ជនជាតិដើមភាគតិចខេត្តរតនគិរីចាត់ទុកបណ្ឌិត កែម ឡី ថាជាអ្នកស្នេហាជាតិស្រឡាញ់ទឹកដី
2016.07.24
ប្រជាពលរដ្ឋនៅខេត្តរតនគិរី ភាគច្រើនមិនបានរៀបចំពិធីបុណ្យ ឬចូលរួមជូនដំណើរចុងក្រោយនៃបុណ្យសពបណ្ឌិត កែម ឡី ដែលត្រូវបានមនុស្សរាប់សែននាក់នាំគ្នាដង្ហែទៅកាន់ខេត្តតាកែវ នៅថ្ងៃទី២៤ ខែកក្កដា នេះទេ ក៏ប៉ុន្តែទាំងប្រជាពលរដ្ឋ តំណាងគណបក្សនយោបាយ និងមន្ត្រីអង្គការសង្គមស៊ីវិលមួយចំនួន បង្ហាញសមានចិត្តជាសារចូលរួមមរណភាពបណ្ឌិត កែម ឡី សម្រាប់កូនខ្មែរគ្រប់រូបចងចាំ។
ប្រជាពលរដ្ឋនៅខេត្តរតនគិរី នៅតែប្រកបរបរចិញ្ចឹមជីវិតដូចធម្មតានៅថ្ងៃទី២៤ ខែកក្កដា មិនឃើញមានសកម្មភាពធំដុំណាពាក់ព័ន្ធទៅនឹងការចូលរួមជូនដំណើរសពបណ្ឌិត កែម ឡី នៅថ្ងៃចុងក្រោយនៃបុណ្យសពលោកឡើយ។
សភាពស្ងប់ស្ងាត់នេះ មិនមែនមានន័យថា ប្រជាពលរដ្ឋមិនបានចាប់អារម្មណ៍ ឬឈឺឆ្អាលចំពោះការបាត់បង់ធនធានមនុស្សដ៏សំខាន់ គឺបណ្ឌិត កែម ឡី នោះទេ។ តាមរយៈការជជែកគ្នាជាលក្ខណៈមិត្តភាពនៅតាមហាងកាហ្វេ នៅការិយាល័យធ្វើការ ឬការបង្ហោះទស្សនៈនៅតាមបណ្ដាញសង្គមហ្វេសប៊ុក (Facebook) ប្រជាពលរដ្ឋមួយចំនួនបង្ហាញការឈឺចាប់ ខ្លះស្ដាយស្រណោះ ខ្លះទៀតស្រែកទាមទារឲ្យរាជរដ្ឋាភិបាល ស្វែងរកឃាតក និងអ្នកពាក់ព័ន្ធបាញ់សម្លាប់បណ្ឌិត កែម ឡី មកផ្ដន្ទាទោស។
ជនជាតិដើមភាគតិចគ្រឹង រស់នៅឃុំអូរជុំ ស្រុកអូរជុំ លោក ជុ សាវាត ចាត់ទុកបណ្ឌិត កែម ឡី ថាជាខ្មែរស្នេហាជាតិស្រឡាញ់ទឹកដី ព្រំដែន ព្រៃឈើ និងជាពិសេសបានចូលរួមផ្សព្វផ្សាយអប់រំជនជាតិដើមភាគតិចឲ្យយល់ដឹងសិទ្ធិមនុស្ស និងការអភិវឌ្ឍ។ លោកសម្ដែងការសោកស្ដាយចំពោះការបាត់បង់កុលបុត្រខ្មែរដ៏ថ្លៃថ្លា ដែលជានិច្ចកាល ការងាររបស់លោកបានបម្រើផលប្រយោជន៍ប្រជាពលរដ្ឋពិតប្រាកដ៖ «មិនថាគ្រឹង ទំពួន ព្រៅ កាវេត ព្នង នៅខេត្តរតនគិរី