ពលរដ្ឋតំបន់បឹងទន្លេសាបខេត្តបាត់ដំបងរិះគន់ករណីមិនទប់ស្កាត់វៀតណាមនេសាទខុសច្បាប់
2018.12.22
ប្រជានេសាទនៅស្រុកឯកភ្នំ ខេត្តបាត់ដំបង រិះគន់អាជ្ញាធរពាក់ព័ន្ធនៅខេត្តនេះថា មិនទប់ស្កាត់ជនជាតិវៀតណាមធ្វើនេសាទខុសច្បាប់នៅតំបន់បឹងទន្លេសាប។ ការរិះគន់នេះ ដោយសារមានទូកកាណូតនេសាទរបស់ជនជាតិវៀតណាមជាច្រើនគ្រឿង កំពុងធ្វើសកម្មភាពនៅតំបន់បឹងទន្លេសាបដោយសេរី ហើយមិនមានអាជ្ញាធរណាទប់ស្កាត់នៅឡើយ។
ប្រជានេសាទស្រុកឯកភ្នំ អំពាវនាវសុំឲ្យមេដឹកនាំទីក្រុងភ្នំពេញ លោក ហ៊ុន សែន ដកសមត្ថកិច្ចពាក់ព័ន្ធនៅតំបន់បឹងទន្លេសាបចេញ ពីតំណែងទាំងអស់ ព្រោះមន្ត្រីទាំងនេះឃុបឃិតគ្នាបើកដៃឲ្យជនជាតិវៀតណាម និងអ្នកមានទ្រព្យធ្វើនេសាទខុសច្បាប់។
តំណាងប្រជានេសាទខេត្តបាត់ដំបង លោក ហ៊ុត ហាន ថ្លែងប្រាប់អាស៊ីសេរីនៅរសៀលថ្ងៃសុក្រទី២១ ធ្នូ ថា ជនជាតិវៀតណាមជាច្រើននាក់ធ្វើនេសាទទ្រង់ទ្រាយធំ ដោយប្រើអួនក្រឡាញឹក អូសចាប់ត្រីនៅមុខតំបន់អភិរក្សក្នុងបឹងទន្លេសាប នៅភូមិក្បាលតោល ឃុំកោះជីវាំង ស្រុកឯកភ្នំ យ៉ាងគគ្រឹកគគ្រេង ដោយមិនមានអាជ្ញាធរណាអើពើទប់ស្កាត់នោះទេ។ តំណាងប្រជានេសាទរូបនេះអះអាងទៀតថា អ្នកនេសាទជនជាតិវៀតណាម ធ្វើសកម្មភាពនៅពេលថ្ងៃលិច គឺចាប់ពីម៉ោង៦រសៀលរហូតដល់ម៉ោង៤ទៀបភ្លឺ ទើបពួកគេនាំគ្នាដឹកត្រីយកទៅលក់នៅទីផ្សារក្នុងតំបន់នោះ៖ «អានឹងគេអូសម៉ាស៊ីន ២គ្រឿង មុខវាទទឹក ៧០ម៉ែត្រ និងបណ្ដោយប្រហែល ១០០ម៉ែត្រ កាណូត២គ្រឿង កម្លាំង៦ម៉ាស៊ីនអូសសង្ខាង ធ្វើឲ្យប៉ះពាល់ធនធានរបស់យើងខ្លាំងមែនទែន ជាពិសេសឡូត៍បម្រុង។ ព្រោះឧបករណ៍នេះមានអាត្រជាក់ និងអាក្ដៅ អាត្រជាក់ប្រើច្រកវ៉ាក់នៅខាងក្រោមអាចឆក់ត្រីបានទៀតផង»។
លោកបន្ថែមទៀតថា ក្រៅពីនេះក៏មានក្រុមអ្នកមានលុយកាក់ប្រើឧបករណ៍បណរ៉ាវ ឬហៅថា មងក្រឡាញឹក ដាក់ពាំងរាប់ពាន់ម៉ែត្រចាប់យកត្រី នៅឡូត៍លេខ១ និងឡូត៍នេសាទលេខ២ ក្នុងឃុំកោះជីវាំង ជាច្រើនកន្លែងទៀត បានធ្វើសកម្មភាពជាច្រើនខែ ហើយមិនមានសមត្ថកិច្ចណាទៅទប់ស្កាត់នោះទេ។
ឆ្លើយតបនឹងបញ្ហានេះអភិបាលស្រុកឯកភ្នំ លោក ម៉ិល សុផល មានប្រសាសន៍ប្រាប់អាស៊ីសេរីថា នៅតំបន់ព្រៃលិចទឹក ជាប់បឹងទន្លេសាបក្នុងស្រុកឯកភ្នំ មិនមានបទល្មើសនេសាទទ្រង់ទ្រាយធំដូចការចោទប្រកាន់របស់ពលរដ្ឋនោះទេ ព្រោះសមត្ថកិច្ចបានចុះបង្ក្រាបជាញឹកញាប់ដែរ៖ «ព័ត៌មានបានមកពិតប្រាកដ ឬអត់? ទីមួយជួនកាលយករូបភាពពីណាមកបំប៉ោងដាក់សមត្ថកិច្ច ទី២សមត្ថកិច្ចចុះទៅវាបាត់ គេហៅថាគាត់ដឹងដំណឹងថាយើងចុះទៅគាត់បន្លិចបាត់ ហើយពេលយើងមកវិញគាត់ងើបវិញដដែល។ ប៉ុន្តែមិនអីទេខ្ញុំនឹងរៀបចំកម្លាំងចុះទៅមើលហើយ គ្រាន់តែមិនប្រាប់ថា ចុះថ្ងៃណាប៉ុណ្ណឹង»។
ទោះជាយ៉ាងនេះតំណាងប្រជានេសាទលោក ហ៊ុត ហាន អះអាងថា ការធ្វើនេសាទខុសច្បាប់គឺរឿងពិត ព្រោះលោកបានចុះទៅដល់ទីតាំងផ្ទាល់ជាមួយប្រជាពលរដ្ឋនៅក្នុងភូមិក្បាលតោល ចាប់ពីថ្ងៃទី១៩ ដល់ថ្ងៃទី២១ ធ្នូ ដូច្នេះមិនមែនជាការមួលបង្កាច់ខុសពីការពិតដើម្បីបង្ខូចឈ្មោះអាជ្ញាធរនោះទេ ប៉ុន្តែអាជ្ញាធរទៅវិញទេ ដែលច្រើនឆ្លើយបដិសេធយករួចខ្លួននោះ៖ «ធ្វើនេះមិនចេះតិចទេ តាំងពីថ្ងៃ៦ធ្នូមក គេនៅតែធ្វើដដែល ដូច្នេះហើយបានជាពលរដ្ឋព្រួយបារម្ភនោះ ហើយខ្ញុំមិនដែលទៅចេះនិយាយកុហកទេ អ៊ីចឹងបើសិនលោកអភិបាលគាត់ថា ពលរដ្ឋរាយការណ៍បំប៉ោងដូច្នេះ ខ្ញុំគិតថាលោកអភិបាលខ្លួនឯងទេ ដែលមិនដឹងព័ត៌មានពិតប្រាកដ»។
លោកអះអាងទៀតថា ការធ្វើនេសាទខុសច្បាប់នេះ ធ្វើឲ្យហិនហោចត្រីនៅក្នុងបឹងទន្លេសាបឆាប់រហ័ស ព្រោះសព្វថ្ងៃជនជាតិវៀតណាម និងអ្នកមានលុយទាំងនោះនេសាទត្រីទាំងតូចធំរាប់សិបតោនក្នុងមួយថ្ងៃៗ។ លោកថា បញ្ហានេះបានប៉ះពាល់យ៉ាងខ្លាំងដល់ប្រជាពលរដ្ឋនៅរស់នៅលើផ្ទះបណ្ដែតទឹក ក្នុងខេត្តបាត់ដំបងរាប់ពាន់គ្រួសារ និងខេត្តនៅជុំវិញបឹងទន្លេសាប ក្នុងនោះជាច្រើនទៀត មិនអាចរកត្រីដោះស្រាយជីវភាពគ្រួសារបានឡើយ ព្រោះពួកគាត់ពឹងផ្អែកទាំងស្រុងទៅលើរបបធ្វើនេសាទ ដូច្នេះដើម្បីដោះស្រាយបញ្ហានេះឲ្យមានប្រសិទ្ធភាព លុះត្រាតែអាជ្ញាធររបបលោកហ៊ុន សែន ដកមន្ត្រីពាក់ព័ន្ធទាំងចេញពីតំណែង ហើយដាក់មន្ត្រីផ្សេងដែលមានការស្មោះត្រង់ចំពោះពលរដ្ឋ និងប្រទេសជាតិជំនួស ហើយចុះធ្វើសកម្មភាពឲ្យបានទៀងទាត់ នឹងអាចជួយការពារបញ្ហានេះបាន៕