ប្រជាពលរដ្ឋនៅក្នុងទីក្រុងភ្នំពេញផ្ទុះការតវ៉ាដោយសារគ្មានអាហារសម្រាប់បរិភោគ
2021.04.29
ប្រជាពលរដ្ឋប្រមាណជាង ១០០នាក់ រស់នៅសង្កាត់ស្ទឹងមានជ័យ ក្រុងភ្នំពេញ បាននាំគ្នាចេញមកតវ៉ាជាលើកដំបូង ក្រោយរដ្ឋាភិបាលបន្តរាំងខ្ទប់មិនឱ្យពលរដ្ឋចេញក្រៅផ្ទះ ដើម្បីទប់ស្កាត់ជំងឺកូវីដ-១៩ ចូលក្នុងសហគមន៍។ ពលរដ្ឋភាគច្រើនបានកាន់បដា ដែលសរសេរថា « ភូមិខ្ញុំដាច់បាយហើយ» បាននាំគ្នាឈរស្រែកទាមទារដើម្បីឱ្យអាជ្ញាធរក្រុងភ្នំពេញដោះស្រាយស្បៀងអាហារដល់ពួកគេ។ ប៉ុន្តែការតវ៉ានោះត្រូវបានកម្លាំងសមត្ថកិច្ចរារាំង មិនឱ្យធ្វើដំណើរចេញពីរបាំងដែកដែលសមត្ថកិច្ចហាមឃាត់នោះទេ។
ពលរដ្ឋរស់នៅក្នុងសង្កាត់ស្ទឹងមានជ័យលោកស្រី មឿន សាម៉ន ប្រាប់អាស៊ីសេរីកាលពីថ្ងៃទី២៩ ខែមេសាថា សព្វថ្ងៃនេះ លោកស្រីនៅសល់អង្ករតែ ៥កំប៉ុងតែប៉ុណ្ណោះ មិនអាចផ្គត់ផ្គង់ សមាជិកក្នុងក្រុមគ្រួសារចំនួន ៦នាក់ ឱ្យបន្តរស់នៅបានទៀតទេ បើអាជ្ញាធរនៅតែបន្តរាំងខ្ទប់មិនឱ្យចេញក្រៅទៀតនោះ។
លោកស្រីថា លោកស្រីបាត់បង់ការងារធ្វើជាកម្មកររោងចក្រក្រោយរដ្ឋាភិបាលបានដាក់បម្រាមមក។ លោកស្រីនិយាយទៀតថា ឥឡូវនេះជំងឺកូវីដ១៩ អ្នកស្រីលែងខ្លាចហើយៗ អ្វីដែលអ្នកស្រីខ្លាច គឺសមាជិកនៅក្នុងក្រុមគ្រួសារស្លាប់ដោយសារដាច់បាយ ហេតុដូច្នេះទើបអ្នកស្រីចេញមកតវ៉ាដើម្បីឱ្យអាជ្ញាធរផ្ដល់ស្បៀងអាហារសម្រាប់បរិភោគ៖ «ធម្មតាកូវីដខ្លាចដែរ ដល់ពេលយើងដាច់ខ្លាំងទៅលែងខ្លាចកូវីដ ងាប់អីក៏ងាប់ទៅ។ អាដាច់បាយហ្នឹងខ្លាំងជាកូវីដទៀតអូន បានផ្ទុះការតវ៉ាហ្នឹង។ ពីព្រោះអីនៅក្នុងភូមិហ្នឹងអត់ស្គាល់ប្រធានភូមិ អត់ស្គាល់ប្រធានក្រុមយ៉ាងម៉េច? អត់មានមកសួរសុខទុក្ខប្រជាជនយ៉ាងម៉េចនៅក្នុងតំបន់ក្រហមហ្នឹងដែរ»។
