អង្គការ​អន្តរជាតិ​រក​ឃើញ​ថា​ស្ថាប័ន​តុលាការ​ប៉ូលិស​និង​មន្ត្រី​រដ្ឋាភិបាល​ពុក​រលួយ​ជាង​គេ

ដោយ យ៉ង ចាន់តារា
2017-02-28
អ៊ីម៉ែល
មតិ
Share
បោះពុម្ព
ប្រធាន​អង្គការ​តម្លាភាព​កម្ពុជា លោក ព្រាប កុល ផ្ដល់​បទសម្ភាសន៍​អំពី​របាយការណ៍​ស្ដីពី​ការ​វាស់វែង​អំពើ​ពុក​រលួយ​ជា​សកល​ឆ្នាំ​២០១៦ របស់​អង្គការ​តម្លាភាព​អន្តរជាតិ នៅ​ថ្ងៃ​ទី​២៨ ខែ​កុម្ភៈ ឆ្នាំ​២០១៧។ RFA/Cheu Sideth
ប្រធាន​អង្គការ​តម្លាភាព​កម្ពុជា លោក ព្រាប កុល ផ្ដល់​បទសម្ភាសន៍​អំពី​របាយការណ៍​ស្ដីពី​ការ​វាស់វែង​អំពើ​ពុក​រលួយ​ជា​សកល​ឆ្នាំ​២០១៦ របស់​អង្គការ​តម្លាភាព​អន្តរជាតិ នៅ​ថ្ងៃ​ទី​២៨ ខែ​កុម្ភៈ ឆ្នាំ​២០១៧។ RFA/Cheu Sideth
RFA/Cheu Sideth

អង្គការ​តម្លាភាព​អន្តរជាតិ (Transparency International) រក​ឃើញ​ថា ប្រជាពលរដ្ឋ​ខ្មែរ​ចាត់​ទុក​មន្ត្រី​តុលាការ ប៉ូលិស និង​មន្ត្រី​រដ្ឋាភិបាល ថា​ពុក​រលួយ​ខ្លាំង​ជាង​គេ។ ការ​លើក​ឡើង​នេះ ផ្អែក​លើ​របាយការណ៍​ស្ដីពី​ការ​វាស់វែង​អំពី​អំពើ​ពុក​រលួយ​ជា​សកល​ឆ្នាំ​២០១៦ ចេញ​ផ្សាយ​នៅ​ព្រឹក​ថ្ងៃ​ទី​២៨ ខែ​កុម្ភៈ ឆ្នាំ​២០១៧។ មន្ត្រី​រដ្ឋាភិបាល​ច្រានចោល​របាយការណ៍​នេះ និង​ចាត់​ទុក​ថា​វា​គ្រាន់​តែ​ជា​ការ​វាយ​ប្រហារ​រដ្ឋាភិបាល​តែ​ប៉ុណ្ណោះ។

របាយការណ៍​ស្ដីពី​ការ​វាស់វែង​អំពី​អំពើ​ពុក​រលួយ​ជា​សកល​ឆ្នាំ​២០១៦ របស់​អង្គការ​តម្លាភាព​អន្តរជាតិ ដែល​ធ្វើ​ឡើង​នៅ​ប្រទេស​កម្ពុជា នេះ មាន​អ្នក​ចូលរួម​ផ្តល់​បទសម្ភាសន៍​ចំនួន​ជាង ១​ពាន់​នាក់ (.០០៣​នាក់) ដែល​បាន​បង្ហាញ​ទស្សនៈ និង​បទពិសោធន៍​របស់​ពួក​គេ​ទាក់ទង​នឹង​អំពើ​ពុក​រលួយ។

លទ្ធផល​នៃ​របាយការណ៍​នេះ​បង្ហាញ​ថា ស្ថាប័ន​សាធារណៈ​ដែល​បង្កើត​ឡើង​ក្នុង​គោល​បំណង​ការពារ​ប្រជាពលរដ្ឋ​ដើម្បី​ផ្តល់​យុត្តិធម៌ និង​លើក​កម្ពស់​សិទ្ធិ​មនុស្ស ត្រូវ​បាន​ប្រជាពលរដ្ឋ​មើល​ឃើញ​ថា ជា​ស្ថាប័ន​ដែល​រំលោភ​អំណាច និង​មុខងារ​ទៅ​វិញ។ ស្ថាប័ន​ទាំងនោះ គឺ​តុលាការ ប៉ូលិស និង​មន្ត្រី​រដ្ឋាភិបាល។

