ស្រូវ​ប្រាំង​ជាច្រើន​ម៉ឺន​ហិកតារ​នៅ​បាត់ដំបង​និង​បន្ទាយមានជ័យ​ប្រឈម​នឹង​ខ្វះ​ទឹក

ដោយ សួន សុផលមុន្នី
2014.05.31
Share on WhatsApp
Share on WhatsApp
ស្រូវ​ប្រាំង​ខ្វះ​ទឹក សៀមរាប ៦១០ កសិករ​ម្នាក់​នៅ​ភូមិ​ក្រសាំង អង្គុយ​មើល​ស្រូវ​ប្រាំង​ខ្វះ​ទឹក​ដោយ​ក្ដី​អស់​សង្ឃឹម នា​ខេត្ត​សៀមរាប កាល​ពី​ថ្ងៃ​ទី​២ ខែ​មេសា ឆ្នាំ​២០១៤។
RFA/Hang Savyouth

ដំណាំ​ស្រូវ​ជាច្រើន​ម៉ឺន​ហិកតារ​នៅ​ក្នុង​ស្រុក​ចំនួន​បី នៃ​ខេត្ត​បាត់ដំបង និង​ខេត្ត​បន្ទាយមានជ័យ កំពុង​ប្រឈម​ទៅ​នឹង​ការ​ក្រៀម​ស្អិត ដោយសារ​ពុំ​មាន​ប្រភព​ទឹក​ស្រោចស្រព​ឲ្យ​បាន​គ្រប់គ្រាន់។ ការ​ខ្វះខាត​ទឹក​នេះ គឺ​បណ្ដាល​មក​ពី​ក្រុមហ៊ុន​ឯកជន​មួយ ដែល​ទទួល​លុយ​ពី​ម្ចាស់​ជំនួយ​បើក​ការដ្ឋាន​សាងសង់​ស្ពាន និង​ដាក់​ប្រព័ន្ធ​លូ​បិទ​មុខ​ទឹក នៅ​ចំណុច​គល់​ស្ពាន​មួយ​កន្លែង ក្នុង​ភូមិ​បវេល២ ឃុំ​បវេល ស្រុក​បវេល ខេត្ត​បាត់ដំបង។

ផល​ដំណាំ​ស្រូវ​របស់​កសិករ ដែល​បាន​ដាំ​ដុះ​លើ​ផ្ទៃដី​ស្រែ​ប្រាំង​ទំហំ​ជាង ៤​ម៉ឺន​ហិកតារ នៅ​ក្នុង​ស្រុក​បវេល ស្រុក​ថ្មគោល ខេត្ត​បាត់ដំបង និង​ស្រុក​មង្គលបុរី ខេត្ត​បន្ទាយមានជ័យ កំពុង​ជួប​គ្រោះ​រាំង​ស្ងួត និង​អាច​ឈាន​ទៅ​រក​ការ​ខូចខាត​ទាំង​ស្រុង។ បញ្ហា​នេះ ទាមទារ​ឲ្យ​អាជ្ញាធរ​មូលដ្ឋាន និង​ស្ថាប័ន​ជំនាញ​ពាក់ព័ន្ធ ត្រូវ​ចាត់​វិធានការ​ដោះស្រាយ​ជា​បន្ទាន់។

មន្ត្រី​សហគមន៍ កសិករ ប្រើប្រាស់​ទឹក​ប្រឡាយ​ស្វាយអា លោក អ៊ូ ពុយ ថ្លែង​នៅ​ថ្ងៃ​ទី​៣១ ខែ​ឧសភា ថា ការ​ខ្វះខាត​ប្រភព​ទឹក​ស្រោចស្រព​ដំណាំ​ស្រូវ​របស់​កសិករ​នេះ គឺ​បណ្ដាល​មក​ពី​ក្រុមហ៊ុន​ឯកជន​មួយ ដែល​ទទួល​ថវិកា​ពី​ធនាគារ​អភិវឌ្ឍន៍​អាស៊ី (ADB) ធ្វើ​ការដ្ឋាន​សាងសង់​ស្ពាន​បិទ​មុខ​ទឹក នៅ​ចំណុច​ស្ពាន​មួយ​កន្លែង ឋិត​ក្នុង​ភូមិ​បវេល២ ឃុំ​បវេល ស្រុក​បវេល ខេត្ត​បាត់ដំបង៖ «មិន​បាច់​ចាំ​ទុក​យូរ​ទេ តែ​១​ខែ​ទៀត​ហ្នឹង​ងាប់​ស្រូវ​អស់​ហើយ អត់​មាន​ទឹក ព្រោះ​ស្រូវ​រយៈពេល​ខ្លី​ស្រូវ​ប្រាំង ៧០% លើ​ផ្ទៃដី​រហូត​ដល់​ថ្មគោល»

