មន្ត្រី​ជាន់​ខ្ពស់​ថា រដ្ឋាភិបាល​នឹង​បញ្ជូន​មន្ត្រី​ជំនាញ​ចុះ​ពិនិត្យ​ទីតាំង​យោធា​ថៃ ដុត​ស្ពាន នៅ​ព្រំដែន​ខេត្ត​ប៉ៃលិន

ដោយ ម៉ៅ សុធានី
2022.01.28
Share on WhatsApp
Share on WhatsApp
មន្ត្រី​ជាន់​ខ្ពស់​ថា រដ្ឋាភិបាល​នឹង​បញ្ជូន​មន្ត្រី​ជំនាញ​ចុះ​ពិនិត្យ​ទីតាំង​យោធា​ថៃ ដុត​ស្ពាន នៅ​ព្រំដែន​ខេត្ត​ប៉ៃលិន
រូប៖ ពលរដ្ឋផ្ដល់ឱ្យ

មន្ត្រី​ជាន់​ខ្ពស់​រដ្ឋាភិបាល​អះអាង​ថា រដ្ឋាភិបាល​នឹង​បញ្ជូន​មន្ត្រី​ជំនាញ រួម​ទាំង​យោធា​ព្រំដែន ចុះ​ពិនិត្យ​នៅ​តំបន់​ព្រំដែន ដែល​ទាហាន​ថៃ​មក​ដុត​បំផ្លាញ​ស្ពាន​ឈើ​មួយ​កន្លែង ​ក្នុង​ដីខ្មែរ នា​ខេត្ត​ប៉ៃលិន ប្រសិន​បើ​ជា​រឿង​ពិត។ ការ​លើក​ឡើង​នេះ​ ក្រោយពី​ពលរដ្ឋ​រស់នៅ​តាម​បណ្ដោយ​ព្រំដែន​រាយការណ៍​ថា មាន​ទាហាន​ឈុត​ខ្មៅ ៣០នាក់ ​បាន​ឆ្លងដែន​ចូល​ដីខ្មែរ ដើម្បី​ដុត​កម្ទេច​ស្ពានឈើ​មួយ កាល​ពី​សប្ដាហ៍​មុន។

មន្ត្រី​ជាន់​ខ្ពស់​រដ្ឋាភិបាល នៅ​មិន​ទាន់​ជឿ​ថា ពិត​ជា​មាន​ទាហាន​ឈុត​ខ្មៅ​ថៃ​ជា​ច្រើន​នាក់ ឆ្លងដែន​ចូល​ដីខ្មែរ ដុត​កម្ទេច​ស្ពាន​ឈើ​មួយ​កន្លែង​នៅ​ខេត្ត​ប៉ៃលិន​នោះ​នៅ​ឡើយ​ទេ ដោយសារ​មិន​ទាន់​ឃើញ​ សេចក្ដីរាយការណ៍​ពី​មន្ត្រី​ពាក់ព័ន្ធ​ថ្នាក់​មូលដ្ឋាន។ ប៉ុន្តែ​ប្រសិន​បើ​រឿង​នេះ​ ជា​ការពិត​ រដ្ឋាភិបាល​នឹង​បញ្ជូន​ប៉ូលិស និង​យោធា ការពារ​ព្រំដែន ចុះ​ពិនិត្យ​ទីតាំង​ជាក់​ស្តែង ដើម្បី​ដោះស្រាយ​ជា​បន្ទាន់។

ប្រធាន​អង្គភាព​អ្នកនាំពាក្យ​រដ្ឋាភិបាល លោក ផៃ ស៊ីផាន ប្រាប់​វិទ្យុ​អាស៊ី​សេរី​ នៅ​ថ្ងៃ​ទី២៨ មករា​ថា លោក​ពុំ​ទាន់​ទទួល​ព័ត៌មាន ទាក់ទិន​ករណី​នេះ​នៅ​ឡើយ​ទេ។ តែ​យ៉ាង​ណា​ក្ដី លោក​ថា ប្រសិន​បើ​រឿង​នេះ​ជា​ការពិត នគរបាល​ព្រំដែន និង​យោធា​ការពារ​ព្រំដែន ​ត្រូវ​ធ្វើ​សេចក្ដី​ពន្យល់​មួយ​ឱ្យ​ច្បាស់​លាស់ តើ​ការ​ឆ្លងដែន​ចូល​បំផ្លាញ​ស្ពាន​របស់​យោធា​ថៃ ឋិត​ក្នុង​ដី​ខ្មែរ​ឬ​យ៉ាង​ណា? លោក​ថា ប្រសិន​បើ​ស្ពាន​នោះ នៅ​លើ​ទឹក​ដី​ខ្មែរ យោធា​ថៃ មិន​ត្រូវ​ដុត​បំផ្លាញ​នោះ​ទេ គឺ​ត្រូវ​ធ្វើ​កិច្ច​ចរចា​ និង​ដោះស្រាយ​ដោយ​សន្តិវិធី​ច្បាប់។

