ពលរដ្ឋមួយចំនួនរស់នៅរាជធានីភ្នំពេញ ស្នើរដ្ឋាភិបាលបញ្ចុះតម្លៃអគ្គិសនី និងទឹកស្អាត
2021.03.04
ប្រជាពលរដ្ឋមួយចំនួនរស់នៅរាជធានីភ្នំពេញ ស្នើរដ្ឋាភិបាលលោក ហ៊ុន សែន បញ្ចុះតម្លៃអគ្គិសនី និងទឹកស្អាត ដោយសារពួកគាត់ បាត់បង់ការងារ ដោះបំណុលធនាគារ និងផ្គត់ផ្គង់ជីវភាពរស់នៅប្រចាំថ្ងៃ ស្របពេលស្ថានភាពជំងឺកូវីដ១៩ បន្តរីករាតត្បាតជាលើកទី៣។ អ្នកស្រាវជ្រាវការអភិវឌ្ឍសង្គមថា រដ្ឋាភិបាលគួរមានគោលនយោបាយជួយសម្របសម្រួលកាត់បន្ថយការចំណាយ លើតម្លៃអគ្គិសនី និងទឹកស្អាត ដល់ប្រជាពលរដ្ឋ។
កម្មការិនីរោងចក្រកាត់ដេរ ប័ររី (Berry) ជម្ពូវ័ន កញ្ញា ហេង បូរី កំពុងជួប ស្ថានភាពលំបាក មិនសូវមានការងារ ទទួលប្រាក់ខែបានតិចតួច ត្រូវបង់ធនាគារ រ៉ាប់រងការចាយវាយ និងបង់ទឹកភ្លើងប្រចាំខែទៀតផង។ កញ្ញា ហេង បូរី ថា ជាងមួយឆ្នាំនេះ ក្នុងអំឡុងកូវីដ១៩ គ្រួសារកញ្ញាត្រូវបង់ទឹកភ្លើងយ៉ាងច្រើនជារៀងរាល់ខែ កញ្ញាមិនដែលឃើញរដ្ឋាភិបាលប្រកាសបញ្ចុះតម្លៃទឹកភ្លើងជូនប្រជាពលរដ្ឋនោះទេ។ កញ្ញាស្នើរដ្ឋាភិបាលជួយបន្ធូរបន្ថយការបង់ថ្លៃទឹកភ្លើងដល់ប្រជាពលរដ្ឋ ក្នុងស្ថានភាពជំងឺកូវីត១៩ ដែលពលរដ្ឋកំពុងបាត់បង់ប្រាក់កម្រៃ និងខ្វះខាតលទ្ធភាព៖ «ជីវភាពរាល់ថ្ងៃនឹង ជាពិសេស ផ្ទុះជំងឺកូវីដហ្នឹង ខាងការងារខ្ញុំ ក៏មិនសូវមានការងារគ្រប់គ្រាន់ ជួនបានថែមម៉ោងជួនអត់ទៅ ហើយខ្ញុំត្រូវរ៉ាប់រងលើការចាយវាយ ក៏ដូចជាទឹកភ្លើង ហើយនឹងបង់ធនាគារទៀតអ៊ីចឹង ខ្ញុំសង្ឃឹមថា រដ្ឋាភិបាលនឹងអាចមានការបន្ធូរបន្ថយសេវាបង់ទឹកភ្លើងមកដល់ប្រជាពលរដ្ឋ»។