ក្រុមហ៊ុន​ដែល​កំពុង​ដំណើរ​ការ​សាងសង់​ស្ពាន និង​ប្រព័ន្ធ​លូ​នេះ មាន​ឈ្មោះ​ថា ក្រុមហ៊ុន អ៊ឹង ស៊ឹមសៀ ដែល​មាន​ទីស្នាក់ការ​នៅ​ឯ​ទីក្រុង​ភ្នំពេញ។ ក្រុមហ៊ុន​នេះ​ទទួល​ម៉ៅការ​លើ​គម្រោង​សាងសង់​ស្ពាន​លូ​នេះ​ពី​ធនាគារ​អភិវឌ្ឍន៍​អាស៊ី និង​ជំនួយ​របស់​ប្រទេស​អូស្ត្រាលី។ ក្រុម​កសិករ​ថ្លែង​ថា មូលហេតុ​សំខាន់​ដែល​បណ្ដាល​ឲ្យ​ខ្វះខាត​ប្រភព​ទឹក គឺ​ដោយសារ​ក្រុមហ៊ុន​នេះ​បាន​សាងសង់​ស្ពាន​ដាក់​ប្រព័ន្ធ​លូ​ខ្ពស់​ផុត​ពី​ទឹក​ខុស​បច្ចេកទេស មិន​អាច​ទាញ​យក​ទឹក​មក​ប្រើប្រាស់​បាន។

ទន្ទឹម​គ្នា​នេះ ពួក​គាត់​ស្នើ​ឲ្យ​មាន​ការ​កាយ​ទម្លាយ​សំណង់​លូ ដែល​កំពុង​សាងសង់​នោះ​ចេញ ទើប​អាច​ទាញ​យក​ទឹក​ស្រោចស្រព​ដំណាំ​ស្រូវ​បាន។

អភិបាល​ស្រុក​បវេល លោក ទឹម ដារ៉េត បញ្ជាក់​ថា ដើម្បី​ជួយ​ដល់​ផល​ដំណាំ​ស្រូវ​របស់​កសិករ​ជាច្រើន​ម៉ឺន​ហិកតារ ដែល​កំពុង​ខ្វះខាត​ទឹក​ស្រោចស្រព​នោះ អាជ្ញាធរ​ស្រុក​បាន​ធ្វើ​លិខិត​ជា​ផ្លូវ​ការ​បញ្ជូន​ទៅ​ឲ្យ​ក្រុមហ៊ុន ដោះស្រាយ​បញ្ហា​នេះ​ជា​បន្ទាន់៖ «ខ្ញុំ​បាន​ចារ​លើ​លិខិត​ហ្នឹង​ឲ្យ​ជំនាញ​ទៅ​ទំនាក់ទំនង​ជាមួយ​ការដ្ឋាន​ហ្នឹង​ហើយ ឲ្យ​គាត់​ធ្វើ​ឡើង​វិញ ពីព្រោះ​ធម្មតា​ការដ្ឋាន​ធ្វើ​ស្ពាន​វា​ត្រូវ​តែ​ធ្វើ​ផ្លូវ​វាង អ៊ីចឹង​គ្រាន់​តែ​ថា ផ្លូវ​វាង​នោះ​ត្រូវ​ដាក់​លូ​ទាប​ខ្ពស់​ម៉េច​ឲ្យ​បាន​ត្រឹមត្រូវ ឲ្យ​សម្រួល​ទឹក​ឲ្យ​ប្រជាពលរដ្ឋ​បាន»

ឆ្លើយ​តប​ចំពោះ​បញ្ហា​នេះ លោក ស៊ី តារ៉ា ជា​មន្ត្រី​វិស្វករ​របស់​ក្រុមហ៊ុន អ៊ឹង ស៊ឹមសៀ ដែល​កំពុង​ប្រចាំ​ការ​នៅ​ការដ្ឋាន​នោះ​ថ្លែង​ថា ខាង​ក្រុមហ៊ុន​កំពុង​គិតគូរ​ចំពោះ​បញ្ហា​នេះ។ ជំហាន​ទី​១ លោក​ថា ក្រុមហ៊ុន​ត្រូវ​បើក​បង្ហូរ​មុខ​ទឹក​តាម​ប្រព័ន្ធ​លូ​ក្នុង​កម្រិត​ទាប ដើម្បី​រក្សា​កម្រិត​ទឹក​ឲ្យ​នៅ​ទាប​ទើប​អាច​បន្ត​ការ​សាងសង់​សំណង់​ស្ពាន​បាន៖ «តែ​ដល់​ពេល​ពួក​ខ្ញុំ​ធ្វើ​ជើង​ទី​មួយ​ហើយ​ប្រហែល​ជា​កន្លះ​ខែ​ទៀត ពួក​ខ្ញុំ​នឹង​ពង្រីក​ទឹក នៅ​ពេល​ពួក​ខ្ញុំ​បញ្ចប់​ជើង​ស្ពាន​ទី​២​ហើយ​មួយ​ទៀត ខ្ញុំ​អាច​បង្វែង​ទឹក​ចេញ​ដូច​កាល​ពី​មុន​ធ្វើ​ស្ពាន ប៉ុន្តែ​រយៈពេល​ដល់​កន្លះ​ខែ​ហ្នឹង យើង​ពង្រីក​បាន​បន្តិចបន្តួច​ទេ ព្រោះ​យើង​អត់​មាន​ច្រក​ចេញ»

