សមាគម​គ្រូ​នឹង​ប្រារព្ធ​ទិវា​គ្រូបង្រៀន​ពិភពលោក​នៅ​ថ្ងៃ​៥​តុលា​នា​ទីលាន​ប្រជាធិបតេយ្យ

ដោយ ដែន អយុធ្យា
2014.09.30
Share on WhatsApp
Share on WhatsApp
រ៉ុង ឈុន ៦១០ ប្រធាន​សមាគម​គ្រូបង្រៀន​កម្ពុជា​ឯករាជ្យ លោក រ៉ុង ឈុន ថ្លែង​ក្នុង​ទិវា​គ្រូបង្រៀន​ពិភពលោក ប្រារព្ធ​នៅ​ទីលាន​ប្រជាធិបតេយ្យ កាល​ពី​ថ្ងៃ​ទី​១៣ ខែ​តុលា ឆ្នាំ​២០១៣។
RFA/Tep Soravy

មន្ត្រី​សាលា​រាជធានី​ភ្នំពេញ បាន​អនុញ្ញាត​ឲ្យ​សមាគម​គ្រូបង្រៀន​កម្ពុជា​ឯករាជ្យ យក​ទីលាន​ប្រជាធិបតេយ្យ ដើម្បី​រៀបចំ​ទិវា​គ្រូបង្រៀន​ពិភពលោក នៅ​ព្រឹក​ថ្ងៃ​ទី​៥ ខែ​តុលា ប៉ុន្តែ​មិន​អនុញ្ញាត​ឲ្យ​ដើរ​ហែ​ក្បួន​តាម​ផ្លូវ​សាធារណៈ​នោះ​ទេ។

មន្ត្រី​សមាគម​គ្រូបង្រៀន ឲ្យ​ដឹង​ថា អាជ្ញាធរ​បាន​កំណត់​សមាជិក​សមាគម​ប្រមាណ ៣០​នាក់ ដើម្បី​យក​ញត្តិ​ដាក់​ជូន​ក្រសួង ឬ​ស្ថាប័ន​ពាក់ព័ន្ធ ជំនួស​ការ​ដើរ​ហែ​ក្បួន​ទ្រង់ទ្រាយ​ធំ ព្រោះ​បារម្ភ​ខ្លាច​ប៉ះពាល់​សណ្ដាប់ធ្នាប់​សង្គម ជាដើម។

បន្ទាប់​ពី​បើក​កិច្ច​ប្រជុំ​ពេញ​មួយ​ព្រឹក​រវាង​មន្ត្រី​ជំនាញ​ពាក់ព័ន្ធ និង​តំណាង​ឲ្យ​សមាគម​គ្រូបង្រៀន​កម្ពុជា​ឯករាជ្យ នា​សាល​ប្រជុំ​សាលា​រាជធានី​ព្រឹក​ថ្ងៃ​ទី​៣០ ខែ​កញ្ញា រួច​មក លោក ឃួង ស្រេង អភិបាល​រង​សាលា​ក្រុង​ភ្នំពេញ បាន​អនុញ្ញាត​ឲ្យ​សមាគម​គ្រូ​ជួប​ជុំ​គ្រូបង្រៀន​មក​ពី ២៥​រាជធានី​ខេត្ត ដើម្បី​ប្រារព្ធ​ទិវា​ពិភពលោក និង​សម្ដែង​មតិ​ផ្សេងៗ។

លោក ឃួង ស្រេង បាន​បញ្ជាក់​ក្នុង​កំណត់​ហេតុ​ប្រជុំ​រួម​ថា អាជ្ញាធរ​មិន​ជំទាស់​ការ​រៀបចំ​ទិវា​គ្រូបង្រៀន​ពិភពលោក​ទេ ប៉ុន្តែ​មិន​អនុញ្ញាត​ឲ្យ​សមាគម​គ្រូបង្រៀន ដើរ​ហែ​ក្បួន​តាម​ផ្លូវ​សាធារណៈ​នោះ​ទេ ប៉ុន្តែ​អាច​ចាត់​តំណាង​គ្រូបង្រៀន​មក​ពី​តាម​រាជធានី​ខេត្ត​នីមួយៗ នាំ​យក​ញត្តិ​ដាក់​ជូន​ស្ថាប័ន​ពាក់ព័ន្ធ​ជំនួស​វិញ។

អ្នកស្រី អ៊ុក ឆាយ៉ាវី អនុប្រធាន​សមាគម​គ្រូបង្រៀន​កម្ពុជា​ឯករាជ្យ និង​ជា​គ្រូបង្រៀន​ម្នាក់ បាន​ឲ្យ​ដឹង​ថា ទិវា​គ្រូបង្រៀន​ពិភពលោក​ឆ្នាំ​នេះ ក្រោម​ប្រធានបទ ការ​លើក​កម្ពស់​គុណភាព​អប់រំ។ អ្នកគ្រូ​បន្ត​ថា ក្រុម​គ្រូបង្រៀន​ក៏​នឹង​យក​ពិធី​ជួប​ជុំ​នេះ សម្ដែង​ពី​កង្វល់ និង​ទាមទារ​ឲ្យ​រដ្ឋាភិបាល​ដំឡើង​ប្រាក់​ខែ​គោល​ជូន​គ្រូបង្រៀន​ម្នាក់ៗ ឲ្យ​បាន ១​លាន​រៀល​ក្នុង​១​ខែ៖ «លោកគ្រូ​អ្នកគ្រូ​ចង់​សម្ដែង​ដែល​គ្រូបង្រៀន​ប្រឈម​មុខ​សព្វថ្ងៃ ដូចជា​ទាមទារ​ប្រាក់​ខែ និង​សិទ្ធិ​សម្ដែង​មតិ ឬ​សិទ្ធិ​សេរីភាព​ក្នុង​ការ​ប្រមូល​ផ្តុំ ក៏ដូចជា​មាន​ការ​រើសអើង​ពី​អាជ្ញាធរ និង​មាន​ការ​រើសអើង​ពី​ក្រសួង​អប់រំ កន្លង​មក»

