ពលរដ្ឋស្វាយរៀងចោទអាជ្ញាធរថាខ្វះសមត្ថភាពគ្រប់គ្រងច្រកព្រំដែនជាមួយវៀតណាម
2018.12.16
ស្ត្រីជនជាតិវៀតណាម ដើរកាន់សន្លឹកឆ្នោតលក់អោយពលរដ្ឋខ្មែរនៅក្នុងហាងកាហ្វេមួយកន្លែង ស្ថិតក្នុងទីរួមខេត្តស្វាយរៀង កាលពីថ្ងៃទី២១ ខែសីហា ឆ្នាំ២០១៥។
Photo: RFA
ប្រជាពលរដ្ឋខ្មែររស់តាមតំបន់ព្រំដែនស្ថិតក្នុងខេត្តស្វាយរៀងអះអាងថា អាជ្ញាធរខ្មែរខ្វះសមត្ថភាពគ្រប់គ្រងច្រកព្រំដែនជាមួយប្រទេសវៀតណាម ដូចជាបណ្ដោយឲ្យជនជាតិវៀតណាម ដឹកទំនិញចេញចូលទឹកដីខ្មែរដោយសេរី មិនថាយប់ឬថ្ងៃនោះទេ។ ការលើកឡើងដូច្នោះ ដោយសារតែអាជ្ញាធរកម្ពុជា-វៀតណាម បានបើកិច្ចប្រជុំប្ដេជ្ញាមួយ ដែលមន្ត្រីចូលរួមអះអាងថា មានមូលបំណងបន្តលើកកម្ពស់ប្រសិទ្ធភាពការងារគ្រប់គ្រងច្រកទ្វារព្រំដែន និងការត្រួតពិនិត្យសកម្មភាពចេញ-ចូលឆ្លងដែនរវាងប្រទេសទាំងពីរ។
ប្រជាពលរដ្ឋខ្មែររស់នៅខេត្តស្វាយរៀង អះអាងថា អាជ្ញាធរនៃរបបលោក ហ៊ុន សែន ហាក់ដូចជា គ្មានឆន្ទៈអនុវត្តច្បាប់គ្រប់គ្រងច្រកទ្វារព្រំដែន និងត្រួតពិនិត្យសកម្មភាពចេញ-ចូលឆ្លងដែនរវាង ប្រទេសកម្ពុជា-វៀតណាមនោះទេ ដោយសារតែពួកគេ ភាគច្រើនពាក់ព័ន្ធជាមួយអំពើពុករលួយ។
ប្រជាពលរដ្ឋម្នាក់ដែលសុំមិនបញ្ចេញឈ្មោះ ព្រោះបារម្ភពីសុវត្ថិភាព លើកឡើងថា សព្វថ្ងៃនេះ អាជ្ញាធរកម្ពុជា បានបណ្ដោយឲ្យជនជាតិវៀតណាមចេញចូលទឹកដីខ្មែរដោយសេរី ហើយជនជាតិ វៀតណាមខ្លះ បាននាំទំនិញសព្វសារពើមកលក់ក្នុងប្រទេសកម្ពុជា បណ្ដាលឲ្យពលរដ្ឋខ្មែរបាត់បង់ មុខរបរទៀតផង។ លើសពីនេះ ជនជាតិវៀតណាមខ្លះ ក៏ចូលមកប្រព្រឹត្តបទល្មើសផ្សេងៗ ដែរដូចជា ពាក់ព័ន្ធគ្រឿងញៀនជាដើម៖ «វាអាចច្រើនណាស់រឿងខុសច្បាប់ខុសអីនេះ ជូនកាលវាមកទៅ វាឲ្យលុយតាមប៉ុស្តិ៍តាមអីតិចតូចអ៊ីចឹងទៅ វាចូលមកស្រុកខ្មែរទាំងយប់ ហើយភ្លឺនៅស្រុក ខ្មែរអ៊ីចឹងទៅ។ គេមិនសូវរង់ចាំពេលបើកច្រកព្រំដែនត្រឹមត្រូវនោះទេ។ ទំនិញនាំចូលភាគច្រើន មានជ្រូករស់ សាច់ជ្រូក ពងទា និងត្រីចិញ្ចឹមជាដើម។ ពួកគេដឹងតាមម៉ូតូ តាមឡានអ៊ីចឹងទៅ»។
