លោក ស សុខា ព្រមានចាត់វិធានការចំពោះអ្នកប្រើប្រាស់ស្លាកលេខនគរបាលខុសគោលដៅ
2024.03.02
រដ្ឋមន្ត្រីក្រសួងមហាផ្ទៃ លោក ស សុខា ថ្លែងក្នុងសន្និបាតត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងមហាផ្ទៃ កាលពីថ្ងៃទី២៩ ខែកុម្ភៈ ឆ្នាំ២០២៤។
រូប៖ ហ្វេសប៊ុកលោក ស សុខា
រដ្ឋមន្ត្រីក្រសួងមហាផ្ទៃ លោក ស សុខា បានដាក់បញ្ជាឱ្យមន្ត្រីក្រោមឱវាទ យកចិត្តទុកដាក់ទៅលើការប្រើប្រាស់រថយន្តពាក់ ស្លាកលេខន.ប (នគរបាល) ឱ្យបានត្រឹមត្រូវ និងចាត់វិធានការចំពោះការប្រើប្រាស់ស្លាកលេខនគរបាល យកទៅធ្វើការនៅកាស៊ីណូ និងជិះទៅឈប់នៅមុខទីតាំងខារ៉ាអូខេ (KTV) ជាដើម។
ថ្លែងក្នុងសន្និបាតត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងមហាផ្ទៃ នៅថ្ងៃទី២៩ ខែកុម្ភៈ បានដាក់បញ្ជាឱ្យអគ្គស្នងការនគរបាលជាតិ និងស្នងការនគរបាលរាជធានី-ខេត្តទាំងអស់ យកចិត្តទុកដាក់ចំពោះអ្នកប្រើប្រាស់ស្លាកលេខ ន.ប។ លោកបន្តថា ក្នុងករណីប្រព្រឹត្តខុសច្បាប់ អាជ្ញាធរត្រូវដកស្លាកលេខ ហើយឱ្យម្ចាស់ឡាន ឬម៉ូតូទៅបង់ពន្ធតាមច្បាប់ ហើយស្លាកលេខ ន.ប នេះ គឺប្រើប្រាស់បម្រើឱ្យសមត្ថកិច្ច និងអង្គភាពតែប៉ុណ្ណោះ ហើយមន្ត្រីនគរបាលដែលប្រើប្រាស់យានយន្តពាក់ស្លាកលេខ ន.ប ស្របតាមគោលការណ៍ច្បាប់ ក៏មិនត្រូវឱ្យគេខ្ចីជិះយកទៅប្រើប្រាស់ផ្ដេសផ្ដាសដែរ។
ការដាក់បញ្ជារបស់រដ្ឋមន្ត្រីក្រសួងមហាផ្ទៃ នេះ គឺបន្ទាប់ពីមានសេចក្ដីរាយការណ៍ ពីករណីប្រើប្រាស់រថយន្តស្លាកលេខ ន.បរបស់អង្គភាពមួយចំនួនខុសគោលដៅ ក្នុងនោះមានករណីប្រើប្រាស់យានយន្តពាក់ស្លាកលេខ” នគរបាល ” ជិះទៅធ្វើការនៅកាស៊ីណូ ហើយអ្នកខ្លះជិះទៅឈប់នៅមុខ KTV ដែលមិនមែនជាប្រតិបត្តិការរបស់សមត្ថកិច្ចឡើយ។
ជុំវិញរឿងនេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ គាំទ្រចំពោះវិធានការរបស់រដ្ឋមន្ត្រីក្រសួងមហាផ្ទៃ ប៉ុន្តែជាមួយគ្នានេះ លោកក៏ជំរុញឱ្យអាជ្ញាធរ អនុវត្តវិធានការនេះ ឱ្យម៉ឺងម៉ាត់ ដើម្បីកុំឱ្យមន្ត្រីខិលខូចមួយចំនួន ប្រើប្រាស់ស្លាកលេខ ស្ថាប័ននគរបាលខុលគោលដៅ និងយកទៅប្រព្រឹត្តបទល្មើសផ្សេងៗ ពិសេសការប្រើប្រាស់ឥទ្ធិពលស្លាកលេខន.ប នេះ ទៅគាបសង្កត់ពលរដ្ឋ នៅពេលមានគ្រោះថ្នាក់ចរាចរណ៍ជាដើម។
លោក សេក សុជាតិ៖ «តាមរយៈបទពិសោធន៍កន្លងមក អ្នកដែលបើកបររថយន្ត មានបំពាក់ស្លាកលេខរបស់នគរបាល ភាគច្រើនមិនមែនជាមន្ត្រីនគរបាលយកទៅប្រើប្រាស់ក្នុងបេសកកម្មទេ។ ភាគច្រើនយើងឃើញថា ជាលេខដែលយកទៅបំពាក់លើរថយន្ត ភាគច្រើនដែលយើងមើលឃើញ គឺរថយន្តគ្រួសារ ឬក៏ជារថយន្តដែលមានបញ្ហាទាក់ទងជាមួយនឹងការមិនបង់ពន្ធចូល ឬក៏ជារថយន្តខុសច្បាប់»។
កាលពីថ្ងៃទី២៨ ខែកុម្ភៈ ក្រសួងការពារជាតិ បានចេញសេចក្ដីប្រកាសព្រមានចំពោះអ្នកប្រើប្រាស់ស្លាកលេខ ខេមរភូមិន្ទ (ខ.ម) ខុសគោលដៅ ដែលបង្កផលប៉ះពាល់ដល់សង្គម និងកិត្តិយសក្រសួងការពារជាតិ។ ជាមួយគ្នានេះ ក្រសួងបានព្រមានចាត់វិធានការចំពោះអ្នកប្រើប្រាស់ស្លាកលេខ”ខេមរភូមិន្ទ” ផ្ទុយនឹងគោលការណ៍ច្បាប់ និងមិនអនុញ្ញាតឱ្យជនស៊ីវិល ឬជនបរទេសប្រើប្រាស់បានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
