រដ្ឋបាលខេត្តព្រះសីហនុត្រៀមកម្លាំងការពារសន្តិសុខជូនទេសចរក្នុងឱកាសបុណ្យចូលឆ្នាំខ្មែរ
2017.04.12
អភិបាលខេត្តព្រះសីហនុ លោក យន្ត មីន (រូបពីឆ្វេងទី២) ថ្លែងក្នុងសន្និសីទកាសែតទាក់ទងផែនការអភិវឌ្ឍន៍ឆ្នេរសមុទ្រខេត្តព្រះសីហនុ នាឆ្នេរឯករាជ្យ កាលពីព្រឹកថ្ងៃទី២៧ ខែកុម្ភៈ ឆ្នាំ២០១៦។ RFA/Den Ayuthyea
RFA/Den Ayuthyea
រដ្ឋបាលខេត្តព្រះសីហនុ សហការជាមួយវិស័យឯកជន រួមគ្នាពង្រឹងសន្តិសុខ សុវត្ថិភាព និងគុណភាពសេវាកម្មទេសចរណ៍ ដើម្បីផ្តល់ភាពសប្បាយរីករាយជូនប្រជាពលរដ្ឋ ពិសេសភ្ញៀវទេសចរដែលចូលកម្សាន្តខេត្តនេះ ក្នុងឱកាសពិធីបុណ្យចូលឆ្នាំខ្មែរ។
ទន្ទឹមគ្នានេះ មន្ត្រីជំនាញនគរបាល ក៏បានអំពាវនាវដល់ប្រជាពលរដ្ឋដែលជាអ្នកប្រើប្រាស់ផ្លូវ ត្រូវគោរពច្បាប់ចរាចរណ៍ឲ្យបានខ្ជាប់ខ្ជួន ដើម្បីបង្ការគ្រោះថ្នាក់ចរាចរណ៍ ដែលអាចនឹងកើតមាននៅពេលធ្វើដំណើរទៅស្រុកកំណើត និងទីអារាមនានា ក្នុងឱកាសពិធីបុណ្យចូលឆ្នាំមានសុវត្ថិភាពទាំងអស់គ្នា។
មន្ត្រីស្ថាប័នពាក់ព័ន្ធខេត្តព្រះសីហនុ ត្រៀមកម្លាំងការពារសន្តិសុខសុវត្ថិភាព និងផ្ដល់ភាពសប្បាយរីករាយជូនប្រជាពលរដ្ឋ ពិសេសភ្ញៀវទេសចរជាតិ-អន្តរជាតិ ដែលចូលមកទស្សនាខេត្តនេះនៅអំឡុងពេលពិធីបុណ្យចូលឆ្នាំប្រពៃណីជាតិឆ្នាំនេះ។
អភិបាលខេត្តព្រះសីហនុ លោក យន្ត មីន បានឲ្យអាស៊ីសេរី ដឹងថា ពិធីបុណ្យចូលឆ្នាំៗនេះថ្នាក់ដឹកនាំស្ថាប័នកងរាជអាវុធហត្ថ និងស្នងការដ្ឋាននគរបាលខេត្តព្រះសីហនុ ជាដើម បានពង្រាយកម្លាំងការពារសន្តិសុខនៅតាមគោលដៅនានា រួមមាន តាមទីវត្តអារាម និងទីកន្លែងកម្សាន្តនានាទាំងយប់ថ្ងៃ ដើម្បីរក្សាសុវត្ថិភាពជូនប្រជាពលរដ្ឋឲ្យទទួលបានភាពរីករាយតាមក្រុមគ្រួសារនីមួយៗ។