លោក​សង្កត់​ធ្ងន់​ថា សមត្ថកិច្ច​ពាក់ព័ន្ធ​តាម​ព្រំដែន មិន​ត្រូវ​អនុញ្ញាត​ឱ្យ​យោធា​បរទេស​ណា​មួយ ឆ្លង​ដែន​ចូល​ដីខ្មែរ ដើម្បី​ធ្វើ​ផ្ដេសផ្ដាស​ជា​ដាច់ខាត៖ «យើង​រក​ហេតុផល ​ហើយ​ហេតុផល​របស់​យើង​គឺ​ អ្នក​ដែល​នៅ​មើល​តាម​ព្រំដែន​ ត្រូវ​ធ្វើការ​ពន្យល់​ឱ្យ​បាន​ច្បាស់​លាស់ ពី​ទាហាន​ឈុត​ខ្មៅ​ហ្នឹង​ ដែល​ប្រព្រឹត្ត​អំពើ​ផ្ដេសផ្ដាស​លើ​ទឹកដី​ខ្មែរ។ តើ​ស្ពាន​លើ​ទឹក​ដី​នរណា? ហើយ​ត្រូវ​មាន​ការ​សម្រប​សម្រួល​ដោះស្រាយ​ តើ​ហេតុអ្វី​បាន​ជា​គេ​ដុត។

កាល​ពី​ថ្ងៃ​ទី២៣ និង ២៤ ខែមករា ទាហាន​ឈុត​ខ្មៅ​ថៃ​មួយ​ក្រុម​មាន​គ្នា​ជាង ៣០នាក់ បាន​ឆ្លង​ដែន​ចូល​មក​ដុត​ស្ពាន​ឈើ​ឆ្លង​អូរ​មួយ​កន្លែង នៅ​ចំណុច​វាលស្បូវ ក្នុង​ភូមិ​ប​ហ៊ុយ​ត្បូង សង្កាត់​បយ៉ាខា ក្រុង​ប៉ៃលិន គឺ​នៅ​ឆ្ងាយ​ពី​ព្រំដែន​ប្រហែល ១០០ម៉ែត្រ។

ពលរដ្ឋ​​រស់​នៅ​ក្បែរ​ព្រំដែន​កម្ពុជា-ថៃ អះអាង​ថា ក្រុម​យោធា​ថៃ​ប្រដាប់​ដោយ​កាំភ្លើង​បាន​នាំ​គ្នា មក​ដុត​ស្ពាន​ចំនួន ២ដង បណ្ដាល​ឲ្យ​ឆេះ​ក្ដារ​ក្រាល​ស្ពាន​ទាំង​ស្រុង បន្សល់​ទុក​សសរ​បង្គោល​ផ្ដេក​អម​សង​ខាង​ស្ពាន ២ដើម។

ឆ្លើយ​តប​រឿង​នេះ​អ្នក​នាំ​ពាក្យ​កងទ័ព​ជើងគោក លោក ម៉ៅ ផល្លា បកស្រាយ​ថា លោក​មិន​ទាន់​ទទួល​ព័ត៌មាន​នេះ ពី​មេ​បញ្ជា​ការ​ភូមិ​ភាគ៣ ប្រចាំ​ទិស​ជួរ​មុខ​ប៉ៃលិន-សំឡូត នៅ​ឡើយ​ទេ មក​ទល់​ពេល​នេះ។ តែ​យ៉ាង​ណា​លោក​ថា ប្រសិនបើ​ពលរដ្ឋ បាន​រាយការណ៍​ផ្ទាល់​ប្រាប់​ទាហាន នៅ​តំបន់​នោះ ​មន្ត្រី​យោធា​នឹង​ចុះ​ពិនិត្យ​ភ្លាម ស្រប​តាម​គោលការណ៍​រួម​របស់​រដ្ឋាភិបាល និង​អគ្គ​បញ្ជាការ​យោធា៖ «អនុវត្ត​ត្រួត​ពិនិត្យ ទី២ យើង​ចរចា សម្រប​សម្រួល​គ្នា​ជាមួយ ក្រុម​ការងារ​ព្រំដែន​របស់​ថៃ ​និង​កម្ពុជា បើ​សិន​ជា​មាន​រឿង។ យើង​មិន​អាច​ធ្វើ​អី​ផ្សេង​បាន​ ក្រៅ​ពី​ជួប​ពិភាក្សា​គ្នា ជាមួយ​គណៈកម្មការ​សម្រប​សម្រួល​ព្រំដែន»

