ករណីដុតផ្ទះស្នាក់នៅធ្វើចម្ការនៅភូមិពាណិជ្ជ ឃុំយាអង្គ ស្រុកថ្ពង ខេត្តកំពង់ស្ពឺ នោះ ក្រុមអ្នកភូមិបានដាក់ការសង្ស័យទៅក្រុមមនុស្សមានទាំងស៊ីវិល និងទាហាន ដែលនៅការពារសកម្មភាពឈូសឆាយដីរបស់ក្រុមហ៊ុន ស៊ីធីម៉ាត នៅតំបន់ពួកគាត់រស់នៅនោះ។
តំណាងប្រជាពលរដ្ឋ លោក លីវ សារ៉ុម មានប្រសាសន៍ថា សកម្មភាពលួចដុតនោះនៅម៉ោងប្រមាណ ៩យប់ ថ្ងៃសុក្រ ទី១ ខែវិច្ឆិកា នៅពេលម្ចាស់ផ្ទះមិននៅ។ លោកបន្តថា ផ្ទះនោះធ្វើពីឈើប្រក់ស្លឹក ដែលពួកគាត់សង់ស្នាក់នៅប្រកបរបរកសិកម្ម មានទំហំប្រមាណពី ៤ ទៅ ៧ម៉ែត្រ។
លោកថា ករណីនេះជាសកម្មភាពគំរាមកំហែងបណ្ដេញប្រជាពលរដ្ឋចេញពីតំបន់នោះ និងបញ្ឈប់ការតវ៉ាជាមួយក្រុមហ៊ុនក្នុងរឿងជម្លោះដីធ្លី៖ «នេះតាមខ្ញុំសន្និដ្ឋាន ព្រឹកមិញខ្ញុំឃើញប៉ូលិសប៉ុស្តិ៍ចុះធ្វើកំណត់ហេតុអន្តរាគមន៍ដែរ មានការខូចខាតអីខ្លះដែរ អើ…! ឆេះតែឆ្នាំងចាន អង្ករគាត់បន្តិចបន្តួច អត់មានខូចខាតអីទេ ឆេះគ្រែ...ខ្លះឃើញក្តារងឿគាត់អីនៅ តែគ្រែធម្មតាវាឆេះទៅ...»។
វិទ្យុអាស៊ីសេរី ពុំទាន់អាចទាក់ទងតំណាងក្រុមហ៊ុន ស៊ីធីម៉ាត ដើម្បីសុំការបំភ្លឺចំពោះការសង្ស័យរបស់ប្រជាពលរដ្ឋនោះទេ នៅថ្ងៃទី២ ខែវិច្ឆិកា។
អាជ្ញាធរឃុំថា ករណីដុតផ្ទះពលរដ្ឋនេះកើតឡើងបន្ទាប់ពីប្រជាពលរដ្ឋនាំគ្នាទៅរារាំងសកម្មភាពឈូសឆាយដីប៉ះពាល់លើដីកម្មសិទ្ធិរបស់ពួកគាត់ កាលពីថ្ងៃព្រហស្បតិ៍ ទី៣១ តុលា និងថ្ងៃសុក្រ ទី១ វិច្ឆិកា គឺមុនថ្ងៃកើតហេតុ ១ ទៅ ២ថ្ងៃប៉ុណ្ណោះ។
ទាក់ទងករណីនេះដែរ ប្រធានប៉ុស្តិ៍នគរបាលរដ្ឋបាលឃុំយាអង្គ លោក ជីម ជឿន មានប្រសាសន៍ថា នៅព្រឹកថ្ងៃសៅរ៍ ទី២ ខែវិច្ឆិកា លោកបានដឹកនាំកម្លាំងចុះពិនិត្យមើលករណីនេះនៅទីកើតហេតុផ្ទាល់ ប៉ុន្តែពុំមានតម្រុយណាមួយអាចសន្និដ្ឋានបានថាខាងណាជាជនបង្កនោះនៅឡើយទេ ហើយលោកក៏បានទៅសាកសួរទៅបុគ្គលិកស៊ីវិល និងទាហានការពារឲ្យក្រុមហ៊ុននៅតំបន់នោះដែរ តែពួកគេបានបដិសេធចំពោះពាក្យចោទប្រកាន់របស់អ្នកភូមិ៖ «ខ្ញុំសួរទាហានមេវានៅនេះឈ្មោះ សៀនៗ ថាមានប៉ះពាល់រោងរបស់ប្រជាពលរដ្ឋនៅនេះទេ បន្ទាប់ពីជជែកគ្នារឿងដី យប់ឡើងមានបញ្ជាកូនទាហានណា ឬពលទាហានណាទៅដុតទៅអីទេ គាត់ថាអត់ទេ ទាហានអត់បានទៅប៉ះពាល់រឿងហ្នឹងទេ ហ្នឹងខ្ញុំបានសួរទៅឈ្មោះ សៀន ជាមេទាហានប្រចាំនៅទិសហ្នឹង...»។
ទោះយ៉ាងនេះក្តី លោកបានបញ្ជូនរបាយការណ៍ចុះអង្កេតស្ដីពីការដុតផ្ទះពលរដ្ឋនេះទៅអាជ្ញាធរឃុំ និងស្រុកបន្តទៀត ដើម្បីរកដំណោះស្រាយ។ មុននឹងមានដំណោះស្រាយនោះ ប្រជាពលរដ្ឋព្យាយាមសង់ជម្រកស្នាក់នៅបណ្ដោះអាសន្នឡើងវិញ និងបង្កើនការប្រុងប្រយ័ត្នបន្ថែមទៀត ក្នុងការឃ្លាំមើលបញ្ហានេះ។
កាលពីឆ្នាំ២០០៨ ក៏មានករណីដុតខ្ទមស្នាក់នៅធ្វើចម្ការរបស់អ្នកភូមិជិតនោះម្តងរួចហើយដែរ គឺភូមិក្រវៀក អស់ចំនួនប្រមាណ ៣០ខ្ទម ដោយពាក់ព័ន្ធនឹងជម្លោះដីធ្លីជាមួយក្រុមហ៊ុនដដែលនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។