ស្រដៀងគ្នានេះដែរ អ្នករត់ផាសអាប់ (PassApp) នៅរាជធានីភ្នំពេញ លោក គង់ ស្រ៊ន់ ប្រាប់អាស៊ីសេរីថា វិបត្តិជំងឺកូវីត១៩ បានធ្វើឱ្យលោក និងអ្នករត់ផាសអាប់ផ្សេងទៀត រកប្រាក់ទៅទិញម្ហូបប្រចាំថ្ងៃសឹងមិនបានផង។ លោកថាផាសអាប់ ដែលលោកដឹកភ្លៀងរាល់ថ្ងៃនេះ គឺបង់រំលោះ ដូច្នេះលោកត្រូវចំណាយទៅធនាគារ បង់ថ្លៃទឹកភ្លើងប្រចាំខែទៀត។ បុរសវ័យ ៤៧ឆ្នាំរូបនេះលើកឡើងថា ប្រជាពលរដ្ឋបានសំណូមពរទៅរដ្ឋាភិបាលច្រើនដងមកហើយ ចំពោះទុក្ខលំបាកទាំងនេះ តែរដ្ឋាភិបាលមិនអើពើនឹងការស្នើបញ្ចុះតម្លៃទឹកភ្លើងជូនប្រជាពលរដ្ឋនោះទេ៖ «ស្នើឱ្យរដ្ឋាភិបាលហ្នឹង គាត់ជួយបញ្ចុះតម្លៃទឹកភ្លើងដល់ប្រជាពលរដ្ឋខ្លះទៅ ព្រោះប្រជាពលរដ្ឋរកលុយអត់បានទេ ផ្ទុះលើកទី៣នេះ គឺធ្ងន់ធ្ងរ គឺបិទទីតាំងច្រើន ដោយភ្ញៀវអត់ហ៊ានចេះដើរអ៊ីចឹងទៅ អ្នកប្រកបមុខរបបសេដ្ឋកិច្ចក្រៅប្រព័ន្ធហ្នឹង គឺគ្នាយ៉ាប់យ៉ឺនមែនទែន ថ្ងៃនេះ ថ្មើរណេះអី អ្នករត់ម៉ូតូឌុបវិញ ទើបបានពីរបីពាន់ ប្រាំពាន់ មួយម៉ឺន ចេះតែសួរៗ ទៅណា៎ មិនមែនយ៉ាប់តែយើងទេ»។
រដ្ឋលេខាធិការ និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បដិសេធការឆ្លើយតបជុំវិញកង្វល់ និងសំណើរបស់ពលរដ្ឋអំពីបញ្ហាបញ្ចុះតម្លៃអគ្គិសនី និងទឹកស្អាតនេះ ដោយលោករុញឱ្យទៅសួរខាងអគ្គិសនីកម្ពុជា និងរដ្ឋាករទឹកក្រុងភ្នំពេញវិញ។ អាស៊ីសេរីបានទាក់ទងទៅអគ្គនាយកអគ្គិសនីកម្ពុជា លោក កែវ រតនៈ ដើម្បីសាកសួរបញ្ហានេះដែរ ប៉ុន្តែមិនលើកទូរស័ព្ទ។
ទោះបីជាយ៉ាងណា រដ្ឋាករទឹកស្វយ័តក្រុងភ្នំពេញ បានបង្ហាញរបាយការណ៍ ប្រាក់ចំណេញ ឬខាត និងចំណូលផ្សេងៗ សង្ខេបសម្រាប់រយៈមួយឆ្នាំ២០២០ ធៀបនឹងឆ្នាំ២០១៩ រដ្ឋាករទឹកស្វយ័តក្រុងភ្នំពេញរកប្រាក់ចំណូលបានជាង ៧៩លានដុល្លារ កើនជិត ៥០ភាគរយ និងទទួលប្រាក់ចំណេញបានជាង ២១លានដុល្លារ កើន ១៦៥ភាគរយ។
