រាប់ផ្ដល់ឲ្យក្រុមគ្រួសារគាត់ ប្រសិនបើគាត់មានប្រពន្ធមានកូនតូចគួរតែបានយ៉ាងហោចណាស់តាមលក្ខខណ្ឌប.ស.ស ទៅយើងមិនទាមទារលើសហ្នឹងទេ។ ទី២ ដែលគាត់ត្រូវទទួលបានហ្នឹង គឺយុត្តិធម៌សម្រាប់កម្មករ ក្រុមគ្រួសារគាត់ ដែលបានស្លាប់ទៅ ព្រោះវាជាការធ្វេសប្រហែសមួយរបស់និយោជក របស់ក្រុមហ៊ុន ដែលមិនបានត្រួតពិនិត្យទៅលើសម្ភារៈសម្រាប់ប្រើប្រាស់ ដែលនាំឲ្យគ្រោះថ្នាក់ដល់កម្មករ»។
ផ្សារទំនើបអូឡាំព្យ៉ា ជារបស់ក្រុមហ៊ុនវិនិយោគទុនអាណិកជនកម្ពុជា ឬហៅកាត់ថា (OCIC) របស់ឧកញ៉ា ពុង ឃាវសែ ដែលជាអ្នកជំនួញស្និទ្ធនឹងប្រធានព្រឹទ្ធសភា លោក ហ៊ុន សែន។ អគារនៃផ្សារទំនើបនេះ សាងសង់ឡើងដោយក្រុមហ៊ុន ឌឺ អូឡាំព្យ៉ា ស៊ីធី ឌីវើលប់មិន (The Olympia City Development) ជាបុត្រសម្ព័ន្ធរបស់ក្រុមហ៊ុន OCIC ។
វិទ្យុអាស៊ីសេរី នៅមិនទាន់អាចទាក់ទងអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក កត្តា អ៊ន និងអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត ដើម្បីសុំការអត្ថាធិប្បាយជុំវិញបញ្ហានេះ បាននៅឡើយទេ នៅថ្ងៃទី២៨ ខែកញ្ញា។ វិទ្យុអាស៊ីសេរី ក៏មិនទាន់អាចទាក់ទងតំណាងក្រុមហ៊ុនអូឡាំព្យ៉ា ដើម្បីសាកសួររឿងនេះ បានដែរនៅថ្ងៃដដែលនេះ។
ទាក់ទងនឹងគ្រោះថ្នាក់ការងារនេះដែរ សហជីពកត់សម្គាល់ឃើញថា ទោះជាក្រសួងដែនដី បានតែងតាំងមន្ត្រី មន្ត្រីអធិការកិច្ចជិត ៤រយ (៣៦២) នាក់ ដើម្បីចុះតាមអង្កេត ស្រាវជ្រាវ ត្រួតពិនិត្យ និងជំរុញការអនុវត្តច្បាប់ស្ដីពីសំណង់នៅទូទាំងប្រទេស កាលពីឆ្នាំ២០២០ក៏ដោយ ក៏ករណីគ្រោះថ្នាក់បណ្ដាលមកពីកង្វះខាតការត្រួតពិនិត្យការដ្ឋាននៅតែបន្តកើតមាន។ ជាក់ស្ដែងករណីកម្មករសំណង់ចំនួន៤នាក់ បាត់បង់ជីវិត និងម្នាក់ទៀតរងរបួសធ្ងន់ នៅក្នុងហេតុការណ៍ដាច់ខ្សែកន្ត្រកយោងនៅខេត្តព្រះសីហនុកាលពីឆ្នាំ២០២២ ជាដើម។
អគ្គលេខាធិការសហព័ន្ធសហជីពកម្មករសំណង់ និងព្រៃឈើ លោក យ៉ាន់ ធី ទទូចដល់មន្ត្រីអធិការកិច្ចសំណង់ ឲ្យអនុវត្តតួនាទីរបស់ខ្លួន និងស្នើដល់ក្រសួងការងារ ឲ្យបង្កើនការដាក់បញ្ចូលកម្មករសំណង់ទៅក្នុងប្រព័ន្ធកិច្ចគាំពារសង្គម ឬហៅថា ប.ស.ស។
លោក យ៉ាន់ ធី៖ «ខ្ញុំគិតថា ពួកគាត់ (ក្រុមអធិការកិច្ច) គួរតែសកម្មឡើងវិញ ដើម្បីចុះពិនិត្យ និងចុះអធិការកិច្ចទៅលើក្រុមហ៊ុនការដ្ឋានសំណង់ ដើម្បីបញ្ចៀសគ្រោះថ្នាក់មកលើមកលើកម្មករ ហើយពង្រឹង អនុវត្តបទដ្ឋានគតិយុត្តិ ដែលមានស្រាប់ដូចជា ច្បាប់ ឬក៏ប្រកាសរបស់ក្រសួងពាក់ព័ន្ធពីព្រោះ ក្រសួងដែលពាក់ព័ន្ធមានពីរ គឺក្រសួងការងារ និងក្រសួងដែនដី នគរូបនីយកម្ម និងសំណង់ និងអាជ្ញាធរមូលដ្ឋាន ដែលជាអ្នកអនុវត្តផ្ទាល់ ដែលឃើញផ្ទាល់ទាក់ទងនឹងក្រុមហ៊ុនការដ្ឋាន ដែលកំពុងតែសាងសង់ ហើយមួយចំនួនមានស្តង់ដារ ហើយមួយចំនួនទៀតមិនបានគោរពតាមគោលការណ៍ ឬស្តង់ដារ ឬបទដ្ឋានគតិយុត្តិរបស់ក្រសួងទាំងនោះទេ»។
កម្មករសំណង់ ជាកម្មករធ្វើការដោយប្រើកម្លាំងបាយ ប្រឈមនឹងគ្រោះថ្នាក់ការងារគ្រប់ពេលវេលា ប៉ុន្តែពួកគាត់ទទួលបានប្រាក់ខែតិច ហើយប្រាក់ឈ្នួលគោលអប្បបរមា រដ្ឋាភិបាលនៅមិនទាន់កំណត់នៅឡើយទេ។
សហជីព ទាមទារឲ្យក្រុមហ៊ុនសាងសង់ទទួលខុសត្រូវ និងផ្ដល់សំណងដល់ក្រុមគ្រួសារសពតាមច្បាប់ ក្នុងករណីខ្វះការត្រួតពិនិត្យបណ្ដាលឲ្យមនុស្សស្លាប់ចំនួន៥នាក់នេះ ព្រមទាំងទទូចដល់ក្រសួងដែនដី និងក្រសួងការងារ ចុះធ្វើអធិការកិច្ចលើក្រុមហ៊ុនសាងសង់ទាំងអស់ ដើម្បីបង្ការគ្រោះថ្នាក់ជាយថាហេតុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
