អ្នកភូមិនៅកំពង់ឆ្នាំងជាង១០០នាក់ផ្ដិតមេដៃជំទាស់នឹងការបិទផ្លូវសាធារណៈ
2016.01.01
ផែនទីខេត្តកំពង់ឆ្នាំង។
Photo: RFA
ប្រជាពលរដ្ឋខ្មែរ និងចាមប្រមាណ ១០០នាក់ នៅស្រុកកំពង់ត្រឡាច ខេត្តកំពង់ឆ្នាំង ប្រតិកម្មចំពោះស្ត្រីបង្គោលឃុំម្នាក់ ដែលបានបិទផ្លូវសាធារណៈមិនឲ្យអ្នកភូមិបររទេះឆ្លងកាត់ និងលំបាកចេញចូលថ្វាយបង្គំព្រះនៅវិហារអ៊ីស្លាម។ តំណាងពលរដ្ឋអះអាងថា អ្នកភូមិបានធ្វើលិខិតភ្ជាប់ស្នាមមេដៃដាក់ជូនអាជ្ញាធរឃុំ និងស្រុកជាងបីខែហើយ ប៉ុន្តែគ្មានដំណោះស្រាយ។
តំណាងពលរដ្ឋខ្មែរ និងចាមនៅភូមិត្រពាំងខ្ទុំ នៃឃុំឈូកស ដែលនាំគ្នាផ្ដិតមេដៃជាង ១០០ស្នាមមេដៃ ជំទាស់នឹងជនបង្គោលឃុំម្នាក់ឈ្មោះ អប់ ខទីជៈ សង់ផ្ទះបិទផ្លូវរទេះបុរាណមួយខ្សែ ឲ្យដឹងនៅថ្ងៃទី១ ខែមករា ថា អ្នកភូមិសម្ដែងការហួសចិត្តនៅពេលឃើញផ្ទះមួយខ្នងសង់ចំកណ្ដាលផ្លូវដែលពួកគាត់ឆ្លងកាត់ព្រឹកល្ងាច។ បញ្ហានេះ បានធ្វើឲ្យប៉ះពាល់ដោយផ្ទាល់លើប្រជាពលរដ្ឋចំនួន ៦គ្រួសារ។
បុរសជនជាតិចាម វ័យ ៦២ឆ្នាំម្នាក់ដែលអះអាងថា ជាតំណាងពលរដ្ឋ គឺលោក ម៉ូត ទឺ មានប្រសាសន៍ថា បច្ចុប្បន្នពលរដ្ឋជិះម៉ូតូ និងដើរប្រជ្រៀតក្រោមផ្ទះ ឬដើរអែបជើងសសរទៅស្រែ និងទៅថ្វាយបង្គំក្នុងព្រះវិហារ។ ចំណែករទេះគោ គោយន្ត និងម៉ាស៊ីនបោកស្រូវដែលធ្លាប់បឆ្លងកាត់លែងចូលរួច ហើយត្រូវបើកវាងចម្ងាយ ៣០០ម៉ែត្រទើបដល់ស្រែ។
លោកបារម្ភថា ថ្ងៃណាមួយគេនឹងលែងអនុញ្ញាតឲ្យមនុស្សដើរ ឬជិះម៉ូតូទៀតផង៖ «ខ្ញុំចង់ឲ្យអាជ្ញាធរដោះស្រាយឲ្យផ្លូវហ្នឹងដើរវិញបាន។ ចង់បានឆាប់នេះហើយ ព្រោះខ្ញុំនៅខ្វល់ខ្វាយយ៉ាងនេះ ធ្វើម៉េចអាណិតពួកខ្ញុំខ្មែរអ៊ីស្លាម អ៊ីស្លាមអត់សូវចេះនិយាយខ្មែរ និយាយខុសបន្តិចបន្តួចកុំប្រកែប្រកាន់»។
វិទ្យុអាស៊ីសេរី មិនអាចរកប្រភពទាក់ទងស្ត្រីដែលជាជនបង្គោលឃុំឈ្មោះ អប់ ខទីជៈ ដើម្បីឆ្លើយតបនឹងការចោទប្រកាន់នេះបានទេ នៅថ្ងៃទី១ ខែមករា។ ប៉ុន្តែអភិបាលស្រុកកំពង់ត្រឡាច លោក ឈឹម វុទ្ធា ថ្លែងថា លោកបានទទួលលិខិតពលរដ្ឋ ហើយបានចាត់អភិបាលរងទទួលបន្ទុកដោះស្រាយវិវាទម្នាក់ចុះពិនិត្យមើលលើបញ្ហានេះ ប៉ុន្តែមិនទាន់បានព័ត៌មានត្រឡប់យ៉ាងណានៅឡើយទេ៖ «ពាក់ព័ន្ធការងារនេះ កំពុងឲ្យលោកអភិបាលរងទទួលបន្ទុកការងារនេះចុះទៅពិនិត្យមើល ដោយសហការជាមួយអាជ្ញាធរឃុំ មិនទាន់ដោះស្រាយសម្របសម្រួលយ៉ាងម៉េចនៅឡើយទេ»។
យ៉ាងណាអភិបាលរងស្រុកទទួលបន្ទុកដោះស្រាយវិវាទ លោក ទាំ សារឿន បដិសេធថា លោកមិនទាន់ទទួលបានសំណើដោះស្រាយវិវាទនៅឃុំឈូកសនោះទេ ប៉ុន្តែបានទទួលរឿងដាច់ដោយឡែកមួយនៅឃុំច្រេស។ ត្រង់ចំណុចនេះ អ្នកភូមិត្រពាំងខ្ទុំ នៃឃុំឈូកស រិះគន់ថា បើអាជ្ញាធរនៅតែធ្វើមិនដឹង ឬដោះស្រាយជូនពលរដ្ឋទេ នោះអ្នកភូមិអាចនឹងបាត់ផ្លូវចេញចូលដឹកកសិផល ឬទៅថ្វាយបង្គំតាមបែបសាសនាអ៊ីស្លាមនៅក្នុងព្រះវិហារ។
ក្រុមពលរដ្ឋចង់ឃើញអាជ្ញាធរឃុំ ឬស្រុកជួយអន្តរាគមន៍រំកិលផ្ទះ ឬដកជើងសសរអ្នកស្រី អប់ ខទីជៈ ដែលបានដាំរំលោភលើផ្លូវកាលពីជាង ៣ខែ មុននោះចេញខ្លះ ដើម្បីបើកផ្លូវទំហំប្រមាណ ៥ម៉ែត្រដូចដើមវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
សង្គម
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- សារជូនពរឆ្នាំថ្មី ២០២៤
- ពលរដ្ឋចាញ់បោកអ្នកស្រី ឡេង ចាន់ណា ព្រមានឡើងមកតវ៉ានៅមុខផ្ទះលោក ហ៊ុន សែន បើតុលាការខេត្តសៀមរាបពន្យារពេលដោះស្រាយ
- ទិដ្ឋភាពទូទៅ នៃពិធីបុណ្យចូលឆ្នាំខ្មែរ ក្នុងតំបន់អង្គរខេត្តសៀមរាប