ពលរដ្ឋខ្មែរនិងបរទេសប្រមាណ១០ម៉ឺននាក់ចូលរួមពិធីបុណ្យឆ្លងឆ្នាំនៅសៀមរាប
2016.01.01
ខេត្តសៀមរាប គឺជាតំបន់ទាក់ទាញភ្ញៀវទេសចរបរទេសឱ្យមកទស្សនាប្រាសាទបុរាណច្រើនជាងគេបំផុត នៅក្នុងចំណោមបណ្ដាខេត្ត-ក្រុងចំនួន ២៤ ផ្សេងទៀតរបស់កម្ពុជា។ ខេត្តនេះក៏ទាក់ទាញអ្នកទេសចរណ៍ជាច្រើនអោយមកលេងកម្សាន្តក្នុងពិធីឆ្លងចូលឆ្នាំថ្មីសកលដែរ។
ចាប់តាំងតែពីព្រលប់រហូតទៅដល់ពាក់កណ្ដាលអធ្រាត្រថ្ងៃទី៣១ ខែធ្នូ គឺមានប្រជាពលរដ្ឋខ្មែរ និងបរទេសយ៉ាងច្រើនណែនណាន់តាន់តាប់ បានចូលរួមសប្បាយធ្វើពិធីបុណ្យឆ្លងឆ្នាំថ្មី ឆ្នាំសកល ២០១៦ ជាមួយគ្នា នៅជុំវិញបរិវេណតំបន់ផ្សារចាស់ដែលជាកន្លែងប្រជុំក្រុមជនបរទេស។
សំឡេងស្រែកថា សួស្ដីឆ្នាំថ្មី ជាភាសាអង់គ្លេសដែលចេញពីមាត់ប្រជាពលរដ្ឋខ្មែរ ទៅកាន់ជនបរទេស និងពីជនបរទេសមកកាន់ពលរដ្ឋខ្មែរ បានកើតមានស្ទើរតែគ្រប់ទីកន្លែងនៅក្នុងទីរួមខេត្តសៀមរាប ដែលជាតំបន់ទេសចរណ៍ដ៏ល្បីល្បាញរបស់កម្ពុជា កាលពីរាត្រីថ្ងៃទី៣១ ខែធ្នូ ឆ្នាំ២០១៥ ជាថ្ងៃដែលមនុស្សទូទាំងពិភពលោកអបអររង់ចាំទទួលឆ្នាំថ្មី ឆ្នាំ២០១៦ មកដល់។
អាជ្ញាធរខេត្តសៀមរាប ឱ្យដឹងថា មានប្រជាពលរដ្ឋកម្ពុជា និងបរទេសចម្រុះជាតិសាសន៍ប្រមាណ ១០ម៉ឺននាក់ បាននាំគ្នាចូលរួមអបអរសាទរឆ្នាំថ្មី ឆ្នាំសកល២០១៦ កាលពីរាត្រីថ្ងៃទី៣១ ខែធ្នូ។
ក្រៅពីនៅតាមទីសាធារណៈដែលមានហ្វូងមនុស្សកុះករចូលរួមអបអរសាទរឆ្នាំថ្មី គឺនៅតាមសណ្ឋាគារជាច្រើនទៀត ក៏បានប្រារព្ធពិធីអបអរសាទរឆ្នាំថ្មី ព្រមទាំងជូនវត្ថុអនុស្សាវរីយ៍ដល់ភ្ញៀវដែលកំពុងស្នាក់នៅដែរ។
នៅក្នុងសណ្ឋាគារបូរី អង្គរ កាលពីរាត្រីថ្ងៃទី៣១ ខែធ្នូ គឺមានរៀបចំពិធីលៀងសាយភោជន ពិសេសសម្រាប់ភ្ញៀវដែលស្នាក់នៅ ព្រមទាំងមានការសម្ដែងសិល្បៈឆៃយ៉ាំ និងក្បាច់គុនល្បុក្កតោខ្មែរជូនភ្ញៀវទេសចរចម្រុះជាតិសាសន៍ទស្សនាទៀតផង។
ចំណែកនៅតាមដងផ្លូវជាច្រើនក្នុងទីរួមខេត្តសៀមរាប ចាប់តាំងតែពីមុខសណ្ឋាគារ ហ្គ្រែន (Grand Hotel) តាមមាត់ស្ទឹង ជាពិសេសគឺផ្លូវ ផប់ ស្ត្រីត (Pub Street) តំបន់ផ្សារចាស់ គឺមានប្រជាពលរដ្ឋខ្មែរ និងជនបរទេសចម្រុះជាតិសាសន៍យ៉ាងច្រើនណែនណាន់ចូលរួមរាំសប្បាយជាមួយគ្នាដើម្បីអបអរសាទរឆ្នាំថ្មី ឆ្នាំ២០១៦។