លោក យន្ត មីន បានអំពាវនាវដល់ប្រជាពលរដ្ឋខ្មែរទាំងក្នុង និងក្រៅប្រទេស ឲ្យជ្រើសយកខេត្តជាប់ឆ្នេរសមុទ្រមួយនេះ សម្រាប់ដំណើរកម្សាន្ត ស្រូបយកខ្យល់ជំនោរសមុទ្រនៅតាមឆ្នេរ និងកោះនានាឲ្យបានច្រើនកុះករ។ ជាងនេះទៀត កម្លាំងសមត្ថកិច្ចស្ថាប័នជំនាញពាក់ព័ន្ធ បានត្រៀមលក្ខណៈការពារសន្តិសុខសុវត្ថិភាព ២៤ម៉ោង ជូនភ្ញៀវទេសចរជាតិ និងអន្តរជាតិដោយយកចិត្តទុកដាក់៖ «ខេត្តយើងបានរៀបចំឲ្យមានព្រឹត្តិការណ៍ជាច្រើនដើម្បីផ្ដល់ជូនបងប្អូនប្រជាពលរដ្ឋ និងភ្ញៀវទេសចរសប្បាយរីករាយ ដើម្បីអបអរសាទរពិធីបុណ្យចូលឆ្នាំថ្មីឆ្នាំនេះ ក្នុងន័យបង្ហាញឲ្យឃើញពីការមានសន្តិភាព និងភាពរីកចម្រើនរបស់ប្រទេសជាតិ របស់ខេត្តព្រះសីហនុ ក្រោមដំបូលដឹកនាំ ដោយសម្ដេចនាយករដ្ឋមន្ត្រី ហ៊ុន សែន នាំឲ្យប្រទេសជាតិមានសុខសន្តិភាពពេញលេញ និងមានការអភិវឌ្ឍ។ ចូលឆ្នាំថ្មីឆ្នាំនេះ ខេត្តយើងបានរៀបចំឲ្យមានកម្មវិធីកម្សាន្តនៅតាមឆ្នេរមួយចំនួន មានឆ្នេរឯករាជ្យ ឆ្នេរអូរឈើទាល ឬតាមទីអារាម និងនៅតំបន់កោះខ្ចង ស្រុកព្រៃនប់ ជាដើម ដើម្បីផ្ដល់ភាពសប្បាយរីករាយជូនប្រជាពលរដ្ឋ និងភ្ញៀវទេសចរដែលចូលមកកម្សាន្តក្នុងខេត្តនេះក្នុងឱកាសបុណ្យចូលឆ្នាំ»។
លោក យន្ត មីន ក៏បានបង្ហាញជម្រើសកម្សាន្តសម្រាប់ផ្ដល់ភាពសប្បាយរីករាយជូនភ្ញៀវទេសចរដោយអះអាងថា រដ្ឋបាលខេត្តនេះបានសហការជាមួយស្ថាប័នពាក់ព័ន្ធ មានវិស័យឯកជន ឬសភាពាណិជ្ជកម្មខេត្តព្រះសីហនុ ជាដើម បង្កើតឲ្យមានកម្មវិធីលេងល្បែងប្រជាប្រិយខ្មែរ និងប្រគំតន្ត្រីសម័យជូនភ្ញៀវទេសចរកម្សាន្តនៅតាមតំបន់ឆ្នេរសមុទ្រ និងនៅតំបន់ផ្លូវចូលទៅកាន់មូលដ្ឋានកោះខ្យង ស្រុកព្រៃនប់ ជូនប្រជាពលរដ្ឋ និងភ្ញៀវទេសចរសប្បាយរីករាយរយៈពេល ៣ថ្ងៃជាប់ៗគ្នា។
ឆ្លៀតឱកាសនេះ លោក យន្ត មីន អភិបាលខេត្តព្រះសីហនុ បានផ្ញើសារជូនពរដល់ប្រជាពលរដ្ឋនៅទូទាំងប្រទេស ពិសេសប្រជាពលរដ្ឋខេត្តព្រះសីហនុ សូមឲ្យមានសុខភាពល្អ និងមានសុវត្ថិភាពក្នុងការធ្វើដំណើរកម្សាន្ត ឬជួបជុំក្រុមគ្រួសារនៅតាមគោលដៅនីមួយៗខ្លួន នាឱកាសពិធីបុណ្យចូលឆ្នាំថ្មីឆ្នាំនេះ៖ «សូមជូនពរដល់លោក លោកស្រី អ្នកនាង កញ្ញា ឯកឧត្ដម លោកឧកញ៉ា មន្ត្រីរាជការ ប្រជាពលរដ្ឋទាំងអស់ សូមឲ្យមានសេចក្ដីសុខ និងមានសុវត្ថិភាព ប្រកបកិច្ចការងារអ្វីសូមឲ្យបានសម្រេចគ្រប់ៗគ្នា ក្នុងឱកាសពិធីបុណ្យចូលឆ្នាំថ្មីឆ្នាំនេះ។ បើជាមន្ត្រីរាជការសូមឲ្យទទួលជោគជ័យក្នុងការងារ និងបានឡើងបុណ្យស័ក្ដិគ្រប់ៗគ្នា ហើយបើជាប្រតិបត្តិករទេសចរ ឬអាជីវករក៏សូមឲ្យការប្រកបរបរទទួលទានលក់ដូរដាច់ ឬមានអតិថិជនច្រើន»។
ចំណែកស្នងការនគរបាលខេត្តព្រះសីហនុ លោក ជួន ណារិន្ទ មានប្រសាសន៍ថា នៅពេលមានពិធីបុណ្យជាតិធំៗ មានបុណ្យចូលឆ្នាំជាដើម កម្លាំងរបស់លោកបានបន្ថែមកម្លាំង និងបែងចែកឲ្យប្រចាំការទាំងយប់ថ្ងៃនៅតាមរមណីយដ្ឋាន កន្លែងកម្សាន្ត និងនៅតាមវត្តអារាមជាដើម ដើម្បីរង់ចាំការពារសន្តិសុខសណ្ដាប់ធ្នាប់ជូនភ្ញៀវទេសចរជាប្រចាំ។
លោកស្នងការទទូចដល់ប្រតិបត្តិករទេសចរ និងប្រជាពលរដ្ឋទាំងអស់ត្រូវចូលរួមសហការជាមួយកម្លាំងនគរបាល និងកម្លាំងជំនាញដទៃទៀត ដើម្បីឈានដល់រក្សាការពារសន្តិសុខ ឬបញ្ចៀសការកកស្ទះចរាចរណ៍ឲ្យមានសុវត្ថិភាពល្អ។
លោក ជួន ណារិន្ទ បានក្រើនរំឭកដល់ប្រជាពលរដ្ឋនៅទូទាំងប្រទេសដែលធ្វើដំណើរតាមផ្លូវទៅលេងស្រុកកំណើតរបស់ខ្លួន ពិសេសប្រជាពលរដ្ឋជាអ្នកប្រើប្រាស់ផ្លូវធ្វើដំណើរចេញចូលទៅមូលដ្ឋានខេត្តព្រះសីហនុ ស្នើឲ្យការបើកបរត្រូវគោរពច្បាប់ចរាចរណ៍ឲ្យបានទាំងអស់គ្នា ជាពិសេសអ្នកបើកបរគ្រប់ៗរូប ត្រូវមានការយោគយល់គ្នាទៅវិញទៅមកដោយសេចក្ដីថ្លៃថ្នូរ និងមានសីលធម៌ខ្ពស់។
បុណ្យចូលឆ្នាំនេះដែរ លោក អ៊ី សុខឡេង អភិបាលក្រុងព្រះសីហនុ ឲ្យដឹងថា រដ្ឋបាលក្រុងនេះ បានត្រៀមជាស្រេចរង់ចាំការពារសន្តិសុខ និងសណ្ដាប់ធ្នាប់ជូនប្រជាពលរដ្ឋ ពិសេសភ្ញៀវទេសចរជាតិអន្តរជាតិចូលមកកម្សាន្តមូលដ្ឋាននេះដោយយកចិត្តទុកដាក់។
លោក អ៊ី សុខឡេង ក៏បានជូនពរប្រជាពលរដ្ឋទូទៅ សូមឲ្យការធ្វើដំណើរទៅលេងស្រុកកំណើត ឬដំណើរកម្សាន្តនៅតាមទីតាំងផ្សេងៗ នាឱកាសពិធីបុណ្យចូលឆ្នាំនេះ ឲ្យទទួលបានភាពសប្បាយរីករាយតាមក្រុមគ្រួសារនីមួយៗ។ លោកអំពាវនាវដល់ប្រជាពលរដ្ឋទូទាំងប្រទេស សូមអញ្ជើញមកកម្សាន្តខេត្តព្រះសីហនុ ឲ្យបានច្រើន ព្រោះមូលដ្ឋាននេះមានឧទ្យានជាតិ ឆ្នេរសមុទ្រមានសោភ័ណភាព ទាំងឆ្នេរនៅលើដីគោក និងឆ្នេរលើដីកោះសម្រាប់ផ្ដល់ជូនប្រជាពលរដ្ឋគ្រប់ៗ រូបគំរាមកំហែង និងមានកម្លាំងការពារជំនាញរង់ចាំការពារសន្តិសុខ ទាំងលើគោក និងនៅលើផ្ទៃសមុទ្រ។
លោក អ៊ី សុខឡេង៖ «កម្លាំងជំនាញនគរបាល និងកងរាជអាវុធហត្ថជាដើម ក៏បានដាក់ពង្រាយនៅតាមគោលដៅផ្លូវធ្វើដំណើរសំខាន់ៗ សម្រាប់រង់ចាំសម្រួលការធ្វើចរាចរណ៍ និងរក្សាសណ្ដាប់ធ្នាប់តាមផ្លូវសាធារណៈ ព្រមទាំងដាក់ពង្រាយកម្លាំងនគរបាលទេសចរណ៍ នៅតាមតំបន់ឆ្នេររង់ចាំឃ្លាំមើលសកម្មភាពរបស់ភ្ញៀវទេសចរចុះងូតទឹកកម្សាន្តនៅតាមឆ្នេរសមុទ្រ ដោយយកចិត្តទុកដាក់ថែមទៀត»។
ប្រធានសភាពាណិជ្ជកម្មខេត្តព្រះសីហនុ លោក ឡាវ កាំង ឲ្យដឹងថា វិស័យឯកជនខេត្តនេះបានរៀបចំតាំងពិព័រណ៍ស្តង់លក់ទំនិញក្នុងស្រុកជិត ១០០ស្តង់ និងរៀបចំកម្មវិធីលេងល្បែងប្រជាប្រិយប្រពៃណីខ្មែរ ព្រមទាំងប្រគំតន្ត្រីសម័យផ្ដល់ជូនភ្ញៀវទេសចរចូលលេងកម្សាន្ត និងទស្សនារហូតចប់ពិធីបុណ្យចូលឆ្នាំ។ លោកអះអាងថា ភ្ញៀវទេសចរដែលចូលទៅទស្សនាខេត្តព្រះសីហនុ នៅពិធីបុណ្យចូលឆ្នាំៗនេះ នឹងទទួលបានភាពរីករាយទ្វេដង ព្រោះអាចចេញទៅកម្សាន្តនៅតាមឆ្នេរលើដីកោះ និងឆ្នេរលើដីគោកដ៏សម្បូរបែប។ ពួកគេក៏អាចចូលរួមលេងល្បែងប្រជាប្រិយ និងរាំកម្សាន្តតន្ត្រីសម័យ ដែលប្រគំបម្រើនៅតាមទីតាំងមួយចំនួនមានឆ្នេរអូរឈើទាល ជាដើម។
ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹស្នា មានប្រសាសន៍ថា នៅមុនពិធីបុណ្យចូលឆ្នាំចូលមកដល់រូបលោកបានអញ្ជើញអ្នកប្រកបរបរទទួលទានពីសេវាទេសចរណ៍ឲ្យមកប្រជុំ និងស្នើឲ្យពិចារណាទៅលើការកំណត់តម្លៃសេវាកម្ម ទាំងការស្នាក់នៅ និងសេវាចំណីអាហារឲ្យបានសមរម្យជូនភ្ញៀវទេសចរ ដោយមិនត្រូវដំឡើងតម្លៃសេវាទេសចរណ៍ឲ្យខ្ពស់ហួសហេតុ ឬបើសិនជាអាចស្នើឲ្យរក្សាតម្លៃថេរដូចថ្ងៃធម្មតា ដើម្បីឲ្យភ្ញៀវទេសចរចូលមកកម្សាន្តខេត្តព្រះសីហនុ ទទួលបានភាពសប្បាយរីករាយក្នុងឱកាសពិធីបុណ្យចូលឆ្នាំៗនេះ។
លោក សុចិត្រគ្រឹស្នា បង្ហាញជំនឿផ្ទាល់ខ្លួនថា ការកំណត់តម្លៃសេវាស្នាក់នៅ ឬចំណីអាហារហូបចុកមានតម្លៃសមរម្យ នឹងអាចទាក់ទាញកំណើនភ្ញៀវទេសចរឲ្យចូលមកកម្សាន្តខេត្តព្រះសីហនុ កើនច្រើនពីមួយឆ្នាំទៅមួយឆ្នាំ ហើយប្រាក់ចំណូលរបស់ប្រជាពលរដ្ឋ ឬប្រតិបត្តិករទេសចររស់នៅខេត្តព្រះសីហនុ ដែលទទួលបានពីសេវាបម្រើវិស័យទេសចរណ៍ ក៏មានកំណើនតាមនោះដែរ។
ទោះជាយ៉ាងនេះក្តី កន្លងទៅគេសង្កេតឃើញថា នៅពេលមានពិធីបុណ្យជាតិធំៗ ដូចជាបុណ្យចូលឆ្នាំបុណ្យភ្ជុំ ឬបុណ្យឆ្លងឆ្នាំសកលជាដើមតម្លៃសេវាកម្មទេសចរណ៍នាខេត្តព្រះសីហនុ មានដូចជាសេវាស្នាក់នៅ និងចំណីអាហារជាដើម ត្រូវម្ចាស់អាជីវកម្មភាគច្រើនដំឡើងតម្លៃខ្ពស់ជាងថ្ងៃធម្មតាមួយទ្វេជា៣ ឬច្រើនជាងនេះ។ បញ្ហានេះបាននាំឲ្យមានការរិះគន់ពីសំណាក់ភ្ញៀវទេសចរជាតិ ពិសេសប្រជាពលរដ្ឋ ឬមន្ត្រីរាជការដែលមានប្រាក់ចំណូលទាប។ ប្រការនេះធ្វើឲ្យពលរដ្ឋខ្លះរារែក ឬមិនហ៊ាននាំក្រុមគ្រួសារមកកម្សាន្តខេត្តជាប់សមុទ្រមួយនេះទេពេលមានបុណ្យទានម្ដងៗ ព្រោះបារម្ភខ្លាចខ្វះថវិកាសម្រាប់ចំណាយទៅលើអាហារ និងការស្នាក់នៅដែលប្រតិបត្តិករទេសចរដំឡើងតម្លៃខ្ពស់កប់ពពក។ ប៉ុន្តែក្រុមអាជីវករ ឬប្រតិបត្តិករទេសចរបម្រើសេវាលើវិស័យទេសចរណ៍ថ្លែងថា នៅពេលមានពិធីបុណ្យធំៗចូលមកដល់ ដែលមានភ្ញៀវទេសចរច្រើនចូលមកទស្សនាខេត្តព្រះសីហនុ គឺជាឱកាសរកប្រាក់ចំណូល ឬប្រាក់ចំណេញរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
