មន្ត្រីសង្គមស៊ីវិលព្រួយបារម្ភអំពីកំណើនគ្រឿងញៀនចូលកម្ពុជាតាមរយៈជនជាតិចិន ដែលធ្វើប៉ះពាល់ដល់សង្គម និងស្មារតីយុវជនដែលជាអ្នកបន្តវេនអភិវឌ្ឍប្រទេសជាតិនៅថ្ងៃអនាគត។ ក្ដីបារម្ភនេះ ធ្វើឡើងក្រោយពីអាជ្ញាធរប្រឆាំងបទល្មើសគ្រឿងញៀន ចាប់ខ្លួនជនជាតិចិនម្នាក់ ពាក់ព័ន្ធនឹងករណីដឹកជញ្ជូនគ្រឿងញៀនឆ្លងដែនជាង ១០០ គីឡូក្រាមចូលកម្ពុជា។
មន្ត្រីសង្គមស៊ីវិលចង់ឃើញអាជ្ញាធរអនុវត្តច្បាប់ឱ្យបានតឹងរ៉ឹង និងមានវិធានការទប់ស្កាត់បទល្មើសគ្រឿងញៀនឱ្យមានប្រសិទ្ធភាព ខណៈជនជាតិចិននៅតែបន្តដឹកជញ្ជូនគ្រឿងញៀនចូលកម្ពុជាឥតឈប់ឈរ។
នាយកទទួលបន្ទុកទូទៅនៃអង្គការសិទ្ធិមនុស្សលីកាដូ (LICADHO) លោក អំ សំអាត ប្រាប់វិទ្យុអាស៊ីសេរីនៅថ្ងៃទី២ កញ្ញា ថា លំហូរគ្រឿងញៀនចូលកម្ពុជាឥតថមថយដូចសព្វថ្ងៃនេះ គឺជារឿងគួរឱ្យព្រួយបារម្ភ និងគ្រោះថ្នាក់សម្រាប់ពលរដ្ឋ ជាពិសេសយុវជនជំនាន់ក្រោយដែលអាចរងផលប៉ះពាល់ដោយសារតែប្រើប្រាស់គ្រឿងញៀននេះ។ លោកលើកឡើងបន្តថា បើប្រជាពលរដ្ឋ ឬក្រុមយុវជន ផុងខ្លួនប្រើប្រាស់គ្រឿងញៀនកាន់តែច្រើន នោះសង្គមក៏កាន់តែប្រឈមបាត់បង់ធនធានសម្រាប់អភិវឌ្ឍប្រទេសជាតិកាន់តែច្រើនដែរ។
លោកបន្តស្នើយ៉ាងទទូចដល់អាជ្ញាធរត្រូវតែចាត់វិធានការចំពោះក្រុមឧក្រិដ្ឋជនគ្រឿងញៀនឱ្យបានម៉ឺងម៉ាត់ និងត្រូវស៊ើបអង្កេតតាមចាប់មេខ្លោងធំៗ យកមកអនុវត្តទោស ទើបទប់ស្កាត់បទល្មើសគ្រឿងញៀននេះមានប្រសិទ្ធភាព៖ «គ្រឿងញៀនបំពុលសង្គមជាតិយើង គ្រឿងញៀនបំផ្លាញធនធាន និងសេដ្ឋកិច្ចសង្គមជាតិយើង។ ដូច្នេះ បញ្ហាគ្រឿងញៀននេះ វាជាបញ្ហាធំ ដែលទាមទារឱ្យមានការបង្ក្រាប និងទប់ស្កាត់ឱ្យបានជាដាច់ខាត។ អ៊ីចឹង បញ្ហានេះ ត្រូវចាប់ផ្ដើមពីយើងគ្រប់គ្នា និយាយថា ត្រូវនៅឱ្យឆ្ងាយពីគ្រឿងញៀន។ មួយទៀត អាជ្ញាធរដែលពាក់ព័ន្ធគឺស្ថិតនៅឱ្យឆ្ងាយពីគ្រឿងញៀន»។
ប្រតិកម្មនេះ ធ្វើឡើងក្រោយសមត្ថកិច្ច បង្ក្រាបបានមេខ្លោងឧក្រិដ្ឋជនជនជាតិចិនម្នាក់ដែលដឹកជញ្ជូនគ្រឿងញៀនប្រភេទ កេតាមីន (KETAMINE) ចំនួន ១រយដុំ (១០០) ស្មើនឹងទម្ងន់ជាង ១០០គីឡូក្រាមចូលកម្ពុជាកាលពីពេលថ្មីៗនេះ។
គេហទំព័រអគ្គស្នងការដ្ឋាននគរបាលជាតិឱ្យដឹងនៅថ្ងៃទី២ កញ្ញា ថា ជនជាតិចិនដែលដឹកជញ្ជូនគ្រឿងញៀនចូលកម្ពុជាមានឈ្មោះ ទូ សឺរុង (TU SUERONG)។ អាជ្ញាធរប្រឆាំងគ្រឿងញៀនឱ្យដឹងថា កាលពីថ្ងៃទី៣០ ខែសីហា កន្លងទៅបានសហការជាមួយសមត្ថកិច្ចខេត្តព្រះវិហារ ស្ទឹងត្រែង និងខេត្តព្រះសីហនុ បង្ក្រាបមេខ្លោងឧក្រិដ្ឋជនជនជាតិចិនរូបនេះ នៅចំណុច ផ្លូវដើមឈើចាំស្នេហ៍ ស្ថិតក្នុងភូមិគគីរ ឃុំបិតត្រាង ស្រុកព្រៃនប់ ខេត្តព្រះសីហនុ។ អគ្គស្នងការដ្ឋាននគរបាលជាតិ អះអាងថា ឧក្រិដ្ឋជនគ្រឿងញៀនជនជាតិចិនរូបនេះ សមត្ថកិច្ចបានកសាងសំណុំរឿងបញ្ជូនទៅកាន់សាលាដំបូងខេត្តព្រះវិហាររួចរាល់ហើយ។
