សមត្ថកិច្ចពុំទាន់កំណត់មុខសញ្ញាឃាតកបាញ់សម្លាប់ឧកញ៉ាម្នាក់នៅកណ្ដាលក្រុងភ្នំពេញ
2014.11.23
សមត្ថកិច្ចនគរបាលកំពុងតែស៊ើបអង្កេត រកឃាតកដែលបានបាញ់សម្លាប់ឧកញ៉ាម្នាក់ ជាម្ចាស់ហាងពេជ្រមួយនៅរាជធានីភ្នំពេញ។ ជនរងគ្រោះត្រូវបានសមត្ថកិច្ចអះអាងថា ជាអ្នកមានស្ដុកស្ដម្ភ និងជាម្ចាស់សហគ្រាសរកស៊ីគ្រឿងសំណង់គ្រប់ប្រភេទ។
សមត្ថកិច្ចនៅមិនទាន់កំណត់មុខសញ្ញាឃាតក ដែលបានបាញ់សម្លាប់ឧកញ៉ា អ៊ឹង ម៉េងជឺ បាននៅឡើយទេ រហូតដល់រសៀលថ្ងៃទី២៣ វិច្ឆិកា ក្រោយពីជនរងគ្រោះ ត្រូវបានឃាតក២នាក់ បាញ់សម្លាប់ជាច្រើនគ្រាប់នៅក្បែរស្តាតអូឡាំពិក។
មន្ត្រីនាំពាក្យក្រសួងមហាផ្ទៃ លោក ខៀវ សុភ័ក ប្រាប់វិទ្យុអាស៊ីសេរីថា សមត្ថកិច្ចជំនាញកំពុងតែ ដុតដៃដុតជើង ស្វែងរកឃាតកដែលបានបាញ់សម្លាប់ឧកញ៉ា អ៊ឹង ម៉េងជឺ។ ប៉ុន្តែនៅមិនទាន់អាច ទម្លាយព័ត៌មានលំអិតពីការស៊ើបអង្កេតនោះបាននៅឡើយ៖ «ចំពោះមុខដែលយើងត្រូវធ្វើនេះគឺស្វែងរកចាប់ខ្លួនជនល្មើសប៉ុណ្ណឹងឯង ស្វែងរកមើលអស់ពីចិត្តពីថ្លើមបំផុតដើម្បីធ្វើយ៉ាងណាស្វែងរកឲ្យឃើញ»។
ឧកញ៉ា អ៊ឹង ម៉េងជឺ ថៅកែហាងពេជ្រហុងកុង នៅក្បែរផ្សារថ្មី ត្រូវបានឃាតក២នាក់បាញ់សម្លាប់ជា ច្រើនគ្រាប់ កាលពីម៉ោងប្រមាណ៧យប់ ថ្ងៃសៅរ៍ទី២២ វិច្ឆិកា នៅពេលដែលលោក ចុះពីឡាន ដើរសំដៅទៅរកទិញផ្លែឈើនៅហាងលក់ផ្លែឈើមួយកន្លែងយីហោ ឡោ តិចសេង នៅក្បែរស្តាតអូឡាំពិក។
តាមវីដេអូឃ្លីបពីការបាញ់សម្លាប់ជនរងគ្រោះ ដែលថតបានពីកាមេរ៉ាសុវត្ថិភាព ហើយត្រូវបង្ហោះ តាមបណ្ដាញសង្គមហ្វេសបុកនោះ ឲ្យដឹងថាជនដៃដល់នោះពាក់ឯកសណ្ឋានស៊ីវិល ពាក់មួកកន្តឹប ខ្មៅ គ្មានម៉ាស់បិទមុខ មានវិទ្យុទាក់ទងនៅចង្កេះ ប្រើកាំភ្លើងខ្លីបាញ់ជាច្រើនគ្រាប់ទៅលើលោក អ៊ឹង ម៉េងជឺ។ លោក អ៊ឹង ម៉េងជឺ បានព្យាយាមរត់គេច ពីការបាញ់ប្រហារនោះ តែលោកត្រូវដួលស្លាប់ផ្កាប់មុខនៅក្បែររថយន្តទំនើប របស់ខ្លួន។
សាក្សីម្នាក់នៅក្បែរកន្លែងកើតហេតុ មានប្រសាសន៍សុំមិនបញ្ចេញឈ្មោះថា នៅពេលកើតហេតុ នោះ គេបានលឺសំឡេងគ្រាប់កាំភ្លើងជាច្រើនគ្រាប់បាញ់ជាប់ៗគ្នា។ ពេលដែលគេមកមើលស្រាប់តែ ឃើញមនុស្សដេកដួលស្លាប់លើដី ហើយអ្នកជិតខាងបានមកចោមរោមមើលនៅកន្លែងកើតហេតុ មុននឹងសមត្ថកិច្ចបានទៅដល់៖ «ខ្ញុំឃើញមនុស្សនៅជុំវិញនឹងច្រើន (កន្លែងកើតហេតុ) ហើយគាត់បានដេកដួល»។
មន្ត្រីនាំពាក្យក្រសួងមហាផ្ទៃ លោក ខៀវ សុភ័ក នៅមិនទាន់អាចសន្និដ្ឋានជុំវិញមូលហេតុ ដែលនាំឲ្យមានករណីឃាតកម្ម បាញ់សម្លាប់មនុស្សកណ្ដាលក្រុងភ្នំពេញនេះ បាននៅឡើយទេ។ តែប្រភពពីសមត្ថកិច្ច បានបង្ហើបឲ្យដឹងថាករណីនេះ អាចពាក់ព័ន្ធនឹងបញ្ហាគំនុំ ព្រោះឃាតកក្រោយពីបាញ់សម្លាប់ជនរងគ្រោះរួច ក៏គេចខ្លួនបាត់ ដោយមិនបានយកទ្រព្យសម្បត្តិ អ្វីរបស់ជនរង គ្រោះឡើយ។
យ៉ាងណាស្ត្រីម្នាក់សុំមិនបញ្ចេញឈ្មោះ ដែលជាអ្នកជិតខាងនៃហាងលក់ពេជ្ររបស់ជនរងគ្រោះ ឲ្យ ដឹងថាឧកញ៉ាដែលស្លាប់ និងប្រពន្ធរបស់លោក គឺជាមនុស្សស្លូតបូត មិនធ្លាប់មានទំនាស់ជាមួយនរណា។ ស្ត្រីដដែលនោះសម្ដែងការសោកស្ដាយ និងរន្ធត់ចិត្តចំពោះករណីបាញ់សម្លាប់នេះ។ ប្រជាពលរដ្ឋរាជធានីភ្នំពេញ មានការភ្ញាក់ផ្អើល និងព្រួយបារម្ភចំពោះសុវត្ថិភាព ក្រោយមានការបាញ់សម្លាប់នោះកណ្ដាលទីប្រជុំជននោះ ពីព្រោះពេលវេលា និងទីកន្លែងបាញ់នោះ ជាពេលមនុស្សធ្វើដំណើរកុះករ និងចរាចរណ៍នៅទីនោះ មានភាពចង្អៀតកកស្ទះ តែឃាតកបានរត់គេចចេញទៅដោយសុវត្ថិភាព។
បច្ចុប្បន្នសពលោកឧកញ៉ា អ៊ឹង ម៉េងជឺ ត្រូវបានគ្រួសារសព យកទៅធ្វើបុណ្យតាមប្រពៃណី៕