ប្រជាពលរដ្ឋនៅក្រុងប៉ោយប៉ែត ខេត្តបន្ទាយមានជ័យ រិះគន់សមត្ថកិច្ចប្រចាំការច្រកទ្វារអន្តរជាតិប៉ោយប៉ែត ថាមិនអើពើរៀបចំសណ្ដាប់ធ្នាប់ និងធ្វើចរាចរនៅគល់ស្ពានច្រកចេញចូលឲ្យមានរបៀបរៀបរយ ដើម្បីសម្រួលដល់ការធ្វើដំណើរទៅមករបស់ភ្ញៀវទេសចរជាតិ និងអន្តរជាតិនោះទេ។
ប្រជាពលរដ្ឋថ្លែងបែបនេះ នៅពេលពួកគាត់ធ្វើដំណើរឆ្លងកាត់មានភាពអនាធិបតេយ្យនៅច្រកទ្វារនេះ បានបង្កការកកស្ទះចរាចរណ៍តាមដងផ្លូវរៀងរាល់ថ្ងៃ ដោយពុំមានសមត្ថកិច្ចរៀបចំសណ្ដាប់ធ្នាប់ និងចរាចរណ៍ឲ្យបានល្អប្រសើរឡើយ។
ប្រជាពលរដ្ឋនៅក្រុងប៉ោយប៉ែត ចង់ឃើញសមត្ថកិច្ចរៀបចំសណ្ដាប់ធ្នាប់ និងធ្វើចរាចរនៅច្រកទ្វារអន្តរជាតិនេះឲ្យបានល្អ ដើម្បីសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរ។
ពលរដ្ឋមួយចំនួនប្រាប់វិទ្យុអាស៊ីសេរី នៅច្រកទ្វារអន្តរជាតិប៉ោយប៉ែត កាលពីថ្ងៃទី៩ មេសា ថា បញ្ហាកកស្ទះចរាចរណ៍ច្រកទ្វារប៉ោយប៉ែត កើតមានរៀងរាល់ថ្ងៃ ជាពិសេសនៅគល់ស្ពានមិត្តភាពកម្ពុជា-ថៃ តែម្ដង ហើយបង្កការលំបាកដល់អ្នកធ្វើដំណើរជាខ្លាំង។ ពលរដ្ឋអះអាងថា មូលហេតុដែលកកស្ទះចរាចរណ៍ ដោយសារសមត្ថកិច្ចមូលដ្ឋានមិនអើពើរៀបចំសណ្ដាប់ធ្នាប់ចរាចរណ៍តាមដងផ្លូវឲ្យបានត្រឹមត្រូវ។ ផ្ទុយទៅវិញ គឺបណ្ដោយឲ្យក្រុមអ្នករត់ម៉ូតូឌុប ចូលទៅចាប់ម៉ូយនៅមាត់ច្រកបានដោយសេរី និងរថយន្តដឹកទំនិញធុនធំចេញចូលយ៉ាងអនាធិបតេយ្យ គ្មានសម្រួលចរាចរណ៍នោះទេ៖ « សមត្ថកិច្ចមិនគួរបណ្ដោយឲ្យម៉ូតូឡានបត់ចុះបត់ឡើងនៅមុខច្រកអ៊ីចឹងទេ ព្រោះអីវាធ្វើឲ្យខូចសោភ័ណភាពដល់ច្រកអន្តរជាតិ »។
ជារៀងរាល់ពេលល្ងាច ពេលស្ទះចរាចរណ៍ខ្លាំង មានមន្ត្រីនគរបាលអន្តោប្រវេសន៍ផ្នែកផ្ដល់ទិដ្ឋាការ មានគ្នាពីរបីនាក់ តែងតែចេញមកធ្វើចរាចរ និងសម្រួលដល់អ្នកដំណើរចេញចូលតាមច្រកនេះខ្លះដែរ ប៉ុន្តែពលរដ្ឋរិះគន់ថា មន្ត្រីនគរបាលអន្តោប្រវេសន៍ផ្នែកច្បាមចល័តដែលប្រចាំនៅមាត់ច្រក មិនបានចេញមកជួយសម្រួល ឬរៀបចំសណ្ដាប់ធ្នាប់ចរាចរណ៍នោះទេ។
ឆ្លើយតបនឹងបញ្ហានេះ អនុប្រធានប៉ុស្តិ៍នគរបាលអន្តោប្រវេសន៍ច្រកទ្វារប៉ោយប៉ែត លោក ជុំ សារ៉េត មានប្រសាសន៍ថា កន្លងមក សមត្ថកិច្ចតែងចុះរៀបចំសណ្ដាប់ធ្នាប់តាមដងផ្លូវជាប្រចាំ។ ចំណែកឯការកកស្ទះចរាចរណ៍នោះ លោកថា ដោយសារសព្វថ្ងៃច្រកទ្វារប៉ោយប៉ែត កំពុងសាងសង់ផ្លូវរថភ្លើង ហើយបើកឲ្យធ្វើចរាចរផ្លូវតែមួយ ទើបធ្វើឲ្យចង្អៀតកកស្ទះតាមដងផ្លូវ៖ « សមត្ថកិច្ចយើងដុតដៃដុតជើងខ្លាំងចំពោះការងារនេះខ្លាំងណាស់ ប៉ុន្តែយើងដេញពួកគាត់ទៅបានតែមួយភ្លែតទេ គាត់ចូលមកវិញហើយ គឺពិបាកណាស់ »។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ក្រុមអ្នករត់ម៉ូតូឌុបចូលទៅចាប់ម៉ូយនៅច្រកទ្វារប៉ោយប៉ែត បាន លុះណាមានភ្លើងខៀវពីសមត្ថកិច្ច ដែលពួកគេបង់ប្រាក់ឲ្យប្រចាំខែ។ លោកថា ប្រសិនបើសមត្ថកិច្ចមានវិធានការតឹងរ៉ឹង ហើយរៀបចំសណ្ដាប់ធ្នាប់ឲ្យបានល្អ នឹងមិនមានការកកស្ទះនៅចក្រចេញចូលនោះឡើយ៖ « សមត្ថកិច្ចគួរតែខំប្រឹងប្រែងរៀបចំសណ្ដាប់ធ្នាប់ឲ្យបានល្អជាងសព្វថ្ងៃ ដើម្បីជាមុខមាត់របស់ប្រទេសជាតិ ប្រសើរជាងទុកឲ្យនៅដដែល »។
ចរាចរណ៍កកស្ទះខ្លាំងនៅច្រកទ្វារប៉ោយប៉ែត ភាគច្រើននៅពេលរសៀលដែលមានឡានដឹកទំនិញរបស់ថៃ ចេញចូលច្រើន ហើយម្យ៉ាងទៀតជាពេលដែលភ្ញៀវទេសចរជាតិ និងអន្តរជាតិ ធ្វើដំណើរចេញចូលច្រើន ពេលខ្លះមានសំរាមចោលពាសពេញធុំក្លិនស្អុយក៏មាន។ អ្នកដំណើរខ្លះបានរអ៊ូរទាំពីភាពអនាធិបតេយ្យតាមដងផ្លូវ ដោយសាររថយន្ត និងម៉ូតូឆ្លងផ្លូវចុះឡើងដោយគ្មានសណ្ដាប់ធ្នាប់ត្រឹមត្រូវ ដែលខុសពីច្រកខាងព្រំដែនថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។