ក្រសួងមហាផ្ទៃព្រមានចាត់ការក្រុមអ្នកបំភ្លៃព័ត៌មានមិនពិតថាមានករណីចាប់ក្មេង
2017.07.31
មន្ត្រីជាន់ខ្ពស់ក្រសួងមហាផ្ទៃ ព្រមានប្រើប្រាស់ផ្លូវច្បាប់ដើម្បីកម្ចាត់ក្រុមអ្នកចាត់តាំង ដែលបានបំភ្លៃព័ត៌មានមិនពិតកន្លងទៅ ថាកម្ពុជា មានមនុស្សដើរចាប់យកកូនក្មេង។ ក្រោយពីមានការលើកឡើងពីមន្ត្រីក្រសួងមហាផ្ទៃ នេះ អាជ្ញាធរខេត្តកំពង់ធំ បានសម្រេចបញ្ជូនខ្លួនអ្នកគាំទ្រគណបក្សសង្គ្រោះជាតិ ម្នាក់ ទៅតុលាការ បន្ទាប់ពីបានបង្ហោះព័ត៌មានផ្សព្វផ្សាយតាមទំព័រហ្វេសប៊ុក (facebook) របស់ខ្លួន ថាមានជនជាតិវៀតណាម ចាប់យកក្មេងវះយកគ្រឿងក្នុង។
នាយឧត្តមសេនីយ៍ផ្កាយបួន លោក ខៀវ សុភ័គ អ្នកនាំពាក្យក្រសួងមហាផ្ទៃ សង្ស័យថា អាចមានក្រុមអ្នកចាត់តាំងមនុស្សឲ្យធ្វើសកម្មភាពបង្ហោះផ្សព្វផ្សាយព័ត៌មានមិនពិតតាមទំព័រហ្វេសប៊ុក ថាកម្ពុជា កំពុងមានមនុស្សតាមចាប់យកកូនក្មេងដើម្បីទម្លាក់កំហុសមកលើកម្លាំងសមត្ថកិច្ចរដ្ឋាភិបាល ថាអសមត្ថភាពចំពោះបញ្ហានេះ។
លោកបន្តថា រដ្ឋាភិបាលធ្លាប់បានបញ្ជាក់រួចហើយថា ការផ្សាយព័ត៌មានមិនពិតបែបនេះ ជារឿងអាចប្រឈមមុខនឹងច្បាប់ បន្ទាប់ពីរដ្ឋាភិបាលស្វែងរកឃើញថាពុំមានករណីចាប់កូនក្មេងដូចមានការបង្ហោះព័ត៌មានព្រោងព្រាតតាមទំព័រហ្វេសប៊ុកទាំងនោះឡើយ។
លោក ខៀវ សុភ័គ សង្កត់ធ្ងន់ថា កម្លាំងអាជ្ញាធរនឹងជីកឲ្យដល់ឫស ដើម្បីតាមចាប់មេខ្លោងមកផ្ដន្ទាទោសតាមផ្លូវតុលាការឲ្យបាន ប្រសិនបើមានក្រុមចាត់តាំងដូចការសង្ស័យរបស់លោកមែន៖ «ប្រសិនបើមានមែនទោះនៅកន្លែងណារកមេឯងទាល់តែឃើញ»។
ការលើកឡើងរបស់នាយឧត្តមសេនីយ៍ផ្កាយបួនរូបនេះ ស្របពេលអាជ្ញាធរនៅខេត្តកំពង់ធំ កាលពីរសៀលម៉ោង២ ថ្ងៃទី៣០ កក្កដា បានសម្រេចបញ្ជូនខ្លួនអ្នកលេងហ្វេសប៊ុកជាសកម្មជនបក្សប្រឆាំងម្នាក់ដែលមានគណនីហ្វេសប៊ុកឈ្មោះ ណៃ ស៊ីណេង (Nay Sineng) ទៅកាន់តុលាការ ដើម្បីឲ្យប្រឈមមុននឹងផ្លូវច្បាប់ ដោយការចោទថា បានបំភ្លៃព័ត៌មានធ្វើឲ្យប្រជាពលរដ្ឋភ្ញាក់ផ្អើល។ កាលពីថ្ងៃទី២៩ កក្កដា ម្ចាស់គណនីហ្វេសប៊ុកឈ្មោះ ណៃ ស៊ីណេង រូបនេះបានបង្ហោះរូបថតមួយចំនួន