តុលាការក្រុងភ្នំពេញមិនទាន់ចោទប្រកាន់លោក ឡាយ វណ្ណៈ ករណីឃាតកម្មស្រីស្នេហ៍
2018.04.02
អតីតអភិបាលខេត្តតាកែវ លោក ឡាយ វណ្ណៈ និងជនរងគ្រោះ ឈ្មោះ ចេវ សុវឌ្ឍនា។
Photo Facebook
សាលាដំបូងរាជធានីភ្នំពេញ មិនទាន់សម្រេចចោទប្រកាន់អតីតអភិបាលខេត្តតាកែវ លោក ឡាយ វណ្ណៈ ពាក់ព័ន្ធនឹងករណីឃាតកម្មលើស្រី្ត ឈ្មោះ ចេវ សុវឌ្ឍនា នៅឡើយទេ ក្រោយការសាកសួរ នៅថ្ងៃទី២ ខែមេសានេះ។
អ្នកនាំពាក្យអយ្យការអមសាលាដំបូងរាជធានីភ្នំពេញ លោក លី សុផាណា ឲ្យដឹងតាមបណ្ដាញ សង្គមតេឡេក្រាមថា តុលាការ បានបញ្ជូនលោក ឡាយ វណ្ណៈទៅឃុំនៅក្រសួងមហាផ្ទៃវិញ ដើម្បីបន្តការសាកសួរនៅថ្ងៃទី០៣ មេសា ទៀត។
លោក លី សុផាណា បន្តថា ចំពោះជនសង្ស័យ៥នាក់ទៀត រួមមានអតីតស្នងការរងខេត្តតាកែវ លោក ឡាយ ណារិទ្ធ ដែលជាបងប្រុសលោក ឡាយ វណ្ណៈ និងជនសង្ស័យ៤នាក់ផ្សេងទៀត ក៏នៅមិនទាន់ចោទប្រកាន់ជាផ្លូវការដែរ ដោយតំណាងអយ្យការ កំពុងបន្តពិនិត្យសំណុំរឿងនេះនៅឡើយ។
អ្នកនាំពាក្យក្រសួងមហាផ្ទៃ លោកខៀវ សុភ័គ ប្រាប់អាស៊ីសេរីកាលពីថ្ងៃអាទិត្យ ទី០១ មេសា ម្សិលមិញថា លោក ឡាយ វណ្ណៈ គឺជាជនសង្ស័យម្នាក់ដែលបានប្រែក្លាយសំណុំរឿងឃាតកម្ម ទៅជាសំណុំរឿងអត្តឃាត។
អតីតអភិបាលខេត្តតាកែវ លោកឡាយ វណ្ណៈ ត្រូវបានសមត្ថកិច្ចឃាត់ខ្លួនតាមដីកាបង្គាប់ ដោយព្រះរាជអាជ្ញារងនៃសាលាដំបូងរាជធានីភ្នំពេញ លោក សៀង សុខ កាលពីថ្ងៃទី១ ខែ មេសា។ ក្នុងដីកានោះ លោក សៀង សុខ បញ្ជាក់ថា នឹងសួរនាំលោក ឡាយ វណ្ណៈ អំពី ដំណើររឿងឃាតកម្ម លើស្ត្រីម្នាក់ ឈ្មោះ ចេវ សុវឌ្ឍ នា កាលពីថ្ងៃទី២៦ ខែមករា ឆ្នាំ២០១៨ នៅ ចំណុចផ្ទះជួលមួយ ក្នុងសង្កាត់រកាក្នុង ក្រុងដូនកែវ ខេត្តតាកែវ។
កាលពីថ្ងៃទី៣១ ខែមីនា អតីតអភិបាលខេត្តតាកែវ លោក ឡាយ វណ្ណៈ នៅមុនពេលចាប់ខ្លួនសរសេរនៅលើបណ្ដាញសង្គមហ្វេសប៊ុក (Facebook) ថា លោកពិតជាមានទំនាក់ទំនងស្នេហាជាមួយនឹងស្ត្រីរងគ្រោះនោះមែន ប៉ុន្តែបានបដិសេធថា លោកមិនមែនជាជនដៃដល់ក្នុងរឿងឃាតកម្មនោះទេ។
ជនរងគ្រោះឈ្មោះ ចេវ សុវឌ្ឍនា អាយុ ៣៦ឆ្នាំ មានកូន ៣នាក់។ ដំបូងឡើយត្រូវបានរកឃើញស្លាប់ដោយចងក ដែលសមត្ថកិច្ចខេត្តតាកែវ អះអាងកាលពីពេលនោះថា ជនរងគ្រោះធ្វើអត្តឃាតខ្លួនឯង ប៉ុន្តែក្រោយការស៊ើបអង្កេត របស់សមត្ថកិច្ចបង្ហាញថា ស្ត្រីជនរងគ្រោះត្រូវជនល្មើសធ្វើឃាត។
រហូតមកដល់ពេលនេះ សមត្ថកិច្ច មិនទាន់បង្ហាញលំអិត ជុំវិញរឿងរាវ ដែលនាំឲ្យមានអំពើឃាតកម្មលើជនរងគ្រោះឈ្មោះ ចេវ សុវឌ្ឍនា នៅឡើយទេ។
នៅក្នុងសំណុំរឿងដដែលនេះនៅមានចំណុចអាថ៌កំបាំង ជាច្រើនដែលកំពុងធ្វើឲ្យមហាជន និង អ្នកប្រើប្រាស់បណ្ដាញសង្គមជាច្រើន នៅមានមន្ទិលសង្ស័យថា មានរឿងរាវជាច្រើនទៀតនៅពីក្រោយអំពើលឃាតកម្មនេះ និងទាមទាមឲ្យសមត្ថកិច្ច និងតុលាការ បង្ហាញ ភស្តុងតាងពិត និងឃាតកពិត ព្រមទាំងអ្នកពាក់ព័ន្ធនៅពីក្រោយរឿងនេះ ប្រកបដោយយុត្តិធម៌។
មួយរយៈពេលចុងក្រោយនេះ រឿងអាស្រូវផ្លូវភេទរបស់មន្ត្រីគណបក្សប្រជាជនកម្ពុជា កើតឡើងជាញឹកញាប់ ប៉ុន្តែជនរងគ្រោះមិនទាន់ទទួលបានយុត្តិធម៌នៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
សង្គម
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- សារជូនពរឆ្នាំថ្មី ២០២៤
- ពលរដ្ឋចាញ់បោកអ្នកស្រី ឡេង ចាន់ណា ព្រមានឡើងមកតវ៉ានៅមុខផ្ទះលោក ហ៊ុន សែន បើតុលាការខេត្តសៀមរាបពន្យារពេលដោះស្រាយ
- ទិដ្ឋភាពទូទៅ នៃពិធីបុណ្យចូលឆ្នាំខ្មែរ ក្នុងតំបន់អង្គរខេត្តសៀមរាប