ស្នងការរាជធានីបញ្ជាឲ្យនគរបាលបង្កើនការបង្ក្រាបបទល្មើស
2013.04.01
មន្ត្រីនគរបាលចូលរួមក្នុងកិច្ចប្រជុំ កាលពីព្រឹកថ្ងៃទី១ មេសា ឆ្នាំ២០១៣។
របាយការណ៍ប្រចាំខែមីនា កន្លងមកនេះ បានឲ្យដឹងថា បទល្មើសនានាបានកើតឡើងចំនួន ៨៣លើក ក្នុងនោះបណ្ដាលឲ្យមនុស្សស្លាប់ចំនួន ៣នាក់ និងរបួស ៨នាក់ នៅរាជធានីភ្នំពេញ។ របាយការណ៍បន្តថា នគរបាលរាជធានីភ្នំពេញ បានបង្ក្រាបបទល្មើសព្រហ្មទណ្ឌចំនួន ៣៧ករណី និងបានចាប់ឃាត់ខ្លួនជនសង្ស័យចំនួន ៧៣នាក់ ដើម្បីបញ្ជូនទៅតុលាការចោទប្រកាន់ និងឃុំខ្លួន។
ក្រៅពីនេះ នគរបាលរាជធានីភ្នំពេញ បានបង្ក្រាបបទល្មើសគ្រឿងញៀនចំនួន ១៨ករណី និងបានចាប់ឃាត់ខ្លួនជនសង្ស័យចំនួន ៣៦នាក់ នៅខែមីនា កន្លងទៅនេះ។
របាយការណ៍នេះបានបង្ហាញឲ្យដឹងនៅពេលដែលមន្ត្រីនគរបាលចំនួនជិត ២០០នាក់ បានមកជួបប្រជុំគ្នានៅក្នុងកិច្ចប្រជុំប្រចាំខែនៅឯស្នងការដ្ឋាននគរបាលរាជធានីភ្នំពេញ នៅថ្ងៃទី១ ខែមេសា។
ស្នងការនគរបាលរាជធានីភ្នំពេញ លោកឧត្ដមសេនីយ៍ឯក ជួន សុវណ្ណ និងជាអគ្គស្នងការរងនគរបាលជាតិ បានមានប្រសាសន៍ទៅកាន់មន្ត្រីនគរបាលជិត ២០០នាក់ថា លោកបានកោះប្រជុំជាមួយមន្ត្រីប៉ុស្តិ៍នគរបាលជាច្រើនរយនាក់ ចំនួន ២លើកបន្តបន្ទាប់គ្នា ដើម្បីស្វែងរកយុទ្ធសាស្ត្រសំខាន់ៗបង្ក្រាបបទល្មើសដែលបានកើនឡើងនៅខែមីនា កន្លងទៅនេះ។
លោក ជួន សុវណ្ណ៖ «អ៊ីចឹងទេ បន្ទាប់ពីយើងប្រជុំមិនទាន់បានប៉ុន្មានថ្ងៃផង ហើយមន្តអាគមដែលទើបបានសិក្សានោះមិនទាន់បានយកទៅប្រតិបត្តិការផង បញ្ហាប្លន់បានកម្រើកផ្ទួនៗទៀត អ៊ីចឹងទេការប្រជុំលើកទី២ បានចាប់ផ្ដើមភ្លាម ដើម្បីពិនិត្យអំពីវិធានការគន្លឹះ និងយុទ្ធសាស្ត្រក្នុងការងាររបស់យើង ដែលដាក់ចេញទៅហើយនេះ ហេតុអ្វីបង្ក្រាបបទល្មើសមិនបាន?»។
លោកបានបញ្ជាក់ថា នគរបាលរាជធានីភ្នំពេញ បានបើកយុទ្ធនាការត្រួតពិនិត្យ និងឆែកឆេរស្លាកលេខម៉ូតូនៅចុងខែមីនា កន្លងទៅនេះ និងបានប្រមូលម៉ូតូចំនួន ៤៥៨គ្រឿង ដែលសង្ស័យថា ពាក់ស្លាកលេខក្លែងក្លាយ។ ក្នុងនោះម៉ូតូចំនួន ៣៧២គ្រឿង ត្រូវបានបញ្ជូនមកនគរបាលចរាចរណ៍រាជធានីភ្នំពេញ។ យុទ្ធនាការនេះ គឺក្រោយពីករណីប្លន់ម៉ូតូ ហើយជនល្មើសបានប្តូរស្លាកលេខក្លែងក្លាយជំនួសវិញ។
អ្នកវិភាគសង្គមឯករាជ្យ លោក កែម ឡី បានមានប្រសាសន៍ថា សីលធម៌សង្គមកាន់តែធ្លាក់ចុះ រីឯភាពក្រីក្រនៅតែជាបញ្ហាធ្ងន់ធ្ងរ ដូច្នេះក្រុមយុវជនហ៊ានប្រព្រឹត្តបទល្មើសដោយមិនរុញរាឡើយ៖ «ទាល់តែយើងកម្ចាត់ឫសគល់នៃបញ្ហា។ សំខាន់ប្រជាពលរដ្ឋខ្មែរយើងធ្វើម៉េចឲ្យមានការងារធ្វើ ជាពិសេសយុវជនដែលមិនអាចមានភាពផុយស្រួយ មានការទាក់ទាញពីអ្នកជួញដូរគ្រឿងញៀន ឬអ្នកដែលប្រព្រឹត្តបទល្មើស ដូចជាចោរលួច ចោរប្លន់ ចោរគាស់ផ្ទះ...»។
កិច្ចការងារនៅសេសសល់ដែលនគរបាលរាជធានីភ្នំពេញ បន្តបង្ក្រាបទៀតនោះ មានដូចជា ការបង្ក្រាបទីតាំងក្លឹបកម្សាន្តលួចលាក់ និងទីតាំងវីដេអូ ហ្គេម (Video Games) លួចលាក់នៅក្បែរសាលារៀន។ មួយវិញទៀត នគរបាលរាជធានីភ្នំពេញ បន្តស្រាវជ្រាវ និងបង្ក្រាបទីតាំងលក់អាវុធខុសច្បាប់ និងទីតាំងកែច្នៃអាវុធខុសច្បាប់។
នៅក្នុងឱកាសនៃកិច្ចប្រជុំនោះដែរ លោកឧត្ដមសេនីយ៍ឯក ជួន សុវណ្ណ បានក្រើនរំលឹកឲ្យនគរបាលនានានៅរាជធានីភ្នំពេញ យកចិត្តទុកដាក់អនុវត្តតាមសេចក្ដីណែនាំរបស់អគ្គស្នងការនគរបាលជាតិ លោកនាយឧត្ដមសេនីយ៍ នេត សាវឿន ក្នុងការពង្រឹងសន្តិសុខ និងសណ្ដាប់ធ្នាប់សាធារណៈនៅក្នុងឱកាសបុណ្យចូលឆ្នាំថ្មីប្រពៃណីខ្មែរ ចាប់ពីថ្ងៃទី១៤ ដល់ថ្ងៃទី១៦ ខែមេសា ខាងមុខនេះ។
បទល្មើសដែលនគរបាលរាជធានីភ្នំពេញ ត្រូវយកចិត្តទុកដាក់បង្ក្រាបនោះ មានដូចជា អំពើភេរវកម្ម អំពើលួច ឆក់ ប្លន់ វង់ល្បែងស៊ីសងខុសច្បាប់ និងការដុតផាវជាដើម៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