ដែលបង្ហាញអំពីការភ្ញាក់ផ្អើលចោមរោមរបស់ប្រជាពលរដ្ឋវាយបុរសពីរនាក់ ស្ថិតនៅភូមិអណ្ដូងពោធិ៍ ឃុំគ្រើល ស្រុកបារាយណ៍ ខេត្តកំពង់ធំ ព្រមទាំងសរសេររៀបរាប់ថា បុរសទាំងពីរនាក់នេះគឺជាជនជាតិវៀតណាម និងបានដើរចាប់ក្មេងដើម្បីវះយកក្រលៀន និងភ្នែក ដែលជាករណីគួរតែប្រជាពលរដ្ឋប្រុងប្រយ័ត្ន។
ស្នងការរងខេត្តកំពង់ធំ លោក កែ ខាន់ណារ៉ា ថ្លែងប្រាប់អាស៊ីសេរីនៅថ្ងៃទី៣០ កក្កដា ថា ការបង្ហោះព័ត៌មានរបស់បុរសរូបនេះមិនមែនជាការពិតសូម្បីបន្តិចឡើយ ហើយព្រះរាជអាជ្ញាបានសម្រេចឃាត់ខ្លួនរូបគាត់បញ្ជូនទៅតុលាការ បើទោះជាបុរសនេះទទួលស្គាល់កំហុសថា ការបង្ហោះព័ត៌មានចាប់ក្មេងនោះជាការយល់ច្រឡំក្ដី៖ «ហើយគេអនុវត្តច្បាប់យ៉ាងម៉េច លោកសួរទៅខាងតុលាការ»។
សមត្ថកិច្ចខេត្តកំពង់ធំ រូបនេះបញ្ជាក់ថា បុរសទាំងពីរនាក់ដែលត្រូវពលរដ្ឋព្រួតគ្នាវាយដោយចោទប្រកាន់ថាជាជនជាតិវៀតណាម និងបានចាប់កូនក្មេងនោះ គឺតាមពិត ពួកគេបានប្រព្រឹត្តបទល្មើសចោរកម្មប៉ុណ្ណោះ ហើយតុលាការក៏ចេញដីការួចហើយដើម្បីតាមរកចាប់ខ្លួន។ លោកបន្តថា បន្ទាប់ពីរងកាវាយដំពីប្រជាពលរដ្ឋ ជនសង្ស័យទាំងពីរត្រូវបានបញ្ជូនទៅកាន់មន្ទីរពេទ្យ ដើម្បីព្យាបាល មុននឹងត្រូវបញ្ជូនទៅតុលាការនៅពេលក្រោយ។
ទោះជាយ៉ាងណា ប្រធានប្រតិបត្តិខេត្តកំពង់ធំ គណបក្សសង្គ្រោះជាតិ លោក ស៊ុន ចន្ធី ទទួលស្គាល់ថា លោក ណៃ ស៊ីណេង គឺពិតជាសកម្មជនគណបក្សប្រឆាំងពិតមែន ប៉ុន្តែគ្រាន់តែជាអ្នកគាំទ្រធម្មតា ដែលតែងចូលរួមសកម្មភាពជាមួយគណបក្សនៅថ្ងៃណាទំនេរប៉ុណ្ណោះ និងមិនមែនជាមន្ត្រីស្ថិតក្នុងរចនាសម្ព័ន្ធគ្រប់គ្រងដោយគណបក្សឡើយ។ លោក ស៊ុន ចន្ធី យល់ថា ការបញ្ជូនខ្លួនអ្នកគាំទ្រគណបក្សប្រឆាំងទៅតុលាការនៅពេលនេះ អាចជារឿងនយោបាយច្រើនជាង៖ «គាត់ទៅសាលារៀនទេ ហើយត្រឡប់មកវិញ គាត់ឃើញព្រឹត្តិការណ៍ហ្នឹង គាត់ចូលសួរពលរដ្ឋថា មានព្រឹត្តិការណ៍អីកើតឡើង ហើយគាត់លើកឡើងតាមប្រជាពលរដ្ឋតែប៉ុណ្ណឹងទេ វាគ្មានអីទៅធ្ងន់ធ្ងរទេ»។