មន្ត្រី​របស់​ក្រុមហ៊ុន​ដដែល​បន្ត​ថា រយៈពេល​ដែល​កសិករ​អាច​ទទួល​បាន​ទឹក​ប្រើប្រាស់​គ្រប់គ្រាន់​ដូច​ដើម​ឡើង​វិញ​បាន គឺ​ត្រូវ​រង់ចាំ​រយៈពេល​មួយ​ខែ ព្រោះ​នៅ​ចន្លោះ​ពេល​នេះ ខាង​ក្រុមហ៊ុន​ត្រូវ​រក្សា​កម្រិត​ទឹក​ឲ្យ​នៅ​ទាប ដើម្បី​អាច​សាងសង់​សំណង់​ជើង​ស្ពាន៖ «អា​ហ្នឹង​ជម្រើស​ទី​១​សម្រាប់​ខាង​ខ្ញុំ ហើយ​និង​ធនធាន​ទឹក។ បើ​ជម្រើស​មួយ​ទៀត គាត់​ចង់​បាន​ទឹក​ច្រើន​អ៊ីចឹង គឺ​មាន​តែ​ខ្ញុំ​បិទ​ទឹក​តែ​ម្ដង គឺ​ខ្ញុំ​ធ្វើ​តែ​ក្នុង​រយៈពេល​កន្លះ​ខែ ផុត​ពី​កន្លះ​ខែ​ទៅ ខ្ញុំ​អាច​បើក​ទឹក​ឲ្យ​គាត់​បាន ១០០% បាន»

ប៉ុន្តែ ជម្រើស​ទាំង​ពីរ​ដែល​ខាង​ក្រុមហ៊ុន​លើក​ឡើង​នេះ ត្រូវ​បាន​កសិករ​បដិសេធ ហើយ​ទាមទារ​ឲ្យ​ខាង​ក្រុមហ៊ុន​បើក​ផ្លូវ​ទឹក​ត្រង់​ចំណុច​ការដ្ឋាន​សាងសង់​ស្ពាន​ភូមិ​បវេល២ បង្ហូរ​ទឹក​ស្រោចស្រព​ស្រូវ​ឲ្យ​បាន​គ្រប់គ្រាន់។ ពួក​គាត់​លើក​ឡើង​ថា បើ​សិន​ផល​ដំណាំ​ស្រូវ​របស់​ពួក​គាត់​ដែល​បាន​ដាំ​ដុះ​កាល​ពី​ខែ​មេសា ឆ្នាំ​២០១៤ នេះ អត់​ទឹក​ក្នុង​រយៈពេល​មួយ​ខែ​ទៀត នឹង​ត្រូវ​ខូចខាត​ទាំង​ស្រុង។

មន្ត្រី​ការិយាល័យ​ធនធាន​ទឹក និង​ឧតុនិយម ស្រុក​បវេល លោក ពោ រួញ ថ្លែង​ថា បញ្ហា​ខ្វះ​ទឹក គឺ​បង្ក​ឡើង​ដោយសារ​កំហុស​បច្ចេកទេស​របស់​ក្រុមហ៊ុន។ ក្រុមហ៊ុន​បាន​ដាក់​លូ​បង្ហូរ​ទឹក​មាន​មុខ​តូច ហើយ​បើក​បង្ហូរ​ទឹក​ក្នុង​កម្រិត​ទាប​ថែម​ទៀត។ លោក​បន្ត​ថា ក្នុង​ប្រព័ន្ធ​ទំនប់​បវេល នេះ ត្រូវ​ផ្ដល់​ទឹក​ស្រោចស្រព​ដល់​ស្រុក​ចំនួន​បី។

ក្នុង​នោះ មាន​ស្រុក​បវេល ស្រុក​ថ្មគោល ខេត្ត​បាត់ដំបង និង​ស្រុក​មង្គលបុរី ខេត្ត​បន្ទាយមានជ័យ ដែល​មាន​ផ្ទៃដី​ស្រោចស្រព​ចំនួន ៤​ម៉ឺន ៥​ពាន់​ហិកតារ។ លោក​ថា ដំណាំ​ស្រូវ​ទាំង​នោះ​នឹង​ត្រូវ​ស្កក​ស្វិត​ខូចខាត​ទាំង​ស្រុង ហើយ​ដើម្បី​ដោះស្រាយ​បញ្ហា​នេះ​បាន លុះត្រា​តែ​ខាង​ក្រុមហ៊ុន​ត្រូវ​ជីក​ប្រឡាយ​បង្ហូរ​ទឹក ដែល​មាន​ផ្ទៃ​មុខ​ប្រហាក់​ប្រហែល​នឹង​មុខ​ប្រឡាយ​ចាស់ វាង​ពី​ការដ្ឋាន​នោះ ទើប​អាច​ជួយ​សង្គ្រោះ​ស្រូវ​ពី​ការ​ខូចខាត​បាន​ទាំង​ស្រុង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។