ឪពុកកុមារីរងគ្រោះដោយប៉ូលិសខេត្តព្រះសីហនុចាប់រំលោភបន្តស្វែងរកយុត្តិធម៌
2018.03.27
ឪពុកកុមារីរងគ្រោះអាយុ ១១ឆ្នាំ ដែលត្រូវអតីតនគរបាលស្នងការដ្ឋានខេត្តព្រះសីហនុ ចាប់រំលោភកាលពីឆ្នាំ២០១០ បន្តស្វែងរកយុត្តិធម៌ពីថ្នាក់ដឹកនាំប្រទេស។
អស់រយៈពេល ជាង ៨ឆ្នាំហើយ ដែលកូនស្រីលោកត្រូវជនល្មើសចាប់រំលោភ ប៉ុន្តែសមត្ថកិច្ចស្ថាប័នពាក់ព័ន្ធ នៅមិនទាន់ចាប់ខ្លួនជនល្មើស យកមកផ្ដន្ទាទោស ដើម្បីផ្ដល់យុត្តិធម៌ជូនគ្រួសារគាត់នៅឡើយទេ។
ឪពុកកុមារីរងគ្រោះលោក យ៉ុង ប៊ុនលី មានទីលំនៅក្នុងក្រុងព្រះសីហនុ បានសំណូមពរដល់លោកនាយករដ្ឋមន្ត្រី ហ៊ុន សែន អន្តរាគមន៍ទៅថ្នាក់ដឹកនាំស្ថាប័នពាក់ព័ន្ធក្រោមឱវាទ ឲ្យជួយតាមចាប់ជនល្មើសមកផ្ដន្ទាទោស។ លោកក៏បានស្នើឲ្យតុលាការ ជួយរឹបអូសយកទ្រព្យសម្បត្តិជនល្មើស ឈ្មោះ កង សុផាត ដើម្បីផ្ដល់សំណងជំងឺចិត្តចំនួន ៤០លានរៀល ឲ្យស្របតាមអំណាចសាលដីកាស្ថាពរ របស់តុលាការកំពូល។
អាណាព្យាបាលរូបនេះ បានឲ្យដឹងថា កូនស្រីគាត់ដែលកាលណោះទើបមានអាយុ ១១ឆ្នាំ ត្រូវឈ្មោះ កង សុផាត ជាអតីតមន្ត្រីនគរបាល នៃស្នងការដ្ឋាននគរបាលខេត្តព្រះសីហនុ ចាប់រំលោភ កាលពីថ្ងៃទី១៥ ខែសីហា ឆ្នាំ២០១០។ លោកថា គិតមកដល់ថ្ងៃទី២៦ ខែមីនា ឆ្នាំ២០១៨ ជនល្មើសនៅមានសេរីភាពក្រៅសំណាញ់ច្បាប់នៅឡើយ ទោះបីតុលាការកំពូល សម្រេចចេញសាលដីកាកាលពីថ្ងៃទី១៧ ខែតុលា ឆ្នាំ២០១៦ ឲ្យជនល្មើសឈ្មោះ កង សុផាត ជាប់គុគ ៥ឆ្នាំ និងពិន័យប្រាក់ ៤០លានរៀលបែបណាក្ដី។ «»
មន្ត្រីអង្គការការពារសិទ្ធិមនុស្សប្រចាំខេត្តព្រះសីហនុមួយចំនួនរួមមាន៖ សមាគមអាដហុក (ADHOC) និងអង្គការលីកាដូ (LICADHO) មានមន្ទិលថា បទល្មើសព្រហ្មទណ្ឌរំលោភផ្លូវភេទអនីតិជនមួយករណីនេះ ហេតុអ្វីបានជាសាលាដំបូងខេត្តព្រះសីហនុ អាចអនុញ្ញាតឲ្យជនល្មើសឈ្មោះ កង សុផាត រួចផុតពីការផ្ដន្ទាទោស និងរស់នៅក្រៅមន្ទីរឃុំឃាំងបានទៅវិញ ព្រោះជនល្មើសរូបនេះត្រូវកម្លាំងសមត្ថកិច្ចចាប់បញ្ជូនខ្លួន មកបង្ហាញខ្លួននៅចំពោះមុខសាលាដំបូង កាលពីឆ្នាំ២០១០ ក្រោយពេលបានធ្វើសកម្មភាពល្មើស។
អ្នកស្រី ជាប សុធារី អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ សង្ស័យថា សំណុំរឿងនេះ ទំនងជាអាចមានជាប់ពាក់ព័ន្ធមានអ្នករត់ការ ឈានដល់ផ្ដល់សំណូកពុករលួយនៅប្រព័ន្ធតុលាការក្នុងអំឡុងពេលនោះ គឺកាលពីឆ្នាំ២០១០ ក៏ថាបាន ទើបជនល្មើសឈ្មោះ កង សុផាត មិនត្រូវបានសាលាដំបូងខេត្តព្រះសីហនុ ចាប់ដាក់ពន្ធនាគារ។
អ្នកស្រី ជាប សុធារី ដែលបានតាមដានសំណុំរឿងព្រហ្មទណ្ឌ រំលោភផ្លូវភេទអនីតិជនមួយករណីនេះ យល់ថា រឿងនេះ មានភាពអយុត្តិធម៌ ចំពោះកុមារីរងគ្រោះជាទីបំផុត និងជាសំណុំរឿងក្ដីមួយ ក្នុងចំណោមសំណុំរឿងអយុត្តិធម៌ច្រើនទៀត ដែលសាធារណជនរិះគន់ និងចោទប្រព័ន្ធតុលាការខេត្តព្រះសីហនុ នៅក្នុងអំឡុងពេលនោះ ថា មិនមានឯករាជ្យ ពុករលួយ និងកាត់ក្ដីមិនយុត្តិធម៌ជាដើម។
ទាក់ទិនសំណុំរឿងនេះដែរ កាលពីឆ្នាំ២០១៦ ក្រសួងមហាផ្ទៃ បានសម្រេចអនុវត្តវិន័យចំពោះអនុសេនីយ៍ទោ កង សុផាត មានតួនាទីនាយរងផ្នែកព័ត៌មានលើវិស័យសេដ្ឋកិច្ច វប្បធម៌ អប់រំ និងសង្គម នៃការិយាល័យសន្តិសុខផ្ទៃក្នុង ចំណុះស្នងការដ្ឋាននគរបាលខេត្តព្រះសីហនុ ដោយដកហូតមុខតំណែង ឋានន្តរសក្ដិ និងបណ្ដេញផុតចេញពីក្របខ័ណ្ឌមន្ត្រីនគរបាលជាតិ។
ស្នងការនគរបាលខេត្តព្រះសីហនុ លោក ជួន ណារិន្ទ ធ្លាប់បានឲ្យដឹងថា ជនល្មើសឈ្មោះ កង សុផាត អតីតជាមន្ត្រីនគរបាលខេត្តនេះ មិនមានវត្តមាននៅក្នុងមូលដ្ឋានខេត្តព្រះសីហនុទៀតទេ ហើយកម្លាំងជំនាញស្ថាប័នលោកបានបន្តឃ្លាំមើល និងចុះស្រាវជ្រាវមុខសញ្ញានេះដោយយកចិត្តទុកដាក់ ព្រោះមានដីកាឲ្យនាំខ្លួន ឃុំខ្លួនជនល្មើសឈ្មោះ កង សុផាត ពីតុលាការលើសំណុំរឿងនេះរួចហើយ។
លោក ជួន ណារិន្ទ បញ្ជាក់ថា កម្លាំងជំនាញបានតាមដាន និងឃ្លាំមើលជនល្មើសជាប្រចាំ ដើម្បីឈានទៅចាប់ខ្លួនជនល្មើសរូបនេះ មកទទួលខុសត្រូវចំពោះមុខច្បាប់៕