អភិបាលខេត្តសៀមរាប ដែលបានធ្វើដំណើរស្វាគមន៍ដល់ប្រជាពលរដ្ឋខ្មែរ និងបរទេសនៅតាមដងផ្លូវ គឺលោក ឃឹម ប៊ុនសុង។ លោកមានប្រសាសន៍ថា ចំនួនប្រជាពលរដ្ឋខ្មែរ និងជនបរទេសចម្រុះជាតិសាសន៍ដែលចូលរួមឆ្លងឆ្នាំពេលនេះ គឺប្រហែលជា ១០ម៉ឺននាក់។ លោក ឃឹម ប៊ុនសុង បានជូនពរដល់ពលរដ្ឋខ្មែរទាំងអស់សូមឱ្យបានសេចក្ដីសុខចំរើនក្នុងឱកាសឆ្នាំថ្មីមកដល់នេះ៖ «ពលរដ្ឋយើងទាំងអស់នៅក្នុងខេត្តសៀមរាប នេះរាល់ពេលបុណ្យចូលឆ្នាំថ្មីតែងនាំគ្នាទៅបន់ស្រន់នៅព្រះអង្គចេកព្រះអង្គចម ដើម្បីសុំសេចក្ដីសុខ»។
មានប្រជាពលរដ្ឋខ្មែរជាច្រើនដែលចូលរួមអបអរសាទរឆ្នាំថ្មី ក្នុងទឹកមុខរីករាយ ក៏បានបួងសួងសុំសេចក្ដីសុខសម្រាប់ក្រុមគ្រួសារខ្លួនឯង ព្រមទាំងប្រជាពលរដ្ឋខ្មែរទាំងមូលដូចគ្នានេះដែរ។
បុរសអ្នកខេត្តសៀមរាប ម្នាក់ក្នុងចំណោមជាច្រើនទៀត ដែលចូលរួមកម្សាន្តក្នុងពិធីបុណ្យឆ្លងឆ្នាំ លោក សាវី មានប្រសាសន៍ថា លោករីករាយជាខ្លាំងនៅពេលដែលឃើញពលរដ្ឋខ្មែរ និងជនបរទេសច្រើនកុះករ មកចូលរួមសប្បាយជាមួយគ្នាដូច្នេះ៖ «សុំឱ្យមានសេចក្ដីសុខក្នុងក្រុមគ្រួសារ រកស៊ីមានបាន ហើយសូមឱ្យបងប្អូនទាំងអស់ក៏មានសេចក្ដីសុខក្នុងក្រុមគ្រួសាររកស៊ីមានបានទាំងអស់គ្នា»។
ជនបរទេសចម្រុះជាតិសាសន៍ជាច្រើន បាននាំគ្នាដើរលំហែនៅតាមដងផ្លូវដើម្បីរួមសប្បាយជាមួយនឹងព្រឹត្តិការណ៍ឆ្លងឆ្នាំថ្មីនៅខេត្តសៀមរាបនេះ។ ពួកគេខ្លះចូលរាំកម្សាន្តជាមួយប្រជាពលរដ្ឋខ្មែរដោយទឹកមុខរីករាយ។
ស្ត្រីជនជាតិអាមេរិកាំងម្នាក់ ដែលដើរមានគ្នាជាក្រុម លើកដៃគ្រវីស្វាគមន៍ផង មានប្រសាសន៍ថា នាងទើបតែមកខេត្តសៀមរាប ជាលើកដំបូង ហើយនាងពិតជាមានអារម្មណ៍រំភើបយ៉ាងខ្លាំងក្នុងព្រឹត្តិការណ៍ឆ្លងឆ្នាំថ្មីនៅកម្ពុជា៖ «វត្តមានរបស់ខ្ញុំនៅកម្ពុជា លើកដំបូងនេះ ពិតជារំភើបណាស់។ ខ្ញុំរីករាយក្រោយពីខ្ញុំបានឃើញប្រាសាទបុរាណដ៏ស្អាតនៅពេលថ្ងៃ ហើយមកជួបព្រឹត្តិការណ៍ឆ្លងឆ្នាំនៅពេលយប់ទៀតនេះ»។
នៅគ្រប់ទីកន្លែងជិតតំបន់ផ្សារចាស់ មានហ្វូងមនុស្សយ៉ាងច្រើនកុះករ ដោយខ្លះនាំគ្នាអង្គុយលេងនៅតាមសួនមាត់ស្ទឹង ក្រោមពន្លឺភ្លើងពណ៌ និងខ្លះទៀតនាំគ្នាលេងបាចម្សៅ ហើយលាយឡំជាមួយនឹងសំណើចយ៉ាងខ្ញៀវខ្ញារ។
ព្រឹត្តិការណ៍ឆ្លងឆ្នាំថ្មីនៅខេត្តសៀមរាប បានបញ្ចប់រហូតដល់រំលងអធ្រាត្រចូលថ្ងៃទី១ ខែមករា ឆ្នាំ២០១៦ ក្រោមសំឡេងបាញ់កាំជ្រួចលាន់ឭរំពង ហើយមានពន្លឺដ៏ស្រស់ស្អាតនៅលើផ្ទៃមេឃ៕