លោក ខៀវ សុភ័គ មន្ត្រីនាំពាក្យក្រសួងមហាផ្ទៃ បញ្ជាក់ទៀតថា ក្រៅពីករណីបង្ហោះព័ត៌មានមិនពិតថាមានការចាប់កូនក្មេងនៅខេត្តកំពង់ធំ និងនៅទីក្រុងភ្នំពេញកន្លងទៅ ករណីផ្សាយព័ត៌មានមិនពិតស្រដៀងគ្នានេះ ក៏បានកើតមាននៅក្នុងខេត្ត ក្រុងមួយចំនួន ដូចជានៅខេត្តប៉ៃលិន និងខេត្តព្រះសីហនុ ជាដើម ដែលបង្កឲ្យមានក្ដីភ័យព្រួយទៅដល់មាតាបិតាចំពោះកូនៗខ្លួន ដែលត្រូវចេញទៅសាលារៀន។ លោក ខៀវ សុភ័គ បន្ថែមថា ការបំភ្លៃព័ត៌មានរបៀបនេះ តាមពិតកើតមានឡើងតាំងពីលោកនៅវ័យកុមារ។
ជាមួយគ្នានេះ កាលពីថ្ងៃទី២៩ កក្កដា ស្នងការនគរបាលខេត្តព្រះសីហនុ លោក ជួន ណារិន្ទ ក៏បានព្រមានប្ដឹងបុរសម្នាក់ដែលមានគណនីហ្វេសប៊ុកឈ្មោះ ពៅ វីរៈបុត្រ (Pov Vireak Bot) ប្រសិនបើម្ចាស់គណនីនេះមិនចេញមកបកស្រាយបំភ្លឺជុំវិញការបង្ហោះព័ត៌មានតាមហ្វេសប៊ុករបស់ខ្លួន ថានៅក្នុងខេត្តព្រះសីហនុ មានអ្នកចាប់ក្មេងវះពោះយកគ្រឿងក្នុងទៅលក់នៅប្រទេសវៀតណាម។
លោកស្នងការបញ្ជាក់តាមហ្វេសប៊ុកបន្តថា បន្ទាប់ពីកម្លាំងជំនាញចុះទៅស្រាវជ្រាវ គឺពុំឃើញមានករណីនេះកើតឡើងក្នុងខេត្តព្រះសីហនុ ឡើយ ហើយការចុះផ្សាយនោះ គឺជាការបំពុលបរិយាកាសនាំឲ្យពលរដ្ឋយល់ច្រឡំ និងធ្វើឲ្យប៉ះពាល់ដល់សន្តិសុខសង្គម និងប្រទេសជាតិ។
ថ្វីបើយ៉ាងនេះក្ដី ប្រធានការិយាល័យមេធាវីក្រុមអ្នកច្បាប់អមរិន្ទ្រ លោកមេធាវី សុក សំអឿន យល់ឃើញថា អាជ្ញាធរគួរតែប្រើប្រាស់វិធីសាស្ត្រហៅអ្នកដែលតែងផ្សាយព័ត៌មានមិនពិតទាំងនេះ មកអប់រំទើបប្រសើរជាង។ លោកបន្តថា ការប្រើប្រាស់ផ្លូវច្បាប់នៅពេលនេះ ហាក់ដូចជាការបំភ័យទៅដល់ប្រជាពលរដ្ឋដទៃទៀតកុំឲ្យចែករំលែកព័ត៌មានគ្នាតាមទំព័រហ្វេសប៊ុកបន្តទៀត៖ «តាមខ្ញុំថា មិនអីទេ បើយើងឧទាហរណ៍ កាសែតគេចុះវិញ ហើយចុះខុស គេចាប់ដែរម៉េចអ្នកកាសែតមានការចេះដឹង យល់ដឹងខុសអត់អី តែពលរដ្ឋខុសតិចតួចចាប់ដាក់គុកអ៊ីចឹង? អត់ត្រូវទេ»។
កាលពីពេលថ្មីៗនេះ ក្រសួងអប់រំ យុវជន និងកីឡា បានប្រកាសលេខទូរស័ព្ទរបស់ក្រសួងមហាផ្ទៃ ចំនួន ២ខ្សែសម្រាប់ផ្ដល់ព័ត៌មានបន្ទាន់ ទាក់ទងនឹងការចាប់ក្មេង ឬសិស្សសាលា គឺតាមរយៈទូរស័ព្ទលេខ ០៣១ ២០ ១២៣៤៥ និងលេខ ០៣១ ៦០ ១២៣៤៥៕