សមត្ថកិច្ចចាប់ជនជាតិចិន ១៦៣នាក់ នៅខេត្តសៀមរាប សង្ស័យបើកល្បែងស៊ីសងតាមប្រព័ន្ធអ៊ីនធើណេត
2019.03.29
សមត្ថកិច្ចចម្រុះ បានចុះចាប់ជនជាតិចិនចំនួន ១៦៣នាក់ នៅភូមិវិហារចិន សង្កាត់ស្វាយដង្គំ ក្រុងសៀមរាប នៅថ្ងៃទី២៨ មីនា ដោយសង្ស័យថា បើកភ្នាល់ល្បែងស៊ីសងតាមប្រព័ន្ធអ៊ីនធើណេត (Internet Game online)។ សង្គមស៊ីវិលយល់ថា គួរអនុវត្តទោសនៅកម្ពុជាសិន ចាំបញ្ជូនចេញទៅប្រទេសចិន ទើបមានការរាងចាល ផ្ដល់គំរូដល់ជនបរទេសដទៃ។
សមត្ថកិច្ច អះអាងថា ក្នុងប្រតិបត្តិការបង្ក្រាបបានជនជាតិចំនួន១៦៣នាក់ មានស្រី ៤០នាក់ និងកុំព្យូទ័រ ប្រមាណ ១៥០ គ្រឿង ក្នុងពេលជនសង្ស័យទាំងនោះ កំពុងប្រព្រឹត្តបទល្មើស។
គេហទំព័រអគ្គស្នងការនគរបាលជាតិ និងគេហទំព័ររបស់អគ្គនាយកដ្ឋានអន្តោប្រវេសន៍ ចុះផ្សាយថា កងកម្លាំងចម្រុះ ដឹកនាំ ដោយព្រះរាជអាជ្ញារងអមសាលាដំបូងខេត្តសៀមរាប បានចុះប្រតិបត្តិការបង្ក្រាបទីតាំងប្រព្រឹត្តិបទល្មើស ភ្នាល់ល្បែងស៊ីសងតាមប្រព័ន្ធអ៊ីនធើណេត (Internet Game online) ពីរទីតាំងក្នុងពេលតែមួយ សុទ្ធតែស្ថិតក្នុងភូមិវិហារចិន ឃុំស្វាយដង្គំ ហើយក្រោយប្រតិបត្តិការចុះបង្ក្រាប សមត្ថកិច្ចបានបញ្ជូនជនសង្ស័យ និងវត្ថុតាង ទៅស្នងការនគរបាលខេត្តសៀមរាប។
ស្នងការនគរបាលខេត្តសៀមរាប លោក ទិត្យ ណារ៉ុង ប្រាប់អាស៊ីសេរីយ៉ាងខ្លីថា សមត្ថកិច្ចកំពុងចាត់នីតិវិធីច្បាប់ និងរាយការណ៍ជូនអភិបាលខេត្តសៀមរាប៖ «បាទ! យើងកំពុងធ្វើការ។ យើងកំពុងធ្វើការហើយ។ ខ្ញុំមិនទាន់បានរាយការណ៍ឲ្យមេខ្ញុំផង។ ខ្ញុំជាប់ប្រជុំបន្តិច។ ខ្ញុំរាយការណ៍ ឲ្យចៅហ្វាយខេត្តសិន»។
កាលពីឆ្នាំ២០១៨ អាជ្ញាធរកម្ពុជា បានបណ្ដេញជនជាតិចិនជាង ៧០០នាក់ ចេញពីកម្ពុជា ក្នុងចំណោមជនបរទេស ដែលត្រូវបណ្ដេញចេញ ១៤.៩៦៥នាក់ នៃ ៩១សញ្ជាតិ។ ជនជាតិចិន ដែលបណ្ដេញជាទ្រង់ទ្រាយធំចុងក្រោយ ចេញពីកម្ពុជា គឺកាលពីដើមខែធ្នូ ឆ្នាំ២០១៨ មានចំនួន ២៣៥នាក់ជាប់ចោទពីបទឧក្រិដ្ឋកម្មចាប់ជំរិត តាមប្រព័ន្ធអ៊ីនធើណេតពីខេត្តតាកែវ។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វ៉ន់ ពៅ សង្កេតឃើញថា ការដែលជនជាតិចិន ចេះតែមានឱកាសប្រព្រឹត្តិបទល្មើស ជាទ្រង់ទ្រាយធំៗ នៅកម្ពុជាបាន ដោយសារតែរដ្ឋាភិបាលបានបើកដៃឲ្យជនជាតិចិនមកកម្ពុជាច្រើនពេក ដោយមិនបានចម្រាញ់យកតែចិនវិនិយោគិនធំៗ ទេ សូម្បីចិនរកស៊ីរបរកំប៉ិចកំប៉ុក ក៏មានឱកាសមកដណ្ដើមអ្នកសេដ្ឋកិច្ចក្រៅប្រព័ន្ធនៅកម្ពុជាដែរ។ លោក វ៉ន់ ពៅ ថា ជាការព្រួយបារម្ភនេះ ព្រោះជនជាតិចិនមកកម្ពុជាសព្វថ្ងៃ ភាគច្រើនមិនមែនជាវិនិយោគិនទេ៖ «អ្នកខ្លះ (ចិន) មកដណ្ដើមមុខរបរខ្មែរ ហើយយកមកពួករញ៉េរញ៉ៃ។ មកបើកល្បែងស៊ីសង មកបើកបនស្រី មកបើកអ្វីផ្ដេសផ្ដាស ខុសពីច្បាប់រដ្ឋ នៅប្រទេសកម្ពុជា ក៏ដូចជា ប្រពៃណី របស់ខ្មែរ។ ចំណុចនេះហើយ ដែលយើងមានការសោកស្ដាយ ដែលរដ្ឋាភិបាលមិនបានរឹត (បន្តឹង) ទាំងអស់នេះ ដែលធ្វើឲ្យជនជាតិហ្នឹង កាន់តែផ្គើនឡើងៗ ហូរមកចូលស្រុកខ្មែរច្រើនមែនទែន។ ឥឡូវឃើញរាលដាលទៅដល់ខេត្តសៀមរាបទៀត។ យើងឃើញថា ហាក់ធូររលុងសម្រាប់ជនជាតិចិនទាំងអស់ហ្នឹង»។
តំណាងសង្គមស៊ីវិលរូបនេះយល់ថា ដើម្បីកាត់បន្ថយបទល្មើសជនជាតិចិននៅកម្ពុជា រដ្ឋាភិបាលមិនគួរបញ្ជូនពួកគេចេញពីកម្ពុជាភ្លាមៗ ទេ គឺគួរតែដាក់ទោសទណ្ឌតាមច្បាប់កម្ពុជាសិន ទើបមានប្រសិទ្ធិភាព និងជាការព្រមានដល់ជនបរទេសខិលខូចដទៃទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។