គេសោកស្ដាយថាមនុស្សដឹកនាំប្រទេសជាតិឲ្យរីកចម្រើន គេសម្លាប់ចោលទៅវិញ ធ្វើឲ្យហិនហោចប្រទេសកម្ពុជា។ ភាសាខ្មែរគាត់ថាការពារព្រៃឈើ ព្រំដែនដីយើងឲ្យបានគង់វង្ស។ គំនិតខ្ញុំ ថ្ងៃរបស់គាត់អត់ចេះភ្លេចទេ ឲ្យតពូជកូនចៅរៀនសូត្រដូចគាត់ឲ្យខ្មែររីកចម្រើន»។
បណ្ឌិត កែម ឡី ធ្លាប់បានធ្វើដំណើរមកកាន់ខេត្តរតនគិរី ជាពិសេសនៅអំឡុងឆ្នាំ២០១៤។ លោកបានស្រាវជ្រាវទៅលើលំហូរចូលនៃពលរដ្ឋវៀតណាម ជាអន្តោប្រវេសន៍ខុសច្បាប់កាន់តែច្រើននៅខេត្តដែលមានព្រំដែនជាប់នឹងប្រទេសវៀតណាម មួយនេះ។ លើសពីនេះទៀត លោកក៏បានវិភាគរិះគន់ធ្ងន់ៗទៅលើនយោបាយកាន់កាប់ដីសម្បទានសេដ្ឋកិច្ចរបស់ក្រុមហ៊ុនវៀតណាម ថាជាចេតនាលេបត្របាក់ទឹកដីប្រទេសកម្ពុជា។
មន្ត្រីឃ្លាំមើលសិទ្ធិមនុស្សសមាគមអាដហុក (ADHOC) ខេត្តរតនគិរី លោក ឆាយ ធី ក្រៅពីបង្ហោះក្នុងបណ្ដាញហ្វេសប៊ុក ពីទស្សនៈសោកស្ដាយ និងចាត់ទុកបណ្ឌិត កែម ឡី ជាវីរជនហ៊ានវិភាគរិះគន់ដោយមិនសំចៃមាត់ពីបញ្ហាអសកម្មរបស់រាជរដ្ឋាភិបាល និងមន្ត្រីស្ថាប័នរដ្ឋមួយចំនួននោះ លោកប៉ងប្រាថ្នាចង់ឲ្យកូនខ្មែរស្នេហាជាតិផ្សេងទៀត ធ្វើតាមវីរភាពរបស់បណ្ឌិត កែម ឡី ជាជាងឆ្លៀតកេងចំណេញពីមរណភាពរបស់បណ្ឌិត កែម ឡី ដើម្បីប្រយោជន៍ផ្ទាល់ខ្លួន ឬប្រយោជន៍បក្សនយោបាយណាមួយនោះ៖ «បណ្ឌិត កែម ឡី គាត់និយាយក្នុងន័យផ្តល់មតិយោបល់ ដើម្បីប្រយោជន៍ជាតិទេ មិនមែនដើម្បីបក្សនយោបាយណាមួយឡើយ ប៉ុន្តែនៅពេលគាត់ត្រូវបានឃាតកបាញ់សម្លាប់ ស្ថាប័នមួយចំនួនដែលគាត់គិតថាអាចទាញយកប្រយោជន៍ពីសពបណ្ឌិត កែម ឡី ក្នុងការប្រកួតប្រជែងផ្នែកនយោបាយ»។
