ស្នងការនគរបាលរាជធានីភ្នំពេញទទួលស្គាល់ថា មិនទាន់ចាប់ខ្លួនម្ចាស់ក្លឹប លុច្សសារី បានទេ ក្រោយរងការរិះគន់
2019.06.21
ស្នងការនគរបាលរាជធានីភ្នំពេញ បកស្រាយបំភ្លឺថា មិនទាន់ចាប់ខ្លួនម្ចាស់ក្លឹប លុច្សសារី បាននៅឡើយទេ ហើយក៏បញ្ជាក់ដែរថា ជនសង្ស័យដែលចាប់ខ្លួនកាលពីសប្ដាហ៍មុន គឺគ្រាន់តែជាអង្គរក្សក្លឹបកម្សាន្ត លុច្សសារី ខណៈដែលដំបូងឡើយអាជ្ញាធរអះអាងថា ជាម្ចាស់ក្លឹបកម្សាន្ត លុច្សសារី។ ការបំភ្លឺនេះ បន្ទាប់ពីរងការរិះគន់ថា សមត្ថកិច្ចចាប់ខ្លួនម្ចាស់ក្លឹបកម្សាន្ត លុច្សសារី ក្លែងក្លាយ។
ក្រុមប្រតិកម្មរហ័សនៃស្នងការនគរបាលរាជធានីភ្នំពេញ បានចេញសេចក្ដីបំភ្លឺដោយទទួលស្គាល់ថា បុរសសម្បុរខ្មៅម្នាក់ ឈ្មោះ ហួន ទូច អាយុ ៤០ឆ្នាំ ដែលត្រូវបានសមត្ថកិច្ចឃាត់ខ្លួនកាលពីថ្ងៃទី១៦ ខែមិថុនា មិនមែនជាម្ចាស់ក្លឹបកម្សាន្ត លុច្សសារី នោះទេ។ សេចក្ដីបំភ្លឺបន្តថា ជនសង្ស័យរូបនេះ គឺជាជនជាតិខ្មែរ ត្រូវបានចាប់ខ្លួននៅសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ មិនមែនឃាត់ខ្លួននៅស្រុកកំរៀង ខេត្តបាត់ដំបងនោះទេ។ ចំណែកបុរសម្នាក់ទៀតដែលឃាត់ខ្លួន នៅស្រុកកំរៀង ខេត្តបាត់ដំបង កាលពីថ្ងៃទី១៦ ខែមិថុនាដែរនោះ គឺជាប្រធានសន្តិសុខប្រចាំមជ្ឈ មណ្ឌល កម្សាន្ត រ៉ក់ (Rock) មានឈ្មោះ ឡេង សុខគង់។
អាស៊ីសេរី មិនអាចសុំការឆ្លើយតបពីស្នងការនគរបាលរាជធានីភ្នំពេញ លោក ស ថេត បានទេ នៅថ្ងៃទី២០ ខែមិថុនា ដោយទូរស័ព្ទចូលពុំមានអ្នកទទួល។
ការចេញសេចក្ដីបំភ្លឺនេះ បន្ទាប់ពីមានការរិះគន់នៅលើបណ្ដាញសង្គមហ្វេសប៊ុកព្រោងព្រាត ក្រោយពីស្នងការនគរបាលរាជធានីភ្នំពេញ លោក ស ថេត ប្រកាសថា ចាប់បានបុរសម្នាក់ កាលពីថ្ងៃទី១៦ ខែមិថុនា ឈ្មោះ ហួន ទួច មុខរបរជាពាណិជ្ជករ ជាជនជាតិខ្មែរ និងអះអាងថា គឺជាម្ចាស់ក្លឹបកម្សាន្ត លុច្សសារី ។ប៉ុន្តែក្រុមអ្នកប្រើប្រាស់បណ្ដាញសង្គមហ្វេសប៊ុកមិនជឿ និងចោទថា សមត្ថកិច្ច ចាប់ខ្លួនថៅកែក្លឹបកម្សាន្ត លុច្សសារី ក្លែងក្លាយ ខណៈម្ចាស់ក្លឹបពិតប្រាកដកំពុងមានសេរីភាព។
អតីតប្រធានគណបក្សអំណាចខ្មែរ លោក សួន សេរីរដ្ឋា បានសរសេរ និងបង្ហោះរូបភាពអ្នកកាត់ខ្សែ បូណ៌ក្រហមក្នុងពេលសម្ពោធក្លឹប លុច្សសារី នៅលើហ្វេសប៊ុកថា ម្ចាស់ក្លឹប លុច្សសារី ពិតប្រាកដ គឺជា ជនជាតិវៀតណាមឈ្មោះ ង៉ូយិន ថាន់ តូ (Nguyen Than Tu) ដែលមានទំនាក់ទំនងយ៉ាងជិត ស្និទ្ធ ជាមួយឧកញ៉ាក្មេងៗ ដែលរកស៊ីបើកក្លឹបដូចគ្នា និងជិតស្និទ្ធជាមួយអ្នកមានអំណាចនៅភ្នំពេញយ៉ាងស្អិតល្មួត។ ការហ៊ានអះអាងដូច្នេះ ព្រោះលោក សួន សេរីរដ្ឋា មិនឃើញបុគ្គលឈ្មោះ ហួន ទូច ចូលរួមកាត់ខ្សែបូណ៌ក្នុងពេលសម្ពោធក្លឹប លុច្សសារី កាលពីថ្ងៃទី១៩ ខែតុលា ឆ្នាំ២០១៨ នោះទេ។ លោកស្នើសុំឲ្យសមត្ថកិច្ចបើកការស៊ើបអង្កេតជាថ្មី ដើម្បីកុំឲ្យមានវប្បធម៌ស៊ីឈ្នួលជាប់គុកបន្តកើតមាន នៅក្នុងស្រុកខ្មែរតទៅទៀត។ លោកអះអាងថា កន្លងមក ឈ្មួញរកស៊ីគ្រឿងញៀនស្រុកខ្មែរ មានលុយជួលមនុស្សឲ្យជាប់គុកជំនួសខ្លួន រួចផ្ញើលុយឲ្យអ្នកជាប់គុកជំនួសខ្លួននោះដេកចាយ ក្នុងគុករៀងរាល់ខែ។
អ្នកនាំពាក្យអគ្គស្នងការនគរបាលជាតិលោក ឆាយ គឹមខឿន សុំមិនធ្វើអត្ថាធិប្បាយ ចំពោះបញ្ហា ដែលសមត្ថកិច្ចប្រែក្លាយជនសង្ស័យឈ្មោះ ហួន ទូច ពីថៅកែក្លឹប លុច្សសារី ទៅជាអង្គរក្សក្លឹបលុច្ស សារី ឡើយ។ លោក ក៏មិនបញ្ជាក់ថា ពេលនេះ ម្ចាស់ក្លឹប លុច្សសារី ពិតប្រាកដ គឺជានរណា និងនៅ ទីណាទេ៖ «សុំមិនទាន់បកស្រាយព្រោះករណីនេះកំពុងប្រតិបត្តិការស៊ើបអង្កេតអ៊ីចឹងការសន្និដ្ឋានរបៀបជាអញ្ចេះជាអញ្ចុះដោយគ្មានមូលដ្ឋានច្បាស់លាស់គឺធ្វើឱ្យព័ត៌មានវាអ៊ីចឹង។ សុំឱ្យសមត្ថកិច្ចធ្វើការសិន។ខ្ញុំមិនទាន់អាចថាអ្នកជាម្ចាស់ ឬមិនម្ចាស់ហើយអ្នកណាឃាត់ខ្លួនហើយអ្នកណានៅណាឡើយទេ។សុំពេលដើម្បីស៊ើបអង្កេតបញ្ជាក់បន្ថែមសិន»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ លោក អំ សំអាត លើកឡើងថា ករណីម្ចាស់ក្លឹបកម្សាន្ត លុច្សសារី នេះ អាជ្ញាធរគួរតែបង្ហាញភស្តុតាងឲ្យបានត្រឹមត្រូវ ដើម្បីបញ្ចៀស កុំឲ្យមានការរិះគន់ពីសាធារណជន ហើយធ្វើឲ្យបាត់បង់នូវស្នាដៃដែលខិតខំបង្ក្រាបគ្រឿងញៀន។ លោកបន្តថា អាជ្ញាធរ ក៏មិនគួរលាក់បាំងព័ត៌មានជុំវិញការតាមចាប់ខ្លួនម្ចាស់ក្លឹបកម្សាន្ត