នាយក​ប្រតិបត្តិ​អង្គការ​តម្លាភាព​កម្ពុជា លោក ព្រាប កុល សង្កត់​ធ្ងន់​ថា របាយការណ៍​ស្ដីពី​ការ​វាស់វែង​ពី​អំពើ​ពុក​រលួយ​ជា​សកល បង្ហាញ​ពី​ទស្សនៈ និង​បទពិសោធន៍​របស់​ម្ចាស់​ឆ្នោត គួបផ្សំ​នឹង​របាយការណ៍​សន្ទស្សន៍​នៃ​ការ​យល់​ឃើញ​ពី​អំពី​ពុក​រលួយ មាន​សារសំខាន់​ជា​ខ្លាំង​ក្នុង​ការ​ផ្តល់​នូវ​ទស្សនទាន និង​ចក្ខុ​វិស័យ​ដល់​រដ្ឋាភិបាល និង​ស្ថាប័ន​ពាក់ព័ន្ធ ព្រម​ទាំង​គណបក្ស​នយោបាយ​ដើម្បី​បង្កើត​យុទ្ធសាស្ត្រ និង​វិធានការ​ដែល​មាន​ប្រសិទ្ធភាព​ដើម្បី​ប្រយុទ្ធ​ប្រឆាំង​អំពើ​ពុក​រលួយ។ លោក​បន្ត​ថា នៅ​ពេល​ដែល​សាធារណជន​បញ្ជាក់​ថា អំពើ​ពុក​រលួយ​បាន​រីក​រាលដាល​ពេញ​ក្នុង​សង្គម​ទៅ​ហើយ​នោះ ថ្នាក់​ដឹកនាំ​ក្នុង​សង្គម​នោះ​គួរ​តែ​យក​ចិត្ត​ទុក​ដាក់​លើ​បញ្ហា​ពុក​រលួយ​ឲ្យ​បាន​កាន់​តែ​ខ្លាំង និង​ធ្វើ​ការ​ឆ្លើយតប​ឲ្យ​បាន​ទាន់​ពេលវេលា«ពុក​រលួយ​នយោបាយ ការ​វិនិយោគ​ធំៗ ការ​គ្រប់គ្រង​ធនធាន​ធម្មជាតិ ការ​គ្រប់គ្រង​ថវិកា​ជាតិ ការ​ដេញ​ថ្លៃ​ធ្វើ​លទ្ធកម្ម​សាធារណៈ​ដែល​មាន​ទឹក​លុយ​ធំៗ ការ​ប្រមូល​ពន្ធ ការ​កត់ត្រា​ពន្ធ​នាំ​ចេញ​នាំ​ចូល រឿង​ធំៗ​ហ្នឹង​ណា គឺ​នៅ​មិន​ទាន់​មាន​ភាព​ល្អ​ប្រសើរ​គួរ​ឲ្យ​កត់​សម្គាល់​ទេ។ ដ្បិត​តែ​យើង​មាន​ការ​កើន​ចំណូល​ពន្ធ​ដែល​ជា​ចំណុច​វិជ្ជមាន ក៏ប៉ុន្តែ​នៅ​មាន​ចំណុច​ចន្លោះ​ប្រហោង​ដែល​ត្រូវ​បិទ ដែល​ត្រូវ​កែលំអ»

