លោក ស ខេង បញ្ជា​ឲ្យ​សមត្ថកិច្ច​ខេត្ត​ឧត្តរមានជ័យ​តាម​ចាប់​ជន​ដែល​បង្កៃ​គ្រាប់​រ៉ុកកែត​ ដាក់​នៅ​ក្រោយ​សាលា​រៀន

ដោយ មាន ឫទ្ធិ
2019-06-17
អ៊ីម៉ែល
មតិ
Share
បោះពុម្ព
លោក ស ខេង រដ្ឋមន្ត្រី​ក្រសួង​មហាផ្ទៃ និង​គ្រាប់​កាំភ្លើង​បង្កៃ មាន​គ្រាប់​រ៉ុកកែត​ បេ​៤០ (B40)  ដែល​​ប្រជាពលរដ្ឋ​ប្រទះ​​​ឃើញ​នៅ​ខាង​ក្រោយ​អនុវិទ្យាល័យ​រួត​ចំប៉ី ស្ថិត​នៅ​ភូមិ​រួត​ចំប៉ី សង្កាត់​អូរ​ស្មាច់​ ក្រុង​សំរោង​ ខេត្ត​ឧត្តរមានជ័យ ​កាល​ពី​ថ្ងៃ​ទី១៦ មិថុនា។
លោក ស ខេង រដ្ឋមន្ត្រី​ក្រសួង​មហាផ្ទៃ និង​គ្រាប់​កាំភ្លើង​បង្កៃ មាន​គ្រាប់​រ៉ុកកែត​ បេ​៤០ (B40) ដែល​​ប្រជាពលរដ្ឋ​ប្រទះ​​​ឃើញ​នៅ​ខាង​ក្រោយ​អនុវិទ្យាល័យ​រួត​ចំប៉ី ស្ថិត​នៅ​ភូមិ​រួត​ចំប៉ី សង្កាត់​អូរ​ស្មាច់​ ក្រុង​សំរោង​ ខេត្ត​ឧត្តរមានជ័យ ​កាល​ពី​ថ្ងៃ​ទី១៦ មិថុនា។
រូប៖ ស្នងការ​នគរបាល​ខេត្ត​ឧត្ដរ​មាន​ជ័យ

លោក​ ស ខេង​ រដ្ឋមន្ត្រី​ក្រសួង​មហាផ្ទៃ បញ្ជា​ឲ្យ​អាជ្ញាធរ​ខេត្ត​ឧត្តរមានជ័យ ​ខិត​ខំ​ស្រាវ​ជ្រាវ​ និង​តាម​ចាប់​ឲ្យបាន ​ជន​ដែល​យក​គ្រាប់​បេ​៤០ (B40) និង​គ្រាប់​ដេកា (DK) ទៅ​ដាក់​បង្កៃ​ នៅ​ខាង​ក្រោយ​អនុវិទ្យាល័យ​រួត​ចំប៉ី។ លោក ស ខេង ស្នើ​ដល់​ប្រជា​ពលរដ្ឋទាំង​អស់ ​ចូល​រួម​សហការ​ជាមួយ​អាជ្ញាធរ​មូលដ្ឋាន ដើម្បី​រក្សា​ឲ្យ​បាន​ភូមិ​មាន​សុវត្ថិភាព៖ «ឧត្តរមានជ័យ វា​ទៅ​យក​គ្រាប់​បេ​៤០ និង​គ្រាប់​ដេកា ប៉ុន្តែ​វា​អត់មាន​សាស់​ទេ ។ ផ្ទុះ​ទៅ​អត់​មាន​គ្រោះ​ថ្នាក់​អ្នក​ណា​ទេ ព្រោះ​វា​អត់​បាន​បញ្ជូន​គ្រាប់​ហ្នឹង​ឡើង​ទេ ប៉ុន្តែ​យក​សំឡេង​ផ្ទុះ​។ អ៊ីចឹង! អ្នក​ដាក់​ហ្នឹង​ពិត​ជា​មាន​ឧបាយកល​មិន​ល្អ​ហើយ។ ឥឡូវ​បាន​យក​អស់​ហើយ ប្រមូល​ទុក​អស់​ហើយ។ ឥឡូវ​កំពុង​រក​មនុស្ស អ្នក​ដែល​ធ្វើ​ហ្នឹង​ទៅ​ផ្ដន្ទាទោស​តាម​ច្បាប់»

ស្នងការដ្ឋាន​នគរបាល​ខេត្ត​ឧត្តរមានជ័យ​ ឲ្យដឹង​ថា កាល​ពី​ថ្ងៃ​ទី ១៦ មិថុនា ប្រជាពលរដ្ឋ​ប្រទះ​ឃើញ​មាន​គ្រាប់​រ៉ុកកែត​ បេ​៤០ (B40) នៅ​ខាង​ក្រោយ​អនុវិទ្យាល័យ​រួត​ចំប៉ី ស្ថិត​នៅ​ភូមិ​រួត​ចំប៉ី សង្កាត់​អូរ​ស្មាច់​ ក្រុង​សំរោង​ ខេត្ត​ឧត្តរមានជ័យ។

បន្ទាប់​ពី​ចុះ​ត្រួត​ពិនិត្យ​រួច​មក សមត្ថកិច្ច​អះអាងថា គ្រាប់​ប្រភេទ​បេ​៤០ (B40) ផលិត​នៅ​ប្រទេស​សូវៀត ​មាន​ចំនួន​៤​គ្រាប់ និង​គ្រាប់​ដេកា (DK) ១​គ្រាប់។

សមត្ថកិច្ច​ថា ​គ្រាប់​ទាំង​នោះ ត្រូវ​បាន​ជន​មិន​ស្គាល់​មុខ​ យក​ទៅ​កប់​ក្នុង​រណ្ដៅ នឹង​ចាក់​រំសេវ មាន​បី​កន្លែង​ផ្សេង​ពី​គ្នា​ ដោយ​ចម្ងាយ​ពី​កន្លែង​មួយ​​ទៅ​មួយ​កន្លែង ប្រវែង​១០​ម៉ែត្រ។ ចំណែក គ្រាប់​ដេកា​ (DK) មាន​ចម្ងាយ​១រយ​ម៉ែត្រ ពី​គ្រាប់​បេ​៤០។ បន្ទាប់​ពី​នោះ កម្លាំង​ជំនាញ​នៃ​អង្គការ​ស៊ីម៉ាក់ (CMAC) បាន​ចុះ​ទៅ​ដោះ​គ្រាប់​ទាំង​អស់​នោះ​ យក​ទៅ​រក្សាទុក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល