ពលរដ្ឋខ្មែរក្រោមទាមទារឲ្យក្រុមហ៊ុនស្រាបៀសៃហ្គនដករូបភាពវប្បធម៌ខ្មែរចេញពីកំប៉ុងស្រាបៀ
2024.12.02
រូបភាពលើកំប៉ូងស្រាបៀ សៃហ្គន (BIA SAIGON LAGER) របស់ប្រទេសវៀតណាម។
Screenshot
ពលរដ្ឋខ្មែរក្រោម ទាមទារឲ្យរដ្ឋាភិបាលវៀតណាម ជំរុញដល់ក្រុមហ៊ុនស្រាបៀសៃហ្គន (BIA SAIGON LAGER) ឲ្យដករូបភាពវប្បធម៌ខ្មែរចេញពីកំប៉ុងស្រាបៀរបស់ខ្លួន ។ ពួកគាត់ រិះគន់ក្រុមហ៊ុនស្រាបៀសៃហ្គនថា បានបន្ទាបតម្លៃវប្បធម៌ខ្មែរ តាមរយៈការប្រើប្រាស់រូបភាពតំណាងឲ្យវប្បធម៌ខ្មែរ ដាក់នៅលើកំប៉ុងស្រាបៀ ។
ពលរដ្ឋខ្មែរក្រោមមួយចំនួនប្រតិកម្មចំពោះក្រុមហ៊ុនស្រាបៀ សៃហ្គន របស់ប្រទេសវៀតណាម ដែលបានប្រើប្រាស់រូបភាពតំណាងឲ្យវប្បធម៌ ទំនៀមទម្លាប់ និងសាសនារបស់ខ្មែរ ដាក់នៅលើកំប៉ុងស្រាបៀរបស់ពួកគេ។
សកម្មជនខ្មែរក្រោម លោក ថាច់ ង៉ា ប្រាប់វិទ្យុអាស៊ីសេរី នៅថ្ងៃទី១ ខែធ្នូ ថា លោកមិនអាចទទួលយកបានទេ ចំពោះការប្រើប្រាស់រូបភាពតំណាងឲ្យវប្បធម៌របស់ខ្មែរ ដាក់នៅលើកំប៉ុងស្រាបៀរបស់ក្រុមហ៊ុនវៀតណាមបែបនេះ។ លោកចាត់ទុករូបភាពនេះ ជាការបន្ទាបតម្លៃនៃវប្បធម៌របស់ខ្មែរ។
លោក ថាច់ ង៉ា៖ «សម្រាប់ខ្ញុំជាយុវជនខ្មែរក្រោមមួយរូបខ្ញុំមិនពេញចិត្ត ដែលក្រុមហ៊ុនរបស់រដ្ឋាភិបាលវៀតណាមផ្សព្វផ្សាយវប្បធម៌មានអប្សរា អុំទូក និងវត្តអារាមជាដើម ខ្ញុំបាទមិនពេញចិត្តកន្លែងហ្នឹងទាល់តែសោះ ហើយប្រតិកម្មយ៉ាងខ្លាំងចំពោះក្រុមហ៊ុនរបស់យួនបាទ»។
ការលើកឡើងនេះ ធ្វើឡើងបន្ទាប់ពីក្រុមហ៊ុនស្រាបៀ សៃហ្គន (BIA SAIGON LAGER) របស់ប្រទេសវៀតណាម បានប្រើប្រាស់រូបភាពតំណាងឲ្យវប្បធម៌ ទំនៀមទម្លាប់ ជំនឿសាសនារបស់ខ្មែរ ដាក់នៅលើកំប៉ុងស្រាបៀរបស់ខ្លួន ហើយស្រាបៀនេះ ដាក់ឲ្យចរាចរណ៍លើទីផ្សាររបស់ប្រទេសវៀតណាម កាលពីដើមខែតុលា ឆ្នាំ២០២៤កន្លងទៅ ។
រូបភាព ដែលក្រុមហ៊ុនវៀតណាមដាក់បង្ហាញនៅលើកំប៉ុងស្រាបៀសៃហ្គន មានដូចជា រូបទូកងខ្មែរ រូបអប្សរាក្នុងឈុតសម្លៀកបំពាក់ប្រពៃណី និងកំពុងតែរាំរបាំ និងរូបព្រះវិហារពុទ្ធសាសនារចនាបថខ្មែរជាដើម។
គេសង្កេតឃើញ រូបភាពអប្សរា នៅលើកំប៉ុងស្រាបៀ សៃហ្គន នោះ គឺហាក់ដូចគ្នាទៅនឹងតួអង្គអប្សរា នៅក្នុងរបាំព្រះរាជទ្រព្យ ឬរបាំក្បាច់បុរាណខ្មែរ ដែលកម្ពុជា បានចុះរបាំនេះ ក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិ របស់អង្គការយូណេស្កូ (UNESCO) កាលពីខែវិច្ឆិកា ឆ្នាំ២០០៣ ។