ស្របគ្នានេះដែរ អាជ្ញាធរប្រឆាំងគ្រឿងញៀនអះអាងថា សមត្ថកិច្ចបានបន្តការស៊ើបអង្កេត និងបង្ក្រាបបានជនជាតិចិនពាក់ព័ន្ធនឹងករណីជួញដូរគ្រឿងញៀនជាបន្តបន្ទាប់។
នាយកដ្ឋានប្រឆាំងគ្រឿងញៀនឱ្យដឹង នៅថ្ងៃទី២ កញ្ញា ថា កាលពីថ្ងៃទី២២ ខែសីហា សមត្ថកិច្ចស៊ើបអង្កេតទីតាំងជួញដូរគ្រឿងញៀន ២គោលដៅផ្សេងគ្នា។ ក្នុងនោះមួយគោលដៅ នៅទល់មុខខុនដូរ អិល ស្ថិតក្នុងសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ និងគោលដៅទីពីរស្ថិតក្នុង ខុនដូរប៉ាវលី ស្ថិតនៅសង្កាត់វាលវង់ ខណ្ឌ៧មករា រាជធានីភ្នំពេញ និងឃាត់ខ្លួនបានជនជាតិចិនម្នាក់ ព្រមទាំងរឹបអូសបានគ្រឿងញៀនប្រភេទ អ៊ិចស្តាស៊ី (MDMA) ចំនួន ៧គីឡូក្រាម និងសារធាតុគីមីផ្សំជាគ្រឿងញៀនជាង ១០គីឡូក្រាម។
វិទ្យុអាស៊ីសេរីមិនទាន់អាចទាក់ទង អគ្គស្នងការរងនគរបាលជាតិទទួលផែនប្រយុទ្ធប្រឆាំងគ្រឿងញៀន លោក ម៉ក់ ជីតូ ដើម្បីសាកសួរអំពីរឿងនេះបានទេនៅថ្ងៃទី០២ កញ្ញា។ ចំណែក នាយកមន្ទីរប្រឆាំងបទល្មើសគ្រឿងញៀន លោក ឡឹក វណ្ណៈ ក៏មិនអាចទាក់ទងបានដែរនៅថ្ងៃដដែលនេះ។
ទោះបីជាយ៉ាងណា កម្ពុជានារយៈពេលចុងក្រោយនេះ ហាក់កំពុងរងការញាំញីយ៉ាងខ្លាំងពីលំហូរគ្រឿងញៀនដ៏ច្រើនសន្ធឹកសន្ធាប់ ពិសេសតាមរយៈក្រុមឧក្រិដ្ឋជនជនជាតិចិនដែលបើករោងចក្រផលិតគ្រឿងញៀន និងដឹកឆ្លងដែនចូលកម្ពុជា។ អាជ្ញាធរ តែងតែបង្ក្រាបទ្រង់ទ្រាយធំជាបន្តបន្ទាប់ដោយរឹបអូសគ្រឿងញៀនម្តងៗរាប់រយគីឡូក្រាម ហើយក្នុងប្រតិបត្តិការបង្ក្រាបខ្លះ ក្រុមឧក្រិដ្ឋជនបានដកកាំភ្លើងបាញ់តដៃជាមួយសមត្ថកិច្ចថែមទៀតផង។
ជាក់ស្តែង កាលពីថ្ងៃទី៣១ សីហា កន្លងទៅ ក្រុមឧក្រិដ្ឋជនចំនួន ៤នាក់ បានដកកាំភ្លើងបាញ់រះជាមួយសមត្ថកិច្ចក្នុងពេលចុះបង្ក្រាប នៅពេលដែលក្រុមឧក្រិដ្ឋជនទាំងនោះបានដឹកជញ្ជូនគ្រឿងញៀន មកចំណុចសង្កាត់ជ្រោយចង្វារ រាជធានីភ្នំពេញ។ ក្នុងហេតុការណ៍ផ្ទុះអាវុធនោះ បណ្ដាលឱ្យជនសង្ស័យម្នាក់បានស្លាប់ និងម្នាក់ទៀតរងរបួសធ្ងន់ រួមទាំងប្រជាពលរដ្ឋចំនួន ៣នាក់រងរបួសធ្ងន់ ហើយត្រូវសមត្ថកិច្ចបញ្ជូនទៅសង្គ្រោះនៅមន្ទីរពេទ្យភ្លាមៗទៀតផង។ ចំណែក ឧក្រិដ្ឋជន ២នាក់ ទៀតត្រូវបានសមត្ថកិច្ចឃាត់ខ្លួន។
នាយកទទួលបន្ទុកទូទៅនៃអង្គការសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ករណីឧក្រិដ្ឋជនដែលដកកាំភ្លើងបាញ់តដៃជាមួយសមត្ថកិច្ច និងដឹកជញ្ជូនគ្រឿងញៀនចូលកម្ពុជារាប់រយតោនកន្លងមកនេះ ឆ្លុះបញ្ចាំងឱ្យឃើញថា ឧក្រិដ្ឋជនមិនបានញញើតច្បាប់កម្ពុជានោះទេ ហើយពួកគេតែងតែចាត់ទុកកម្ពុជាជាទីកន្លែងសម្រាប់ពួកគេធ្វើអាជីវកម្មខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។