រដ្ឋមន្ត្រី​ក្រសួង​មហាផ្ទៃ​អំពាវនាវ​ដល់​អាជ្ញាធរ​គ្រប់​ជាន់ថ្នាក់​ឲ្យ​បន្ត​បង្ក្រាប​សកម្មភាព​ឧក្រិដ្ឋកម្ម​ផ្សេងៗ ​នៅ​កម្ពុជា

ដោយ ​ម៉ៅ សុធានី
2022.10.20
Share on WhatsApp
Share on WhatsApp
រដ្ឋមន្ត្រី​ក្រសួង​មហាផ្ទៃ​អំពាវនាវ​ដល់​អាជ្ញាធរ​គ្រប់​ជាន់ថ្នាក់​ឲ្យ​បន្ត​បង្ក្រាប​សកម្មភាព​ឧក្រិដ្ឋកម្ម​ផ្សេងៗ ​នៅ​កម្ពុជា រដ្ឋមន្ត្រី​ក្រសួង​មហាផ្ទៃ​លោក ស ខេង។
រូប៖ ហ្វេសប៊ុក​លោក ស ខេង

រដ្ឋមន្ត្រី​ក្រសួងមហាផ្ទៃ លោក ស ខេង អំពាវនាវ​ដល់​អាជ្ញាធរ​ឲ្យ​បន្ត​បង្ក្រាប​សកម្មភាព​ឧក្រិដ្ឋកម្ម​ផ្សេងៗ ​រួមមាន ការ​ជួញដូរ​គ្រឿងញៀន ការ​ជួញដូរ​មនុស្ស ការ​ជំរិត​ទារប្រាក់ ល្បែងស៊ីសង​ខុសច្បាប់ និង​ឧក្រិដ្ឋកម្ម​ឆ្លងដែន​ជាដើម។

លោក ស ខេង កាល​ពី​ថ្ងៃទី​១៩ ខែ​តុលា លើកឡើង​ថា ដោយសារ​ស្ថានភាព​សង្គម​បច្ចុប្បន្ន គ្រប់​ក្រសួង​ស្ថាប័ន​ទាំងអស់ ជាពិសេស​សមត្ថកិច្ច​គ្រប់​ជាន់ថ្នាក់ ត្រូវ​បង្ហាញ​សុ​ឆន្ទៈ​ពិតប្រាកដ ដើម្បី​ប្រយុទ្ធ​ប្រឆាំង​រាល់​សកម្មភាព​ឧក្រិដ្ឋកម្ម​ទាំងនោះ​។ លោក​បន្ត​ថា ការ​កើនឡើង​នៃ​សកម្មភាព​ឧក្រិដ្ឋកម្ម​ទាំងនោះ បណ្តាល​ឲ្យ​ប៉ះពាល់​ធ្ងន់ធ្ងរ​ដល់​សន្តិសុខ​សង្គម កំណើន​សេដ្ឋកិច្ចជាតិ និង​ហានិភ័យ​នៃ​ការ​ធ្លាក់​ចុះ​កិត្យានុភាព​របស់​កម្ពុជា នៅ​លើ​ឆាក​អន្តរជាតិ។

លោក ស ខេង សង្កត់ធ្ងន់​ថា ក្រុម​ឧក្រិដ្ឋជន​អន្តរជាតិ បាន​យក​ប្រទេស​កម្ពុជា ជា​កន្លែង​ប្រើប្រាស់​សម្រាប់​ផលិត​គ្រឿងញៀន និង​ចែកចាយ​យក​ទៅ​លក់​បន្ត​ទៅ​ទីផ្សារ​អន្តរជាតិ ដោយ​ពួកគេ​បាន​នាំចូល​គ្រឿងញៀន និង​សារ​ធាតុគីមី​ផ្សំ​រាប់​រយ​តោន​សំរាប់​ផលិត​គ្រឿងញៀន​។ លោក​ថា ប្រសិនបើ​នៅតែ​បន្ត​អនុញ្ញាត​ឲ្យ​មាន​ការផលិត​គ្រឿងញៀន​នៅ​កម្ពុជា​តទៅទៀត ពលរដ្ឋ​ខ្មែរ​កាន់តែ​ច្រើន ជាពិសេស​ យុវជន នឹង​ក្លាយជា​អ្នក​ញៀន​គ្រឿងញៀន ដែល​បង្ក​ផល​ប៉ះពាល់​ធ្ងន់ធ្ងរ​ដល់​ប្រព័ន្ធ​សរសៃប្រសាទ និង​អនាគត​របស់​ពួកគេ។

ពាក់ព័ន្ធ​នឹង​ការជួញ​ដូរ​មនុស្ស​វិញ ក្រសួង​ការបរទេស​វៀតណាម ឲ្យ​ដឹង​ថា សមត្ថកិច្ច​កម្ពុជា បាន​ជួយ​រំដោះ​ជនជាតិ​វៀតណាម​ ១៧១​នាក់ ដែល​ចាញ់បោក​ក្រុម​ជនល្មើស ចាប់​បង្ខាំង​ឲ្យ​ធ្វើការ​ខុសច្បាប់​នៅ​ព្រំដែន​កម្ពុជា ​និង​ថៃ។

ទីភ្នាក់ងារសារព័ត៌មាន​វៀតណាម (VNA) ដែល​បាន​ដកស្រង់​សំដី​អ្នកនាំពាក្យ​ក្រសួងការបរទេស​វៀតណាម អ្នកស្រី ឡេ ធី ធូហង់ (Le Thi Thu Hang) ថ្លែង​ក្នុង​សន្និសីទ​សារព័ត៌មាន កាលពី​ថ្ងៃទី២០ ខែ​តុលា ឲ្យ​ដឹង​ថា ស្ថាន​អគ្គ​កុងស៊ុល​វៀតណាម នៅ​ខេត្ត​បាត់ដំបង បាន​សហការ​ជាមួយ​អាជ្ញាធរ​កម្ពុជា ជួយ​សង្គ្រោះ​ជនជាតិ​វៀតណាម​ចេញពី​ការ​បង្ខាំង​ឲ្យ​ធ្វើការ​ខុសច្បាប់ នៅ​តាម​ព្រំដែន​កម្ពុជា​-​ថៃ ជាង​ ១៧១​នាក់ ចាប់ពី​ខែ​កក្កដា រហូត​ដល់​ចុង​ខែ​កញ្ញា​។​

ក្រសួងការបរទេស​វៀតណាម​ឲ្យ​ដឹង​ថា រហូត​មក​ដល់​ចុង​ខែ​កញ្ញា ឆ្នាំ​២០២២ ជនរងគ្រោះ​វៀតណាម ជាង​ ១​ពាន់​នាក់ ត្រូវ​បាន​ជួយ​រំដោះ​ចេញពី​ការ​ឃុំ​ឃាំង​របស់​ក្រុម​ជនល្មើស ដែល​បង្ខំ​ឲ្យ​ធ្វើការ​ខុសច្បាប់ នៅ​ប្រទេស​កម្ពុជា​។ ស្ថាន​អគ្គ​កុងស៊ុល​វៀតណាម កំពុងធ្វើការ​ជាមួយ​ស្ថាប័ន​ពាក់ព័ន្ធ ដើម្បី​ផ្ទៀងផ្ទាត់​អត្តសញ្ញាណ​របស់​ជនរងគ្រោះ មុន​នឹង​បញ្ជូន​ត្រឡប់​មក​ប្រទេស​វៀតណាម​វិញ។

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។