មន្ត្រី​នាំ​ពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន ច្រានចោល​របាយការណ៍​នេះ ដោយ​ចាត់​ទុក​ថា វា​គ្រាន់​តែ​ជា​ការ​វាយ​ប្រហារ​មក​លើ​រដ្ឋាភិបាល និង​ត្រូវ​បាន​ធ្វើ​ឡើង​ដើម្បី​បម្រើ​និន្នាការ​របស់​អង្គការ​តម្លាភាព​អន្តរជាតិ តែ​ប៉ុណ្ណោះ។ លោក​ថា រាជ​រដ្ឋាភិបាល​កម្ពុជា បាន​យក​ចិត្ត​ទុក​ដាក់​ខ្លាំង​ចំពោះ​ការ​ប្រឆាំង​អំពើ​ពុក​រលួយ ហើយ​កន្លង​ទៅ មាន​មន្ត្រី​តុលាការ និង​មន្ត្រី​រដ្ឋាភិបាល​ជាច្រើន​នាក់​ដែល​ត្រូវ​បាន​ផ្ដន្ទាទោស​ពាក់ព័ន្ធ​នឹង​សំណុំ​រឿង​ពុក​រលួយ«អ្វី​ដែល​លើក​ឡើង​ថា តុលាការ​មាន​អំពើ​ពុក​រលួយ​ជាង​គេ ខ្ញុំ​យល់​ឃើញ​ថា គ្រាន់​តែ​ជា​ការ​វាយ​ប្រហារ មិន​មែន​ជា​ការ​ស្រាវជ្រាវ​ទេ ដ្បិត​អី​អង្គការ​តម្លាភាព​នេះ​មិន​ទាន់​បាន​រួម​ចំណែក​ក្នុង​ការ​ប្រយុទ្ធ​ប្រឆាំង​អំពើ​ពុក​រលួយ​ទេ។ រាជ​រដ្ឋាភិបាល និង​តុលាការ​បាន​រៀបចំ​គោល​នយោបាយ​ច្បាប់ និង​យន្តការ ហើយ​មេធាវី និង​ចៅក្រម​មួយ​ចំនួន​បាន​ជាប់​ពន្ធនាគារ»

របាយការណ៍​ស្ដីពី​ការ​វាស់វែង​អំពី​អំពើ​ពុក​រលួយ​ជា​សកល (GCB) ខុស​គ្នា​ពី​របាយការណ៍​សន្ទស្សន៍​ការ​យល់​ឃើញ​ពី​អំពើ​ពុក​រលួយ (CPI) នៅ​ត្រង់​ថា វា​ជា​ការ​ស្ទង់​មតិ​សាធារណជន​ដែល​ឆ្លុះ​បញ្ចាំង​អំពី​ទស្សនៈ និង​បទពិសោធន៍​របស់​ប្រជាពលរដ្ឋ ទាក់ទង​នឹង​អំពើ​ពុក​រលួយ ចេញ​ផ្សាយ​រៀង​រាល់ ២ ទៅ ៣​ឆ្នាំ​ម្តង។ ចំណែក​ឯ​របាយការណ៍​សន្ទស្សន៍​ការ​យល់​ឃើញ​ពី​អំពើ​ពុក​រលួយ (CPI) គឺ​ជា​ការ​យល់​ឃើញ​របស់​អ្នក​ជំនាញ​អន្តរជាតិ​ខាង​អភិបាលកិច្ច នីតិរដ្ឋ និង​ធុរកិច្ច ទាក់ទង​នឹង​អំពើ​ពុក​រលួយ ចេញ​ផ្សាយ​ជា​រៀង​រាល់​ឆ្នាំ។

របាយការណ៍​សន្ទស្សន៍​ការ​យល់​ឃើញ​ពី​អំពើ​ពុក​រលួយ​ឆ្នាំ​២០១៦ (CPI) របស់​អង្គការ​តម្លាភាព​អន្តរជាតិ ដែល​ទើប​ចេញ​ផ្សាយ​កាល​ពី​ចុង​ខែ​មករា ឆ្នាំ​២០១៧ កន្លង​ទៅ បង្ហាញ​ថា កម្ពុជា ទទួល​បាន​ពិន្ទុ​២១ ស្ថិត​ក្នុង​លេខ​រៀង​ទី​១៥៦ ក្នុង​ចំណោម​ប្រទេស​១៧៦។ លទ្ធផល​នៃ​សន្ទស្សន៍​នេះ​បង្ហាញ​ថា កម្ពុជា នៅ​តែ​ជា​ប្រទេស​ដែល​មាន​អំពើ​ពុក​រលួយ​កម្រិត​ខ្ពស់ ហើយ​នៅ​តែ​ឈរ​ក្នុង​ចំណាត់​ថ្នាក់​ទាប​បំផុត​ក្នុង​ចំណោម​ប្រទេស​សមាជិក​អាស៊ាន និង​ចំណាត់​ថ្នាក់​ទាប​បំផុត​លំដាប់​ទី​៣ នៅ​តំបន់​អាស៊ី​ប៉ាស៊ីហ្វិក។