បណ្ឌិត កែម ឡី ត្រូវបានឃាតកបាញ់សម្លាប់កាលពីថ្ងៃទី១០ ខែកក្កដា នៅស្ដារម៉ាត (Star Mart) នៃស្ថានីយប្រេងឥន្ធនៈកាល់តិច (Caltex) ស្តុបបូកគោ ខណ្ឌចំការមន ក្រុងភ្នំពេញ។ បន្ទាប់ពីមរណភាពដ៏រន្ធត់នេះ មជ្ឈដ្ឋានប្រជាពលរដ្ឋ អ្នកនយោបាយ មន្ត្រីសង្គមស៊ីវិល និងមជ្ឈដ្ឋានអន្តរជាតិខ្លះ ផ្ដោតការទទួលខុសត្រូវបញ្ហានេះទៅលើរាជរដ្ឋាភិបាលនៃគណបក្សប្រជាជនកម្ពុជា។ ចំណែកប្រព័ន្ធផ្សព្វផ្សាយ និងមន្ត្រីគាំទ្រគណបក្សប្រជាជនកម្ពុជា ភ្ជាប់ហេតុការណ៍នេះទៅលើគណបក្សប្រឆាំង ថាល្បិចស្វាលួចស៊ីបាយ ហើយលាបមាត់ពពែ និងដោយឡែកមជ្ឈដ្ឋានមួយចំនួនទៀត ក៏បានបំផុសឲ្យខ្មែរប្រុងប្រយ័ត្នទៅក្រុមជនបរទេសដែលហៅថាបាតដៃទីបី បង្កើតបញ្ហានេះឡើងដើម្បីបំបាក់បំបែកលាបពណ៌ឲ្យខ្មែរឈ្លោះគ្នា ហើយពួកគេកេងយកចំណេញពីបញ្ហានេះ។
អនុប្រធានគណៈកម្មាធិការប្រតិបត្តិគណបក្សសង្គ្រោះជាតិ ខេត្តរតនគិរី លោក អ៊ឹម អឿន ចាត់ទុកការលាបពណ៌គ្នាទាក់ទិនគណបក្សនយោបាយ ឬការចោទប្រកាន់ទៅលើរាជរដ្ឋាភិបាល ទាក់ទិនអំពើឃាតកម្មទៅលើបណ្ឌិត កែម ឡី ថាជារឿងបុគ្គល មិនឆ្លុះបញ្ចាំងពីការពិតនោះទេ។ លោកថា អ្វីដែលពលរដ្ឋខ្មែរគួរធ្វើ គឺទឹកចិត្តស្ដាយស្រណោះកុលបុត្រខ្មែរ គឺបណ្ឌិត កែម ឡី ដែលបានបន្សល់នូវគុណធម៌ និងគុណប្រយោជន៍ជាគំរូសម្រាប់អ្នកជំនាន់ក្រោយប្រតិបត្តិតាម៖ «រដ្ឋាភិបាលគាត់គ្រប់គ្រងដឹកនាំប្រទេសជាតិ អ្វីកើតឡើងគេទម្លាក់ទៅ ខ្ញុំមិនថាម៉េចធ្ងន់ធ្ងរទេ។ គេអ្នកថាអ្វីដែលគេយល់ថា ត្រូវគេថាទៅសម្រាប់ខ្ញុំ ខ្ញុំមិនថា ហើយខ្ញុំមិនប៉ះ ខ្ញុំមិនដុតថែម។ ខ្ញុំចូលរួមសោកស្ដាយប្រជាពលរដ្ឋអ្នកចេះដឹងយើងម្នាក់ ចង់បានឲ្យខ្មែរយើងមានអ្នកចេះដឹងដូចបណ្ឌិត កែម ឡី បន្តជំនាន់ក្រោយទៀត»។
មនុស្សរាប់សែននាក់បានចូលរួមដង្ហែសពលោកបណ្ឌិត កែម ឡី ទៅកាន់ស្រុកកំណើតនៅខេត្តតាកែវ ដែលអ្នកចូលរួមទាំងអស់ទាមទារឲ្យរដ្ឋាភិបាលត្រូវតែស្វែងរកយុត្តិធម៌ជូនលោក។ វិយោគកថាដែលបន្សល់សម្រាប់ពលរដ្ឋខ្មែរ ពោលគឺបណ្ឌិត កែម ឡី ចាកចោលយើងទៅមែន ក៏ប៉ុន្តែមតិយោបល់ទស្សនៈជាតិនិយមរបស់លោក នឹងនៅជាមួយយើងរៀងរហូត៕