កម្ពស់ទឹកនៅខេត្តស្ទឹងត្រែងកំពង់ចាមនិងកណ្ដាលលើសពីកម្រិតប្រកាសអាសន្ន
2018.08.09
រដ្ឋាភិបាលប្រកាសថា ស្ថានភាពទឹកទន្លេ គិតត្រឹមម៉ោង ៥ល្ងាច នៅថ្ងៃទី៩ បានឡើងខ្ពស់ផុតពីកម្រិតប្រកាសការប្រុងប្រយ័ត្ន។
ក្រសួងធនធានទឹក និងឧតុនិយមឱ្យដឹងថាកម្ពស់ទឹកនៅស្ថានីយ ចំនួន៣ ដែលកម្ពស់ទឹកបានឡើងហួសពីកម្រិតប្រុងប្រយ័ត្ននោះ រួមមាន ស្ថានីយខេត្តស្ទឹងត្រែង ខេត្តកំពង់ចាម និងស្ថានីយកោះខែល នៅខេត្តកណ្ដាល។
ទន្ទឹមនឹងកម្ពស់ទឹកនៅតាមខេត្តចំនួន ៣ បានឡើងផុតពីកម្រិត ប្រុងប្រយ័ត្ន កម្ពស់ទឹកនៅខេត្តចំនួន ៤ផ្សេងទៀត ក៏កំពុងឡើង ជិតដល់កម្រិតកម្ពស់ប្រុងប្រយ័ត្នដែរ ក្នុងនោះមានស្ថានីយទន្លេមេគង្គ ខេត្តក្រចេះ ស្ថានីយទន្លេបាសាក់ ចតុមុខ ស្ថានីយទន្លេមេគង្គ អ្នកលឿង និងស្ថានីយទន្លេសាប ព្រែកក្តាម។
សេចក្ដីជូនដំណឹងរបស់ក្រសួងធនធានទឹក និងឧតុនិយម កាលពីថ្ងៃទី៦ ខែសីហា បានព្យាករណ៍ថា កម្ពុជានឹងមានភ្លៀងធ្លាក់ ពីមធ្យម ទៅច្រើន នៅតាមតំបន់ខ្ពង់រាប ភាគឦសាន តំបន់ទន្លេសេកុង ទន្លេសេសាន និងទន្លេស្រែពក បានធ្វើអោយទឹកទន្លេទាំងបីនេះ ឡើងបន្តិច។ ក្រៅពីនេះមានប្រព័ន្ធ សម្ពាធទាបមួយផ្សេងទៀតបាន អូសកាត់ទន្លេមេគង្គក្នុងប្រទេសថៃ និងឡាវ ដែលបង្កអោយមានភ្លៀង ធ្លាក់ពីកម្រិតតិច ទៅមធ្យម។
ទោះយ៉ាងណាក្រសួងធនធានទឹក និងឧតុនិយម មានសុទិដ្ឋិនិយមថា ផ្ទៃបឹងទន្លេសាប ដែលទើបមានកម្ពស់ទឹកប្រាំម៉ែត្រ និងជាង ៣៣សង់ទីម៉ែត្រ អាចមានលទ្ធភាពស្រូបយកទឹកជំនន់បានបន្ថែមទៀត៕