អង្គការ​តម្លាភាព ទទូច​ឲ្យ​រដ្ឋាភិបាល​កម្ពុជា អនុវត្ត​កំណែ​ទម្រង់​ជា​លក្ខណៈ​រចនាសម្ព័ន្ធ និង​ប្រព័ន្ធ​ក្នុង​ស្ថាប័ន​ជាតិ​សំខាន់ៗ ដោយ​ផ្ដោត​លើ​កំណែ​ទម្រង់​ប្រព័ន្ធ​តុលាការ និង​ភ្នាក់ងារ​អនុវត្តន៍​ច្បាប់ ជាពិសេស​គឺ​ការ​ធានា​នូវ​ឯករាជ​ភាព​របស់​ស្ថាប័ន​តុលាការ និង​អង្គភាព​ប្រឆាំង​អំពើ​ពុក​រលួយ ព្រម​ទាំង​ធ្វើ​វិសោធនកម្ម​ច្បាប់​ប្រឆាំង​អំពើ​ពុក​រលួយ។

ក្រៅ​ពី​នេះ អង្គការ​តម្លាភាព ក៏​ទទូច​ឲ្យ​លុប​បំបាត់​ការ​អនុវត្ត​បែប​បក្សពួក​និយម និង​ទំនាស់​ផល​ប្រយោជន៍​ក្នុង​ស្ថាប័ន​សាធារណៈ អនុម័ត​ច្បាប់​ស្ដីពី​សិទ្ធិ​ទទួល​បាន​ព័ត៌មាន និង​ច្បាប់​ស្ដីពី​ការ​ការពារ​បុគ្គល​រាយការណ៍ ព្រម​ទាំង​លើក​កម្ពស់​វប្បធម៌​សុចរិត​ភាព តម្លាភាព និង​គណនេយ្យ​ភាព​ក្នុង​សង្គម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក


សុខ អីសាន នឹង ផៃស៊ីផាន ពូកែណាស់ពីរឿងចោទគេថាគេវាយប្រហាររដ្ឋាភិបាល សួរថា ម្តេចក៍មិនទៅផ្តឹង Transparency International នៅតុលាការអន្តរជាតិទៅ? សូមប្រាប់ទៅ សុខ អីសាន នឹង ផៃស៊ិផាន ថារបាយការណ៍នេះគេមិនមែនធ្វើតែក្នុងប្រទេសខ្មែរទេ គេធ្វើទូទាំងភិភពលោក ហើយខ្មែរបានជាប់លេខរៀងទី ១៥៦ ក្នុងចំណោមប្រទេស ១៧៦។ អ្នកទាំងពីរចេះរាប់លេខដែរទេ?

តុលាការស្រុកខ្មែរមិនបាច់សួររកឫសគល់អីទេ ឲ្យតែចូលបំភ្លឺគឺដឹងតែចូលគុកហើយ គេស្គាល់ស្ថាប័ននេះថាជា “ដុល្លារការ” ហើយប៉ូលិសវិញប្រើពាក្យអសុរោះយ៉ាងថោកបំផុត ដូចជាប្រើពាក្យ “អាត្រងោល” ទៅលើព្រះសង្ឃជាដើម។

Feb 28, 2017 08:34 PM

អ្នក​អាន​អនាមិក

អាណាក៏ដូចតែអាណាដែរ រកឃើញតែចោរអំបុកចោរអំបែង។តាមពិតពុករលួយបំផុតនិងដុសស្លែមកហើយនោះគឺ​ គយនិងពន្ធដាឯណោះទេ។សួរទៅប្រាក់ខែពួកវាប៉ុន្មានសព្វថ្ងៃនេះ?មើលទៅឡានវាជិះនិងផ្ទះវានៅ​ ដីចំការម្រេច......ឡឥដ្ឋ....ថ្លៃប៉ុន្មាន?។

Feb 28, 2017 07:09 PM

គេហទំព័រ​ទាំងមូល