លុច្សសារីដែរ ព្រោះកាន់តែធ្វើឲ្យមានការសង្ស័យអំពីការប្រព្រឹត្តភាពមិនប្រក្រតីរវាងអ្នកអនុវត្តច្បាប់ជា មួយជនសង្ស័យ៖ «អាជ្ញាធរគួរតែបង្ហាញហេតុផលឱ្យបានច្បាស់លាស់ជៀសវាងការបង្ហាញមិនបានច្បាស់លាស់ ទាក់ទងនឹងថៅកែក្លឹប លុច្សសារី ហ្នឹងទេ វាធ្វើឱ្យមានការសង្ស័យ និងការរិះគន់បន្ថែមទៀត។ អ៊ីចឹងបានថា អ្វីក៏ដោយយើងត្រូវតែស្រាវជ្រាវ និងស៊ើបអង្កេតឱ្យបានពិតប្រាកដ។ជាពិសេស ខ្ញុំគិតថា ម្ចាស់ក្លឹប លុច្សសារី មិនពិបាករកទេ ព្រោះក្លឹបកម្សាន្តនីមួយៗ បើមិនចុះអាជ្ញាប័ណ្ណ បើមិនសុំការបើកទេ តើធ្វើម៉េចនឹងបើកបាន។ អ៊ីចឹងឈ្មោះ និងអត្តសញ្ញាមានរួចជាស្រេចហើយនៅក្នុងនោះ គឺវាអត់មានអីនឹងពិបាករកទេ»។
ចាប់តាំងពីរដ្ឋមន្ត្រីក្រសួងមហាផ្ទៃលោក ស ខេង ចេញបញ្ជាឱ្យកម្លាំងសមត្ថកិច្ចគ្រប់រាជធានី-ខេត្តសហការគ្នាបង្ក្រាបគ្រឿងញៀននៅតាមខារ៉ាអូខេ និងក្លឹបកម្សាន្តឱ្យអស់ត្រឹមឆ្នាំ២០១៩ មក គឺ សមត្ថកិច្ចបានបង្ក្រាបករណីគ្រឿងញៀនទ្រង់ទ្រាយធំជាបន្តបន្ទាប់ដូចជាបង្ក្រាបនៅក្លឹបកម្សាន្តរ៉ក់(Rock) ឃាត់ខ្លួនមនុស្សជាង ៣០០នាក់ បង្ក្រាបនៅក្លឹបកម្សាន្តម៉ៃអាមី (MIAMI Night Club &Dance Party) ឃាត់ខ្លួនមនុស្ស ៥០នាក់ បន្ទាប់មកឃាត់ខ្លួនមនុស្សក្លឹបកម្សាន្តលុច្សសារី (Luxurious) ជាង ៤យនាក់ និងការបង្ក្រាបគ្រឿងញៀននៅកាស៊ីណូ ឡាក់គី ក្នុងក្រុងប៉ោយប៉ែត ឃាត់ខ្លួនមនុស្ស ១៥៥នាក់។ ទោះបីជាយ៉ាងណាក្ដីក្នុងប្រតិបត្តិការបង្ក្រាបគ្រឿងញៀនកន្លងមកសមត្ថកិច្ច មិនដែលចាប់ខ្លួនម្ចាស់ទីតាំង ដែលមានការចែកចាយគ្រឿងញៀនភ្លាមៗ នោះទេ គឺតែងតែអូសបន្លាយពេលវេលា ឬទាល់តែមានការបញ្ជាពីលោក ហ៊ុន សែន ព្រមទាំងមានការរិះគន់ខ្លាំងពីក្រុមអ្នកប្រើប្រាស់បណ្ដាញសង្គម។
មន្ត្រីសង្គមស៊ីវិលយល់ថា ប្រសិនបើអាជ្ញាធរឃាត់ខ្លួនតែអ្នកប្រើប្រាស់តូចតាចហើយបណ្ដោយឱ្យម្ចាស់ទីតាំង និងមេខ្លោងធំៗ ឬអ្នកនៅពីក្រោយរួចខ្លួននោះ គឺជាការអនុវត្តច្បាប់ស្តង់ដារពីរហើយការបង្ក្រាបគ្រឿងញៀនគ្មានប្រសិទ្ធភាពនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។