ភាគីពាក់ព័ន្ធឯកភាពឲ្យកម្មកររោងចក្រស៊ីរ៉ាតិចយកសម្ភារៈរោងចក្រលក់
2016.12.16
កម្មកររោងចក្រកាត់ដេរស៊ីរ៉ាតិច (Seratex) ផ្ដល់បទសម្ភាសន៍ក្នុងពេលតវ៉ានៅមុខរោងចក្រនាភូមិចម្ការឪឡឹក សង្កាត់ក្បាលដំរី ខណ្ឌពោធិ៍សែនជ័យ រាជធានីភ្នំពេញ នៅថ្ងៃទី១៥ ខែធ្នូ ឆ្នាំ២០១៦។ RFA/Sorn Chanratha
RFA/Sorn Chanratha
កិច្ចប្រជុំដើម្បីរកដំណោះស្រាយបញ្ហាឲ្យកម្មកររោងចក្រ ស៊ីរ៉ាតិច (SERATEX) រវាងក្រសួងការងារ សហជីព ភាគីរោងចក្រ និងតំណាងកម្មករប្រមាណជាង ២០នាក់ បានឯកភាពគ្នាសម្រេចឲ្យកម្មករនៅក្នុងរោងចក្រនេះ អាចយកសម្ភារៈ និងម៉ាស៊ីនដេរមួយចំនួននៅក្នុងរោងចក្រទៅលក់ដើម្បីសម្រួលជីវភាពមួយរយៈសិន។
ភាគីពាក់ព័ន្ធ និងតំណាងកម្មករអះអាងថា ការឯកភាពសម្រេចឲ្យកម្មករនៅក្នុងរោងចក្រនេះ អាចយកសម្ភារៈ និងម៉ាស៊ីនដេរមួយចំនួននៅក្នុងរោងចក្រទៅលក់ធ្វើឡើងក្រោយកម្មករបានទុកពេល ១សប្ដាហ៍ឲ្យថៅកែរោងចក្រដែលជាជនជាតិកូរ៉េ ចេញមុខមកដោះស្រាយ តែនៅមិនព្រមចេញមុខមកទទួលខុសត្រូវ។
តំណាងកម្មកររោងចក្រស៊ីរ៉ាតិច ស្ថិតក្នុងភូមិចម្ការឪឡឹក សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ លោក កន ភាស់ ដែលចូលរួមកិច្ចប្រជុំ បានប្រាប់អាស៊ីសេរីថា ក្រោយកិច្ចប្រជុំបិទទ្វារជាង ៣ម៉ោង នៅក្រសួងការងារ រកដំណោះស្រាយចុងក្រោយបានឯកភាពឲ្យកម្មករយកសម្ភារៈ ដូចជាម៉ាស៊ីនដេរទៅលក់។ លោកបន្តថា ការសម្រេចឯកភាពគ្នាចំណុចនេះ ព្រោះតែមិនមានតំណាងថៅកែរោងចក្រណាមកទទួលខុសត្រូវបើកប្រាក់ឈ្នួលឲ្យពួកគាត់សម្រាប់ខែវិច្ឆិកានោះ។
តំណាងកម្មកររូបនេះឲ្យដឹងថា កម្មករមិនពេញចិត្តចំណុចឯកភាពនេះទេ ប៉ុន្តែកម្មករព្រមយកបណ្ដោះអាសន្ន ព្រោះពួកគាត់កំពុងប្រឈមក្នុងជីវភាពខ្វះខាត ដូចជាគ្មានលុយបង់ថ្លៃផ្ទះជួល និងការទិញអាហារជាដើម៖ «ដំណោះស្រាយនេះកម្មករពិបាកទទួលយកបានណាស់ ដោយសារតែលក់តែម៉ាស៊ីនតែមួយមុខវាតិចតួចណាស់ មិនបាន ១០ ទៅ ២០% ផង»។
ទន្ទឹមគ្នានេះ ប្រធានសហជីពមូលដ្ឋានពលកម្មកម្ពុជា លោក អោក វេទគូ ដែលចូលរួមកិច្ចប្រជុំដែរនោះយល់ថា ដំណោះស្រាយនេះ គ្រាន់តែបានជួយកម្មករ កម្មការិនី បានមួយគ្រាប៉ុណ្ណោះ មិនមែនជាដំណោះស្រាយដ៏មានប្រសិទ្ធភាពជូនកម្មករនោះឡើយ។ ហេតុនេះលោកអំពាវនាវរកអន្តរាគមន៍ពីអ្នកពាក់ព័ន្ធឲ្យជួយដល់ពួកគាត់ឲ្យបានឆាប់៖ «តាមដែលខ្ញុំមើលទៅ គឺមិនសមរម្យ ព្រោះវាគ្រាន់តែជួយដោះទាល់គាត់បន្តិចបន្តួច ហើយកម្មករជាច្រើនរស់នៅក្នុងស្ថានភាពលំបាក ដោយសារគាត់ត្រូវបានម្ចាស់ផ្ទះជួលដេញចេញ ព្រោះគ្មានលុយបង់ថ្លៃបន្ទប់ ហេតុនេះសូមរដ្ឋាភិបាលជួយពួកគាត់»។
ក្រោយកិច្ចប្រជុំដើម្បីរកដំណោះស្រាយបញ្ហាឲ្យកម្មកររោងចក្រ ស៊ីរ៉ាតិច រវាងក្រសួងការងារ សហជីព ភាគីរោងចក្រ និងតំណាងកម្មករ នៅថ្ងៃទី១៦ ខែធ្នូ អាស៊ីសេរី មិនអាចសុំការឆ្លើយតបពីភាគីក្រសួងការងារ និងភាគីរោងចក្រនៅឡើយ។
ប៉ុន្តែបើតាមតំណាងសហជីព និងតំណាងកម្មករ ឲ្យដឹងថា អគ្គលេខាធិការរងនៃគណៈកម្មការដោះស្រាយកូដកម្ម បាតុកម្មរបស់ក្រសួងការងារ និងបណ្ដុះបណ្ដាលវិជ្ជាជីវៈ គឺលោក វង្ស សុវណ្ណ ដែលចូលរួមកិច្ចប្រជុំនេះបញ្ជាក់ទៅកម្មករថា ក្រសួងនឹងបន្តស្វែងរកតំណាងថៅកែឲ្យមកទទួលខុសត្រូវរឿងប្រាក់ឈ្នួលកម្មករ។
តំណាងកម្មករនៅរោងចក្រ ស៊ីរ៉ាតិច ឲ្យដឹងថា កម្មករ កម្មការិនីដែលធ្វើការនៅរោងចក្រស៊ីរ៉ាតិចនេះ មានចំនួនសរុបជាង ១ពាន់នាក់ (១.០៣១)។
ក្រុមកម្មករនៅតែអំពាវនាវឲ្យក្រសួងការងារ និងស្ថាប័នរាជរដ្ឋាភិបាលពាក់ព័ន្ធ ជួយអន្តរាគមន៍ដោះស្រាយទូទាត់ប្រាក់ឈ្នួលខែចុងក្រោយឲ្យបានឆាប់។ ជាងនេះទៀត ក្រុមកម្មករក៏ប្រកាន់ជំហរបន្តការតវ៉ានឹងដាក់ពាក្យប្ដឹងទៅស្ថាប័នតុលាការ រហូតពួកគាត់ផ្ដល់ដំណោះស្រាយដ៏មានប្រសិទ្ធភាពពីថៅកែរោងចក្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