រដ្ឋាភិបាលបានចេញបម្រាមបិទខ្ទប់ទីក្រុងភ្នំពេញ និងទីក្រុងតាខ្មៅ ខេត្តកណ្ដាល រយៈពេលមួយសប្ដាហ៍ទៀតដើម្បីទប់ស្កាត់ជំងឺកូវីដ១៩ ចូលនៅក្នុងសហគមន៍។ ការបិទខ្ទប់នេះអាជ្ញាធរមិនឱ្យពលរដ្ឋចេញខាងក្រៅផ្ទះជាដាច់ខាតសូម្បីតែទៅផ្សារដើម្បីទិញម្ហូបយកមកទទួលទាន។ លើកលែងតែមានករណីចាំបាច់ ដូចជាអ្នកជំងឺត្រូវយកទៅមន្ទីរពេទ្យប៉ុណ្ណោះ។
កម្មការិនីម្នាក់នៅរោងចក្រចុងហាង ដែលបានជួលបន្ទប់ស្នាក់នៅក្នុងសង្កាត់ស្ទឹងមានជ័យ គឺលោកស្រី ឆេង ស៊ន បញ្ជាក់ថា លោកស្រីនៅសល់អង្ករតែ ៣កំប៉ុងប៉ុណ្ណោះ អង្ករនេះមិនអាចផ្គត់ផ្គង់សមាជិកក្រុមគ្រួសារចំនួន ៣នាក់ តទៅមុខទៀតបានទេ ហើយបើពេលនេះមិនចេញមកតវ៉ាប្រាកដជាដាច់បាយស្លាប់ជាមិនខាន។
លោកស្រីថា លោកស្រីគ្មានប្រាក់សម្រាប់ទិញអង្ករ និងម្ហូបអាហារដើម្បីស្ដុកទុកដូចអ្នកផ្សេងទេ ដោយសារតែលោកស្រីជាកម្មកររោងចក្រធ្វើការមួយខែ សឹងតែចំណាយសម្រាប់មួយខែមិនគ្រប់គ្រាន់ផង ហើយណាមួយជំពាក់ប្រាក់ធនាគារទៀតផង៖ «ចាំគេបើកអំណោយចាំៗ រហូត គេក៏ហៅទៅកត់ឈ្មោះដែរ កត់ឈ្មោះពីរដង។ ល្ងាចមិញប្រហែលម៉ោងបីពួកខ្ញុំទៅសួរគេៗ ថា ចែកបានតែមួយគ្រួសារសិនទេ។ អីចឹងពួកខ្ញុំជាប់ទៀតហ្នឹងធ្វើយ៉ាងម៉េច ពីព្រោះពួកខ្ញុំក៏អស់អង្ករ ហើយតូបគេលក់ អង្ករអីគេ បិទអស់ហើយ។ គេថាចាំសិនទៅ។ ពួកខ្ញុំមានពាក្យអី មានតែពាក្យស្នើសុំទៅសម្ដេចជួយ បើពួកខ្ញុំគ្រប់គ្នា អត់អង្ករហើយ»។
អាស៊ីសេរីបានព្យាយាមទាក់ទងអភិបាលក្រុងភ្នំពេញលោក ឃួង ស្រេង លោកបានទទួលទូរស័ព្ទហើយនៅពេលដែលឮថា ទូរស័ព្ទហៅពីវិទ្យុអាស៊ីសេរីលោក បានផ្ដាច់ការសន្ទនាតាមទូរស័ព្ទ។
ប្រជាពលរដ្ឋដែលមកតវ៉ានិយាយថា អាជ្ញាធរមូលដ្ឋានបានមកកត់ឈ្មោះ និងចំនួនប្រជាពលរដ្ឋ រួចរាល់ហើយ ដោយសន្យាថា នៅថ្ងៃទី៣០ ខែមេសានេះ អាជ្ញាធរសន្យាថា និងចែកស្បៀងអាហារជូនពលរដ្ឋ។
ការផ្ទុះឡើងការតវ៉ានេះក្រោយពីមេដឹកនាំគណបក្សប្រឆាំងលោក សម រង្ស៊ី បានអំពាវនាវឱ្យពលរដ្ឋចេញមកក្រៅផ្ទះ ដើម្បីប្រកបមុខរបរទទួលទានឡើងវិញ ក្នុងអំឡុងពេលដែលរដ្ឋាភិបាលបន្តរាំងខ្ទប់មិនឱ្យពលរដ្ឋចេញក្រៅផ្ទះដើម្បីទប់ស្កាត់ជំងឺកូវីដ១៩ ចូលក្នុងសហគមន៍។ ក្រោយការអំពាវនាវរបស់លោក សម រង្ស៊ី តុលាការក្រុងភ្នំពេញបានចេញដីកាតាមចាប់លោក សម រង្ស៊ី ពីបទញុះញង់ប៉ះពាល់ដល់សន្តិសុខជាតិ។
ស្របពេលនឹងប្រជាពលរដ្ឋនៅក្នុងទីក្រុងភ្នំពេញផ្ទុះការតវ៉ា ដោយសារគ្មានម្ហូបអាហារទទួលទាន ពលរដ្ឋខ្មែរនៅក្នុងសហរដ្ឋអាមេរិកបានរៃអង្គាសថវិកាមួយចំនួនដើម្បីទិញស្បៀងអាហារសម្រាប់ចែកជូនពលរដ្ឋដែលកំពុងប្រឈមមុខនឹងកង្វះស្បៀងអាហារ។
ឧបាសក ឆាយ អ៊ីវសៀង និងឧបាសិកា ហុង គឹមសែ រស់នៅរដ្ឋម៉ារីលែនដ៍ (Maryland) បញ្ជាក់ថា ដោយសារការផ្សព្វផ្សាយថា មានពលរដ្ឋមួយចំនួនកំពុងប្រឈមអត់បាយ ទើបលោកស្រីមានគំនិតរៃអង្គាសថវិកា ដើម្បីជួយដល់ពលរដ្ឋ នៅស្រុកខ្មែរដែលកំពុងលំបាក។ លោកស្រីថា លោកស្រីធ្លាប់អត់ឃ្លានពេលដែលមករស់នៅក្នុងជំរំជាជនភៀសខ្លួន ដូច្នេះលោកស្រីដឹងពីទំហំនៃភាពអត់ឃ្លាននេះថា តើមានការលំបាកប៉ុណ្ណា?។
លោកស្រីប្រមូលថវិកាសរុបចំនួនជាង ១ម៉ឺនដុល្លារ (១០.៥០០ដុល្លារ) សម្រាប់ចែកជូនពលរដ្ឋខ្មែរ ដែលកំពុងប្រឈមការដាច់ស្បៀង នៅសង្កាត់បឹងសាឡាង ក្រុងភ្នំពេញ។ នៅថ្ងៃទី៣០ ខែមេសា នេះពលរដ្ឋចំនួន ៣០០គ្រួសារ ម្នាក់ៗ នឹងទទួលបាន អង្ករ ២៥គីឡូក្រាម ទឹកត្រី ១យួរ ទឹកស៊ីអ៊ីវ១យួរ ត្រីខ ១យួរ និង លុយ ១០ដុល្លារ ក្នុងម្នាក់ៗ៖ «កាលណាយើងទុកយូរពេលគ្នាអត់បាយនៅទីនោះ។ ខ្ញុំអត់មានបន្ទោសរដ្ឋាភិបាលអីទេ ខ្ញុំធ្វើនេះដោយសុទ្ធចិត្តខ្ញុំ ដោយខ្ញុំស្តាប់អាស៊ីសេរីទៅខ្ញុំ ឮថា អត់បាយអីទៅ ខ្ញុំក៏មានគំនិតចង់ជួយតែប៉ុណ្ណឹងទេ។ អត់មានទាក់ទងនយោបាយអីទេ»។
គិតត្រឹមថ្ងៃទី២៩ ខែមេសានេះរដ្ឋាភិបាលមិនទាន់បង្ហាញរបាយការណ៍ជាក់លាក់ណាមួយថា មានពលរដ្ឋប៉ុន្មានគ្រួសារកំពុងប្រឈមមុខនឹង កង្វះស្បៀងអាហារនោះនៅឡើយ ក្រៅពីវិធានការចាប់ពលរដ្ឋដាក់ពន្ធនាគារ ចំពោះអ្នកដែលហ៊ានរិះគន់វិធានការរដ្ឋាភិបាលដើម្បីទប់ស្កាត់ជំងឺកូវីដ ១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។