អ្នកស្រាវជ្រាវការអភិវឌ្ឍសង្គម បណ្ឌិត មាស នី មានប្រសាសន៍ ការលើកឡើងរបស់ប្រជាពលរដ្ឋជារឿងត្រឹមត្រូវ និងសមហេតុផល ដែលគាត់កំពុងប្រឈមពិតប្រាកដ ហើយមិនមែនជាការញុះញង់នោះទេ តែនេះជាតម្រូវការរបស់ពួកគាត់ ដើម្បីជីវភាពរស់នៅរាល់ថ្ងៃ។ លោកមើលឃើញថា កន្លងមករដ្ឋាភិបាលមិនទាន់បានបង្ហាញពីគោលនយោបាយ ជួយកាត់បន្ថយការចំណាយរបស់ពលរដ្ឋឱ្យបាន ច្បាស់លាស់ ចំពោះការចំណាយលើថ្លៃទឹកភ្លើងនោះឡើយ។ លោកថា ស្ថាប័នរដ្ឋ និងឯកជនបែរជាប្រកាសអួតពីប្រាក់ចំណេញទៅវិញ។ លោកចង់ឃើញរដ្ឋាភិបាលមានគោលនយោបាយជួយសម្បទានដល់ប្រជាពលរដ្ឋកំពុងមានបញ្ហាបំណុល បង់ថ្លៃទឹកភ្លើង ក្នុងវិបត្តិកូវីដ១៩។ លោកថា រដ្ឋាភិបាល គួរមានចំណាត់ការណាមួយជួយកាត់បន្ថយ កុំឱ្យស្ថានភាពរបស់ប្រជាពលរដ្ឋកាន់តែដុនដាបដោយសារតម្លៃទឹកភ្លើង ដើម្បីឱ្យពួកគាត់ អាចដកដង្ហើមបានស្រួលក្នុងស្ថានភាពបែបនេះ៖ «មិនទាន់ឃើញរដ្ឋាភិបាលហ្នឹង គឺមានគោលនយោបាយ ដើម្បីជួយប្រជាពលរដ្ឋទទួលរងផលប៉ះពាល់ថា មិនលុយចែកឱ្យក៏ហីចុះ ប៉ុន្តែក៏អាចពិចារណារឿងកាត់បន្ថយរឿងទឹកនិងភ្លើងផង យើងដឹងថារដ្ឋចំណេញមិនខាតទេ ពីរឿងទឹកនិងភ្លើង ហើយទន្ទឹមគ្នាទៀត យើងឃើញប្រេងក៏កាន់ឡើងថ្លៃជាបន្តបន្ទាប់ហើយទៅដល់ជាង៣ពាន់៥រយរៀល ឬក៏អាចឡើងលើសហ្នឹងទៀត យើងជាពលរដ្ឋ ជាពិសេសពលរដ្ឋក្រីក្រ ចង់ឃើញរដ្ឋាភិបាល គួរមានគោលនយោបាយណាមួយ ដើម្បីជាសម្បទាន នៅពេលពលរដ្ឋទទួលរងផលប៉ះពាល់ដោយសារកូវីដនេះ»។
លោកនាយករដ្ឋមន្ត្រី ហ៊ុន សែន ធ្លាប់ប្រាប់ថា រដ្ឋាភិបាលរបស់លោកគ្រោងចំណាយថវិកាប្រមាណ២៥លានដុល្លារអាមេរិកក្នុងមួយខែ សម្រាប់ផ្តល់ជូនពលរដ្ឋក្រីក្រចំនួន ៥៦២.៦៨៦គ្រួសារ តែលោក ហ៊ុន សែន មិនបានលើកឡើងពីការបញ្ចុះតម្លៃទំនិញ អគ្គិសនី និងទឹកស្អាតជូនប្រជាពលរដ្ឋក្នុងវិបត្តិកូវីដ១៩ នោះទេ។
ធនាគារពិភពលោកព្យាករណ៍ថាប្រជាពលរដ្ឋខ្មែរជិត ២លាននាក់ នឹងធ្លាក់ខ្លួនក្រីក្រ ដោយសារវិបត្តិជំងឺកូវីដ១៩ ក្នុងឆ្នាំ២០២០ ធ្វើឱ្យចំនួនអ្នកក្រនៅកម្ពុជានឹងកើនឡើងដល់ ៤លាននាក់ ក្នុងចំណោមពលរដ្ឋសរុបជាង ១៥លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។