ពលរដ្ឋរូបនេះ បន្តថា ដោយឡែកសម្រាប់ភាគីវៀតណាមវិញ គឺបានអនុវត្តច្បាប់នៅតាមតំបន់ ព្រំដែនរឹងមាំ និងមានប្រសិទ្ធភាពជាងកម្ពុជា ដោយពួកគេ តែងតែចាប់បញ្ជូនពលរដ្ឋខ្មែរមកវិញជាបន្តបន្ទាប់ ប្រសិនបើពលរដ្ឋខ្មែរចូលទៅប្រទេសវៀតណាម ដើម្បីលក់ស្ករត្នោត និងទៅសុំទានជា ដើម។
ពលរដ្ឋមួយរូបទៀត រស់នៅក្រុងបាវិត លើកឡើងស្រដៀងគ្នាថា អាជ្ញាធរខ្មែរពិតជាកង្វះសមត្ថភាព គ្រប់គ្រងច្រកព្រំដែនមែន ដោយពួកគេភាគច្រើន តែងតែទទួលសំណូកពីជនបរទេស ជាថ្នូរឲ្យនាំទំនិញចូលតាមច្រករបៀង និងច្រកអន្តរជាតិដោយសេរី ពុំមានការត្រួតពិនិត្យត្រឹមត្រូវនោះទេ។
លោកថា ពលរដ្ឋខ្មែរភាគច្រើនសុទ្ធតែមើលឃើញបញ្ហាទាំងនេះ ប៉ុន្តែពួកគេខ្លាចរអាក្នុងការនិយាយ ដោយសារតែកន្លងមក មានការព្រមានធ្ងន់ៗពីរបបលោក ហ៊ុន សែន ថាមិនឲ្យប្រជាពលរដ្ឋ ចេះ ដឹងរឿងរ៉ាវនៅតាមព្រំដែន៖ «មានការចាប់អារម្មណ៍យ៉ាងខ្លាំងដូចជាការនាំចូលបន្លែត្រីសាច់មកលក់តាមផ្សាររបស់ខ្មែរយើងនៅតាមព្រំដែន គឺមានច្រើន។ ទំនិញទាំងអស់ នេះភាគច្រើន មកតាមច្រករបៀង ដូច្នេះមិនដឹងថា ត្រឹមត្រូវឬអត់នោះទេ។ ប្រជាពលរដ្ឋខ្មែរនៅតាមព្រំដែនមានការព្រួយបារម្ភយ៉ាងខ្លាំងអំពីចំណីអាហារទាំងអស់នេះ»។
អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ លោក គៀត ច័ន្ទថារិទ្ធ និងមេបញ្ជាការបញ្ជាការដ្ឋានកងទ័ពការពារព្រំដែនវៀតណាម លោក ហ្វាង ស៊ុនជៀន បានបើកកិច្ចប្រជុំមួយ ពិភាក្សាគ្នាកាលពីថ្ងៃ១៤ ខែធ្នូ ដើម្បី បន្តសហការដឹកនាំលើកកម្ពស់ប្រសិទ្ធភាពការងារគ្រប់គ្រងច្រកទ្វារព្រំដែន និងការត្រួតពិនិត្យសកម្មភាពចេញ-ចូលឆ្លងដែន ការនាំចេញ-នាំចូលជាដើម។ លើសពីនេះ ភាគីទាំងពីរ ក៏ប្ដេជ្ញាបន្តបង្កើតកិច្ចសហការលើកកម្ពស់ប្រសិទ្ធភាពប្រយុទ្ធប្រឆាំងបទល្មើស ពិសេសបទល្មើសគ្រឿងញៀន រត់ពន្ធមនុស្ស និងជួញដូរមនុស្ស នៅតំបន់ច្រកទ្វារព្រំដែនអន្តរជាតិនៃប្រទេសទាំងពីរផងដែរ។
អាស៊ីសេរីនៅមិនទាន់អាចទាក់ទងមន្ត្រីមូលដ្ឋានខេត្តស្វាយរៀង ដើម្បីឆ្លើយតបនឹងកង្វល់របស់ ពលរដ្ឋបាននៅឡើយទេ កាលពីថ្ងៃទី១៥ ធ្នូ។
មន្ត្រីសម្របសម្រួលនៃអង្គការលីកាដូ (Licadho) ប្រចាំខេត្តស្វាយរៀង លោក នុត ប៉ូពិណ្ណារ័ត្ន មានប្រសាសន៍ ថា ការនាំទំនិញចូលកម្ពុជាដោយជនជាតិវៀតណាមតាមច្រករបៀង និងច្រកព្រំដែនអន្តរជាតិខេត្ត ស្វាយរៀងនេះ គឺកើតឡើងយូរណាស់ហើយ តែមិនអាចទប់ស្កាត់បានឡើយ។ លើសពីនេះ ជនជាតិវៀតណាម បានចូលមកលក់ឆ្នោត និងបន្លែ ផ្លែឈើ ត្រី សាច់ ដោយខ្លួនឯងតែម្ដង។ លោកសង្កេតឃើញថា បទល្មើសគ្រឿងញៀន ក៏កើតឡើងច្រើនណាស់ដែរ នៅតាមតំបន់ព្រំដែនកម្ពុជា-វៀតណាម ចំណែកការជួញដូរមនុស្សវិញ មិនសូវកើតមានទេ។
ក្រសួងការពារជាតិបង្ហាញរបាយការណ៍ថា ចាប់ពីខែមករា ដល់ដើមខែតុលា ឆ្នាំ២០១៨នេះ កងយោធពលខេមរភូមិន្ទ បានទប់ស្កាត់ និងបង្ក្រាបបទល្មើសផ្សេងៗ នៅតាមព្រំដែន សរុបជាង ៤ពាន់(៤ .២៣៣) លើក ដែលក្នុងនោះមាននៅព្រំដែនកម្ពុជា-ថៃជាង២ពាន់( ២.០៥៤) លើក ព្រំដែនកម្ពុជា-វៀតណាមជាង១ពាន់(១.០០៨)លើក និងព្រំដែនកម្ពុជា-ឡាវជាង១ពាន់ (១.១៧១) លើក៖ «បើយើងពិនិត្យមើលជាក់ស្ដែង គឺថាព្រលឹមឡើងវៀតណាមព្រាតដើរលក់ឆ្នោតក្នុងខេត្តស្វាយរៀង ហើយមានទំនិញ ត្រីសាច់អីផងដែរ។ អ្នកខ្លះជិះម៉ូតូមកស្លាកលេខវៀតណាមតែម្ដង»។
លោក នុត ប៉ូពិណ្ណារ័ត្ន មានប្រសាសន៍ថា ដើម្បីបញ្ចៀសការរិះគន់របស់ប្រជាពលរដ្ឋ និងទប់ស្កាត់ការឆ្លងដែនខុសច្បាប់ សកម្មភាពល្មើសច្បាប់តាមព្រំដែន និងទប់ស្កាត់ការនាំទំនិញចូលកម្ពុជា ដោយសេរីនោះទេ គឺអាជ្ញាធរកម្ពុជា គួរតែពង្រឹងការអនុវត្តច្បាប់អន្តោប្រវេសន៍ និងច្បាប់ព្រំដែនឲ្យ បានតឹងរ៉ឹង យ៉ាងហោចណាស់ឲ្យបានដូចវៀតណាមជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