ជុំវិញរឿងនេះ អនុប្រធានសមាគមខ្មែរកម្ពុជា ក្រោមដើម្បីសិទ្ធិមនុស្ស និងអភិវឌ្ឍន៍ លោកបណ្ឌិត សឺន ជុំជួន មានប្រសាសន៍ថា ក្រុមហ៊ុនស្រាបៀរបស់វៀតណាម មិនគួរប្រើប្រាស់រូបភាព ដែលតំណាងឲ្យវប្បធម៌ខ្មែរដាក់នៅលើកំប៉ុងស្រាបៀរបស់ខ្លួនឡើយ ។ លោកថា អាជ្ញាធរវៀតណាម គួរតែពិនិត្យ និងមានវិធានការលើក្រុមហ៊ុនស្រាបៀវៀតណាមមួយនេះ។
បណ្ឌិត សឺន ជុំជួន៖ «ខ្ញុំយល់ថា ការផលិតស្រាបៀដែលយកវប្បធម៌របស់ខ្មែរដាក់នៅលើកំប៉ុងនេះ គឺត្រូវតែមានការឆ្លងកាត់ក្រសួងស្ថាប័នពាក់ព័ន្ធដូចជា ក្រសួងវប្បធម៌ និងក្រសួងពាណិជ្ជកម្មរបស់វៀតណាមហ្នឹង មិនគួរអនុញ្ញាត ឲ្យក្រុមហ៊ុនផលិតស្រាបៀយករូបភាពបែបនេះ មកដាក់នៅលើកំប៉ុងស្រាបៀទេ»។
វិទ្យុអាស៊ីសេរីនៅមិនទាន់អាចទាក់ទងតំណាងក្រុមហ៊ុនស្រាបៀសៃហ្គន និងស្ថានទូតវៀតណាម ប្រចាំនៅកម្ពុជា ដើម្បីសុំការឆ្លើយតបជុំវិញបញ្ហានេះ បាននៅឡើយទេ នៅថ្ងៃទី១ ខែធ្នូ ។ ចំណែកឯ ប្រធានក្រុមអ្នកនាំពាក្យក្រសួងវប្បធម៌ ស៊ុំ ម៉ាប់ ក៏មិនអាចទាក់ទងបានដែរ នៅថ្ងៃដដែលនេះ។
នៅលើកំប៉ុងស្រាបៀ ក្រុមហ៊ុនស្រាបៀសៃហ្គន ក្រៅតែពីបង្ហាញរូបភាពវប្បធម៌ខ្មែរ ពួកគេក៏បានដាក់ឈ្មោះខេត្តសុកត្រាំង (Soc Trang) ដែលមានឈ្មោះដើមថា ខេត្តឃ្លាំង នៅលើសំបកកំប៉ុង អមដោយពាក្យថា ចូលឆ្នាំវៀតណាមឆ្នាំ ២០២៥ (Tet 2025)។
ពលរដ្ឋខ្មែរក្រោមយល់ថា ក្រុមហ៊ុនស្រាបៀវៀតណាមដាក់រូបភាពដែលបង្ហាញពីវប្បធម៌ខ្មែរ និងឈ្មោះខេត្តខ្មែរនៅកម្ពុជាក្រោមនៅលើកំប៉ុងស្រាបៀ មិនមែនជាការជួយលើកស្ទួយតំលៃវប្បធម៌ ឬមុខមាត់របស់ខេត្តខ្មែរនៅកម្ពុជាក្រោមនោះទេ ផ្ទុយទៅវិញ ជារូបភាព នៃការបន្ទាបបន្ថោកទៅវិញ។ ពួកគាត់ថា បើវៀតណាមពិតជាចង់លើកកំពស់តំលៃវប្បធម៌ខ្មែរមែននោះ វៀតណាមត្រូវផ្តល់នូវសិទ្ធិសេរីភាពឱ្យខ្មែរក្រោមជាជនជាតិដើមមានសិទ្ធិស្វ័យសម្រេចក្នុងការគ្រប់គ្រង ការប្រតិបត្តិជំនឿសាសនា និងការធ្វើពិធីបុណ្យប្រពៃណីដោយគ្មានការរំខាន ឬលូកលាន់ពីសំណាក់អាជ្ញាធរ វៀតណាមជាដើម មិនមែនយកតំលៃវប្បធម៌ខ្មែរមកលូកឡំជាមួយគ្រឿងស្រវឹងនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន
អត្ថបទពេញនិយម
សង្គម
- មនុស្ស ៤នាក់ស្លាប់ និង ៥នាក់ទៀតរបួសធ្ងន់ ពេលប្រជ្រៀតគ្នាយកអាំងប៉ាវនៅភូមិគ្រឹះលោក សុខ គង់
- ជនសង្ស័យ៥នាក់ត្រូវបានឃាត់ខ្លួនករណីក្លែងបន្លំឯកសណ្ឋានសមត្ថកិច្ចដើរជំរិតទារប្រាក់
- អ្នកឃ្លាំមើលរិះគន់ថា អាជ្ញាធរមិនបានបង្ក្រាបមេខ្លោងបនល្បែងធំៗ ទើបទីតាំងបនល្បែងតាមអនឡាញរីករាលដាលខ្លាំង
- កម្មកររោងចក្រ គ្លូរី នីតវែរ នៅខេត្តកណ្ដាល តវ៉ាបិទផ្លូវជាតិ៤ ទាមទារឲ្យថៅកែបើកប្រាក់បំណាច់ឆ្នាំ
- អាជ្ញាធរមីនកម្ពុជាបើកការស៊ើបអង្កេតលើករណីផ្ទុះមីនតោន នៅខេត្តឧត្តរមានជ័យដែលសម្លាប់អ្នកជំនាញដោះមីន២នាក់