តាម​គម្រោង ការ​ប្រារព្ធ​ទិវា​គ្រូបង្រៀន​ពិភពលោក​ឆ្នាំ​នេះ សមាជិក​គ្រូបង្រៀន​មក​ពី ២៥​រាជធានី​ខេត្ត ដឹក​នាំ​ដោយ លោក រ៉ុង ឈុន មាន​គម្រោង​ដើរ​ហែ​ញត្តិ​ចេញ​ពី​ទីលាន​ប្រជាធិបតេយ្យ ដើម្បី​យក​ញត្តិ​ដាក់​ជូន​ក្រសួង​អប់រំ យុវជន និង​កីឡា និង​ខុទ្ទកាល័យ​លោក​នាយក​រដ្ឋមន្ត្រី។ លោក រ៉ុង ឈុន បញ្ជាក់​ថា ខ្លឹមសារ​ញត្តិ​មាន​ដូចជា ស្នើ​ឲ្យ​រដ្ឋាភិបាល​ដំឡើង​ប្រាក់​ខែ​គោល​គ្រូបង្រៀន ឬ​មន្ត្រី​រាជការ​ឲ្យ​បាន ១​លាន​រៀល ស្នើ​បញ្ឈប់​ការ​រើសអើង​សមាគម ឬ​បំបិទ​សិទ្ធិ​សម្ដែង​មតិ​របស់​ក្រុម​គ្រូបង្រៀន ជាដើម៖ «ហើយ​យើង​ទាមទារ​ធ្វើ​ម៉េច​ឲ្យ​មាន​សាលា​រៀន គ្រូបង្រៀន​នៅ​តាម​តំបន់​ដាច់​ស្រយាល​ឲ្យ​បាន​គ្រប់គ្រាន់។ ហើយ​ក៏​ដូចជា​សម្ភារៈ​សិក្សា​ផង​ដែរ ធ្វើ​ម៉េច​ត្រូវ​ផ្តល់​ឲ្យ​សិស្ស ឲ្យ​គ្រូ​ហ្នឹង ឲ្យ​បាន​គ្រប់គ្រាន់ ក្នុង​ឆ្នាំ​សិក្សា​នីមួយៗ»

ទាក់ទិន​បញ្ហា​នេះ លោក ឡុង ឌីម៉ង់ មន្ត្រី​នាំ​ពាក្យ​សាលា​រាជធានី​ភ្នំពេញ បាន​ស្នើ​ដល់​សមាគម​គ្រូបង្រៀន ត្រូវ​រៀបចំ​ទិវា​នេះ​ឲ្យ​ស្រប​តាម​ប្រធានបទ​ដែល​បាន​ដាក់​ចេញ និង​បាន​ព្រមព្រៀង​គ្នា។ ជាង​នេះ រាល់​ការ​សម្ដែង​មតិ ធ្វើ​យ៉ាង​ណា​កុំ​ឲ្យ​ប៉ះពាល់​ដល់​ព្រះមហាក្សត្រ ថ្នាក់​ដឹក​នាំ​រដ្ឋាភិបាល និង​ស្ថាប័ន​ពាក់ព័ន្ធ​ផ្សេងៗ។

មន្ត្រី​សាលា​រាជធានី ស្នើ​ដល់​សមាគម​គ្រូបង្រៀន ដឹក​នាំ​ដោយ លោក រ៉ុង ឈុន ត្រូវ​គោរព​តាម​ស្មារតី ឬ​ខ្លឹមសារ​ដែល​បាន​ព្រមព្រៀង និង​ចុះ​ហត្ថលេខា​រួម​គ្នា។

ចំណែក លោក ស៊ឹម វុទ្ធី ស្នងការ​រង​នគរបាល​រាជធានី​ភ្នំពេញ ដែល​បាន​ចូលរួម​ក្នុង​កិច្ច​ប្រជុំ​នោះ​ដែរ បាន​ទទូច​ដល់​ការ​រៀបចំ​ទិវា​គ្រូបង្រៀន​ពិភពលោក​ឆ្នាំ​នេះ ស្នើ​កុំ​ឲ្យ​សមាគម​គ្រូ​ដើរ​ហែ​ក្បួន ប៉ុន្តែ​អាច​ចាត់​តំណាង​នាំ​យក​ញត្តិ​ដាក់​ជូន​ស្ថាប័ន​នីមួយៗ​ជំនួស​វិញ។

សមាគម​គ្រូបង្រៀន​ប្រកាស​ថា គម្រោង​រៀបចំ​ប្រារព្ធ​ទិវា​គ្រូបង្រៀន​ពិភពលោក នៅ​ព្រឹក​ថ្ងៃ​ទី​៥ ខែ​តុលា នា​ទីលាន​ប្រជាធិបតេយ្យ អាច​មាន​គ្រូបង្រៀន សិស្ស និស្សិត កម្មករ ប្រជាពលរដ្ឋ និង​មន្ត្រី​អង្គការ​សង្គម​ស៊ីវិល​មិន​មែន​រដ្ឋាភិបាល​យ៉ាង​តិច ៦០០​នាក់​ចូលរួម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។