វិទ្យុ​អាស៊ី​សេរី​មិន​ទាន់​អាច​ទាក់ទង​សុំ​ការ​បំភ្លឺ​រឿង​នេះ​បន្ថែម​ពី​អ្នក​នាំ​ពាក្យ​ក្រសួង​ការ​បរទេស​កម្ពុជា​ លោក​ ជុំ សុន្ទរី និង​មន្ត្រី​ស្ថាន​ទូត​ថៃ ប្រចាំ​កម្ពុជា ​បាន​នៅ​ឡើយ​ទេ នៅ​ថ្ងៃ​ទី២៨ មករា។

ទោះ​យ៉ាង​ណា ក្ដី គណបក្សប្រឆាំង ​មើល​ឃើញ​ថា ​អាជ្ញាធរ​កម្ពុជា ​និង​យោធា​ព្រំដែន​ខ្មែរ គួរតែ​ចេញ​មុខ​បកស្រាយ​រឿង​នេះ​ឱ្យ​បាន​ច្បាស់ ​ព្រោះ​ជា​រឿង​ពាក់ព័ន្ធ​នឹង​អធិបតេយ្យ​កម្ពុជា។

អតីត​តំណាង​រាស្ត្រ​គណបក្ស​ប្រឆាំង ​ដែល​កំពុង​រស់​នៅ​សហរដ្ឋ​អាមេរិក លោក អ៊ុំ សំអាន ផ្តល់​ទស្សនៈ​ថា រដ្ឋាភិបាល​ខ្មែរ​គួរតែ​កោះហៅ​ ឯក​អគ្គរាជ​ទូត​ថៃ ប្រចាំ​កម្ពុជា ដើម្បី​ស្រាយ​បំភ្លឺ​ជុំវិញ​រឿង​នេះ។ លោក​ថា ប្រសិនបើ​មាន​ការ​រំកិល​បង្គោល ​អាជ្ញាធរ​ខ្មែរ​ និង​ថៃ គួរតែ​សហការ​គ្នា រក​បង្គោល​ចាស់ មក​ដាំ​ជា​ថ្មី​ឡើង​វិញ ​ដើម្បី​កំណត់​ខណ្ឌសីមា​ឱ្យ​ច្បាស់លាស់ ​អនុលោម​តាម​អនុសញ្ញា​បារាំង-សៀម ឆ្នាំ១៩០៤ និង​ឆ្នាំ១៩០៧៖ «គ្រាន់​យក​ទីតាំង​បង្គោល​ចាស់ ដែល​បារាំង​បោះ​ជាមួយ​ថៃ ហើយ​បោះ​បង្គោល​ហ្នឹង​ឡើង​វិញ បើ​សិន​មាន​ការ​រំកិល វា​ចប់​សព្វ​គ្រប់​ហើយ។ យើង​មិន​ដឹង​ថា រដ្ឋាភិបាល​លោក ហ៊ុន សែន មិន​ព្រម​បោះ​បង្គោល​ព្រំដែន​ជាមួយ​ថៃ ដើម្បី​កុំ​ឱ្យ​ថៃ រំលោភបំពាន​ទឹក​ដី​កម្ពុជា​បន្ត​ទៀត»

កម្ពុជា​មាន​ព្រំដែន​ជាមួយ​ប្រទេស​ថៃ ប្រវែង ៨០៤គីឡូម៉ែត្រ ដែល​មាន​បង្គោល​ចំនួន ៧៣បង្គោល​ ដែល​កំណត់​ក្នុង​អនុសញ្ញា​បារាំង-សៀម នៅ​ឆ្នាំ១៩០៤ និង​ឆ្នាំ១៩០៧ ដែល​ទទួលស្គាល់​ជា​អន្តរជាតិ។ ខេត្ត​ដែល​ជាប់​ព្រំដែន​ជាមួយ​ថៃ រួម​មាន ខេត្តប៉ៃលិន កោះកុង បាត់ដំបង បន្ទាយ​មានជ័យ ​ឧត្តរ​មានជ័យ និង​ខេត្តព្រះវិហារ៕

រឿង​ដែល​គេ​អាន​​ច្រើន​បំផុត
RFA
លោក​ស្រី សំ សុខា ​អតីត​​អ្នក​ជាប់​ឃុំ​ករណី​​គប់​ស្បែក​​ជើង​លើ​រូប​លោក ហ៊ុន សែន ស្នើ​លោកឱ្យ​ពិចារណា​កំហុស​របស់ខ្លួន​ឡើងវិញ​ថា ហេតុអ្វី​បាន​ជា​ពលរដ្ឋ​គប់​ស្បែក​ជើង​ដាក់​លោក​​
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល